鳳凰會

鳳凰會全體成員合照
鳳凰會
作者	J·K·羅琳
系列	哈利波特 魔法世界
類型	抵抗組織
創立者	阿不思·鄧不利多
創立年份	1970年代
出現	- 佛地魔第一次崛起（1970年代） - 佛地魔第二次崛起（1995年）
宗旨	- 抵抗佛地魔 - 令魔法世界恢復和平
地點	- 古里某街12號（第5-6輯） - 洞穴屋（第7輯）
重要人物	阿不思·鄧不利多 瘋眼穆敵 金利·俠鉤帽
盟友	鄧不利多的軍隊
對手	佛地魔 食死人 前魔法部

鳳凰會（英文： Order of the Phoenix），係J·K·羅琳嘅奇幻小說同電影《哈利波特》系列入面由阿不思·鄧不利多喺哈利·波特父母果個時代創立嘅一個秘密組織，目的係對抗第一次崛起嘅佛地魔同埋佢嘅同黨食死人。

鳳凰會第一次出現喺果個系列嘅第五輯小說—《哈利波特-鳳凰會的密令》入面。鄧不利多喺佛地魔重生之後無幾耐就即刻重組呢個組織。呢個組織嘅總部曾經喺唔同嘅地方，最後喺天狼星·布萊克嘅家族大宅。霍格華茲大戰後，鳳凰會嘅大部分成員都犧牲咗，淨係得返一小部分倖存到落嚟。

概要

哈利·波特出世前

1970年代前後，當時佛地魔由外國返去英國，仲開始集結一班叫做食死人嘅黑魔法巫師嚟控制魔法部同迫害麻瓜出身嘅巫師，仲向魔法世界宣戰。作為一個正直而強大的魔法世界公民，兼霍格華茲嘅校長嘅阿不思·鄧不利多，佢就喺佛地魔第一次崛起果陣時試吓透過創立鳳凰會嚟控制呢個局勢，對抗日益壯大仲構成威脅嘅佛地魔。當時作為魔法部正氣師嘅鄧不利多學生（小說裡面嘅一啲角色）都加入咗鳳凰會，嚟試圖阻止佛地魔接管魔法世界仲建立一個強橫嘅新世界秩序。鳳凰會仲曾經幫過魔法部反抗佛地魔同佢嘅追隨者，佢哋仲參與對反黑魔王政府嘅秘密武裝襲擊。鄧不利多喺果時仲發明咗一種令護法講嘢嘅方法，等鳳凰會成員之間可以用咁樣嚟傳遞消息。

作為佛地魔嘅黨羽嘅食死人最初主要攻擊麻瓜同麻瓜出身嘅巫師，但係佢哋同時好快又將矛頭指向果啲「純種叛徒」，例如係鳳凰會嘅成員。以安東寧·杜魯哈為首嘅六個食死人謀殺咗鳳凰會成員嘅費邊同吉迪翁·普瑞兩兄弟、班吉·方維克俾佢哋好殘忍咁殺咗、馬琳·麥金農同佢屋企人俾包括崔佛在內嘅食死人捉走仲殺咗、開多·迪爾博恩嘅失蹤（預計佢被殺），仲有艾加·波恩一家人被捉走。雖然鳳凰會蒙受咗巨大嘅損失，但佢哋仍然繼續戰鬥，其中鳳凰會嘅四個成員—詹姆同莉莉·波特兩公婆，同埋法蘭克同愛麗斯·隆巴頓兩公婆，佢哋分別三次喺佛地魔本人手上走甩。不過波特夫婦最終俾佛地魔殺死咗（但殺唔到波特夫婦個仔—哈利·波特），而隆巴頓夫婦就俾食死人貝拉·雷斯壯折磨到精神錯亂。鳳凰會喺第一次巫師世界大戰入面起到咗至關重要嘅作用，佢哋喺1981年贏咗果場戰爭，但付出嘅係慘痛嘅代價，大量嘅鳳凰會成員都犧牲咗佢哋寶貴嘅生命。因為鳳凰會受到重創，而喺第一次巫師世界大戰之後去到《神秘的魔法石》事件之前，由於佛地魔嘅力量嚴重咁削弱咗，結果鳳凰會認為無進一步嘅威脅而暫時解散咗。

哈利·波特時代

喺哈利·波特參與1995年嘅三巫鬥法大賽之後，佢話俾鄧不利多知道佛地魔已經重生，鄧不利多於是就重新啟動咗鳳凰會。好多最初成立果陣嘅成員都返番崗位，亦有新成員嘅加入，而呢啲新成員有效咁取代咗喺第一次巫師世界大戰入面陣亡嘅成員。喺果個系列嘅第四輯同第五輯小說之間嘅空隙度，鳳凰會喺古里某街12號嘅天狼星·布萊克家族大宅嚟建立佢哋嘅總部。鄧不利多作為鳳凰會嘅保密人，呢個意味住淨係得佢先至可以將鳳凰會總部嘅位置透露俾其他人。不過，鄧不利多喺第六輯小說裡面過身令到果個位置變得脆弱同容易受攻擊，果個位置因為咁而放棄唔用，取而代之嘅係衛斯理一家嘅洞穴屋。

魔法部喺第五輯小說的入面唔肯承認黑魔王已經翻生嘅事實，搞到鳳凰會成為咗同佛地魔戰鬥嘅領導者角色，但淨係可以獨立咁保護哈利·波特，同埋一眾鳳凰會成員輪流守護住擺喺魔法部神秘部門嘅果個哈利同佛地魔本人有關嘅預言，果個預言入面提到咗佛地魔嘅倒台，同埋哈利喺打敗佢嘅過程入面所扮演嘅角色。鳳凰會嘅創始成員兼霍格華茲嘅獵場管理員魯霸·海格試吓招募巨人加入鳳凰會嘅陣營。鳳凰會嘅一啲成員喺第五輯小說尾聲果陣參與咗1996年嘅神秘部門之戰，魔法部直至神秘部門之戰後，先至焗住去承認佛地魔已經翻生嘅事實。

喺《哈利波特：混血王子的背叛》入面，鳳凰會成員喺鄧不利多過身果晚喺霍格華茲巡邏，仲諗辦法同入去霍格華茲城堡嘅食死人作戰。喺果一年裡面，鳳凰會先後無咗兩個領袖（鄧不利多同瘋眼穆敵），而魔法部又逐漸俾佛地魔操控。

喺整個小說系列嘅高潮部分之前，鳳凰會成員將作為食死人主要目標嘅哈利·波特喺德思禮一家嘅避暑之家護送佢轉去洞穴屋嘅衛斯理家。喺小說系列後期嘅第二次巫師世界大戰最慘烈嘅階段，當佛地魔成功接管咗魔法部之後，鳳凰會轉咗做地下嘅抗爭組織，佢哋試吓保護麻瓜，仲有啲鳳凰會成員主持咗一個秘密嘅地下電台節目《波特瞭望站》，裡面提供咗佛地魔政權唔希望俾魔法世界嘅巫師公眾知道嘅魔法世界新聞同事實真相。

鳳凰會喺1998年鄧不利多的軍隊嘅號召下，佢哋同霍格華茲教職員仲有高年級嘅學生（包括史萊哲林學院成員）嘅協助之下，佢哋喺霍格華茲大戰入面同食死人展開咗決戰，當中有幾個鳳凰會成員同埋其他盟友犧牲咗。

