港鐵巴士
港鐵巴士同埋港鐵接駁巴士（以前叫九鐵巴士）係香港鐵路有限公司轄下接駁或輔助巴士服務嘅簡稱，於1985年9月9號開始運作，吸引離鐵路車站較遠嘅乘客去東鐵綫、屯馬綫或輕鐵車站轉車。
接駁巴士服務原本由九廣鐵路公司嘅單一部門負責營運，叫九廣巴士。到2003年西鐵通車，各部門重新調整之下東鐵同西鐵嘅接駁巴士服務由兩條鐵路嘅營運部門各自負責。自此接駁巴士再冇單一嘅巴士營運部門。
喺兩鐵合併後，港鐵公司將九鐵巴士分為港鐵巴士同埋港鐵接駁巴士，港鐵巴士係指屯馬綫同埋輕鐵嘅接駁及輔助巴士線嘅統稱；而港鐵接駁巴士係指由九巴營運嘅東鐵綫接駁巴士線。
港鐵採用綜合收費系統，鐵路乘客持有八達通而轉接駁巴士或者搭接駁巴士之後轉鐵路，車費低啲嗰一程就免費（K12假日班次、A73及K73P線除外）。若果乘客只係搭接駁巴士而唔搭東鐵綫、屯馬綫或者輕鐵，就要畀巴士車費。
港鐵接駁巴士（東鐵綫）
[編輯]
歷史
[編輯]- 開展服務
1985年9月9號，九鐵開咗兩條九廣鐵路接駁巴士線，分別係：
不過啱啱開辦嗰時，九鐵冇自己嘅巴士車隊，而係租旅遊巴士嚟行，一年後嘅9月1號就改為租九龍巴士（九巴）嘅巴士嚟行，直到1987年9月1號，先至用自己買嘅巴士行。
- 服務擴充
K11同K12都係唔使錢，所以反應好理想。因此九鐵再開多幾條接駁巴士線去應付客量，佢哋分別係：
其中K15喺運作初期更係由九鐵、香港小輪同信和集團聯合經營，主要係宣傳中港城（因為中港城係信和集團起嘅），同埋接駁中港碼頭（當時，香港小輪係嗰個碼頭嘅主要使用者）。到1990年，K15改由九廣鐵路公司自己營辦。另外嗰時的士團體認為K12嘅運作扼殺佢哋嘅生存空間，所以K12最後一班車喺夜晚9時開。
- 批出特許經營權
大多數接駁巴士線嘅客量都係非常之高。不過，由於接駁巴士唔使錢，同時法例唔畀九鐵開辦收費嘅巴士服務，結果俾好多非東鐵乘客濫用。為解決呢個問題，九鐵由1999年5月3號開始，借殼九龍巴士，轉為專利巴士路線，但由九廣鐵路公司管理啲車同埋員工。自此，接駁巴士線成為專利巴士線，可以向乘客收費，並通過八達通系統繼續畀東鐵乘客免費接駁優惠，並同時享受政府畀九巴嘅燃油稅優惠。喺新安排下，濫用情況得到明顯改善；但同時，K15因為乘客大多數係非東鐵乘客，結果客量大幅下跌。K15喺2001年6月3號改經海泓道（富榮花園、海富苑），以擴展服務範圍。
- 假日同消閒服務
K12原本淨係喺平日提供服務，為方便東鐵乘客去大埔中心一帶，K12由2000年5月28號起增設假日服務。但由於的士團體認為噉做扼殺佢哋嘅生存空間，故此K12喺假日冇轉車優惠。另外，香港迪士尼樂園喺2005年9月12號啟用，九鐵公司亦有意染指迪士尼嘅交通市場。本來，九鐵公司只係租非專利巴士來往上水火車站同香港迪士尼樂園，以套票形式（羅湖去上水嘅東鐵車飛加上水去香港迪士尼樂園嘅巴士車飛）賣，不過的士團體認為九鐵公司噉做係扼殺佢哋嘅生存空間而反對。亦有北區區議員認為巴士線喺北區上落，但唔畀北區居民搭係唔公平。後來九鐵公司推出本地乘客都用得嘅套票（仍然係要連埋車飛一齊買，東鐵同馬鐵都喺上水站轉巴士，西鐵就喺錦上路站），但因為嗰條巴士線客量低兼且嚴重虧蝕，最終喺2007年11月1號起取消。
