體育遊戲

體育遊戲（英文：sports game）可以算係模擬遊戲嘅一種，顧名思義係模擬緊現實世界當中嘅運動。體育遊戲係史上最早出現嘅電子遊戲類型之一，早喺 1950 年代尾經已有。

例如係好出名嘅《FIFA 系列》噉，就模擬緊英式足球，亦都可以睇埋《FIFA 系列》以外嘅《EA Sports》遊戲－呢啲遊戲包括咗模擬多種團隊運動嘅遊戲作品，由籃球以至美式足球都有。喺最基本上，體育遊戲會考玩家嘅反應同手眼協調，要求玩家好似動作遊戲噉，直接控制住運動員參與比賽；但另一方面，有好多體育遊戲又會比較睇重策略或者管理，例如《EA Sports》當中模擬團隊運動嘅作品會往往要求玩家指揮一隊球隊嘅唔同成員作出有組織有計劃嘅行動，考反應同手眼之餘又要求玩家識得團隊運動上嘅策略；呢啲遊戲好多時仲會要求玩家管理球隊－例如用球隊嘅資金嚟請球員，途中要考慮到資源分配等嘅問題。