預言

呢幅油畫描繪一個女人喺度睇水晶球。
（設計對白）「水晶球呀水晶球，可唔可以話畀我知下期六合彩會開咩冧把？」

預言（粵拼：jyu6 jin4 | 英文：prophecy），或者叫預知未來，係指對未來將會發生嘅事作出預報或者斷言。各種宗教或者迷信都有講到預知未來呢家嘢，例如各大宗教嘅經書成日會提到先知聲稱由某啲神祇嗰度收到信息，當中新約聖經入面嘅《啟示錄》就好出名。

奇幻

奇幻故仔成日會用到預言呢條橋段。例如「好耐好耐之前，有個先知作咗個預言，話有一日會有個俾天神揀中咗嘅人出現，打低大魔王同驅逐籠罩世界嘅黑暗」，然後故仔中途發現主角就係呢個被選中嘅人，最後主角打低魔王令預言應驗。到咗廿一世紀初，「被選中者」呢條橋一般俾西方文壇覺得係一種陳腔濫調，所以唔建議作家直接用呢條橋。