其後九鐵公司推出同海洋公園合作嘅類似套票，由於班次更加密，因此反應幾好。2007年初，九鐵將同海洋公園合作嘅套票推廣活動改為永久計劃。
- 西鐵同馬鐵嘅影響
西鐵喺2003年12月通車，但西鐵只係去到南昌站，結果九鐵安排K16延長到南昌站以接駁西鐵乘客去尖沙咀，並增設假日服務。由於來回程都經海泓道，同K15重疊，加上K16班次比K15密，於是K15自2004年1月4號起取消，並以專線小巴線79K取代。
馬鐵就喺2004年12月通車，最受影響嘅係喺沙田區服務嘅K11。由於馬鐵可以服務嗰區，故此九鐵公司取消免費轉乘優惠，結果客量大跌，到2007年1月15號K11被取消。
九龍南綫喺2009年8月16號通車，由於沿綫居民有直接嘅鐵路服務提供，令K16線冇咗原有嘅轉乘作用，因此港鐵公司取消路線K16同港鐵喺免費轉乘優惠，並於9月19號停止服務。
路線
[編輯]現時，九巴向九鐵租巴士去營運4條東鐵綫接駁巴士線，包括：
| 號碼 | 總站 | 總站 | 備註 |
|---|---|---|---|
| K12 | 大埔墟站 | 大埔八號花園 | 服務時間只去到夜晚10點，假日冇任何轉乘優惠 |
| K14 | 大埔中心 | 大埔墟站 | 淨係喺星期一至六上晝0700至1000單程（大埔中心→大埔墟站）行駛 |
| K17 | 大埔墟站 | 富善 | 淨係喺星期一至六行駛 |
| K18 | 大埔墟站 | 廣福 | 淨係喺星期一至六行駛 |
註：
- K12線於2000年5月28號起增設假日服務。但由於的士團體認為噉做扼殺佢哋嘅生存空間，故此K12喺假日冇轉車優惠，所有乘客（包括上水－尖東全月通）喺星期日及公眾假期搭呢條線都要畀正常車費。
- 轉乘優惠唔可以同機場快綫免費港鐵接駁服務共用；
- 用「機場快綫旅遊票」（一程或兩程機場快綫單程車程及連續3日無限次搭港鐵車程仍然有效期間）唔會享有免費轉乘優惠。
港鐵巴士（屯馬綫同輕鐵）
[編輯]歷史
[編輯]輕鐵嘅接駁巴士服務喺1988年輕鐵投入服務嗰時開辦。由於政府立法喺大欖涌至凹頭嘅青山公路之間、屯門同埋元朗設立「輕鐵專區」（原本係由1988年開始為期20年，早期重唔畀九巴接載區內乘客，到1993年放寬呢個限制），唔畀九巴開辦「輕鐵專區」內嘅區內巴士線。但部分屯門、元朗區內嘅鄉郊地方係唔適宜行輕鐵，故此有需要由九鐵開辦接駁巴士以應付輕鐵線以外嘅交通需求。因此，輕鐵接駁巴士同東鐵接駁巴士唔同，由於有「輕鐵專區」嘅關係，故此法例容許九鐵喺「輕鐵專區」開辦收費嘅接駁巴士線，呢樣係東鐵接駁巴士做唔到嘅。喺開辦初期，呢啲巴士以接駁輕鐵為主，到2003年12月西鐵啟用，九鐵重組輕鐵接駁巴士線，以方便乘客轉西鐵。
同東鐵綫接駁巴士另一個唔同嘅係輕鐵巴士一開始已經分為「接駁巴士」（路線冧巴原本同輕鐵一樣係三位數，後來改為K字頭）同埋「輔助巴士」（冧巴係A字頭）兩種。前者嘅目的在於服務因輕鐵專區而取消原有九巴路線，但輕鐵去唔到嘅地區；故此如果喺搭輕鐵之前或者之後搭接駁巴士，嗰程車唔使錢。輔助巴士在於服務輕鐵去到，但因路線同原有巴士線唔同，較難服務嘅地區（例如屯門新墟、置樂花園一帶）；輔助巴士用單程飛，冇轉駁優惠，要畀全程車費，但有輕鐵月票就唔使錢。
路線
[編輯]| 路線 | 總站 | 總站 | 備註 |
|---|---|---|---|
