並母

出自維基百科,自由嘅百科全書
跳去導覽 跳去搵嘢

並母粵拼bing6 mou5;中古漢語拼音:bengx)係中古漢語聲母,屬脣音嘅幫組,係全濁聲母。呢個聲母接韻母時,無開合口之分,同四個等都可以接。

其例字如下(中古漢語拼音採用古韻羅馬字):

一等 朋bong、倍baix、步boh、勃buot
二等 龐brung、鮑braux、瓣brenh、帛brak
三等 凡byam、婦biux、附byoh、服biuk、皮bie、辯bienx、斃bjed、愎bik
四等 瓶beng、陛bex、蹩bet

擬音[編輯]

因爲大多數嘅漢語、域外方音、對音中,並母大多發/b/,所以學界一致同意將佢擬音爲/b/。但對於係咪送氣就有得拗,有啲話係送氣音[bʱ],有啲話係唔送氣音[b],有話平送仄唔送,有話無所謂。不過,佢喺送氣唔送氣方面,冇對立嘅音位。

各學者擬音
聲母 古韻羅馬字 高本漢 李方桂 陸志韋 王力 周法高 李榮 邵榮芬 蒲立本 董同龢 鄭張尚芳 潘悟雲 《廣韻》字數
b b b(bʷ) b b b b b b 1118

註:過往學界曾用逆撇號「ʻ」代表送氣音,後來國際語音學學會已規範用「ʱ」作爲濁音送氣符號,上表亦依規範統一。

上古來源[編輯]

大部分學者都認爲滂母字來自上古漢語[b]輔音,呢個音喺上古音到中古音嘅演變好穩定。

分類[編輯]

守溫三十字母 三十六字母 陳澧 曾運乾 白涤洲 李榮 周法高
並、奉 並、旁 蒲、符 蒲、符

反切上字[編輯]

《廣韻》度,屬並母嘅反切上字有23個。

  • 重唇:蒲步裴薄白傍部平皮便毗弼婢
  • 輕唇:房防縛附符苻扶馮浮父

演變[編輯]

喺相當多漢語族語言中,脣音三等字嘅一部份(有學者認爲係合口字,有學者認爲係主要元音爲後元音,或者由於某啲介音)轉變爲脣齒音。音韻學上稱呢啲字爲輕脣音,而仍保持雙脣音發音嘅字爲重脣音。喺三十六字母中,《切韻》系統中幫母嘅重脣音仍稱幫母,而輕脣音稱奉母(fung6 mou5;中古漢語拼音:byungx)。

喺粵語嘅演變[編輯]

早期中古漢語(切韻音系)中,脣音只有幫組,到後期嘅三十六字母階段,脣音分出重脣同輕脣,粵語就係繼承自三十六字母階段嘅發音。

重脣音中,到現代粵語並母清化,平仄送氣狀況各片粵語唔同,喺廣府粵語,平聲讀送氣p [pʰ],仄聲讀唔送氣b [p]。對聲調嘅影響係:並母字派入聲調中嘅陽聲調。少數陽上聲嘅並母字送氣,如抱讀pou5。

輕脣音中,佢喺三十六字母屬奉母,到現代粵音清化,變做f [f],對聲調嘅影響係:奉母字派入聲調中嘅陽聲調。

切韻嘅並母變奉母有條演化式:b+i, y+a, o, u = v。i, y即係三等介音(唔分開合口),佢嘅韻腹一旦係a, o, u,佢嘅聲母就會轉爲v。

下面係一啲例字嘅古今音對比,第一欄例字,第二欄中古音(切韻),第三欄現代粵音:

byang bieng brak byat byox biengh biu buan boh bak
fong4 ping4 baak6 fat6 fu6 beng6 fau4 pun4 bou6 bok6

調返轉頭,現代粵語中嘅p聲母來源自中古音嘅滂、並二母,b聲母來源自中古音嘅幫、並二母,f聲母來源自中古音嘅幫、滂、並、溪、曉五母。

喺吳語嘅演變[編輯]

切韻嘅並母喺吳語中分兩種,重脣並母、輕脣奉母都繼續係古音狀態,並母對應嘅係吳拼係b [b],奉母對應嘅吳拼係v [v]

喺普通話嘅演變[編輯]

切韻嘅並母喺普通話嘅演變同粵語一樣,重脣並母清化,送氣方面,平聲送氣,讀普拼p [pʰ],仄聲唔送,讀普拼b [p],輕脣奉母清化爲f。

喺日文嘅演變[編輯]

喺日文,並母唔分輕重脣,喺吳音係ば行([b]),喺漢音係は行([h][ɸ])。

喺韓文嘅演變[編輯]

喺韓文,佢嘅聲母冇輕脣化,切韻嘅並母一律繼續係重脣音,但喺送氣方面,有啲係ㅂ([p]),有啲係ㅍ([pʰ]),冇乜規律。如排讀배(bae),皮讀피(pi)。

喺越南文嘅演變[編輯]

喺越南文,重脣並母繼續係古音形態b([ɓ]),輕脣奉母清化爲ph([f]),佢哋兩種喺聲調上都派入陽聲調。重紐四等字會轉t,如幣讀tệ。

睇埋[編輯]

中古早期漢語(切韻音)聲母
表中字母爲潘悟雲擬音嘅國際音標
全清 次清 全濁 次濁 全清 全濁
脣音 p b m
舌音 t d n
ʈ ʈʰ ɖ ɳ
l
齒音 ts tsʰ dz s z
tʂʰ ʂ ʐ
tɕʰ ȵ ɕ ʑ
牙音 k g ŋ
喉音 ʔ ɦ j h ɦ