成員

第一次建立嘅成員

序號	中文名	英文名	性别	出生年 （逝世年）	簡介	倖存
1	阿不思·鄧不利多	Albus Dumbledore	男	1881年	鳳凰會嘅始創人兼第一任領袖。霍格華茲魔法與巫術學院嘅校長，佢被認為係佢果個時代最偉大嘅巫師，亦都係佛地魔唯一會驚嘅巫師。接骨木魔杖嘅擁有人。	係
2	阿波佛·鄧不利多	Aberforth Dumbledore	男	1884年	阿不思·鄧不利多嘅細佬，延續到重組鳳凰會。	係
3	瘋眼穆敵	Alastor Moody	男	1925年	延續到重組鳳凰會。	係
4	阿拉貝拉·費	Arabella Figg	女	不詳	延續到重組鳳凰會。	係
5	班吉·方維克	Benjy Fenwick	男	不詳	佢喺佛地魔第一次敗亡之前俾食死人炸成碎片，只能搵返一啲零碎嘅部分殘骸。	唔係
6	卡拉多克·迪爾伯恩	Caradoc Dearborn	男	不詳	第一次巫師戰爭入面失咗蹤；推測俾食死人嘅殘黨秘密咁殺咗。佢嘅屍體而家仲未搵得返。	唔係
7	迪達勒斯·迪歌	Dedalus Diggle	男	不詳	延續到重組鳳凰會。	係
8	朵卡·麥道	Dorcas Meadowes	女	不詳	喺第一次巫師世界大戰果陣，除咗波特一家之外，唯一已知俾佛地魔親手殺咗嘅鳳凰會成員。	唔係
9	艾加·波恩	Edgar Bones	男	不詳	佢同老婆仔女喺第一次巫師世界大戰果陣俾食死人謀殺。艾加·波恩係魔法部嘅魔法執法部首長艾蜜莉·波恩嘅細佬。 佢嘅侄女—蘇珊·波恩，係哈利喺霍格華茲同屆嘅赫夫帕夫學院同學，亦都係鄧不利多的軍隊成員。	唔係
10	艾飛·道奇	Elphias Doge	男	1881年	延續到重組鳳凰會。	係
11	伊美玲·旺司	Emmeline Vance	女	不詳	延續到重組鳳凰會。	係
12	費邊·普瑞 吉昂·普瑞	Fabian & Gideon Prewett	兄弟	不詳	茉莉·衛斯理嘅阿哥同細佬，而費邊係吉昂嘅細佬。佢哋兩個喺第一次巫師世界大戰之前俾五個食死人（包括安東寧·杜魯夫）夾埋殺死咗。 哈利喺17歲生日果陣，茉莉將費邊隻手錶送咗俾佢。	唔係
13	愛麗絲·隆巴頓 法蘭克·隆巴頓	Alice & Frank Longbottom	夫婦	1960年	奈威·隆巴頓嘅阿爸阿媽，佢哋兩個都係出名嘅正氣師（Auror），仲喺1981年「三度反抗」佛地魔，由於食死人貝拉·雷斯壯喺度搵有關佛地魔下落嘅信息果陣，佢率領住一班食死人用酷刑咒將佢哋兩個折磨到精神錯亂到瘋癲嘅地步。愛麗絲同法蘭克自此就留喺聖蒙果醫院嘅封閉式病房留醫到而家，搞到奈威要由佢嫲嫲—法蘭克嘅阿媽—奧古斯塔·隆巴頓將佢湊大。	係
14	詹姆·波特 莉莉·波特	James & Lily Potter	夫婦	1960年 （1981年1月）	哈利·波特嘅阿爸阿媽，佢哋兩個喺霍格華茲相識。佢哋為咗保護哈利而俾佛地魔殺咗，佛地魔仲試吓殺咗得15個月大嘅哈利但俾莉莉阻住咗，令到佛地魔唔成功之餘仲搞到佢差啲死咗。	唔係
15	馬琳·麥金農	Marlene McKinnon	女	不詳	根據伊果·卡卡夫嘅講法，麥金農同佢屋企人一齊俾食死人（包括崔佛）殺咗。	唔係
16	蒙當葛·弗列契	Mundungus Fletcher	男	不詳	延續到重組鳳凰會。	係
17	彼得·佩迪魯	Peter Pettigrew	男	1960年	佢花名係蟲尾，曾經係詹姆·波特同莉莉·波特嘅好朋友。佢背叛咗波特夫婦俾佛地魔，搞到佢哋兩個死咗。佩迪魯之後叛離咗鳳凰會，投奔去食死人嘅行列。 佢喺流放果陣效忠佛地魔力仲幫佢重生，佛地魔因為咁而用一隻魔法之手嚟獎勵佢。喺哈利話作為蟲尾嘅佢欠咗自己嘅救命之恩後，佩迪魯就俾佢隻魔法之手殺死。鄧不利多話果個魔法係「最深層同難以穿透嘅魔法」。	係
18	雷木思·路平	Remus Lupin	男	1960年	延續到重組鳳凰會。	係
19	賽佛勒斯·石內卜	Severus Snape	男	1960年	延續到重組鳳凰會。	係
20	天狼星·布萊克	Sirius Black	男	1960年	延續到重組鳳凰會。	係
21	史特吉·包莫	Sturgis Podmore	男	不詳	延續到重組鳳凰會。	係

