獵鹿博弈

呢幅史前嘅圖畫，描繪人類打獵捕鹿嘅情景。

獵鹿博弈（粵音：lip6 luk2 bok3 jik6），又叫保證博弈，係博弈論上嘅經典博弈。呢種博弈講到，兩個獵人可以選擇合作獵大隻嘅鹿－高收益但需要合作，或者各自獵兔－低收益但穩陣。假如兩個人齊齊去獵鹿，雙方都會得到高回報，但如果佢哋是但一個轉向去獵兔，單獨走去獵鹿嗰個人就咩都得唔到。

獵鹿博弈其中一個特徵，就係佢有兩個拿殊均衡點：雙方都選擇合作同雙方都選擇獵兔；兩者都係穩定嘅形勢，而且喺呢兩種情況下，雙方都冇誘因單方面改變策略。

獵鹿博弈嘅模型喺經濟學、政治學同埋動物學上都有用。例如好多動物物種都會成群打獵，而獵鹿博弈嘅概念可以解釋點解佢哋有誘因做呢樣嘢。此外，獵鹿博弈噉嘅形勢，亦都會喺人類社會中出現，被指係合約等社會現象嘅成因。

基本個款

（英文） 獵鹿博弈個報償矩陣圖像化嘅樣；當中
Cooperate 意即合作，而
Defect 意即唔合作或背叛。

睇埋：博弈論

想像依家有兩位獵人，佢哋需要做選擇，揀合作捉鹿（高收益但需要合作）定係捉兔仔（低收益但一個人上都搞得掂）。喺最基本嗰款獵鹿博弈當中，兩位獵人冇得溝通，規則唔准佢哋事先夾定去獵鹿定去獵兔，只可以各自做決定：

• 假如佢哋咁啱一齊決定去獵鹿（Stag，S），佢哋就齊齊得到大回報。
• 假如佢哋一個去獵鹿另一個去獵兔（Hare，H），獵鹿嗰個乜嘢都冇，獵兔嗰個得到中回報。
• 假如佢哋咁啱一齊決定去獵兔，佢哋得到小回報（平分咗件中回報）。

呢場博弈嘅其中一個可能報償矩陣如下：

	合作捕鹿	單獨捕兔
合作捕鹿	(3, 3)	(0, 2)
單獨捕兔	(2, 0)	(1, 1)

廣義化嘅話，個報償矩陣係噉嘅：

	合作捕鹿	單獨捕兔
合作捕鹿	(a, a)	(c, b)
單獨捕兔	(b, c)	(d, d)

當中 a > d 而且 a > b > c 。呢場遊戲有兩個純策略拿殊均衡點：

• 雙方合作捕鹿（高風險高收益）。
• 雙方各自單獨捕兔（低風險低收益）。

喺呢兩個狀態下，雙方都冇誘因單方面改變策略。

現實應用

内文：合作

社科研究採取博弈論觀點嗰陣，成日會攞獵鹿博弈嚟分析合作以及相關嘅行為。無論係人類定係第啲動物，合作行為都可以用獵鹿博弈嘅方式嚟諗。噉係因為好多現實情境都係噉：齊齊合作就最著數，各自為政著數少咗，自己合作對方唔合作就最唔著數。

舉例說明，假設某群灰狼需要合作捉大型獵物（獵鹿）但每隻狼都可以單獨捕捉細隻嘅獵物（獵兔）。佢哋嘅選項有合作捕鹿或者單獨捕兔，收益如下：

• 如果狼群合作，捉到鹿會得到大量嘅肉，夠晒成群狼分享。
• 如果得一部分狼合作，有狼選擇去捕兔，合作方可能會失敗咩都捉唔到，而捕兔方就會得到少量嘅肉。
• 如果所有狼都自己走去捉兔仔，雖然避免大失敗，但係每隻狼只能夠獲得少量嘅肉。

狼群合作就可以獲得最高收益，但呢點需要所有狼都信任對方並且加入合作行動。如果某些狼唔信任群體選擇自己走去捕兔，就可能導致成場捕鹿行動失敗。

容許溝通

睇埋：信任

喺獵鹿博弈裡便，事前溝通可以顯著影響博弈嘅結果。最基本嗰款獵鹿博弈唔容許參與者事先溝通，佢哋一定要做咗選擇之後先會知對方做咗咩選擇。對於博弈者嚟講，佢哋唔知對方會唔會合作，如果自己揀合作而對方唔合作，自己就會損失慘重。但係假如參與者能夠行動前溝通，佢哋就可以事先講定要合作，而假如佢哋信任對方就會更容易協調到合作捕鹿，更願意選擇高收益高風險嘅選項。

事實係，經濟學同政治學等領域嘅研究者，成日都會思考容許溝通嘅獵鹿博弈，用呢個模型嚟解釋點解人類會互相協調做出合作嘅行為。例如（商業同政治上嘅）合同以至人際關係當中嘅合作，都可以用獵鹿博弈嘅方式嚟諗。

睇埋

• 監犯困境
• 多數無知
• 社會契約

外拎

• （英文） 博弈論 101：獵鹿同埋純策略拿殊均衡點，YouTube 呢段短短哋嘅影片，講獵鹿博弈嘅拿殊均衡點。