九廣鐵路
九廣鐵路（英文：Kowloon-Canton Railway，簡稱：KCR），又叫九鐵，以前廣州嗰便叫廣九鐵路，1906年開始起，1910年通車，連接住九龍市區、新市鎮同中國大陸嘅鐵路系統，又係連接九龍同廣州嘅第一條鐵路。當時鐵路分為兩個部份，即係中國境內嘅華段同香港境內嘅英段（當時香港重係英國殖民地），路軌等基建設施分兩地管理。來往兩地嘅長途客車曾經因為第二次世界大戰同中國大陸政局動盪而中斷，後來喺1979年再通返車。
路段由兩間唔同嘅公司營運，分別係廣深鐵路集團營運嘅廣深鐵路（原華段）同九廣鐵路公司營運嘅東鐵（原英段）。1990年代中期之前，「九廣鐵路」喺香港只代表「九廣鐵路──英段」，之後就係解九廣鐵路公司喺香港營運嘅所有鐵路網，包括佢喺幾個新市鎮開拓嘅西鐵，落馬洲支線同馬鐵鐵路路線。
目錄 |
[編輯] 九廣鐵路網絡
[編輯] 九龍至廣州嘅九廣鐵路
| 車站 | 里程 |
|---|---|
| 廣州 | 0 |
| 廣州東 | 8 |
| 石龍 | 69 |
| 東莞（常平） | 90 |
| 樟木頭 | 103 |
| 塘頭廈 | 114 |
| 平湖 | 127 |
| 深圳 | 147 |
| 九龍 | 183 |
九龍至廣州嘅九廣鐵路包括廣深鐵路（廣州至深圳）同九廣東鐵（羅湖至九龍）。現時仍然有直通車分別來往九龍（紅磡）至廣州、上海，以及北京（來往九龍至廣州更有部分係九廣通列車，即ktt）。
[編輯] 香港境內嘅九廣鐵路
九廣鐵路公司喺香港發展咗3條重鐵路線，全長76.9公里嘅鐵路系統網絡，包括共32個車站，其中5個係轉車站。
另外，九廣鐵路亦有1個叫做九廣輕鐵嘅輕鐵網絡，來往屯門區同元朗區之間，全長36.15公里，共68個車站。
[編輯] 歷史
[編輯] 早期策劃
19世紀末，因香港同廣州貿易頻繁，港英政府同當時嘅滿清政府商議興建連接香港同埋廣州嘅鐵路。1898年，香港政府同當時嘅清政府達成協議，起一條連接九龍同埋廣州嘅鐵路，專營權歸英方所有。而鐵路按地域分成中英兩段，分別由中、英兩國政府負責起。
1905年9月，香港立法局通過起九廣鐵路後，香港政府就開始研究定線，並派出一班英國工程人員負責鐵路測量工作。
當時九廣鐵路英段有兩個方案。第一個方案係由尖沙咀直接向北，穿越筆架山，然後沿城門河同吐露港海岸到達邊境。呢個方案嘅好處係能夠經過當時新界嘅行政中心大埔，但缺點係需要開成2.4公里嘅筆架山隧道。另一個方案係由尖沙咀向西北沿海岸而行，經過荃灣同青山灣海岸，再北上屯門同元朗到達邊境。這個方案嘅優點係只須開鑿幾條較短嘅隧道，技術上較第一個方案簡單得多，但係呢個定線所經之處比較荒蕪，而且定線亦比第一個方案長。因此，香港政府最後接納第一個方案。
1906年，全長35.4公里嘅英段開始動工，而全長143.2公里嘅華段亦喺1907年展開建築工程，滿清政府更請到中國鐵路專家詹天佑做華段嘅總工程師。九廣鐵路英段興建初期用咗軌距為610毫米嘅路軌，但工程中途就全面改用軌距為1435毫米嘅標準路軌。工程需要起橋同埋基堤，同5條隧道，當中包括最長嘅筆架山隧道。呢條隧道係當時亞洲規模最龐大嘅工程，花咗3年時間先至完工。由於當時施工環境較為惡劣，工程期間有超過50個工人死喺隧道內。
