死
定義
[編輯]
死亡定義上就係指一隻生物嘅生命永久噉終結嘅過程[1]。一隻生物可以係因為意外、衰老、病、唔夠營養、中毒、或者自殺等嘅原因而死。喺一隻生物死咗之後，佢條屍會返返去生物地球化學循環（指唔同物質喺地球環境當中嘅循環過程）嗰度－佢身體淨低嘅有機部份會俾一啲專食廢料嘅生物（例如係屎甲蟲）食落肚，令到佢哋身上嘅營養可以喺大自然入面循環再用，變成環境或者第啲生物個體嘅一部份[2]。
定義死亡喺醫學上係一條有些少挑戰性嘅問題：定義上，死亡係「生命嘅終結」，但「生命」呢隻詞要點定義已經係一個令人頭痕嘅問題，所以定義一隻生物究竟「死咗未」或者斷定佢嘅「死亡時間」亦唔係容易嘅事；例如一隻動物死嗰陣，好多時佢身體各個器官死嘅時間都唔同，例如個肝嘅細胞可能喺個腦死咗之後幾分鐘先至死得嗮[3]。一般嚟講，醫學上會用「心跳停咗」或者「個腦死咗」嚟當做由生到死之間嘅界線；但有陣時，啲腦死嘅病人又可以靠架生幫手做唞氣同心跳呢啲基本功能[1]，而且廿一世紀初嘅醫學界已知有瀕死體驗（NDE）嘅現象－喺瀕死體驗期間，病人嘅腦部好多時經已停止運作（用腦死做死亡定義嘅話算係經已死咗），不過病人後嚟救得返，而且仲能夠正確噉描述佢「死咗」期間發生嘅事，又引起咗生物學界同醫學界對死亡嘅討論[4][5]。
傳統來講，人冇咗心跳、冇咗呼吸就屬於死咗，但係問題係以而今嘅醫學技術，心肺可以復甦而令到身體機能回復活動。現代科學上可以分做瀕臨死亡期、臨床死亡期同生物學死亡期。目前公認嘅醫學觀念用腦幹死亡做腦死亡嘅標準，一旦個腦死咗，即係腦部冇活動嘅象徵，就即係死咗。
死嘅原因
[編輯]病、受傷、中毒等可引致死亡。呢啲種種嘅原因可以永久破壞主要器官嘅功能，影響身體，搞到內部失衡，最終引致死亡。所有已知地球生物遲早都會老死，除咗幾種燈塔水母。人同其他生物一樣隨時間而衰老，就算人嘅健康同生活環境有幾好，都未必可以活到一百歲，而大多數動物嘅壽命都短過人。由於對個「死」字係唔吉利，所以喺粵語/其他漢語嘅方言中对死描述嘅辭彙極其豐富，有好多講法，例如：
- 婉轉啲嘅：唔喺度、過身、過世、去世、逝世、打柴、瓜柴、瓜老襯、謝雞、瓜咗（本字「㱠」[6]）、釘蓋、釘咗、去咗、走咗、冇咗、香咗、冧咗、冚旗、兩腳一伸、伸直咗、行先一步、Game Over（香港口音，粵拼：gem1 ou1 faa4）、摺埋、埋單[7]、長休、玩完、已故、斷氣、早登極樂、賣鹹鴨蛋、百年歸老、返返舊時嗰度、一命嗚呼、撒手塵寰、駕崩（帝皇專用）、香消玉殞（女人專用）、冚國旗、天妒英才、移咗民、去咗遊埠、收咗皮、閂咗總掣、骨頭打鼓、永訣、訣別，瞓大酒店⋯⋯
- 好聽啲嘅：辭世、與世長辭、辭去人世、百年之後、壽終正寢（男）、壽終內寢（女）、成為故物、嗚呼哀哉、已故、作古、大去、仙逝、安眠、安息、往生（佛家語，指去另一個世界生活）、駕鶴西歸…
- 有宗教色彩嘅：安息、主懷安息、魂歸天國、蒙主寵召、息勞歸主、上天堂、圓寂、涅槃、歸西、仙遊、登極樂、上西天、見阿彌陀佛、見閻羅王、上咗路（黃泉路／陰司路）、落黃泉、落地獄、落下面、使陰司紙、食香、嘆元寶蠟燭、氣數已盡、乘鶴西去…
- 政治色彩嘅：見馬克思、搵毛主席…
- 正面啲嘅：殉國、殉教、殉職、殉道、成仁、犧牲、與世長辭、壽終正寢、英年早逝、回天乏術、就義…
- 未成年人死：夭、夭折、夭母、短折、夭亡、殤、夭殤、早逝（英年早逝）、少年亡、夭逝、棄養、夙殞、無服之殤…
- 自然死嘅：壽終、登仙、百年、老咗、謝世、長逝、長往、長辭、歸室、歸泉、走咗、去咗、逝世、故去、就木、壽終正寢、壽終內寢 …
- 非自然死嘅：自盡、自殺、被殺、遇刺、遇難、身亡、暴斃、斃命、喪生、非命、病逝、斷魂、隊冧、解決咗、攪掂咗、魂斷XX（XX係一個地方，可以係：香港、長城、異鄉、南山…）、葬身XX（XX係一個空間，可以係：火海、大海、魚肚、輪下…）…
