天后站

天后 Tin Hau

天后站1號月台

區 東區 地區 銅鑼灣

通車 1985年5月31號 站類 地底 月台類 2側式月台 月台數 2個 出口數 3個

途經 港島綫 代碼 TIH 服務時間 0559-0116 接駁交通 巴士、小巴、電車

街道圖 港鐵網 車站位置

天后站係香港一個鐵路站，喺港鐵港島綫之上。個站喺銅鑼灣東側，維多利亞公園東面，高士威道至英皇道地底。個名係因為附近有間銅鑼灣天后廟而得嚟嘅。喺個站起咗之後，銅鑼灣呢部份，亦都叫天后。舊時個站，附近有銅鑼灣街市。

車站結構

車站樓層

地面	-	出口、公共運輸交匯處
閣樓	行人通道	車站商店
		行人通道前往各出口
L1 大堂	大堂	客務中心、車站商店
		恒生銀行、自動售賣機、自動櫃員機
L3 月台	側式月台，左邊嘅車門將會打開
	➊	往柴灣
L5 月台	側式月台，右邊嘅車門將會打開
	➋	往上環

車站大堂

天后站係一個地底車站，共設有10條扶手電梯。其中8條連接大堂同各月台，其餘2條則往返車站大堂同A出口。2005年12月更整多1部升降機，方便乘客來往大堂同月台。另外，為節約能源，本站嘅10條扶手電梯中會有5條喺非繁忙時間期間暫停使用。

車站商店及自助服務

現時，天后站共設有3間車站商店，包括OK便利站、美心西餅及恒生銀行。另外，天后站更設有自動售賣機、恒生銀行及中銀香港嘅自動櫃員機（入閘後）以及香港郵政郵箱服務。

車站月台

天后站設有2個疊埋嘅側式月台，1號月台喺2號上面，設有月台幕門。由於大堂集中於車站中間，所以各月台設有3條通道往返扶手電梯及升降機嘅位置。

天后站2號月台全景（往上環方向）

車站出口

天后站英皇道A1出口

• A - 維多利亞公園
  • A1 - 巴士總站、香港銅鑼灣海景酒店、留仙街、銀幕街
    • 設有輪椅升降台及失明人士引導徑往返地面
  • A2 - 萬國寶通中心、電氣道、興發街、維多利亞公園
    • 設有失明人士引導徑往返地面
• B - 香港中央圖書館
  • 香港中央圖書館、英皇道、香港銅鑼灣維景酒店、栢景台、珀麗酒店、天后廟公園、天后廟道

鄰接車站

	港島綫
上環 - 中環 - 金鐘 - 灣仔 - 銅鑼灣 - 天后 - 炮台山 - 北角 - 鰂魚涌 - 太古 - 西灣河 - 筲箕灣 - 杏花邨 - 柴灣

接駁交通

喺天后站起嗰時，早已喺車站上蓋物業預留位置起公共運輸交匯處，方便乘客轉其他交通工具往返寶馬山等周邊地區。由於天后站屬於銅鑼灣嘅一部分，而銅鑼灣亦有其他總站，因此巴士總站做「銅鑼灣（天后）」以免混淆。

• 電車
• 城巴：
  • E11 - 銅鑼灣（天后） ↔ 亞洲國際博覽館
  • 其他路線：5、8X、10、25A、25C、41A、72、72A、76、77、96、592、A11
• 新世界第一巴士：
  • 15B - 天后站 ↔ 山頂（淨係喺假日提供服務）
  • 其他路線：2、2A、2X、8、8P、19、23、25、27、38、42、63、65、81
• 過海隧道巴士：
  • 914 - 銅鑼灣（天后） ↔ 海麗邨
  • 948 - 銅鑼灣（天后） ↔ 長安邨（淨係喺朝早繁忙時間提供服務）
  • 968 - 銅鑼灣（天后） ↔ 元朗（西）
  • 其他路線：102、103、106、108、110、112、116、170、307、601、603、619、671、680、681、690、692、962、969
• 專線小巴：
  • 39M - 天后站 ↔ 漁安苑
  • 49M - 天后站 ↔ 寶馬山（循環線）（八達通轉乘優惠）
  • 其他路線：56、69

利用狀況

由於天后站附近多數係住宅，除咗返工放工同返學放學繁忙時間外，平日較少人使用，係港鐵港島綫14個車站中人流較少嘅車站。由於呢個站同炮台山站非常接近，部分服務範圍同炮台山站重疊，乘客可以選擇用炮台山站或天后站，呢個亦係天后站客量偏低嘅間接原因。

然而，當維多利亞公園有大型活動（例如年宵市場及大型遊行）時，該站會有大量人流，甚至要實施人潮管制措施先至可以應付。2003年嘅七一遊行出發時間前後，因為大批市民搭地鐵前往維園集合，天后站曾經出現大型混亂。

此外，由於本站近住銅鑼灣 (天后) 巴士總站同埋銅鑼灣 (摩頓台) 巴士總站，因此該站亦有元朗、屯門、九龍西及港島南區居民及山頂嘅遊客搭巴士到呢個站轉港鐵港島綫。

車站歷史

早期系統及港島綫（1967-1985）

1967年，地鐵規劃港島綫初稿中，天后站嘅位置係炮台山區油街一段英皇道，以及七海商業中心嘅地底，同而家炮台山站位置相約。1980年，地鐵對港島綫嘅規劃作出更改，將原本嘅天后站一分為二，稱為域多利同炮台兩站。其中新增嘅域多利站位於銅鑼灣裁判署地底。兩站其後再分別改名做天后站及炮台山站，並喺1985年5月31號啟用。

銅鑼灣裁判署係一座富有殖民地色彩嘅建築。因應天后站工程，呢座樓要被拆毀。並喺1986年1月重建為栢景臺。

車站建築方式

車站承建商係日本熊谷組，售票大堂及月台隧道先後於1982年5月及9月開始動工。上層東行隧道以隧道盾挖掘建造；而下層西行隧道就用咗新奧地利隧道建造法，係首次使用呢種建造技術。兩者都係喺加壓環境下進行。

上一站‧下一站

上一站		港鐵		下一站
銅鑼灣 往上環		港島綫		炮台山 往柴灣

列車班次

月台	方向	列車班次（分鐘）						頭班車	尾班車
		平日上晝 繁忙時段	平日下晝 繁忙時段	星期六上晝 繁忙時段	星期六下晝 繁忙時段	星期六 非繁忙時段	平日非繁忙時段/ 星期日及公眾假期
➊	往柴灣	2	2.5	3	4-5			0615	0106
➋	往上環							0609	0050

第二啲嘢

Twins唱嗰首《下一站天后》，歌詞提及上一站銅鑼灣站嘅地區建設，但以天后站為目的地。