1910年10月1號，耗資130萬英鎊嘅九廣鐵路英段落成啟用。啟用儀式原本由兩廣總督同香港總督喺羅湖主持，但由於中方最後決定派出次一級嘅官員，英方最後亦只派出香港輔政司主持啟用儀式。當時英段屬單線系統，火車由蒸氣機車拖動，車站就包括尖沙咀站、油麻地站、沙田站、大埔站（其後改叫大埔滘站）同粉嶺站5個車站，同年增設大埔墟旗站。另一方面，由於尖沙咀車站重未完工，所以喺1913年之前，臨時總站設喺疏利士巴利道。
1911年10月5號，來往香港同埋廣州嘅直通車正式投入服務。
[編輯] 戰前發展
1911年4月，香港政府接納大埔理民府建議，起一條由粉嶺通往沙頭角嘅九廣鐵路支線，是為沙頭角支線。興建工程所用嘅物資，主要係之前於九廣鐵路英段拆落嚟嘅610毫米軌距路軌。
1912年4月1號，沙頭角支線正式落成通車。支線全線單軌行車，全長11.67公里，設有5個車站，客貨運兩用。
1913年，為方便用上水高爾夫球場嘅乘客，九廣鐵路喺上水增設停車點。同年直通車進行提速，來往九龍同廣州嘅時間縮短至3小時40分鐘。
1914年列車開始用尖沙咀站月台，整個車站亦喺1916年全面啟用。
1919年，何文田增設咗停車點。1923年發生省港大罷工，令直通車服務一度中斷，至1927年先至恢復正常。
1928年4月1日，因為之前一年沙頭角公路落成啟用後，搭鐵路嘅乘客大幅減少，沙頭角支線正式停辦。
1930年，中國內戰導致九廣鐵路直通車中斷運作。
1937年8月，九廣鐵路增加九龍至汕頭嘅直通車服務。同年抗日戰爭開始，九廣鐵路華段因為經常受到日軍空襲，喺工程人員努力搶修下，九廣鐵路只能維持有限度服務。
1938年10月12號，九廣鐵路華段其中一條鐵路橋被嚴重炸毀，令直通列車服務全面停頓。同年10月21號廣州淪陷，九廣鐵路華段停止運作。
1941年12月8號，日軍開始進攻香港，英方炸毀九廣鐵路英段唔少設施，以阻礙日軍前進，同年12月25號香港淪陷。日方喺1943年完成修理整段九廣鐵路，重新復辦來往香港及廣州嘅直通車。另一方面，大部份原屬九廣鐵路英段嘅列車同設備被運到中國大陸使用，因此香港重光嗰時，只剩低兩部機車同幾個車卡。
[編輯] 戰後發展
1949年10月14號，由於解放軍佔領廣州，來往九龍同廣州嘅直通車就喺政治原因下停駛。華段改以深圳火車站為終點站，成為其後嘅廣深鐵路。而英段就改以羅湖站為終點站。另一方面，香港政府起咗粉嶺至和合石墳場嘅和合石支線，並喺每年嘅清明節同重陽節提供客運服務，平時就用嚟運送屍體。
1955年9月5號，兩架柴油機車開始投入九廣鐵路英段嘅服務，蒸氣機車終於喺1961年8月全部被取代。
1973年，九廣鐵路英段展開雙軌工程。
1975年11月30號，九龍總站由尖沙咀海旁搬去紅磡，冇幾耐之後尖沙咀總站就拆咗，只保留鐘樓（現為香港法定古蹟，亦係尖沙咀地標之一），原址興建香港文化中心，而路軌原址就興建香港藝術館、香港太空館同新世界中心。另一方面，來往九龍同廣州嘅直通車喺1979年4月4號重新運作。
1978年，九廣鐵路英段開始全線現代化同電氣化計劃，耗資35億港元，同年和合石支線因配合工程而停止運作。
1982年5月6號，九龍段首階段電氣化工程完成，九龍至沙田近郊線電氣化列車正式啟用。
