星加坡

新加坡共和國 Republic of Singapore（英文） Republik Singapura（馬來文/印尼文） சிங்கப்பூர் குடியரசு（淡米爾文）
通稱：星架坡
旗 徽
格言：Majulah Singapura（馬來文） 「前進吧，星架坡！」
國歌：《前進吧，星架坡！》
屬地（實轄）
幅員 國土：276平方英里 716.1平方公里（世界第197名） 水域：1.444%
首都	星加坡
中央政府 所在地	星加坡
至高地	武吉知馬
至長河	加冷河
海岸線長	193公里
時區	星加坡標準時間：UTC+8
國民
人數	以下係2014年嘅估計數字 人數：5,469,700（世界第114名） 人口密度：19,725人/平方英里 7,615人/km2（世界第3名）
官方語言	英語（行政用語） 馬來語（國語） 華語、淡米爾語
官方文字	英文、馬來文、簡體中文、淡米爾文
民族	華族、馬來族、印度族、歐亞族
主要宗教	佛教、道教、基督新教、天主教、伊斯蘭教、錫克教同猶太教
曆法	公曆
主要節日	開齋節、春節、屠妖節、聖誕節同國慶日
行車方向	靠左行駛
家用電源 電壓：240 V 插座：G 頻率：50Hz
政制
國家憲法	《新加坡共和國憲法》
國家結構形式	單一制
國家政權	星加坡國會
政制	共和立憲制 自由民主制 議會民主制 雙首長制 一院制
法律體系	普通法
主要領袖 國家元首（總統）：陳慶炎 政府首腦（總理）：李顯龍
其他領袖（三權分立） 行政（總理）：李顯龍 立法（國會）：哈莉瑪 司法（大法官）：桑德萊什·麥農
經濟
GDP（購買力平價） 以下係2016年嘅估計數字 總計：4,849.51億美元（第41名） 人均：86,853美元（第3名）
GDP（國際匯率） 以下係2016年嘅估計數字 總計：2,945.60億美元（第38名） 人均：52,755美元（第6名）
HDI 以下係2014年嘅估計數字 0.901（第9名）－極高
中央銀行	新加坡金融管理局
貨幣	星加坡元（SGD，S$）
堅尼系數	0.414 (2014年)
資訊
立國歷史 立國日期：1965年8月9號 立國事件：被逐出馬來西亞聯邦迫使獨立（1965年8月9號）
國家象徵	國家標誌：星加坡國徽 國父：李光耀等人 國花：卓錦萬代蘭 地標：魚尾獅
國家代碼	SGP、SIN
國際域名縮寫	.sg
國際電話區號	+65
現役軍人數	60,000（第64名）－2002

星加坡（粵拼：sing1 gaa3 bo1），又有同音異字星架坡、星加波；或者新加坡（粵拼：san1 gaa3 bo1），官名新加坡共和國san1 gaa3 bo1 gung6 wo4 gwok3（英文：Republic of Singapore，馬來文：Republik Singapura，淡米爾文：சிங்கப்பூர் குடியரச（Cingkappūr Kudiyarasu））係東南亞嘅一個城邦。唐人亦都叫佢做石叻（sek6 lik1/nit1）或者叻埠（lik1/nit1/lak6 bou6），嚟自馬來文嘅Selat，即係海峽咁解。

地理上星架坡島同埋側邊幾個島組成，位於馬來半島南端，馬六甲海峽南口，南面有星加坡海峽同印尼隔海相望，北同馬來西亞相隔柔佛海峽，有長堤相連，所以又有星洲（sing1 zau1）之稱。

1819年英國東印度公司嘅萊佛士同柔佛蘇丹簽訂條約，獲批准喺星架坡建立交易站同殖民地。由於特殊嘅地理位置，星架坡喺第二次世界大戰之前一直係大英帝國喺東南亞最重要嘅據點，因為咁慢慢發展成為繁榮嘅轉口港。1965年獨立後，喺總理李光耀嘅領導之下，新加坡喺一代人嘅時間內從一個第三世界國家轉變為一個有錢嘅已發展國家，人均國民生產總值居世界前茅。星架坡以廉潔嘅政府、清潔嘅都市、高效率同完善嘅法制聞名於世，但同時又以政府嚴格嘅管制著稱。