| 506 | 屯門碼頭 | 兆麟 | 原本係輕鐵線，因杯渡路架空輕鐵路軌工程（2002年7月14號至2003年8月尾進行）而開辦，之後因為列車唔夠而繼續用巴士行 |
| K51 | 富泰 | 大欖 | 經屯門站、景峰花園、兆康站 西鐵通車前叫521線（富泰－大欖）同埋521P（富泰-屯門市中心 循環線） |
| K52 | 屯門站 | 龍鼓灘 | 經屯門碼頭、屯門市中心 西鐵通車前叫A52線（屯門市中心－龍鼓灘），而A52係由520線（屯門碼頭-龍鼓灘）同埋A51線（屯門碼頭-踏石角）合併而成 |
| K52A | 曾咀 | 屯門站 | 與K52S綫一樣 |
| K52S | 龍鼓灘 | 屯門站 | 淨係喺星期一至五上晝繁忙時間提供單向服務 |
| K53 | 屯門站 | 掃管笏 | 循環綫，淨係喺星期一至六上下晝繁忙時間行駛 取代輔助巴士A59線（青山灣-寶田 循環線） |
| K54 | 和田邨 | 屯門市中心 | 循環綫 經兆康站 |
| K58 | 富泰 | 青山灣 | 經屯門站、兆康站，淨係喺星期一至六上下晝繁忙時間行駛 另設有星期一至五由田景路開去青山灣嘅固定特別班次：0730、0740，取代輔助巴士A59線（青山灣-寶田 循環線） |
| K65 | 元朗站 | 流浮山 | 經天水圍站 西鐵通車前叫655線（元朗東－流浮山） |
| K66 | 大棠 | 朗屏 | 經朗屏站 取代西鐵通車前嘅656線（大棠－元朗工業邨） |
| K68 | 元朗市鎮公園 | 元朗工業邨 | 經朗屏站，循環線 取代西鐵通車前嘅656線（大棠－元朗工業邨） |
| K73 | 天恒 | 元朗西 | 經朗屏站 前身係A70（天瑞－元朗）同埋A74線（天恆－元朗） |
| K74 | 天瑞 | 凹頭 | 經朗屏站、元朗站，循環綫，淨係喺星期一至六上下晝繁忙時間行駛 |
| K75A | 天水圍站 | 洪水橋 | 循環綫，經廈村（田廈路） |
| K75P | 天瑞 | 洪水橋 | 經天水圍站，循環綫，淨係喺星期一至六上下晝繁忙時間行駛 |
| K75S | 天水圍站 | 洪福邨 | 循環綫，淨係喺星期一至五上下晝繁忙時間行駛 非常規路線 |
| K76 | 天恒 | 天水圍站 | 西鐵通車前叫659線（天恆－天水圍市中心） |
| K76S | 濕地公園路 | 天水圍站 | 淨係喺星期一至五上下晝繁忙時間行駛 非常規路線 |
八達通轉乘優惠
[編輯]港鐵接駁巴士亦提供轉乘優惠畀八達通乘客。乘客必須用同一張八達通卡上咗首程巴士後60分鐘內乘搭次程巴士先至有轉乘優惠。各巴士路線之轉乘優惠如下：
| 路線 | 轉乘路線 |
|---|---|
| 506 | 免費轉乘K51、K52線 |
| K51、K52 | 免費轉乘506線 |
| K53 | 免費轉乘K58線 |
| K58 | 免費轉乘K53線 |
| K65 | 免費轉乘K66、K68、K75、K75P線 |
| K66 | 免費轉乘K65、K68線 |
| K68 | 免費轉乘K65、K66線 |
| K73 | 免費轉乘K74線 |
| K74 | 免費轉乘K73線 |
| K75、K75P | 免費轉乘K65、K76線 |
| K76 | 免費轉乘K75、K75P線 |