1983年5月2號，沙田至大埔墟段完成工程。大埔墟至羅湖段電氣化工程喺同年7月15號搞掂，並由當時嘅港督尤德爵士主持通車儀式。
[編輯] 車站增設
1982年，新旺角站啟用，取代原有嘅油麻地站，而可以同香港地鐵轉乘嘅九龍塘地鐵站亦於同年啟用。
1985年，火炭站同馬場站先後啟用，而大圍站同太和站就分別喺1986年同1989年5月9號啟用。
1982年之前，九龍段嘅管理屬香港政府部門，稱為九廣鐵路局，隨住《九廣鐵路公司條例》喺同年12月通過，九廣鐵路公司於1983年2月1號正式成立，自此脫離政府。公司一直由香港政府全資擁有，運作就由管理局監察，管理局嘅成員由港督委任。
[編輯] 開拓新線
1984年10月15號，東鐵接受乘客以地鐵「儲值車票」畀錢，隻車飛改叫「通用儲值票」。同年10月17號，公司接受政府邀請，喺新界西北屯門區同元朗區起同埋營運輕便鐵路。
1990年代，為配合香港起西鐵，九廣鐵路公司將「九廣鐵路─英段」改名為「九廣東鐵」，九廣鐵路公司嘅另一條鐵路「輕便鐵路」就改名為「九廣輕鐵」。
1998年10月，西鐵正式開始施工。同時積極擴展輕鐵網絡，將佢轉型為西鐵嘅主要接駁交通工具。
為配合政府優先發展鐵路嘅政策，九廣鐵路公司決定轉型為規劃、設計同建造大型新網絡嘅機構。公司應政府邀請，就多條新鐵路嘅興建進行詳細研究同提交建議書。呢啲新項目包括3條九廣東鐵支線：喺大圍接駁九廣東鐵嘅馬鞍山鐵路、紅磡車站至尖沙咀東部嘅支線、以及作為第2條過境鐵路通道嘅上水至落馬洲支線。
[編輯] 後期發展
1996年3月6號，中國政府成立廣深鐵路股份有限公司。
2002年9月24號，政府邀請九廣鐵路公司起同埋經營九龍南線。
2002年6月25號，政府宣布九廣鐵路公司投得沙田至中環線（沙中線）嘅興建與經營權。
2003年12月7號，輕鐵位於天水圍嘅兩段新支線通車，兩條新支線共長4.4公里，設有11個新車站。
2003年12月20號，歷時5年建成嘅西鐵正式啟用，正名為「九廣西鐵」。
2004年1月3號，政府重新審查過九鐵整體規劃，九鐵宣佈會擱置沙中線，而會用沙紅線代替。新鐵路嘅走線會同原來嘅沙中線相若，但唔會過海，而係改經黃埔再轉入紅磡站，然後經過南環線連接西鐵；而原來嘅東鐵會南延過海到中環，令東鐵同西鐵形成一個喺紅磡轉車嘅十字型路線。
2004年10月24號，九廣東鐵尖沙咀支線正式啟用，列車從紅磡站延至尖東站為終點。
2007年12月2號，兩鐵合併，九廣鐵路鐵路網同地鐵鐵路網合而為一，成為香港鐵路網。
[編輯] 收費
[編輯] 八達通
- 內文： 八達通
八達通係香港其中一種電子收費系統，卡片嘅大細同信用卡相同，內置晶片，用嗰時將卡片放喺接收器上就畀到錢。而九廣鐵路就係一個最常用到八達通嘅服務。
[編輯] 單程票
單程票係一種附有磁帶嘅車飛，喺入閘之前買。車站大堂設有自動售賣機，賣各種單程票。九廣鐵路各鐵路系統擁有唔同種類嘅單程票：
- 東鐵同馬鐵：單程車票分為普通等同頭等，普通等車票可以喺各車站售票機買，而頭等同／或羅湖車票就可以喺各車站票務處同自動售票機買，但實施羅湖乘客限額制時，東鐵乘客必須喺票務處買；而馬鐵（由車公廟至烏溪沙站出發）乘客必須先買前往上水站嘅單程票，並喺大圍站指定補票處補畀上水站至羅湖站之間嘅差額，至可以轉東鐵前往羅湖站。