史

萊佛士嘅尊像

星架坡早期主要有馬來人住，佢最早嘅文獻，源自中國公元3世紀。14世紀中國大明時將星架坡叫做淡馬錫（Temasek）。1819年1月29號英國不列顛東印度公司僱員萊佛士登陸星架坡，並開始管轄呢個地區。1824年星架坡正式成為英國殖民地，最初隸屬於英屬印度殖民當局管轄，1867年升格為海峽殖民地，受英國直接統治。

1941年太平洋戰爭時期，星架坡畀日本佔領達3年6個月，改埋名叫昭南特別市（Template:字母）。1945年8月英國重新接管星架坡，恢復舊名。1959年星架坡取得自治地位，1963年佢同馬來亞聯邦、砂勞越同北婆羅州（現沙巴）成立馬來西亞聯邦，完全脫離英國統治。1965年8月9號馬來西亞宣布將星架坡驅逐出聯邦，星架坡被迫獨立。

星架坡獨立後，尤其喺1970年之後，政治上嘅自由空間，逐步壓制，之不過經濟上，就取得高速發展，好快就成為東南亞重要嘅金融同埋轉口貿易中心，成為「亞洲四小龍」之一。同時星架坡人嘅生活水平，亦得到大幅度提高，住屋、教育、交通等問題，都步步解決，到1990年李光耀卸任總理時，星架坡已經成為區內，乃至整個亞洲經濟發展模範。喺吳作棟做第二任總理嗰陣，星架坡平穩咁度過咗1997年亞洲金融危機。但到21世紀初第三任總理李顯龍接任嗰陣，星架坡又再度遇到，點樣面對區內其他經濟體系崛起嘅新難題。

政治

星架坡國會大廈

根據星架坡憲法，星架坡實行嘅係議會制政府。國家機構三權分立，總統由直接民選產生，為國家元首。國會議員亦都係選舉產生，總理喺國會多數黨中產生，佢領導嘅內閣擁有行政權，並由獨立嘅公共服務委員會管理公務員嘅聘用同埋處分。總理喺議員中選出內閣部長。

自1965年起，人民行動黨一直係唯一嘅執政黨，喺議會亦好少有能夠形成監督力量嘅反對黨。外界普遍認為，人民行動黨對反對黨同埋異見分子嘅打擊係毫不留情，包括喺選舉前重新劃分選區、運用行政資源同訴諸法律行動等。但同時唔可以否認嘅，人民行動黨確實喺星架坡人中有好高威望，喺建國後嘅歷次選舉中該黨嘅總得票率從未低過 65%。

有啲西方國家指責人民行動黨主宰咗星架坡主要嘅政治舞臺，因為國會成員絕大多數都係該黨黨員，三任總理李光耀、吳作棟同李顯龍亦都係人民行動黨黨員。不過，由於國會嘅構成嚟自選舉結果，呢啲指責並無太大嘅說服力。不過，星架坡即使係實行選舉制度，亦有啲人認為星架坡政府體制似乎更接近專政統治而唔係民主政治。

一般認為，星架坡言論自由嘅空間喺1965年獨立之後就一直受到壓制，雖然近年佢為咗鼓勵創意產業嘅發展同展現更開明嘅政府態度，已經喺呢方面有所放鬆。有啲人認為，人民行動黨政府通過政府持股嘅方式間接控制咗該國兩大媒體集團，反對聲音亦因為種種限制好難通過其他私人出版機構出版佢哋嘅著作或者發表言論。外國媒體對星架坡政府嘅批評往往會導致誹謗官司，或者被限制喺星架坡嘅發行量。此外，個人或民間組織亦被禁止自行安裝衛星天線接收器，冚辦爛鬼佬嘅電視節目都可被審查。政府亦對網絡進行管制，具體管制情況不詳，不過封鎖嘅網站好多都係鹹網。