第二次建立嘅成員

當佛地魔喺《哈利波特：火盃的考驗》結尾捲土重來之後，有新嘅成員加入咗復興之後嘅鳳凰會。

序號	中文名	英文名	性别	出生年 （逝世年）	簡介	倖存
1	阿不思·鄧不利多	Albus Dumbledore	男	1881年 （1997年6月）	鳳凰會嘅始創人兼第一任領袖，佢仲喺佛地魔捲土重來之後重新啟動鳳凰會。霍格華茲魔法與巫術學院幾十年以嚟嘅校長，佢被認為係佢果個時代最偉大嘅巫師，亦都係佛地魔唯一會驚嘅巫師。接骨木魔杖嘅擁有人。第六輯小說入面，佢喺於天文塔俾賽佛勒斯·石內卜殺咗，但實情係佢自己要求石內卜咁樣做嘅。	唔係
2	阿波佛·鄧不利多	Aberforth Dumbledore	男	1884年	阿不思·鄧不利多嘅細佬，豬頭酒吧嘅店主兼調酒師。鳳凰會初創成員。基於佢嘅職位，佢可以攞到有關鳳凰會嘅有用信息。佢喺第七輯小說收到哈利·波特雙面鏡嘅求救，就派家庭小精靈多比去馬份莊園幫佢同營救，仲幫哈利、榮恩同妙麗避開啲食死人，將佢哋三個帶去佢嘅酒吧，仲喺《死神的聖物》裡面入去霍格華茲。喺霍格華茲大戰果陣，佢仲幫手保衛學校。佢參與霍格華茲大戰，打低咗食死人奧古斯都·羅克五。	係
3	阿拉特·穆敵	Alastor Moody	男	1925年 （1997年暑假）	前正氣師（Auror），佢原名係阿拉特·穆敵，第一次巫師世界大戰期間嘅鳳凰會初創成員。佢俾阿不思·鄧不利多喺退休之中帶出嚟，但因為小巴堤·柯羅奇計劃喺三巫鬥法大賽期間取代佢教授黑魔法防禦術教授嘅職位，於是襲擊、囚禁同冒充佢。後來佢重新加入咗復興嘅鳳凰會，喺阿不思·鄧不利多過身之後成為咗第二任領袖。佢喺「七個波特」嘅行動入面陪住扮成哈利·波特嘅蒙當葛·弗列契去到安全屋果陣，佢俾蒙當葛出賣咗，間接促成佢俾佛地魔殺死。佢隻魔法義眼後來俾食死人攞走咗，但最後俾哈利攞返。	唔係
4	阿拉貝拉·費	Arabella Figg	女	不詳	鳳凰會初創成員，係個用唔到魔法嘅「爆竹」巫婆，佢同德思禮一家一齊住喺小惠因區，仲住喺佢哋對面。實情係鄧不利多招募佢用鄰居嘅身份喺屋企睇住細個果陣嘅哈利。佢喺第五輯哈利要接受審訊果陣幫佢辯護做證。佢亦都係復興後嘅鳳凰會成員。	係
5	迪達勒斯·迪歌	Dedalus Diggle	男	不詳	鳳凰會初創成員，佢喺佛地魔第一次倒台果陣，喺肯特郡放煙花。喺知道佢係鳳凰會成員之前，佢同哈利曾經過見面幾次，包括哈利入學之前曾經喺街頭商店裡面向哈利鞠躬，又喺破釜酒吧果度歡迎哈利。 迪歌都係先遣部隊嘅成員，作為哈利嘅保鏢，幫哈利逃離德思禮家；然後佢幫德思禮一家逃離仲帶佢哋去保護區嚟唔好俾食死人攻擊。食死人後來喺突襲之中將佢間屋燒咗，不過迪歌就咩事都無。	係
6	艾飛·道奇	Elphias Doge	男	1881年	鄧不利多嘅老同學，花名係「狗喘」。佢喺第五輯裡成為咗哈利嘅先遣守衛嘅成員；佢喺《預言家日報》寫咗關於鄧不利多嘅訃告同埋追悼文各一篇，仲喺果個系列嘅最後一輯裡面推出嘅書籍公開為鄧不利多嘅正直辯護。	係
7	伊美玲·旺司	Emmeline Vance	女	不詳 （1996年7月）	鳳凰會初創成員。佢喺第五輯入面幫助哈利逃離德思禮家嘅先遣守衛成員。正如《哈利波特：混血王子的背叛》入面所形容嘅咁樣，食死人喺1996年嘅夏天根據石內卜聲稱提供嘅信息殺咗佢。不過，由於石內卜喺《哈利波特：死神的聖物》入面被透露一直幫鄧不利多做嘢，呢個令人懷疑佢係咪真係提供咗可能用嚟殺死佢嘅信息。	唔係
8	蒙當葛·弗列契	Mundungus Fletcher	男	不詳	小偷同騙子，忠於阿不思·鄧不利多。由於鄧不利多曾經幫佢「擺脫困境」，佢因為咁就將喺魔法世界嘅犯罪分子果度打聽到嘅事通知鄧不利多嚟做回報。喺《死神的聖物》裡面，佢喺唔情願之下被派去進行「七個波特」行動，當佛地魔追趕佢果陣，搞到佢驚慌失措到用咗消影術去到一個未知嘅地方，仲瀨低咗瘋眼穆敵俾佛地魔殺死。佢喺《死神的聖物》入面話俾哈利佢哋三人知關於史萊哲林小金匣嘅下落。	係
9	賽佛勒斯·石內卜	Severus Snape	男	1960年 （1998年6月）	鳳凰會初創成員，原本係食死人，哈利阿爸阿媽嘅同學。細個果陣開始暗戀莉莉·波特，喺學校成日俾詹姆·波特。喺知道佛地魔打算消滅波特家—殺咗莉莉·波特嚟得到細個嘅哈利之後，石內卜決定向鳳凰會投誠後，成為咗鄧不利多對抗食死人嘅秘密特工，後來佢去霍格華茲做魔藥學教授，仲暗中保護莉莉·波特嘅獨仔哈利·波特。佢因為咁就喺第二次巫師世界大戰入面做咗雙面特工，成為鳳凰會臥底之餘亦係佛地魔嘅臥底。 第七輯因為佛地魔認錯佢係接骨木魔杖嘅擁有人，俾佛地魔同佢條蛇妖娜吉妮殺死咗。佢臨死前將自己嘅經歷同最後分靈體嘅真相講俾哈利知。佢嘅護法同莉莉同樣係一隻雌鹿—證明咗莉莉係佢唯一嘅最愛。	唔係
10	天狼星·布萊克	Sirius Black	男	1960年 （1996年6月）	詹姆·波特嘅老友，哈利·波特嘅契爺。佢俾彼得·佩迪魯誣蔑將詹姆同莉莉·波特嘅下落出賣俾佛地魔，仲謀殺咗12個睇到佢哋喺街上對抗嘅麻瓜，佢因為咁就喺未經審判嘅情況就將佢送去阿茲卡班，直到佢喺12年之後走甩。喺呢段時間，佢將佩迪魯背叛嘅真相暴露俾佢契仔哈利知道。佢繼續嘅復興之後嘅鳳凰會入面服務，仲喺戰鬥入面幫佢哋打低咗兩個食死人。佢喺魔法部嘅神秘部門之戰入面，佢喺預言大廳裡面嘅一場戰鬥度俾食死人兼係佢表姐嘅貝拉·雷斯壯殺咗。	唔係
11	史特吉·包莫	Sturgis Podmore	男	不詳	鳳凰會初創成員。包莫係魔法部嘅一個員工，職責係守護住啲預言，直到佢因為試圖闖入神秘部門而俾魔法部保安拉咗，佢因為咁而被判處去阿茲卡班坐監6個月。哈利、榮恩和妙麗估係魯休斯·馬份向佢施展咗蠻橫咒。包莫喺《鳳凰會的密令》入面做哈利嘅保鏢，仲曾經向穆迪借走咗一件隱形斗篷，但無再去還返。佢參與咗霍格華茲大戰。	係
12	魯霸·海格	Rubeus Hagrid	男	1928年	鳳凰會初創成員，半巨人，霍格華茲嘅奇獸飼育學教授，兼任獵場看守人同鎖匙管理員，哈利·波特、榮恩·衛斯理同妙麗·格蘭傑嘅好友，參與霍格華茲大戰。	係
13	米奈娃·麥	Minerva McGonagall	女	1935年	鳳凰會初創成員、霍格華茲嘅副校長、葛萊分多學院嘅負責人，仲有哈利·波特佢哋嘅變形學教授。 喺第七集入面參與霍格華茲大戰。喺霍格華茲大戰之後做咗霍格華茲校長到而家。	係
14	亞瑟·衛斯理	Arthur Weasley	男	未知	衛斯理一家嘅阿爸，佢係魔法部裡面嘅麻瓜人工製品濫用局主管，對哈利照顧有加。鳳凰會透過佢嚟聯絡喺《鳳凰會的密令》入面相信鄧不利多同哈利講法嘅人。《鳳凰會的密令》入面中，佢喺看守神秘部門嘅大門果陣時俾娜吉妮咬傷。佢喺《死神的聖物》入面幫哈利喺德思禮家搬去洞穴居。喺霍格華茲大戰入面，佢同佢嘅三仔派西·衛斯理一齊對抗派厄思·希克尼。	係
15	茉莉·衛斯理	Molly Weasley	女	未知	衛斯理一家嘅阿媽。佢係個女巫，當哈利係自己個仔咁照顧有加。喺第七集入面參與霍格華茲大戰。	唔係
16	小仙女·東施 雷木思·路平	Nymphadora Tonks & Remus Lupin	夫婦	路平：1960年 東施：未知 兩人：（1998年）	路平係鳳凰會初創成員同埋復興後嘅成員，佢係一個狼人。因為佢係哈利會即刻認出仲即刻信任嘅人，所以鳳凰會派佢去做保護哈利·波特嘅先遣部隊成員。路平後來潛入地下狼人社區，嚟知道佢哋喺第二次巫師世界大戰入面嘅取態。 東施喺鳳凰會初創果時因為年紀太細而加入唔到，而佢喺後來鳳凰會復興果陣加入。佢哋兩個後來結咗婚仲有個仔叫泰迪·路平。佢哋兩個喺第七輯嘅霍格華茲大戰入面分別俾食死人貝拉·雷斯壯同安東寧·杜魯哈殺咗而雙雙陣亡。	唔係
17	黑絲霞·鍾斯	Hestia Jones	女	未知	第五集裡面作為哈利逃離德思禮家嘅先遣守衛嘅成員，後來佢同迪達勒斯·迪歌喺《死神的聖物》開頭護送德思禮一家逃離唔好受到食死人嘅攻擊。黑絲霞驚訝咁發現德思禮一家並唔知道哈利喺反佛地魔運動嘅重要性，後來仲佢哋對呢個男仔嘅待遇提出質問。	係
18	金利·俠鉤帽	Kingsley Shacklebolt	男	未知	原本係追捕天狼星·布萊克嘅正氣師，喺第五輯裡面做咗哈利嘅保鏢，瘋眼穆敵過咗身之後做咗鳳凰會嘅首領。 比爾同花兒嘅婚禮入面及時派出佢嘅鼬鼠護法仲警告賓客等佢哋知道食死人嚟咗；第六集俾魔法部派去用秘書嘅身份嚟保護麻瓜首相；第七集入面陪住德思禮一家逃離，仲參與咗霍格華茲大戰。霍格華茲大戰之後被任命做魔法部嘅臨時部長，之後就正式做咗魔法部部長。	係
19	比爾·衛斯理	William "Bill" Weasley	男	1970年	衛斯理家嘅大仔，1997年6月喺鄧不利多事件果陣俾食死人焚銳·灰背咬傷，差啲做咗狼人，好彩只係後來變得鍾意食生肉。佢同花兒·戴樂古拍拖同結婚，佢哋兩個婚後一齊住喺貝殼居，參與霍格華茲大戰。	係
20	花兒·戴樂古	Fleur Delacour	女	1977年	喺《火盃的考驗》果陣，佢代表法國嘅波巴洞魔法學校同哈利·波特一齊參加三巫鬥法大賽。佢畢業之後加入咗鳳凰會，後來同比爾·衛斯理結婚仲一齊住喺貝殼居。喺《死神的聖物》入面，佢幫哈利喺德思禮家搬去到洞穴屋，之後喺家庭小精靈多比死咗之後，佢哋喺貝殼居照顧哈利同佢啲朋友。佢參與咗霍格華茲大戰，後來兩公婆生咗三個仔女。	係
21	查理·衛斯理	Charlie Weasley	男	1972年	衛斯理家嘅二仔，畢業之後喺羅馬尼亞研究龍。1995年夏天被派去招募外國鳳凰會成員。喺霍格華茲大戰入面，佢同赫瑞司·史拉轟一齊率領增援部隊。	係
22	弗雷·衛斯理	Fred Weasley	男	1978年 （1998年）	衛斯理家嘅三仔，喬治嘅孖生兄弟。衛氏巫師法寶店嘅店主之一。佢喺第五集果陣未離校加入唔到鳳凰會，後來喺第六集加入，第七集果陣喺霍格華茲大戰入面英勇陣亡。	唔係
23	喬治·衛斯理	George Weasley	男	1978年	衛斯理家嘅四仔，弗雷嘅孖生兄弟。衛氏巫師法寶店嘅店主之一。佢喺第五集果陣未離校加入唔到鳳凰會，後來喺第六集加入，參與霍格華茲大戰。	係
24	哈利·波特	Harry Potter	男	1980年	成個系列嘅主角，榮恩·衛斯理同妙麗·格蘭傑嘅老友。佢喺《鳳凰會的密令》加入鳳凰會，後嚟仲同金妮·衛斯理拍拖同結婚。	係
25	榮恩·衛斯理	Ronald "Ron" Weasley	男	1980年	衛斯理家嘅細仔，哈利·波特同妙麗·格蘭傑嘅老友。佢喺《鳳凰會的密令》同哈利一齊加入鳳凰會，後嚟同妙麗拍拖同結婚。參與霍格華茲大戰。	係
26	妙麗·格蘭傑	Hermione Granger	女	1979年	成個系列嘅主角之一，哈利·波特同榮恩·衛斯理嘅老友。佢喺《鳳凰會的密令》同哈利一齊加入鳳凰會，後嚟同榮恩·衛斯理拍拖同結婚。參與霍格華茲大戰。	係
27	奈威·隆巴頓	Neville Longbottom	男	1980年	鳳凰會初創成員—法蘭克·隆巴頓同愛麗絲·隆巴頓嘅獨生仔。哈利·波特佢哋嘅同學兼好友。喺第七集入面參與霍格華茲大戰。	係