- 輕鐵免費轉乘優惠：必須喺建議輕鐵站出站收費器確認後60分鐘內再喺巴士八達通收費器確認，或喺巴士八達通收費器確認後60分鐘內再喺建議輕鐵站入站收費器確認
- 港鐵免費轉乘優惠：必須喺指定港鐵站出閘後60分鐘內再喺巴士八達通收費器確認，或喺巴士八達通收費器確認後60分鐘內再喺指定港鐵站入閘
- 注意事項：
- 如果轉乘模式係輕鐵或港鐵巴士→港鐵→輕鐵或港鐵巴士，全程唔可以超過120分鐘；
- 轉乘優惠唔可以與機場快綫免費港鐵接駁服務共用；
- K51同埋K52冇轉乘優惠，直接轉乘會扣除兩次八達通單程收費，乘客可以考慮喺市中心站及屯門碼頭站轉輕鐵綫507及614，方可以當作一個車程收費。
屋邨巴士服務
[編輯]九廣鐵路公司曾經開辦3條屋邨巴士線，一條係1980年代開辦，來往策誠軒（大埔滘九鐵職員宿舍）同埋大埔墟火車站嘅50R（後來叫NR50），2005年8月21號起改由陽光巴士營運。另外喺元朗區亦先後開辦95R（後來叫NR95，來往元朗朗屏邨同上水火車站）同埋916R（來往新元朗中心同上水火車站）。916R喺1997年底同95R合併，而95R亦由2002年起改由另一間旅遊巴士公司營運。
地鐵巴士
[編輯]兩鐵合併前嘅地鐵喺1983年，買過20架來自倫敦運輸局嘅丹拿珍寶（倫敦運輸局編號DMS）巴士，諗住開辦6條接駁地鐵站嘅巴士線[1]：
呢項計劃遭到九龍巴士公司（九巴）同埋中華汽車有限公司（中巴）反對，行政局最後未有通過，而令計劃告吹。嗰批巴士後來賣咗畀城巴。而以上路線就交畀九巴同埋中巴開辦，不過由於客量唔夠，好快就停辦。
車隊
[編輯]租九鐵巴士
[編輯]截至2022年9月，港鐵公司向九廣鐵路公司租172架巴士，全部係可以畀坐輪椅嘅人搭嘅低地台巴士。
- 低地台雙層冷氣巴士：161架
- 低地台單層冷氣巴士：11架
| 冧巴 | 型號 | 車身 | 類型 | 投入服務年份 | 退役年份 | 現時服務範圍 |
|---|---|---|---|---|---|---|
| 101-139 | 都城嘉慕威曼都城巴士 | 都城嘉慕威曼Apollo MkII | 兩軸雙層普通巴士 | 1987年至1989年 | 2004年至2005年 | |
| 140-159 | 都城嘉慕威曼都城巴士（二手） | 都城嘉慕威曼Apollo MkI | 兩軸雙層普通巴士 | 1980年出廠，1988年至1989年間投入服務 | 1995年全部退役 | |
| 140-150（第二代） | 亞歷山大丹尼士Enviro 400 | 亞歷山大丹尼士Enviro 400 | 兩軸雙層冷氣巴士 | 2012年、2018年 | 港鐵巴士 | |
| 160-171 | 豐田Coaster | Akarawa | 24座小巴 | 1988年 | 1990年代 | |
| 201-224 | 利蘭奧林比安 | 亞歷山大RH | 雙層冷氣巴士 | 1990年至1991年 | 2008年至2009年 | |
| 225-239 | 富豪奧林比安 | Northern Counties Palatine | 雙層冷氣巴士 | 1997年至1998年 | 2014年至2015年 | |
| 301-311 | 三菱MK117J | 三菱 | 單層冷氣巴士 | 1991年 | 2008年至2009年 | |