人民嘅行動自由並冇受到太大限制，但當局對一切集會活動都非常關注。只要達到一定數量嘅戶外集會，都必須同警方備案。星架坡嘅內部安全局擁有非常大嘅許可權，被殖民地時期留低嘅內部安全法授權可以喺必要時無限期拘留任何被懷疑可能對種族和諧同社會穩定造成威脅嘅人士，並可以喺不經審訊嘅情況下扣押多年。有啲人認為，呢部法律喺人民行動黨政府對付共產黨嘅時候被濫用。

此外星架坡嘅高壓管制重表現喺對日常行為嘅監督上：香口膠被禁止喺新加坡境內銷售（醫療用香口膠除外）；隨地丟垃圾、用完廁所後唔沖水、喺地鐵飲水或者食嘢都會導致高額罰款或強制勞役，好似罰喺公眾地方掃街示眾。呢個國家重擁有可能係全世界最嚴格嘅禁毒法律，攜帶毒品入境或藏毒作販賣用途嘅主要刑罰係絞刑。另外對於成年男性犯罪者重可以使用笞刑處罰。不過雖然大多數外國人無法理解呢啲嚴厲嘅刑法，大多數星架坡人都認同可以用重罰嚟遏制犯罪或破壞性嘅行為。

地理

星架坡地圖

星架坡一共有大小島嶼 50 幾個，地勢起伏和緩，主島星架坡嘅面積佔 90% 以上。星架坡好多地都係填海得嚟，1950年到而家大約有20%嘅國土面積係由填海嚟。

星架坡地處熱帶，四季如夏，氣溫變化較細，年平均溫度喺24到32攝氏度之間，濕度高，每日平均濕度係84%。降雨充足，年均降雨量喺2400毫米左右，每年11月到1月係雨季，雨水較多。

星架坡早期嘅移民多數聚集喺中南部新加坡河出海口一帶，其他地區好多係熱帶雨林或農業用地，但係除咗少數嘅自然保護區外，今日基本上都已經係城市。星架坡綠地面積非常大，除咗美化城市外，重有降暑嘅功用。

由於無淡水河，星架坡嘅主要水源就係降雨，因此修建咗多個水塘。雖然降雨量大，呢啲雨水都係無法滿足當地嘅用水需要，目前50%嘅水源依靠進口，大部分嘅水係喺馬來西亞進口。星架坡亦都積極開發其他水源，包括海水淡化同埋再生水。

人口同語言

星架坡係世界上除咗澳門以外人口密度最高嘅地區，而家常住人口超過400萬，其中25%以上係外國公民。本國公民中，四分之三嘅人口係華人，亦係世界上除兩岸四地以外，唯一華人人口佔大多數嘅國家。馬來人佔 14% 左右，印度族為 8%，重有少部分歐亞混血人口。

係住房方面，84% 嘅星架坡人口住喺由政府起嘅組屋，價格非常低廉，重可以高價再轉賣畀無權買新組屋嘅新加坡永久居民或外國人士。組屋之外最多人居住嘅係共管式公寓，屬於私人嘅公寓住宅，價格一般係政府組屋嘅四、五倍之多。此外重有少部分嘅排屋（即聯體別墅）或獨棟別墅。

新加坡通用英文、馬來話、華語同埋泰米爾話四種官方語言，其中馬來話係國家語言，但係政府機構多數用英文。早期嘅星架坡華人大多習慣使用唔同嘅方言，但係經過幾次大規模政府主導嘅講華語運動後，絕大多數新一代嘅華人多數習慣講普通話。不過，英文先至係星架坡嘅主導語言，星架坡人日常工作同生活，都係以英文為主要語言。另外，洋涇濱文情況非常普遍，因此，新加坡政府發起咗「講正確英語運動」，鼓勵國民學講、多講以英式英文同美式英文為標準嘅英文（睇星式英文）。