成員

下面嘅都係鳳凰會嘅出名成員。阿不思·鄧不利多、賽佛勒斯·石內卜、米奈娃·麥、魯霸·海格、天狼星·布萊克、雷木思·路平，仲有弗雷同喬治·衛斯理都各自有佢哋嘅頁面，而彼得·佩迪魯就喺食死人嘅頁面都有講到佢。

阿波佛·鄧不利多

阿波佛·鄧不利多Aberforth Dumbledore係阿不思·鄧不利多嘅細佬，佢哋兩個相差三歲，佢亦係兩個魔法技能弱啲果個。就係因為咁，佢喺佢阿哥沉浸喺相對成功嘅榮耀入面，佢通常留喺幕後。佢喺《火盃的考驗》小說入面第一次亮相，喺佢嘅父母過身同埋阿不思返嚟屋企照顧唔不穩定嘅細妹阿蕊安娜之後，阿波佛同佢阿哥仲有佢阿哥嘅朋友蓋瑞·葛林戴華德就住佢哋建立新秩序嘅計劃嘈喺上嚟，忽略咗阿蕊安娜。葛林戴華德開始折磨佢，搞到佢哋三個展開決鬥，結果令阿蕊亞娜意外死喺其中一人手上。喺阿蕊安娜嘅葬禮上，阿波佛公開咁質問阿不思仲毆打佢，打穿咗佢個鼻。後來，阿波佛做咗豬頭旅館嘅老闆兼酒保，佢以同山羊有好強嘅親和力而出名。佢嘅護法咒係用山羊嘅形式嚟出現，佢仲向哈利佢哋三個講述咗佢細個果時同佢阿妹阿蕊安娜一齊餵山羊嘅經歷。阿波佛仲因為對山羊施展唔恰當嘅咒語而要接受加碼巫審（巫師高等法院）嘅審判。根據哈利喺《鳳凰會的密令》入面嘅描述，阿波佛嘅酒館裡面都有一浸淡淡哋嘅山羊氣味。喺改編電影入面，可以見到一隻咩咩叫嘅山羊喺酒吧後面走來走去。

阿波佛直至《死神的聖物》先至擔任重要嘅角色，佢喺食死人捉到哈利、榮恩同妙麗之前將佢哋帶入去佢間酒吧度。阿波佛後來同佢哋三個透露咗一啲佢哋都唔知道嘅關於鄧不利多家族歷史嘅事實。哈利被關押喺馬份莊園果陣，佢喺天狼星俾佢嘅雙面鏡嘅碎片入面立吓眼見到阿波佛隻眼，仲呼喚阿波佛嘅協助。阿波佛喺蒙當葛·弗列契果度買咗果塊雙面鏡嘅對應物，仲喺雙面鏡度睇住佢哋三個，同埋派遣家庭小精靈多比去馬份莊園營救佢哋同其他被囚禁嘅人。佢好鍾意多比呢個家庭小精靈，當佢聽到說貝拉·雷斯壯殺死咗多比，佢覺得好難過。

阿波佛俾霍格華茲嘅抵抗戰士通過阿蕊安娜肖像嘅通道，果條係由豬頭旅館通去霍格華茲萬應室嘅安全通道，果個係霍格華茲裡面唯一無人看守嘅入口。根據奈威·隆巴頓所講，呢條通道係用嚟喺霍格華茲疏散未成年學生嘅通道，當鄧不利多的軍隊嘅成員住喺萬應室果陣時，佢哋都係用呢條通道嚟攞到食物，因為呢個係萬應室做唔到嘅一樣嘢。阿波佛後嚟離開咗鳳凰會，因為佢相信同佛地魔嘅戰爭經已失敗咗。不過，佢後喺好快就加入返霍格華茲大戰，佢最後一次出現喺向奧古斯都·羅克五施展昏迷咒。根據羅琳嘅講法，阿波佛喺戰鬥入面倖存咗落嚟，仲仍然「喺豬頭旅館，同佢嘅山羊玩緊」。

阿拉特·穆敵

阿拉特·穆敵Alastor Moody，人稱「瘋眼穆敵"Mad-Eye" Moody」，佢或者係魔法世界入面現代最出名嘅正氣師Auror，佢曾經單槍匹馬咁拉咗好多巫師罪犯。據講穆敵獲准殺死俾佢追捕嘅巫師，但係佢從未咁樣做過，除非佢無得揀。穆敵同黑巫師戰鬥果陣無咗幾個身體部位—包括了左眼、左下腳同鼻嘅一部分，令到佢塊面傷痕累累；穆敵呢個人都相當謹慎—有啲人可能會話佢偏執—因為佢會拒絕飲或食任何唔係由佢自己準備嘅嘢。穆敵擁有一隻可以360°旋轉仲可以睇穿幾乎所有嘢（包括牆壁、門、隱形斗篷同埋佢自己後尾枕）嘅魔法義眼，嚟取代佢無咗嘅左眼。由於穆敵要用義肢同步行杖，令佢行路果陣時睇起嚟明顯趷吓趷吓咁行路。穆敵喺霍格華茲嘅課堂上面成日經常大叫要時刻保持警惕，嚟鼓勵年輕巫師要提防住黑魔法，仲喺佢辦公室裡面擺咗一啲裝置嚟提醒佢要注意潛在敵人嘅存在。穆敵喺正氣師辦公室退休之前，佢係小仙女·東施嘅師父，雖然東施已經成為咗正氣師，但穆敵直至死之仍然將東施睇成係自己嘅學徒。

喺《哈利波特：火盃的考驗》入面，穆敵喺退休之後為咗幫鄧不利多而被任命做霍格華茲嘅新任黑魔法防禦術教授。不過喺學期開始前無幾耐，穆敵俾小巴堤·柯羅奇襲擊，後者用蠻橫咒嚟制伏咗佢，仲飲變身水嚟假扮佢。小巴堤·柯羅奇等真正嘅穆敵在生，作為變身水成份嘅來源同埋穆迪喺霍格華茲位置嘅個人信息。眾所周知，穆敵習慣將自己嘅飲料放喺佢嘅私人酒壺裡面，咁就令小巴堤·柯羅奇可以根據自己嘅需要而飲變身水嚟維持佢嘅偽裝又唔會引起懷疑。