- 西鐵：單程車票可以喺各西鐵車站售票機買飛。
- 輕鐵：沿線各站月台都設有自動售票機，畀乘客買單程票。
[編輯] 「全月通」
「全月通」係一種透過八達通來用嘅月票，月票記錄喺八達通嘅內置晶片。喺買飛當日指定嘅一個月內（可以係本月或者下個月），可以無限次搭指定鐵路路線同指定免費接駁服務。呢隻票於指定車站嘅票務處有售。九廣鐵路各鐵路系統擁有唔同種類嘅「全月通」：
- 東鐵：2005年4月推出。首個月嘅推廣價係$300，之後改以正價$380賣，但自2005年4月起用同一張八達通持續買東鐵「全月通」可繼續以$300發售。適用於無限次搭東鐵尖東至上水各站普通等（馬場站同羅湖站除外），同馬鐵所有車站；亦可以免費轉東鐵接駁巴士K12（星期日同公眾假期除外）、K14、K16、K17、K18同新巴701線。
- 馬鐵：馬鐵全月通係試驗性質嘅計劃，2006年1月推出。票價$200，適用於無限次搭馬鐵所有車站同馬鐵+東鐵普通等（馬場站同羅湖站除外）嘅組合車程，但任何一次車程，起點同／或終點必須係烏溪沙站至車公廟站其中一站，唔係就要畀正常車資；亦可以免費轉東鐵接駁巴士K12（星期日同公眾假期除外）、K14、K16、K17、K18同新巴701線。而且，為防止原東鐵乘客濫用馬鐵月票，乘客用馬鐵全月通嗰時，原站出閘同入閘時間要相隔最少20分鐘，唔係就要畀第二程正常車資。不過最後由於銷售效果欠佳，計劃已於2006年6月試驗期之後終止。買開馬鐵月票嘅乘客可繼續以續購價$300買東鐵「全月通」（必須自2005年4月起用同一張八達通持續買東鐵或馬鐵「全月通」）代替。
- 西鐵：2004年8月推出。頭兩個月嘅推廣價係$300，之後改以正價$400賣，但喺2004年10月至2005年7月交返上月嘅$300西鐵月票，並自2005年7月起以同一張八達通持續買西鐵「全月通」可繼續以$300發售。初推出嗰時係一種附有磁帶嘅車飛，到2005年7月改用八達通形式賣。用呢張月票可以喺有效期內無限次搭西鐵、輕鐵、各新界西北嘅九鐵接駁巴士（K73P除外）、巴士路線K16、新巴701同702線、專線小巴81K、87K同95K線。
[編輯] 西鐵自悠通
西鐵自悠通前稱節日通，最初係西鐵學生全日通嘅車飛，同西鐵全月通同期開售，售價係$20。呢張飛係一張即日通行車飛，喺買飛當日可以無限次搭西鐵、輕鐵、各新界西北嘅九鐵接駁巴士（K73P除外）、巴士路線K16、以及喺推廣期間內推出嘅其他免費接駁服務。為吸引乘客交返用咗嘅磁性車飛，凡交返用咗嘅10張「自悠通」或「節日通」車飛，可免費換「自悠通」一張。
[編輯] 九鐵遊客套票
九鐵遊客套票一套賣$80，2005年5月16號推出，當中包括有九鐵本地線乘車證同九鐵羅湖線乘車證。另外，九鐵本地線乘車證又以$30獨立發售。套票可以喺各東鐵（馬場站除外）、馬鐵同西鐵站買；不過，海洋公園 - 九廣鐵路「逍遙特惠」套票、九鐵快線 - 迪士尼樂園好玩套票、「香港全接通」乘車套票、新渡輪（澳門）- 九廣鐵路「澳門尊尚」等套票已包括嗰兩張乘車證，有相同功能，九鐵遊客套票自2007年4月1號起停止發售，只有九鐵本地線乘車證重係獨立發售。