宗教

實利·馬利亞曼印度廟

星架坡係一個多元民族、多元文化嘅移民社會，亦因此彙集咗世界上多種宗教。

86%嘅星架坡人有宗教信仰。

• 佛教：星架坡第一大宗教。約佔人口嘅30%，信徒基本上係唐人。
• 伊斯蘭教：馬來血統同巴基斯坦血統嘅人基本上都係穆斯林，有34.8萬人，全國有約80座清真寺。著名嘅有花蒂瑪清真寺同蘇丹清真寺。
• 基督教同天主教：10歲以上信徒28.5萬人（佔12.6%），係星架坡唯一重增長緊嘅宗教。有186座教堂。星架坡最早嘅教堂係禧街嘅阿美利安教堂同聖安德烈路嘅聖安德烈教堂。
• 道教：佔人口嘅13%，信徒基本上係唐人。
• 印度教：有教徒8萬幾人，基本上係印度裔。印度廟22座。

其他宗教人數較少，合計只有1萬1千幾人。錫克教係19世紀喺印度傳入嘅，教徒主要係錫克族警察、看守人，有7間錫克廟。好似奎因街嘅中央錫克廟。猶太教喺星架坡有兩個會堂。拜火教冇廟。星架坡雖然有宗教自由，但係對少數偏門宗系，好似耶和華見證人，仍然有所禁制。

經濟

中央商業區

1965年後星架坡經濟發展迅速，係新興嘅現代化工業國家。工業主要包括區內最大嘅煉油中心、化工、造船、電子同機械等。擁有著名嘅裕廊工業區。國際貿易同金融業喺新加坡經濟中扮演重要角色。星架坡目前係繼紐約，倫敦同東京之後國際上第四大外匯市場交易中心。運輸業發達，擁有全世界最繁忙嘅港口同機場。人民生活水平較高，人均國民生產總值超過三萬美元，居世界前列。旅遊業亦喺總體經濟結構中佔重要比重，遊客主要嚟自日本、中國、歐美同東南亞其他國家。

得益於呢個國家穩定嘅政局、廉潔高效嘅政府同較低嘅成本，早期星架坡係眾多跨國公司在東南亞投資嘅首選地。但係隨住人力成本嘅提高，同埋東南亞其他國家嘅相繼發展，星架坡嘅呢啲優勢逐漸喪失，好多工業、製造業紛紛外遷。但係由於英語嘅普及同高素質嘅人才，星架坡依然係區內最重要嘅金融中心。

但係受限於自身環境同埋全球經濟蕭條影響，2001年星架坡經歷建國後經濟狀況最乍抖嘅一年，GDP負增長2.2%，迫使政府開始考慮其他嘅發展道路。目前該國政府開始鼓勵私人創業同埋依靠中國及印度嘅崛起調整經濟結構，鼓勵企業到新興工業國家進行投資，但重未見成效。

旅遊業同樣係政府重點支持嘅產業，雖然近年來旅遊業頻頻受到打擊，歐美同日本旅客明顯減少，憑住良好嘅旅遊服務質量同豐富多元嘅文化，星架坡每年接待嘅外國遊客重有超過600萬人次。其中中國遊客數量增長最為顯著，主要係由於政府放寬中國公民簽證程序同埋延長逗留時間所致。為咗進一步鼓勵旅遊業嘅發展，星架坡好重視廉價航空行業嘅發展趨勢，除咗開兩間私營嘅廉價航空公司之外，亦鼓勵馬來西亞、泰國、印度尼西亞同埋澳州等國嘅廉價航空公司將新加坡列入目的地之中，亦表示願意降低樟宜國際機場對過往客機嘅收取費用。

交通

概要

星架坡交通發達方便，交通產業佔全國GDP總產值嘅10%左右。星架坡港嘅年噸位吞吐量，係居世界之冠，2004年全年達到10.4億噸，而以貨櫃數量嚟計算，就位居世界第二，達到2130萬個標準箱。

