外星生物

小綠人（Little green man）係廿世紀嘅文化產品當中常見嘅外星人形象。

外星生物（粵音：oi6 sing1 sang1 mat6 | 英文：extra-terrestrial life，「地球外嘅生命」噉解），又叫地外生命或者地外生物，泛指喺地球以外嘅行星上產生同進化出嚟嘅生命。直至 2020 年為止，科學界一致認同全宇宙淨係得地球係確定咗有傳統定義上嘅生命嘅，不過有好多人都認為外星生命係有可能存在嘅，甚至確信地球以外有生命。

太陽系內

喺廿一世紀初，有好多科學家都喺度研究緊太陽系入面第啲行星同埋佢哋啲衞星上面有冇生命存在嘅跡象，或者係有冇生命曾經存在過嘅跡象。原則上，太陽系除咗地球以外的確有一啲似係可以俾生命存在嘅地方，包括

• 火星表面底下嘅一啲空洞（火星因為缺乏磁場，所以表面受好強嘅輻射照射，不過呢啲地底空洞理論上受到岩石嘅保護，輻射會冇咁勁）、
• 金星嘅大氣層上層（金星大氣層極厚，造成嚴重嘅溫室效應，所以金星表面日頭閒閒地成攝氏 400 幾度咁熱，不過大氣層上層嘅環境會好啲）、同埋
• 氣體大行星－尤其係木星同土星－嗰啲冰凍衞星嘅海，例如有深測器顯示，土星嘅衞星土衞二（Enceladus）似乎有內熱，即係話佢雖然離太陽遠，但有一定嘅熱能，所以表面底下有一個處於液體狀態嘅海（即係話有對生命嚟講好重要嘅水），俾廿一世紀初嘅科學界認為有可能有類似地球上噉嘅生命。

... 等等。

太陽系外

對於太陽系以外可能存在嘅生命，廿一世紀初嘅天體生物學界都仲係處於理論階段：太陽系以外嘅恆星閒閒地都成幾光年咁遠，未有探測器可以去得到；天體生物學家一般會靠理論計算同埋望遠鏡嚟思考太陽系以外嘅生命。首先，相關領域嘅科學家可以靠觀察恆星嘅光度嘅週期性變化嚟推測有冇行星圍住佢哋轉同埋啲行星係點嘅樣嘅，例：如果有粒恆星有行星圍住佢轉，噉由地球嘅角度睇，粒恆星實會因為週期性噉俾佢啲行星遮住咗而變暗，然後科學家就可以靠得到嘅數據估算每粒恆星有幾多粒行星圍住佢轉，以及係每粒行星離佢嗰粒恆星大約幾遠。跟手科學家可以思考每粒恆星嘅可住帶（habitable zone）－「處於可住帶」意思即係話一粒行星離佢嗰粒恆星唔係太遠又唔係太近，所以唔會太熱或者太凍，令粒行星嘅表面可以有液態嘅水存在。另一方面，又有啲科學家喺度深測地球四周圍嘅電磁波（EM waves），睇吓呢啲電磁波當中有冇啲望落似係地球人類以外嘅文明傳嘅資訊。

• 
  可住帶嘅圖解；中間發光嘅係恆星，恆星周圍嘅有色地帶係可住帶。

一粒行星「能唔能夠容納生命」好大程度上取決於佢嗰粒恆星嘅特徵：首先，一粒恆星嘅大細會影響佢啲行星容納生命嘅能力，大粒嘅恆星嘅可住帶會廣啲，但佢哋一般都會短命啲，搞到佢哋啲行星冇咁多時間可以進化出複雜嘅生命，而細粒嘅恆星會有相反嘅問題，佢哋長命啲，但可住帶會窄啲；因為噉，有人話好似太陽噉中等大細嘅恆星係最有可能支持到生命嘅。另一方面，一粒行星能唔能夠有生命亦取決於佢粒恆星喺個星系入面嘅位置，如果粒恆星身處喺星系當中某啲化學元素多嘅地方，佢可以有行星嘅機會會大啲，而且又會少啲受到超新星（supernova）衝擊，所以支持到複雜生命嘅機會率一般都被認為會高啲。

德里克公式

内文：德里克公式

德里克公式（Drake equation）係天體生物學上一條出名嘅公式，用數學方程式嘅方法概括咗呢柞因素，俾人攞嚟計地球人會接觸到有智慧外星生命嘅機會率：

$N=R_{*}\cdot f_{\mathrm {p} }\cdot n_{\mathrm {e} }\cdot f_{\mathrm {l} }\cdot f_{\mathrm {i} }\cdot f_{\mathrm {c} }\cdot L$，當中

N = 銀河系當中有可能同人通訊嘅文明嘅數量；

R_∗ = 銀河系當中恆星產生嘅率（呢個數字極大）

f_p = 一粒恆星會有行星嘅機會率

n_e = 每粒有行星嘅恆星平均有幾多粒能夠容納生命嘅行星

f_l = 一粒能夠容納生命嘅行星有幾大機會會真係有生命出現

f_i = 一粒有生命嘅行星有幾大機會會有有智能嘅生命出現，並且出現文明

f_c = 一個文明有幾大機會會開發到能夠向太空傳達資訊嘅科技

L = 一個高科技文明將可探測嘅訊號傳去太空所需嘅時間

文學作品

啲科幻作品同神話入面有好多關於外星生物嘅描寫。好似科幻作品入便嘅「火星人」、卡通入便嘅超人家族、《龍珠》入面嘅「孫悟空」，仲有紅底面寫嘅超人等等。

睇埋

• 戴森球
• 費米悖論
• 黑暗森林法則