- 九鐵本地線乘車證：可以喺買飛當日無限次搭東鐵普通等（羅湖站同馬場站除外）、馬鐵、西鐵、輕鐵、各新界西北嘅九鐵巴士、東鐵接駁巴士K12（星期日同公眾假期除外）、K14、K16、K17、K18。
- 九鐵羅湖線乘車證：可以喺買飛當日起一個月內搭東鐵普通等或馬鐵來往羅湖站來回各1次。
[編輯] 九鐵服務
九廣鐵路每日提供近20個鐘嘅列車服務，大概由上晝5點半至凌晨1點，非行車時間就進行軌道同軌旁維修工程。喺一啲假日，例如平安夜同大除夕，九鐵部分路線更會通宵行走。
九廣鐵路喺部分車站提供接駁巴士，方便距離車站較遠嘅市民搭九鐵。輕鐵嘅定位亦包括作為西鐵嘅接駁交通工具，同樣方便距離車站較遠嘅九鐵乘客。
[編輯] 九鐵系統
兩鐵合併之前，九廣鐵路已經發展成有3條重鐵路線，全長76.9公里嘅鐵路系統網絡。系統共有32個車站，其中5個係轉車站。另外，九廣鐵路亦有1個輕鐵路線網絡，全長36.15公里，共有68個車站。
[編輯] 九鐵安全
雖然九鐵各客運設施可以喺99.5%嘅服務時間維持正常，但近年就發生咗多宗嚴重事故，尤其以東鐵系統嘅老化問題，令大眾關注列車喺運作時嘅安全。
[編輯] 事故
1984年11月25號嘅08:50，一列由紅磡駛往上水嘅東鐵列車（E45），喺上水站落客之後，司機想駛入中線路軌，以便調頭後再駛入南行月台載客。當列車駛到路軌交匯處時，較剪位活動軌未有將列車引入中線路軌，令列車駛入第3條路軌。司機煞唔切掣，撞斷一條電纜柱，然後翻側，第2卡車廂橫放壓住車頭。當時乘客已經全部落車，司機亦同時跳車逃生而無人受傷。
1988年6月4號，一列南行貨運列車喺大學站以北（現白石角）出軌，直到第二日恢復服務。期間東鐵服務中斷咗成日。九鐵方面派出接駁巴士疏導乘客，但場面混亂。例如喺沙田站，夜晚大批乘客爭先恐後上接駁巴士，有人甚至爬窗進入。出事地點位於白石角，嗰段鐵路本來係個急彎，後來於1996年把呢段拉直。而家係香港教育學院運動場。
1994年7月29號上晝10點，一架編號1013嘅輕鐵列車駛至屯門兆禧苑側，湖景路同埋湖山路交界同貨櫃車相撞，輕鐵司機當場死咗，而列車自此冇再行，拆咗嚟攞零件。
1997年6月21號，一架輕鐵列車喺兆康站前右轉時與對面路軌前行嘅列車迎頭相撞，超過20人受傷。
2005年7月21號朝早，一列西鐵列車喺八鄉車廠內撞向前面另一架列車嘅車尾，令兩部列車嘅車嘴部分受損（已經整返好）。
2005年12月21號，東鐵一列南行列車駛至火炭站時，列車車底嘅壓縮器支架鬆脫，九鐵其後檢查全線列車嘅116個壓縮器，共發現9個壓縮器支架出現裂紋，但並無即時向政府匯報。九鐵事後為所有壓縮器加上尼龍索帶同U形托架承托以防止鬆脫。但其後再發現有80個車底組件有裂紋，經過初步調查之後發現東鐵列車喺2003年改用列車自動操作系統（ATO）後，對列車組件增加達1倍嘅壓力。而且部分焊接位焊接唔妥，要剷走油漬先至發現裂紋。另外，列車同路軌嘅接口並唔完全吻合而產生震動，令列車懸掛系統可能產生裂紋。九鐵主席田北辰喺2006年1月14號話，管理局將每晚開會，確保東鐵可以安全行駛後先至會開車，並承諾如果再有主要組件或者綑綁嘅尼龍索帶鬆脫，九鐵將即時決定東鐵全線停駛。最後，九鐵喺2006年1月15號獲政府批准，將東鐵恢復以人手操作，但東鐵由羅湖到尖東嘅行車時間會增加1.5分鐘，而早上繁忙時間嘅班次就會由每個鐘24班減至23班（更一度減至每個鐘21班）。2006年8月6號起，東鐵列車全線恢復ATO運作。
