觀塘綫
| ||||||||||||||||||||||||
 ↓路線圖 ↑觀塘綫調景嶺站2號月台 | ||||||||||||||||||||||||
 | ||||||||||||||||||||||||
| ||||||||||||||||||||||||
|
| ||||||||||||||||||||||||
觀塘綫（粵拼：gun1 tong4 sin3；英文：Kwun Tong Line）係港鐵營運嘅十條路線之一（亦係前地鐵歷史最悠久嘅路綫），由九龍城區嘅黃埔連接西貢區嘅調景嶺。1979年通車時嘅總站係喺觀塘，所以叫呢個名。截至2021年，觀塘綫有17個車站，當中有8個係轉車站（何文田站、油麻地站、旺角站、太子站、九龍塘站、鑽石山站、油塘站、調景嶺站），而九龍灣站、牛頭角站、觀塘站、藍田站同埋油塘站5個車站係架空／地面車站。觀塘綫列車一列8卡，喺路線圖上面以綠色做代表。伸延去黃埔之前係全綫採用島式月台嘅路線。
路線圖
[編輯]
歷史
[編輯]
喺1960年代，香港政府已經想起集體運輸系統（Mass Transit Railway）。而當時規劃上已經有Kwun Tong Line，即係觀塘綫，不過比家下長好多。佢由Western Market，大概係今日嘅上環站，到Ma Yau Tong，大約係今日油塘站。香港島Central站（今日中環站）做轉車站，同Island Line（今日港島綫）轉車，但係唔停Admiralty站（今日金鐘站）。Tsim Sha Tsui站（今日尖沙咀站）、Diamond Hill站（今日鑽石山站）同Shatin Line（接近近年講嘅沙中綫）做轉車站。Tsim Sha Tsui站、Jordan站（今日佐敦站）、Waterloo站（今日油麻地站）、Mong Kok站（今日旺角站）四個轉車站同Tsuen Wan Line（約莫今日荃灣綫）做轉車。
不過呢個系統規模大得滯，結果要縮細來搞。
修正早期系統
[編輯]1975年11月，修正早期系統獲准興建。工程歷時四年，1979年10月1號正式通車。修正早期系統（首段）只係有石硤尾站到觀塘站嘅一段投入服務，列車只係有四卡。之後修正早期系統繼續擴展，地鐵服務喺1979年12月31號擴展到尖沙咀站。1980年2月12號過海鐵路路段啟用，地鐵列車第一次去到港島（中環站），地鐵嘅服務亦都伸延到港島區，全段修正早期系統完工。為咗應付客量增加，列車組由1980年2月16號起加到一列六卡。
荃灣綫
[編輯]1982年4月26號，為咗方便觀塘綫乘客適應喺旺角站轉搭荃灣綫嘅列車過去港島，荃灣綫首段（荃灣↔荔景）同埋太子站嘅轉車月台啟用，並且取代咗原有修正早期系統由中環站至旺角站嘅部份。嗰日開始修正早期系統「一分為二」，荃灣站至中環站命名做荃灣綫，而觀塘站至油麻地站就命名做觀塘綫，所有觀塘綫嘅列車會以油麻地站下層月台做總站。
由荃灣綫中環站至佐敦站往觀塘綫嘅乘客要喺旺角站轉車；而由荃灣站至深水埗站往觀塘綫嘅乘客就要喺太子站轉車。
1982年5月，荃灣綫正式啟用，由嗰日開始油麻地站就成為咗觀塘綫嘅終點站，旺角站同埋太子站就成為接駁荃灣綫嘅轉車站。
東區海底隧道
[編輯]1984年，香港政府決定起第二條過海隧道——東區海底隧道。地鐵獲授權興建一條汽車同埋鐵路兩用嘅海底隧道。當隧道喺1989年建成啟用之後，觀塘綫嘅終點站喺同年嘅8月6號伸延到香港島嘅鰂魚涌站；新加嘅藍田站就喺同年嘅10月1號啟用。1986年5月22號，因應客量需求，特別係九龍塘轉車站嘅客量，列車加到去一列八卡，直至而家都係。
將軍澳綫
[編輯]2001年9月27號觀塘綫又被延伸去到香港島嘅北角站。隨住將軍澳綫嘅啟用，2002年8月4號觀塘綫嘅終點站又由香港島改番返去九龍，並且向東延伸以將軍澳綫油塘站作為終點站。同年8月18號，將軍澳綫正式通車，觀塘綫列車最終以調景嶺站做終點站，將軍澳綫正式取代觀塘綫原有由海底隧道至北角站嘅一段。
觀塘綫延伸
[編輯]2016年10月23號，觀塘綫由油麻地站延伸至何文田同黃埔站。因為黃埔站得一個月台，繁忙時間兩個站會輪流做終站。港鐵亦都建議往荃灣列車轉乘往何文田／黃埔列車，反之亦然。屯馬綫2021年6月27號全線通車之後，乘客可以喺何文田轉屯馬綫。
用車
[編輯]觀塘綫有13列英國都城嘉慕所製造嘅列車（M-Train），一列列車8卡（通車初期4卡，喺1980年加到去一列6卡，1986年到而家就加到去一列8卡），喺1998至2001年間全面翻新），間中要抽3列畀將軍澳綫。觀塘綫嘅英國製都城嘉慕列車嘅車卡主要係最早期買落嘅第1代闊門膠車卡，同埋用窄門膠嘅2A、2C同3代車卡。
另外有北車長客電動列車（C-Train）22列，同樣係一列8卡。
| 下行（往黃埔） | 都城嘉慕電動列車車廂編組 | （往調景嶺）上行 |
| AXXX（單數號碼） - CXXX（單數號碼） - DXXX - B4XX - C4XX - DXXX - CXXX（雙數號碼） - AXXX（雙數號碼） | ||
- 都城嘉慕電動列車車廂編組註解：
- AXXX - 有駕駛室負責操控嘅動力車廂
- B4XX - 操控嘅動力車廂動力推動卡
- CXXX/C4XX - 附集電弓嘅電力車廂
- DXXX - 拖卡
車站一覽‧接駁路線
[編輯]| 車站套色同埋名 | 喺邊區 | 車站接駁 | 啟用日期 |
|---|---|---|---|
| 觀塘綫 | |||
| 調景嶺 | 西貢區 | 將軍澳綫 | 2002年8月18號 |
| 油塘 | 觀塘區 | 2002年8月4號 | |
| 藍田 | 1989年8月9號 | ||
| 觀塘 | 1979年10月1號 | ||
| 牛頭角 | |||
| 九龍灣 | |||
| 彩虹 | 觀塘區同埋 黃大仙區 |
||
| 鑽石山 | 黃大仙區 | 屯馬綫 | |
| 黃大仙 | |||
| 樂富 | |||
| 九龍塘 | 九龍城區 | 東鐵綫 | |
| 石硤尾 | 深水埗區 | ||
| 太子 | 油尖旺區 | 荃灣綫 | 1982年5月10號 |
| 旺角 | 荃灣綫[MKE] | 1982年5月10號[TWL] | |
| 油麻地 | 荃灣綫 | ||
| 何文田 | 九龍城區 | 屯馬綫 | 2016年10月23號 |
| 黃埔 | |||
| 附註 | |||