航空

樟宜機場

星架坡而家有5個機場，其中樟宜機場同實里達機場係國際民航機場；另外嘅巴耶利峇機場、三巴旺機場同登加機場等3個就用作軍事用途。

星架坡嘅樟宜機場亦係東南亞甚至全世界最繁忙嘅機場之一，亦係澳洲去歐洲航線嘅必停站。作為亞洲最繁忙嘅5個機場之一，樟宜機場嘅年旅客數已經突破3000萬人次。樟宜機場雖然已經有超過20年嘅歷史，但依然被評為全世界最舒適嘅機場之一，目前擁有2個候機樓同兩條跑道，第三個候機樓就喺度起緊。估計到2008年，樟宜機場嘅年過境旅客人數就會達到6670萬人次。

重有，星架坡北部嘅實里達機場而家擁有一條長達1620米嘅跑道，專門連接鄰近國家嘅旅遊景點嘅定期航班、團體包機或者接待私人飛機，喺2005年，有關當局計劃擴展跑道到2000米，用嚟接待波音737級數嘅客機，佢係新加坡第一個國際民用機場。

巴耶利峇空軍基地，擁有一條長達3760米嘅跑道，係畀外國空軍到訪時使用。據了解，美國空軍經常喺呢個空軍基地停留。新加坡另外重有三巴旺空軍基地同登加空軍基地。

公共運輸與公路交通

列車喺友諾士地鐵站

星架坡本島嘅軌道及公路完善，擁有10多條高速公路貫穿全島。重有公共交通同樣發達，而家開通咗3條地鐵線，重有一條起緊；巴士路線有成百條，由兩間巴士公司經營，分別係新捷運同SMRT巴士。祇係新捷運較常故障。

私家車普及率喺星架坡係好高，主要係由於政府嘅諸多限制措施。私人買車必須首先競標攞到數量有限嘅擁車證，一張擁車證嘅價格就已經相當於一架普通進口轎車嘅價格。另外新加坡亦係全球第一個用電子收費站嘅國家，喺入去市中心嘅道路上架設自動電子收費系統，喺高峰時段入去市中心嘅車輛就要自動畀錢。由於買私家車嘅成本太高，再加上完善、方便嘅公共交通網絡，令到大多數星架坡人選擇唔買車，呢個現象有效咁解決咗其他都市普遍存在嘅交通擠塞問題。

教育

教育部總部

星架坡嘅教育制度同英國嘅制度好似，除咗語文科之外，其他科目都係用英文教嘅。一般讀完十到十一年嘅中小學之後，可以揀到初級學院、高中或者理工學院讀書，讀初級學院或者高中嘅學生，半數以上能夠升上國內大學。星架坡有五間理工學院同埋三所大專學府，其中新加坡國立大學同南洋理工大學係亞洲頗具名氣嘅學府。

每年星架坡都吸納唔少嚟自中國大陸同馬來西亞等地方嘅留學生升學，令星架坡成為亞洲嘅區域教育樞紐。

星架坡教育制度成日俾人批評過分依賴教材，扼殺咗有彈性嘅獨立思想空間。本土戲「小孩不笨」就針對呢個教育弊病拍成嘅。

住屋

大巴窯組屋夜景

内文：組屋

星架坡有八成四人住響政府樓，叫做組屋，價錢好平，只係私人樓嘅五分一到四分一。資格方面，家庭公民有優先權，唔係公民嘅永久居民排後面，而單身人士就要35歲後先至買得。星架坡組屋多數都係多層大廈，但係亦都有小量別墅式房屋。

飲食

勞明達熟食市場

星架坡人主要食飯多，但因為國內有三大民族（華人、馬來人、印度人），所以飲食文化相當多元化。而星架坡嘅食肆就以熟食市場為主，經濟實惠，除咗當地居民之外，唔少遊客都會幫襯。

出面網頁

• Visit Singapore
• Active Singapore
• 新加坡諮訊站