當哈利意外咁喺佛地魔嘅家族墓地之戰裡面有命返嚟之後，穆敵（小柯羅奇）將哈利帶去佢辦公室，問佢有關佛地魔同墓地入面發生嘅事，仲透露自己正喺度幫佛地魔做嘢。正當佢準備殺哈利果陣，鄧不利多、麥教授同石內卜出現仲阻止咗佢。由於小柯羅奇忽略咗自己每個鐘飲變身水嘅需要，搞到佢變返自己原來嘅樣，仲喺吐真劑Veritaserum嘅影響下坦白晒所有嘢。最後鄧不利多喺佢嘅魔法行李箱入面救出咗真正嘅穆敵。

喺《哈利波特：鳳凰會的密令》入面，真正嘅穆敵加入咗復興之後嘅鳳凰會，仲帶領隊伍將哈利喺小惠因區嘅姨媽同姨丈屋企護送去到古里某街12號嘅布萊克家族大宅。穆敵出現喺小說嘅高潮入面，佢喺得到石內卜嘅告密之後參與咗神秘部門嘅戰鬥。最後佢仲同路平同埋東施一齊出現向德思禮一家對待哈利嘅方式作出警告。穆敵喺《哈利波特：混血王子的背叛》入面只係短暫咁出現。穆敵喺《哈利波特：死神的聖物》入面俾扮成波特誘餌嘅蒙當葛·弗列契掉低仲俾佛地魔殺咗。鳳凰會無辦法恢復穆敵嘅身體，但後來佢嘅魔法義眼俾哈利發現安裝喺桃樂絲·恩不里居辦公室嘅門口上面，用嚟監視魔法部嘅員工。後嚟哈利討厭恩不里居用呢種方式嚟用果隻魔法義眼，於是就將佢搶返嚟，仲將佢埋喺一棵老樹下面，用嚟紀念瘋眼穆敵。

阿拉貝拉·費

阿拉貝拉·多琳·費Arabella Doreen Figg，佢更多人知嘅名係費太太Mrs. Figg，佢係一個爆竹，用麻瓜嘅身份嚟過住臥底咁樣嘅生活。當哈利同德思禮一家留喺屋企果陣時，佢依照鄧不利多嘅命令偷偷哋喺暗中睇住哈利。費太太嘅角色係個契訶夫之槍，佢喺《哈利波特：神秘的魔法石》入面第一次被提及做睇起嚟微不足道嘅麻瓜鄰居，直到《哈利波特：鳳凰會的密令》入面先至公開佢係魔法社區嘅一員。費太太對貓有終生嘅熱愛，仲對雜交嘅貓同佢哋嘅魔法變種—獅尾貓Kneazle當中進行咗「冇得彈嘅生意」。

喺《哈利波特：鳳凰會的密令》入面，費太太係鄧不利多喺魔法世界同麻瓜世界之間嘅聯絡人之一。佢喺《鳳凰會的密令》入面，佢喺哈利同佢嘅表哥達力·德思禮俾兩隻催狂魔襲擊之後，佢向哈利提供幫忙，仲向佢展示咗自己嘅身份。佢向哈利解釋話，佢特登令哈利同佢一齊唔開心，咁樣德思禮一家就會繼續將佢送去自己身邊，就算佢寧願唔咁樣做。當魔法部試過令哈利因為未成年用魔法嘅法規（佢施展咗護法咒嚟保護自己同佢表哥）而俾霍格華茲踢出校果時，費太太喺加瑪巫審嘅證供對於俾哈利留喺霍格華茲係好關鍵。不過，根據羅琳嘅講法，爆竹係無辦法睇得見催狂魔。

費太太喺《哈利波特：混血王子的背叛》入面中出席咗鄧不利多喺霍格華茲舉行嘅葬禮。

蒙當葛·弗列契

蒙當葛·弗列契Mundungus Fletcher，花名係頓格Dung，佢喺《哈利波特》系列嘅早期作品入面順便提過，不過佢直至小說《哈利波特：鳳凰會的密令》嘅第二章先至第一次出現。蒙當葛被形容做一個「無剃鬚又肥又矮嘅巫師，佢有一頭長而亂嘅薑黃色頭髮，帶住一對佈滿血絲仲鬆到跌落嚟嘅眼睛，佢其腳短而彎，咁樣令佢睇起嚟好似巴吉度獵犬咁憂鬱」。佢參與咗好多非法活動，不過佢似乎只限於涉及相對輕微嘅犯罪，例如喺黑市上贓物嘅盜竊同交易。鳳凰會許多成員對佢都有好複雜嘅情感，但由於鄧不利多曾經幫佢擺脫咗嚴重嘅麻煩，佢因為咁就好忠誠咁對鄧不利多。佢嘅人脈關係令佢能夠聽到好多巫師世界嘅陰暗面入面流傳嘅謠言同信息，呢啲可能喺對抗佛地魔方面有幫助。

蒙當葛喺《哈利波特：火盃的考驗》入面被簡略咁提到，喺魁地奇世界盃上嘅食死人襲擊事件之後，蒙當葛向魔法部提出咗保險索賠，要求提供一個有12個睡房連按摩浴缸嘅帳篷，而實際上佢一直喺用棍撐起嘅斗篷下面瞓覺。作為鳳凰會嘅始創同復興成員，蒙當葛被分配去保護哈利先遣隊嘅職責，但佢放棄咗自己嘅崗位嚟做一場黑市交易，佢為催狂魔留低一個關鍵嘅機會，俾佢哋諗辦法透過呢個機會攻擊哈利。喺《哈利波特：混血王子的背叛》入面，哈利佢哋三個喺三根掃把出面發現蒙當葛試過將天狼星·布萊克嘅財產（屬於哈利）賣俾阿波佛，於是啲男仔同佢對質。蒙當葛跟住匿埋咗，後尾因為喺一次拙劣嘅搶劫入面冒充陰屍Inferius而坐監。

蒙當葛喺《哈利波特：死神的聖物》入面成功越獄，但具體嘅情況就唔清楚。佢俾被石內卜用混淆咒迷惑咗，仲同鳳凰會提出用變身水同埋六個波特做誘餌嘅諗法，仲幫手護送哈利離開小惠因區。佢用自己做波特其中一個替身嘅身分嚟同瘋眼穆迪一齊騎住掃把喺小惠因區飛行嘅途中，佢見到佛地魔本人現身果陣就嚇到逃走。怪角後來透露，蒙當葛所偷走的財產包括咗佢喺上一輯小說入面喺布萊克家族大宅嘅客廳度偷咗一個重氹dom氹dom嘅小金匣。果個小金匣其實就係佛地魔用嚟做分靈體嘅史萊哲林嘅小金匣。後尾哈利派出怪角將蒙當葛活捉返嚟，蒙當葛透露恩不里居喺威脅要拉佢嘅情況下將史萊哲林小金匣喺佢手上搶走咗。

亞瑟·衛斯理

亞瑟·衛斯理Arthur Weasley係衛斯理一家嘅長輩，哈利同妙麗一般會稱呼佢做衛斯理先生。由於衛斯理一家對麻瓜世界嘅事物有興趣，所以搞到食死人睇成「血腥叛徒blood traitors」。亞瑟同佢老婆茉莉·衛斯理結婚仲生咗七個細路，當中包括同哈利做咗好朋友嘅榮恩·衛斯理。

亞瑟喺霍格華茲讀書果陣係屬於葛萊分多學院，當時嘅佢被形容為又高又瘦，髮線向後移仲戴住角框眼鏡嘅男學生。佢為人和藹可親而且心胸寬廣，佢喺屋企裡面往往唔係權威人物，佢老婆先至係；亞瑟喺魔法部做嘢，最初喺魔法濫用局度做嘢。佢所在嘅部門無乜資金贊助，而佢份人工淨係可以養活一個大家庭，令到佢屋企嘅經濟唔係幾安穩。佢自己沉迷喺了解麻瓜嘅習俗同發明，仲擁有大量主要係麻瓜用過物品嘅收藏。