2006年9月9號，東鐵一列北行往羅湖嘅列車，喺香港天文台發出紅色暴兩警告期間，因雨水滲入絕緣體，喺大學站以北故障停駛，車廂先後傳出三次爆炸巨響同火花，過千乘客受困，亦導致東鐵南北行列車受阻，數以萬計乘客受影響。
2006年9月13號，東鐵一列北行往羅湖嘅列車，繁忙時間喺大學站因列車控制系統嘅電線出現故障，導致東鐵南北行列車受阻約40分鐘。故障期間，列車行車時間平均增加15分鐘，等候時間增至23分鐘。因為故障喺繁忙時間發生，東鐵部份車站需要實施人潮管制措施。
2007年2月14號，西鐵一架列車繁忙時間喺錦上路至荃灣西之間嘅大欖隧道內因列車車頂嘅變壓器漏油，喺高溫下起火燒着，導致西鐵列車受阻約40分鐘。期間乘客需要喺隧道行20分鐘至荃灣西站。
[編輯] 九鐵列車
[編輯] 機車
- 克萊德工程（Clyde Engineering，澳洲）G12機車：5部柴油機車（1954-1957）
- Clyde Engineering/GM（澳洲）G16機車：4部柴油機車（1961-1966）
- 通用汽車（澳洲）G26 CU 柴油機車：3部柴油機車（1974-1977）
- 西門子公司（德國）ER20 機車：5部柴油機車（2002）
- Adtranz-SLMLok 2000 機車：2部電動機車（1997）
- 0-4-4T（英國）：2部蒸氣機車（1924）2
2呢兩架蒸氣機車曾經行過沙頭角支線，係九廣鐵路唯一用蒸氣發動嘅機車，機車喺1928年支線停駛後退役，現時陳列喺大埔香港鐵路博物館。
[編輯] 客運列車
3車組 E44（車箱 144-244-444）並冇被翻新
4所有近畿車輛嘅列車都係從日本買同埋製造
[編輯] 輕鐵
- 第1期車輛：澳洲Comeng製，共70卡（編號1001-1070，1988年通車時一併投入服務）5
- 第2期車輛：日本川崎重工業製，共30卡，編號1071-1090同1201-1210。編號1201-1210係拖卡，冇駕駛室（1992至1993年間投入服務）
- 第3期車輛：澳洲A. Goninan製，共20卡（編號1091-1110，1997至1998年間投入服務）
5車隊編號1013因交通事故報廢
[編輯] 巴士
- 都城嘉慕威曼都城巴士（英國）（1987-1989年）101-139 已全數退役
- 都城嘉慕威曼都城巴士（英國）（原South Yorkshire PTE車隊，1980年首次登記，九鐵喺1988-1989年買入）140-159 已全數退役
- 豐田Coaster（日本）（1988年）160-171 已全數退役
- 利蘭奧林比安（英國）（1990年）201-224
- 富豪奧林比安（英國）（1997年-1998年）225-239
- 三菱MK117J單層巴（日本）（1991年）301-311
- 三菱BM117L（日本）（二手車，1994年買入）312-317 已全數退役