| 312-317 | 三菱BM117L | 捷聯/亞洲 | 單層冷氣旅遊巴士 | 1992年由冠忠買入，1994年投入服務 | 已退役 | |
| 318 | 三菱MP618 | 三菱 | 單層冷氣巴士 | 樣辦車，1994年投入服務 | 1995年 （退返畀供應商） |
|
| 319-386 | 富豪B9TL | Wright Eclipse Gemini 2 | 雙層冷氣巴士 | 2016年至2017年 | 港鐵巴士 | |
| 401-415 | 富豪B10M | Northern Counties Paladin | 單層冷氣巴士 | 1995年 | 2012年 | |
| 501-503 | 丹尼士飛鏢 | Northern Counties Paladin | 單層冷氣巴士 | 1995年 | 2012年 | |
| 504-545 | 亞歷山大丹尼士Enviro 500（11.3米） | 亞歷山大丹尼士Enviro 500 | 雙層冷氣巴士 | 2013年至2018年 | 港鐵巴士 | |
| 546-549 | 亞歷山大丹尼士Enviro 500（11.3米） | 亞歷山大丹尼士Enviro 500 | 雙層冷氣巴士 | 2021年 | 港鐵巴士 | |
| 601-622 | 丹尼士三叉戟（11.3米） | 亞歷山大ALX500 | 雙層冷氣巴士 | 2000年 | 2017年 | |
| 701-747 | 丹尼士三叉戟（10.6米，二手） | 亞歷山大ALX500 | 雙層冷氣巴士 | 向新世界第一巴士買嘅，2004年年尾至2005年間投入服務 | 2015年至2016年 | |
| 748-753 | 丹尼士三叉戟（11.3米，二手） | 亞歷山大ALX500 | 雙層冷氣巴士 | 向新世界第一巴士買嘅，2005年中投入服務 | 2016年 | |
| 801-824 | 亞歷山大丹尼士Enviro 500（12米） | 亞歷山大丹尼士Enviro 500 | 雙層冷氣巴士 | 2008年至2009年 | 港鐵巴士 港鐵接駁巴士 | |
| 825-833 | 亞歷山大丹尼士Enviro 500（11.3米） | 亞歷山大丹尼士Enviro 500 | 雙層冷氣巴士 | 2012年 | 港鐵巴士 | |
| 860-862 | 亞歷山大丹尼士Enviro 500（12米） | 亞歷山大丹尼士Enviro 500 | 雙層冷氣巴士 | 2022年 | 港鐵巴士 | |
| 901-911 | 亞歷山大丹尼士Enviro 200 Dart（11.3米） | 亞歷山大丹尼士Enviro 200 | 單層冷氣巴士 | 2008年至2009年 | 港鐵巴士 |
向其他公司租車
[編輯]九鐵巴士曾經喺2002年8月至2003年10月間向城巴租8架利蘭奧林比安巴士（編號K105、K111-K117），以舒緩唔夠車嘅情況，並用嚟行受杯渡路輕鐵架空工程影響嘅輕鐵線（505、506）。
2003年10月起，九鐵巴士改向新世界第一巴士（新巴）租31架富豪奧林比安巴士（編號K201-K220、K225-K235）同4架利蘭奧林比安巴士（編號K221-K224）。呢啲巴士喺2004年7月至12月間陸續還返畀新巴。