衛斯理先生第一次出現喺《哈利波特：消失的密室》嘅小說同電影入面，哈利喺霍格華茲二年級學期開始之前果個夏天同衛斯理一家留喺洞穴屋果度過，哈利同榮恩喺開學果日揸住佢架飛天汽車返去霍格華茲而闖禍；後來佢哋一家帶啲細路一齊去斜角巷買佢哋嘅開學用品果陣，魯休斯·馬份喺度詆毀亞瑟，仲將湯姆·瑞斗嘅日記偷偷地擺入去金妮·衛斯理嘅大釜裡面，咁樣佢就可以打開密室，仲為襲擊麻瓜出身者負上責任。不過，魯休思嘅詭計得逞唔到，果本日記仲被銷毀埋。喺《哈利波特：阿茲卡班的逃犯》嘅開頭，亞瑟喺抽獎入面贏到巨額現金獎勵，仲利用佢嚟帶全家去埃及度假。佢哋返嚟之後，亞瑟認為哈利應該要知道關於天狼星·布萊克嘅真相（當時佢唔知真正嘅真相）。

亞瑟喺《哈利波特：火盃的考驗》入面似乎並唔完全相信哈利俾德思禮一家虐待嘅事，直到佢親眼睇到佢哋對哈利同埋魔法世界嘅看法，仲有就係衛斯理一家帶哈利去參加魁地奇世界盃之前，佢睇到德思禮一家幾咁急切咁樣同哈利告別，呢樣嘢令佢O晒嘴。喺《哈利波特：鳳凰會的密令》開頭，衛斯理先生作為鳳凰會嘅成員去陪住哈利去魔法部接受聆訊。亞瑟喺魔法部一次輪班守護住西碧·崔老妮嘅預言入面，佢俾佛地魔隻寵物蛇妖娜吉妮攻擊。同佛地魔有住思想聯繫嘅哈利喺幻象入面睇到呢一點，仲可以及時警告霍格華茲。亞瑟跟住及時救返，仲被送去聖蒙果醫院，佢喺果度醫返好。羅琳透露佢喺《鳳凰會的密令》嘅原稿入面計劃過將亞瑟殺死。不過佢改變咗主意，佢話自己唔可以將亞瑟殺死，因為佢係果個系列入面為數唔多嘅其中一個好老豆。但係，佢因為「想殺死父母」，佢就用路平同東施條命嚟換取亞瑟條命。在《哈利波特：混血王子的背叛》入面，亞瑟已經被升咗做「偽造防禦咒語暨防護品偵查沒收處」嘅辦公室主任。

亞瑟之後出現喺《哈利波特：死神的聖物》入面，佢陪住自己個仔—弗雷作為將哈利喺小惠因區轉移去洞穴屋嘅「七個波特」行動入面嘅先遣隊成員。後來亞瑟繼續喺魔法部返工，但係佢嘅一舉一動都被追蹤住。當佢發現榮恩同哈利一齊遠行而唔係病咗喺屋企瞓果陣時，衛斯理一家無得唔匿埋。當亞瑟喺霍格華茲大戰再出現果陣，佢無咗自己個仔—弗雷，然後佢同自己嘅另一個仔派西·衛斯理一齊打低咗派厄思·希克尼。

茉莉·衛斯理

茉莉·衛斯理Molly Weasley，佢外家嘅姓氏係普瑞Prewett，係衛斯理一家嘅長輩，哈利同妙麗一般會稱呼佢做衛斯理太太。佢係衛斯理一家七個細路嘅阿媽，當中包括做咗哈利老友嘅榮恩·衛斯理。茉莉喺純血嘅巫師家族普瑞出世，佢係鳳凰會嘅初創成員費邊同吉昂·普瑞嘅家姐。茉莉嘅角色第一次出現喺《哈利波特：神秘的魔法石》裡面，當時佢好親切咁話俾哈利知點樣穿過9¾月台嘅屏障。佢喺《哈利波特：消失的密室》入面發現弗雷同喬治加埋榮恩揸走咗佢哋阿爸阿媽架飛天汽車嚟去將俾姨媽同姨丈困住喺房裡面嘅哈利救咗出嚟之後，佢對啲仔嘅行為覺得好嬲。喺學年開始果陣，茉莉寄咗一封咆哮信俾榮恩，好嬲咁衝住佢尖叫，因為榮恩又再同哈利揸走佢屋企嘅飛天汽車，而呢次係去霍格華茲。衛斯理一家喺《哈利波特：阿茲卡班的逃犯》入面贏到《預言家日報》嘅抽獎，佢哋利用呢筆獎金去埃及探吓喺果度做嘢嘅大仔比爾·衛斯理。佢哋返到英國之後，仲同哈利同埋妙麗一齊住喺破釜酒吧入面。有一晚，哈利無意中聽到衛斯理夫婦爭論要將有關天狼星·布萊克同哈利之間所謂聯繫嘅真相講俾哈利知，亞瑟認為哈利應該要知道真相，不過茉莉認為真相會嚇驚哈利，佢仲向亞瑟保證哈利喺鄧不利多嘅保護下喺霍格華茲會相當咁安全，仲叫派西·衛斯理喺學校果陣睇住哈利。

喺《哈利波特：火盃的考驗》入面，當哈利去到洞穴屋果陣時，茉莉發現弗雷同喬治正喺度試驗佢哋整嘅危險糖果，仲喺出發去魁地奇世界盃之前叫佢哋要行喇；不過，當黑魔標記出現喺魁地奇世界盃營地嘅上空之後，茉莉對弗雷同喬治嘅大喊大叫覺得不安，佢擔心住自己咁得人驚咁對佢哋之後，佢哋可能會發生啲咩事。喺果輯小說嘅高潮部分，茉莉同比爾去到霍格華茲作為哈利嘅親友賓客，去睇三巫鬥法大賽嘅第三項任務。佛地魔捲土重來之後，鄧不利多邀請茉莉同比爾加入鳳凰會，仲喺嚟緊嘅第二次巫師大戰入面戰鬥。茉莉安慰住哈利，呢樣係佢有生以來第一次有人好似阿媽咁陪喺佢身邊。

茉莉同衛斯理一家喺《哈利波特：鳳凰會的密令》住喺古里某街12號嘅鳳凰會總部，佢同天狼星喺果度為咗講幾多鳳凰會行動嘅嘢俾哈利知而嘈到唔停。幾日後，茉莉被發現喺客廳裡面帶住一個幻化成佢屋企人同埋哈利嘅幻形怪，仲坦白講出佢嘅噩夢就係佢有更多嘅屋企人死喺佛地魔同食死人手上。

茉莉同佢個大仔比爾嘅未婚妻—花兒·戴樂古喺《哈利波特：混血王子的背叛》開頭果陣發生咗衝突；不過，喺小說嘅最後，當茉莉同佢老公仲有花兒一齊趕去霍格華茲照顧俾食死人焚銳·灰背猛烈咁攻擊佢嘅大仔比爾果時，當茉莉因為比爾嘅疤痕而草草有結論話佢嚟緊會同比爾分手果陣，花兒好嬲仲一啲都唔含糊咁俾佢知道比爾嘅傷疤提醒咗佢曾表現出嚟嘅勇氣，茉莉同花兒出乎意料咁擁抱仲開始用更積極嘅眼光嚟去睇大家。

茉莉同亞瑟喺《哈利波特：死神的聖物》開頭果陣時用古里某街12號嘅鳳凰會總部唔再安全嚟做理由，佢哋將洞穴居嚟做鳳凰會總部。佢對哈利佢哋三個喺霍格華茲休學嘅決定感到好唔舒服，仲喺最初試過勸阻佢哋唔好咁樣做。隨住小說嘅推進，呢家人被迫去到牡丹姑婆嘅屋企避難。喺小說嘅最後，茉莉同衛斯理一家參與咗霍格華茲大戰嘅戰鬥。佢因為佢個仔弗雷嘅死而悲痛欲絕，當貝拉·雷斯壯用殺戮咒差啲擊中金妮果陣時，佢嘅情緒被推到去邊緣。嬲到爆炸嘅佢同貝拉·雷斯壯展開咗激烈嘅決鬥，佢嘅詛咒擊中雷斯壯嘅心口將佢殺咗。羅琳曾經話，佢俾茉莉殺死貝拉·雷斯壯嘅原因係為咗展示茉莉作為女巫嘅強大力量，仲喺茉莉嘅「母愛」同貝拉嘅「執著嘅愛」之間提供咗對比。

小仙女·東施

小仙女·東施Nymphadora Tonks係個正氣師，亦都係個變形師。佢係泰德·東施Ted Tonks同美黛·布萊克嘅獨生女，而小仙女Nymphadora呢個名嘅意思係「寧芙嘅禮物」，佢自己一直都睇唔起自己個名，仲更鍾意人哋單獨嗌佢個姓氏。就算結咗婚之後，佢仲係寧願俾同齡嘅人嗌佢做「東施」。佢阿媽係貝拉·雷斯壯同水仙·馬份嘅細妹同家姐，因為咁佢就係佢哋兩個嘅姨甥女，亦都係跩哥·馬份嘅表姐，不過佢從來都唔當佢係屋企人，淨係暗示佢係「馬份家嘅男仔」。