- 三菱MP618NRAGDA（日本）（1994年）318 已退回
- 富豪B10M（瑞典）（1995年）401-415
- 丹尼士飛鏢（英國）（1995年）501-503
- 丹尼士三叉戟11.3米（英國）（2000年）601-622
- 丹尼士三叉戟10.6米（英國）（原新巴車隊，1999年首次登記，九鐵喺2004-2005年買入）701-747
- 丹尼士三叉戟11.3米（英國）（原新巴車隊，1999年首次登記，九鐵喺2005年買入）748-753
- 亞歷山大丹尼士Enviro 500（英國）（2008年）801-809
- 亞歷山大丹尼士Enviro 200 Dart（英國）（2008-2009年）901-911
[編輯] 新路線
- 落馬洲支線：九廣鐵路公司營運嘅東鐵鐵路支線之一。從現時嘅上水站開始，向西北方向延伸，穿越塱原濕地、古洞同洲頭等地，最終連接落馬洲站，全長7.4公里。支線建成後，東鐵北行列車將會分為2個終點站，分別通往2個同中國大陸連接嘅關口－羅湖同落馬洲。屆時，每個鐘將有6班車由尖東站往落馬洲方向行走。工程喺2002年6月14號開始，2007年8月15號通車。
- 九龍南線：九廣鐵路公司營運嘅西鐵鐵路延線之一，全長4.5公里，共3個車站。從西鐵嘅南昌站開始，向南延伸，中途經過九龍西站，再連接現時東鐵嘅總站尖東站。延線建成後，西鐵將可由屯門區連接到紅磡。到時紅磡站會成為東鐵同西鐵嘅終點站。工程喺2005年第四季開始，2009年通車。
- 沙田至中環綫（即沙中綫）：九廣鐵路公司計劃嘅路線之一。計劃嘅路線分為三大部份：大圍至鑽石山鐵路線、東九龍線同第四條過海鐵路。成個計劃由沙田區嘅大圍站開始，穿過大老山到達鑽石山，再沿東九龍線前往啟德新發展區、土瓜灣到達紅磡。同東鐵交匯後，再經由第四條過海鐵路到達香港島嘅銅鑼灣，最終以中環為終點站。全長17.1公里，將會起10個車站。起好之後，將會係九鐵第一次有載客列車駛到香港島，同地鐵作正面競爭。不過兩鐵合併之後，計劃改為分開大圍至紅磡段，同埋延長東鐵綫而成嘅過海段，後者縮短至金鐘站。
[編輯] 參考
- 《百載鐵路情》九廣鐵路 2006 九廣鐵路公司出版 ISBN 988-99604-0-0
- 《九廣鐵路公司2005年報》，九廣鐵路公司，2006年
- 《九廣鐵路新工程簡報 — 2006年第1期》，九廣鐵路公司，2006年4月
- 《九廣鐵路公司小冊子》，九廣鐵路公司，2006年
- 《九鐵歷史》，九廣鐵路官方網站，2006年
- 《南九龍線》(PDF，英文版) ，香港立法會，2005年1月7號
- 九廣鐵路資料，香港鐵路資訊中心，2006年2月7號
[編輯] 參閱
[編輯] 出面網頁
| 香港九鐵車站 |  |
|
|---|---|---|
| 東鐵 |
尖東 2 | 紅磡 ■ | 旺角 | 九龍塘 1 | 大圍 ■ | 沙田 | 火炭 | 馬場 | 大學 | 大埔墟 | 太和 | 粉嶺 | 上水 | 羅湖 | 落馬洲 |
|
| 西鐵 | ||
| 馬鐵 | ||
| 1) 地鐵觀塘綫轉綫站 2) 地鐵荃灣綫轉綫站 3) 地鐵東涌綫轉綫站
建議緊、計劃緊又或者整緊嘅綫同站會以斜體表示。 |
||