- 單字：殁、殞、斃、薨、卒…
死後生命
[編輯]喺生物學以外，有好多宗教都有討論死亡呢家嘢嘅本質，尤其是人死亡嘅超自然性。有好多宗教都相信，人喺死咗之後靈魂會以某啲形式存在落去，例如係會去天堂或者地獄，又或者係會投胎轉世噉[8]。
睇埋
[編輯]同死有關嘅文章：
喪葬相關
[編輯]- 遺囑、遺言、遺書、遺物、遺產、遺腹子
- 死亡證
- 壽衣
- 冥鏹
- 長生店
- 棺材
- 訃聞
- 喪事：輓聯、帛金、吉儀、孝服、仵工、大殮、靈車
- 殯儀館
- 義莊
- 墳場
- 葬禮：火葬、土葬、海葬、天葬
- 火化
- 骨灰、骨灰罌、骨灰龕
- 執骨、金塔（粵港澳特色喪葬傳統）
拉雜相關
[編輯]Info：鼓盆而歌
莊子老婆死咗，惠子去弔慰，但莊子就叉開腳敲住個盆唱歌。惠子話：你同佢一齊住，佢湊大你個仔，老咗死咗，你唔喊都夠啦，仲敲盆唱歌，唔係過咗火咩？莊子話：唔係。佢啱啱死咗嗰陣，我點會唔傷心呢？但睇返佢一開始本來無生命，唔止無生命，本來仲要無形體，唔止無形體，本來仲要無元氣。夾雜喺恍惚之間，變到有元氣，元氣變到有形體，形體變到有生命，依家變返死咗，好似春夏秋冬四季運行咁啫。佢人瞓得喺咁大間房，而我起勢圍住佢喊，我覺得咁係唔通曉天命，所以我無再咁做。
有學者覺得莊子將死亡睇做自然演化嘅過程，係睇化咗生死。就算係佢老婆死咗，佢都可以曠達咁敖然自樂。莊子教人要快樂就要學吓沉靜接受死亡嘅到來，因為死其實可能仲好過生，呢點佢喺第二篇就提過。
不過都有學者反對，話莊子其實都係傷心嘅，所謂睇化生死純粹係學界誤會咗。因為莊子喺其他篇章入面其實表現得好惜命，而且唔少地方都睇得出佢對其他人生命嘅重視，佢嘅生死觀並唔係覺得死一定好過生。嗰啲聽落曠達嘅言論係源自於死亡無可避免，背後係佢嘅悲哀同無奈，咁不如心平氣和啲先唔會對自己做成更大傷害。[9]
參考
[編輯]
- ↑ 1.0 1.1 Definitions of Death. Encyclopedia of Death and Dying.
- ↑ Recycling the dead.
- ↑ Henig, Robin Marantz (April 2016). "Crossing Over: How Science Is Redefining Life and Death". National Geographic.
- ↑ Pim van Lommel (2010). Consciousness Beyond Life: The science of the near-death experience. HarperOne.
- ↑ Griffith, L.J. (2009). "Near-death experiences and psychotherapy". Psychiatry (Edgmont). 6 (10): 35–42.
- ↑ 〈粵語詞彙研究所〉。www.yuetlab.com。原著喺2021-04-09歸檔。喺2021-04-09搵到。
- ↑ 《廣州話普通話詞典》 (中文)。商務印書館。
- ↑ Afterlife: A History of Life after Death by Philip C. Almond (London and Ithaca NY: I B Tauris and Cornell University Press, 2015).
- ↑ 張景 (2017年6月7號)。〈莊子"鼓盆而歌"新解〉。中國社會科學網。歸檔時間2023年5月23號。喺2023年5月23號搵到。
{{cite web}}: CS1 maint: bot: original URL status unknown (link)