東施被形容為「有一塊蒼白嘅心形面同埋一對雙漆黑閃爍嘅眼睛」，通常被形容為有住可以隨佢心意而轉變嘅唔同髮色。眾所周知，東施被認為係出咗名咁論盡而且唔擅長用家務咒語。東施喺霍格華茲果陣被派去赫夫帕夫學院。東施喺哈利入讀霍格華茲嘅前一年喺學校畢業，之後佢就開始咗三年嘅正氣師訓練；東施喺穆敵嘅指導下，佢喺《鳳凰會的密令》第一次出場嘅前一年已經攞到正氣師嘅資格。

東施同金利·俠鈎帽喺魔法部裡面做咗鳳凰會嘅間諜。佢首先幫手護送哈利喺德思禮家去到鳳凰會總部，後來又護送哈利去搭霍格華茲特快列車。東施後來喺神秘部門同食死人戰鬥，期間俾佢姨媽貝拉·雷斯壯打傷，令到佢後來無得唔去聖蒙果醫院。

東施喺《哈利波特：混血王子的背叛》入面駐紮喺活米村，仲被指派守衛霍格華茲。哈利發現佢一直好沮喪仲鮮有笑容，另外佢仲睇到佢嘅頭髮呈灰啡色，而唔係平常咁明亮嘅泡泡糖粉紅色。鄧不利多死咗之後，東施同雷木斯·路平墜入愛河，佢嘅護法亦都因為咁而變成咗狼嘅形態。路平起初唔想回報佢嘅愛意，仲覺得自己對佢嚟講「太老、太窮同太危險」。佢正因為咁陷入咗抑鬱症，搞到佢嘅魔法能力被擾亂，包括佢隨意改變外表嘅能力。

不過喺《死神的聖物》早段果陣，東施宣布喺早前已經同路平結婚。後來喺「七個波特」嘅行動入面，東施陪同12個鳳凰會成員將哈利喺德思禮家帶去洞穴屋，沿途佢同飲咗變身水嘅榮恩一齊飛，嚟到令食死人認唔到真正哈利嘅蹤跡。喺呢場空中戰鬥入面，東施再次同貝拉·雷斯壯戰鬥，仲將貝拉嘅老公—魯道夫·雷斯壯打擊傷咗。路平喺小說嘅後來透露東施有咗，路平離開咗佢一段好短嘅時間，因為佢相信透過佢哋嘅婚姻令到東施成為被拋棄嘅人，如果無咗佢嘅話，佢哋未出生嘅細路會過得更加好，但喺路平同哈利發生激烈爭論之後，路平改變咗主意仲返到去東施身邊。喺第七輯小說嘅四月，東施生咗個仔泰迪·雷木斯·路平Teddy Remus Lupin，佢用自己阿爸同老公嘅名嚟幫自己個仔改名。喺小說嘅結尾，路平兩公婆參與咗霍格華茲大戰，但東施唔好彩俾貝拉·雷斯壯殺死，而路平就俾安東寧·杜魯哈殺咗，所以令到泰迪做咗孤兒，要由佢嘅婆婆美黛·東施湊大。喺《死神的聖物》上映之後無幾耐嘅一次訪談入面，羅琳承認自己原本諗住俾東施同路平喺果個系列嘅結局入面倖存落嚟，但佢認為自己喺《鳳凰會的密令》入面放過咗亞瑟·衛斯理之後，佢覺得唔殺咗佢哋（角色）唔得。

金利·俠鉤帽

金利·俠鉤帽Kingsley Shacklebolt係一個資深正氣師，佢喺魔法部入面做鳳凰會嘅告密者。佢喺《鳳凰會的密令》入面第一次出場，當時佢自願做護送哈利喺小惠因區嘅德思禮家去到布萊克家族大宅嘅其中一個先遣隊成員。金利負責喺魔法部搵天狼星嘅蹤影；不過，佢知道天狼星係無辜嘅，佢亦都向魔法部提供天狼星正身處喺西藏嘅虛假信息。俠鉤帽出現喺第五輯小說嘅場景入面，喺毛莉·邊坑將鄧不利多的軍隊背叛俾桃樂絲·恩不里居之後，佢喺哈利同鄧不利多就鄧不利多的軍隊事件面對住魔法部官員果陣時出現。金利好快咁修改咗毛莉嘅記憶，但為咗避免受到魔法部嘅懷疑，鄧不利多喺逃走果陣都被迫對佢施咒。

金利參與咗神秘部門嘅戰鬥，仲似乎好擅長於決鬥，因為有人見到佢同一時間同兩個食死人戰鬥。不過，喺天狼星被殺之後，佢繼續同貝拉·雷斯壯決鬥，金利喺果個期間俾一個搞到「巨響」嘅咒語擊中，令佢瞓喺地上面「痛苦咁大叫」。喺《混血王子的背叛》入面，新任魔法部部長盧夫·昆爵任命佢假扮成麻瓜首相辦公室秘書嘅身份嚟擔任首相嘅護衛。

喺《死神的聖物》入面透露，因為金利擅長於同麻瓜融為一體，而且佢有住沉著冷靜嘅舉止，佢似乎係德思禮一家所鍾意為數唔多嘅其中一個巫師。喺果輯小說入面，金利同其他鳳凰會成員第一次一齊將哈利喺德思禮家帶到去洞穴屋嘅安全屋。喺小說嘅後來，當佛地魔推翻魔法部果陣，佢及時諗辦法利用佢嘅護法咒—猞猁喺比爾同花兒嘅婚禮上面發出警告，等婚禮上嘅賓客有機會走得甩。佢繼續守衛住麻瓜首相，但最後被迫走人。後來有人聽到佢喺海盜電台節目《波特觀察Potterwatch》入面用化名「皇家Royal」呢個名嚟宣揚麻瓜同巫師嘅平等權利。喺霍格華茲大戰入面，俠鉤帽第一次俾人睇到佢組織果啲留低戰鬥嘅人。後嚟睇到佢同一個唔知係邊個嘅食死人決鬥，最後佢仲同麥教授加埋史拉轟教授一齊同佛地魔本人決鬥，但喺貝拉·雷斯壯死咗之後，佛地魔嘅怒火爆發；金利同另外兩個人被打低咗（無被殺到）。隨住佛地魔死咗同埋佢嘅傀儡統治者派厄思·希克尼被廢黜之後，金利·俠鉤帽被任命做魔法部嘅臨時部長。羅琳後來喺一次訪問入面透露，金利確實做咗新任嘅魔法部部長，仲對魔法部本身進行咗徹底嘅改革。

比爾·衛斯理

比爾·衛斯理Bill Weasley，佢原名係威廉·亞瑟·衛斯理William Arthur Weasley，佢係亞瑟·衛斯理同茉莉·衛斯理嘅大仔，佢喺1970年11月29號出世。

比爾被形容為「勤力」同「腳踏實地」，但有住「些少冒險」和「些少魅力」嘅愛好。比爾喺霍格華茲讀書果陣做咗級長同男生會主席，佢仲喺普等巫測O.W.L.s裡面攞到12科認可等級嘅成績。後來，比爾被派去埃及嘅古靈閣銀行做嘢，擔任解咒師嘅工作。

比爾喺《哈利波特：火盃的考驗》入面第一次全面亮相，佢被形容做一個靚仔嘅後生仔，有一頭紮成馬尾辮嘅紅色長頭髮，仲戴住一隻單齒耳環。喺三巫鬥法大賽果陣，當比爾同佢阿媽去到霍格華茲果時，花兒「好有興趣咁」望住佢。比爾後來返到英國做嘢，仲喺《哈利波特：鳳凰會的密令》入面同鳳凰會合作。佢喺倫敦嘅古靈閣銀行總部同喺果度做嘢嘅花兒撞返，幫佢上堂嚟提高佢嘅英語水平。佢哋兩個拍咗拖一年之後就訂婚，比爾跟住就帶佢嘅未婚妻返去屋企俾佢屋企人認識，不過佢哋並唔認同花兒。

