反修例運動期間對無綫電視嘅批評

喺香港修例風波期間，無綫電視（特別係無綫新聞）對運動採取負面態度，喺新聞同其他節目內容上都偏幫政府，結果引起唔少市民不滿，喺一啲抗議現場，經常發生示威者包圍TVB記者同採訪車嘅情況。有傳媒比較報導篇幅，亦發現無綫畀反送中運動示威者解釋立場嘅機會比起其他媒體為少，甚至喺剪接上嘗試塑造反送中示威人士「先撩者賤自作自受」嘅訊息。雖然指控有足夠理據支持，加上無綫新聞本身亦同唔少親中陣營有密切友好關係，但無綫新聞就聲稱自己堅持中肯客觀嘅報導。

關於無綫新聞有欠中立報導嘅指控

就唔同有限集會報導篇幅嘅比較

BBC中文部就6月9號同6月16號兩場反送中大遊行比較，發現喺報道入面，不論計算受訪遊行人士數目定係遊行報道篇幅時間，都比起有線新聞同Now新聞為少。另外，就6月30號激進左派何君堯帶領嘅「撐警」集會、7月1號示威者衝擊及佔領立法會，無綫花嘅篇幅就比起另外兩個電視台多。

BBC採訪咗一啲無綫新聞嘅員工，佢哋私下透露，有同事被迫喺報導加入支持政府或警察嘅聲音，或者加強報導前線示威者激動行為。

七二一元朗襲擊

喺七二一元朗襲擊入面，有人比較過ViuTV、香港開電視、香港電台同埋無綫新聞嘅報導手法，指前三間媒體都係用順敘式嘅方式報道事件，得無綫新聞係用倒敘方式呈現事件，加上若干剪接技巧，嘗試傳遞黑衣人（反送中示威人士）「先撩者賤自作自受」嘅訊息。

市民表達對無綫立場偏頗嘅不滿

有啲人號召圍堵TVB嘅商場活動，甚至有人針對阻撓無綫新聞嘅採訪車同記者。

外間批評

學者葉蔭聰批評，無綫特意安排林鄭月娥嘅專訪，係為政府宣傳，主播處理即時新聞嘅時候，又即時以政府嘅定性（先係「騷亂」，後係「暴動」）做主題，幾乎完全冇示威者嘅聲音。

無綫嘅回應

行政總裁李寶安曾經喺2019年7月嘅時候，發表內部聲明，聲稱有人用盡手段打壓同抹黑無綫新聞，又話無綫新聞堅守中立。不過，有新聞部員工私下就話，李寶安咁做無辦法緩解群眾嘅怒火，只係火上加油推記者去死。