參考文獻

  呢篇文章講嘅係學術引用。想搵修辭手法，請睇「引用」。

參考文獻（英文：citation）係學術出版上嘅一個重要概念，指喺一篇學術文裏面註明返話「呢個諗法係由邊個邊個喺邊年邊年講過嘅」：學術研究往往會想將自己嘅諗法建基喺第啲研究者嘅諗法之上，又或者係批判第啲研究者嘅見解，而喺呢啲情況下，寫一篇文嘅人通常要喺篇文入面註明返「呢個諗法係由某個人講過嘅」。

註明參考文獻嘅格式有好多種；唔同嘅期刊對要求亦都唔同，但係學術用嘅可以粗略分兩大類，第一類係將參考順次序編號碼，再跟號碼擺入腳註或者尾註，第二類係所謂作者年份格式（author-date system，又叫 Harvard style，哈佛格式），原則上就係將引用嘅作者名嵌入文章，但係有啲格式或者某啲情況下，因為為求準確，會再用括弧或者第種方法寫埋年份；作者年份格式入面嵌入嘅作者名同（如果適用）年份叫 ｢文內註｣（in-text citation）。

用順序編號碼嘅方法有例如IEEE格式；用作者年份格式嘅有例如APA格式同MLA格式等等。順序編號碼嘅格式又分號碼可以當名詞用同號碼齋係號碼兩種，前者又叫溫哥華格式（Vancouver style），IEEE格式係其中一個例子，不過更常見例子會係醫學用嘅ICMJE格式。

無論係邊種格式，引用參考文獻嘅文章都一定會跟一張一覽表，寫明啲號碼或者作者年份究竟係代表邊篇文、邊本書或者乜嘢第啲嘢。用作者年份嘅格式呢張表會叫 ｢參考文獻｣ 或者 ｢參考資料｣（reference list，標題 References），但係如果用編號，呢張表通常會叫 ｢參考書目｣（bibliography）；參考資料淨係會寫低引用過嘅資料，但係參考書目可以加埋睇咗但係冇引用嘅嘢。

學術以外（例如報紙雜誌）有時亦會要寫參考文獻，有時會沿用學術嘅做法，但係亦另外有冇咁複雜嘅格式。

例

作者年份格式

作者年份格式嘅原則係用正常嘅語法，將引用嘅作者名正常嵌入文章，例如，用APA格式可以寫：

根據李國良（1983），應用文可以分三類

根據李國良（1983，頁1），應用文可以分三類

李國良（1983，頁1）認為應用文可以分三類

唔想或者唔可能將作者名嵌入文章，又或者格式規定，就要將作者同作份擺入括弧，掕喺句尾，例如，用APA格式可以寫：

應用文可以分三類（李國良，1983）^{APA 以外嘅有啲其他格式唔用逗號}

應用文可以分三類（李國良，1983，頁1）

上面句嘢意思係話「應用文可以分三類」呢個諗法由李國良呢位作者喺 1983 年嘅一篇文或一本書入面講過。實際上係邊篇文或者邊本書，就要喺文章後面加個一覽表寫明。冇個表，引咗出處都係冇用嘅，因為同一個作者可能喺嗰年出過多過一篇文或者多過一本書。

唔係所有呢種格式都寫年份，例如MLA格式嘅文內註通常淨寫作者名：

根據李國良（1），應用文可以分三類

應用文可以分三類（李國良，1）

溫哥華格式

溫哥華格式嘅號碼可以當名詞用，情況類似作者年份格式嘅文內註；用返上面例子，用IEEE格式（姑且唔理註一會點寫）會類似咁：

根據[1]，應用文可以分三類

根據[1，頁1]，應用文可以分三類 ^{示範例子，IEEE格式可能唔用得中文頁數}

又或者咁：

應用文可以分三類[1]

應用文可以分三類[1，頁1]

其他格式

學術上嘅其他格式會係順序排號碼，再用腳註或者尾註；中文傳統上係寫括弧註幾號，英文就號碼用上標：

應用文可以分三類（註一） ^{傳統中式寫法}

應用文可以分三類^{1　傳統英式寫法}

特別情況

轉引

轉引係引用參考文獻嘅時候，引用嘅地方唔係原始出處，而係第三方資料。有時搵唔到原始出處會咁引，但係咁樣通常唔係嚴謹嘅做法。

冇出處嘅引用

唔係所有嘢都有出處，冇出處嘅話就冇辦法用一般嘅引用方法。有啲冇可能有出處嘅嘢，例如原住民嘅傳統知識（Traditional Knowledge），喺某啲格式可能有特別做法。

睇埋

• 抄襲
• 參考
• 語言學上講嘅據由