喺《哈利波特：混血王子的背叛》接近尾聲果時，比爾同食死人喺霍格華茲嘅天文塔之戰入面對戰，佢喺果度俾狼人焚銳·灰背襲擊搞到佢毀咗容。由於焚銳·灰背喺襲擊佢果陣係人類嘅形態，所以比爾只係受到部分狼毒lycanthropy感染—喺佢塊面臉上留低咗永久性嘅疤痕，同埋對食生牛肉有咗後天嘅鍾意。花兒認為比爾嘅傷疤係佢勇敢嘅驕傲象徵，仲堅信佢哋嘅婚禮可以如期舉行，呢個令到比爾嘅屋企人對佢哋呢對戀人嘅力量印象深刻。

比爾同花兒喺《哈利波特：死神的聖物》入面參與將哈利安全護送離開德思禮家嘅行動，佢哋兩個親眼睇住瘋眼穆敵俾佛地魔殺咗，佢哋返到去洞穴屋果陣宣布呢件事。呢對戀人後來喺洞穴屋舉行佢哋嘅婚禮，佢哋後來喺貝殼居建立自己嘅屋企，仲為哈利佢哋三個同其他人提供咗一個安全嘅避風港。比爾同花兒喺霍格華茲大戰裡面都係戰鬥成員，佢哋都喺戰鬥入面倖存咗落嚟。比爾同花兒後來有咗三個仔女，分別係：維朵爾Victoire、多明妮Dominique，同埋路易斯Louis。

花兒·戴樂古

花兒·戴樂古Fleur Delacour係法國波巴洞魔法與巫術學院嘅學生，佢被選做三巫鬥法大賽入面代表波巴洞嘅冠軍代表。喺三巫鬥法大賽嘅魔杖檢查入面發現，花兒支魔杖嘅核心係由薇拉嘅頭髮製成，果個係源自佢作為薇拉嘅阿婆頭上面嘅一條頭髮。花兒喺佢身上繼承咗銀白色嘅頭髮、蒼白嘅眼睛、標緻嘅外表，同埋迷惑男性嘅能力。

喺三巫鬥法大賽果陣，就算花兒得到咗啲男仔嘅欽佩（尤其係榮恩），但佢喺一開始表現到好冷漠同唔友好。喺三巫鬥法大賽嘅第二項任務入面，花兒試過喺湖入面去救佢個妹—佳兒·戴樂古Gabrielle Delacour但因為受到滾帶落嘅阻撓而失敗咗。當哈利·波特將佳兒救出嚟果陣，就算佢阿妹並唔係真正咁遇到危險，但係花兒都覺得好感激，而佢對哈利仲有霍格華茲嘅一切都變得更加親切。由於花兒喺最後一個任務中被打暈咗，令到佢喺三巫鬥法大賽入面成為咗第四名。

跟住一年，花兒同喺三巫鬥法大賽果陣識到嘅比爾·衛斯理一齊喺古靈閣銀行做嘢，佢哋兩個後來訂咗婚。佢哋兩個婚後就一齊住喺貝殼居嘅分支家庭入面。喺《哈利波特：混血王子的背叛》接近尾聲嘅天文塔之戰入面，比爾俾狼人焚銳·灰背嘅襲擊而受到重傷。不過，由於灰背喺襲擊果陣仲處於人類嘅形態，比爾因為咁只係受到狼人嘅部分感染。由於比爾嘅狀況，茉莉·衛斯理就假設咗花兒唔再想嫁俾比爾，令到茉莉好大程度上每樣嘢都唔贊成花兒嘅決定，不過花兒企硬話佢哋嘅婚禮計劃唔會改變，仲好自豪咁話比爾嘅疤痕係佢勇敢嘅象徵。花兒對自己未婚夫嘅強烈而充滿愛意嘅忠誠為佢贏得以前唔贊成佢哋嘅大部分家庭成員嘅尊重（尤其係茉莉），茉莉最後都承認佢哋嘅愛係真誠嘅。

花兒同比爾喺《哈利波特：死神的聖物》入面參與安全護送哈利去到洞穴居嘅行動，而佢哋兩個都親眼睇住瘋眼穆迪俾佛地魔殺咗。佢哋兩個之後喺洞穴居舉行婚禮和婚宴酒會，但宴會俾魔法部倒台之後俾食死人發動嘅襲擊而中斷咗。榮恩喺同哈利仲有妙麗去搵分靈體嘅過程中離隊，花兒和比爾俾榮恩留喺佢哋身邊。呢對新婚夫婦後來喺佢哋貝殼居嘅新屋企度照顧喺馬份莊園救出嚟哈利佢哋三個同埋其他俾食死人捉咗嘅人，為佢嘅提供咗一個安全嘅避風港。喺霍格華茲大戰期間，比爾同花兒都係鳳凰會嘅戰鬥成員，佢哋仲諗辦法倖存落嚟。後尾英國同法國嘅魔法部都頒發咗英勇勳章俾花兒，用嚟表彰佢喺霍格華茲大戰裡面嘅貢獻。

呢對夫婦喺大戰之後有三名仔女：維朵爾Victoire、多明妮Dominique，同埋路易斯Louis。

查理·衛斯理

查理·衛斯理Charlie Weasley，係亞瑟·衛斯理同茉莉·衛斯理嘅二仔，佢喺1972年12月12號出世。佢個樣寬大而和藹可親，有些少飽經風霜同生滿雀斑。佢嘅手臂肌肉發達，其中一隻手臂有長長哋閃亮嘅燒傷傷疤。佢被形容為擁有同佢兄弟弗雷同喬治相似嘅體型，但同比爾、派西同榮恩相比就矮啲同大隻啲。佢喺霍格華茲果陣係一個級長同魁地奇球隊隊長，亦都係葛萊分多魁地奇球隊嘅傳奇搜捕手。佢作為搜捕手嘅技術好出色，以至到有人話：「如果佢無去追龍嘅話，佢本來就可以為英格蘭隊效力」。畢業之後，查理選擇去羅馬尼亞做同龍有關嘅工作，擔任龍嘅守護者。

根據榮恩喺《哈利波特：神秘的魔法石》入面講到，查理嘅身上仲有俾火龍灼傷而留低咗嘅駭人傷疤。哈利、榮恩和妙麗喺《哈利波特：消失的密室》入面為咗點樣安置魯霸·海格所飼養嘅一隻非法孵化嘅挪威脊背龍蘿蔔Norbert而𢱑爆頭果陣，榮恩喺佢哋三個嘅對話入面曾提及查理曾經做過馴龍者嘅經歷，促使哈利佢哋三個特登寫信委託查理幫手收留蘿蔔。查理喺《哈利波特：火盃的考驗》入面係龍守護者團隊嘅成員，果個團隊將四條唔同品種嘅龍帶去霍格華茲嘅三巫鬥法大賽，作為第一項任務嘅挑戰。

喺佛地魔第二次崛起果陣，查理喺鳳凰會裡面嘅任務係試吓喺國外爭取支持。查理喺《哈利波特：死神的聖物》裡面返到喺洞穴屋嘅屋企，以伴郎嘅身份參與佢阿哥比爾嘅婚禮。佢喺進入霍格華茲大戰嘅後期同史拉轟教授並肩作戰，仲率領守衛軍增援。查理喺霍格華茲大戰嘅戰鬥入面倖存咗落嚟，佢無受到重傷。根據羅琳嘅講法，由於查理「比起女人更鍾意龍」，所以佢既無結婚又無細路。

同盟

• 魔法部 （魔法部部長盧夫·昆爵試吓爭取合作）
• 鄧不利多的軍隊
• 霍格華茲嘅大部分師生同部分家長
• 活米村嘅居民 （佢哋喺霍格華茲大戰果陣亦加入戰鬥）
• 巨人呱啦 （魯霸·海格嘅細佬）
• 鷹馬巴嘴同埋一大群騎士墜鬼馬（佢哋曾幫手攻擊佛地魔手下嘅巨人）
• 霍格華茲嘅家庭小精靈（幫手攻擊食死人）
• 人馬（射傷食死人）

敵人

• 佛地魔
• 食死人
• 催狂魔
• 巨人（由新頭目帶領嘅巨人勢力）
• 禁忌森林嘅一群蜘蛛精
• 死拿錢（一群用捉純血叛徒、麻瓜後代同逃亡學生嚟賺錢嘅壞人）
• 魔法部（魔法部部長康尼留斯·夫子拒絕承認佛地魔重生期間，去到佢嘅接班人盧夫·昆爵死咗之後，再去到佛地魔被打敗）