注意力

一個細路仔集中精神觀察緊隻蝴蝶。

一隻紅色領狐猴集中精神望住某啲嘢。

著西裝嗰個男人喺度同著波衫嗰個男人講緊嘢，但後者明顯並冇留心聽。

注意力（粵拼：zyu³ ji³ lik⁶；英文：attention）係指一系列嘅行為同認知過程，涉及一隻動物由接收到嘅資訊當中揀一部份出嚟集中處理，並且忽略嗰啲唔係集中處理緊嘅資訊：一隻動物（包括人類）嘅腦無時無刻都喺度接收緊大量嘅資訊，包括 由外界嚟嘅感官資訊同埋有關自身內部狀態嘅資訊；好多時，為咗要有效噉解決佢生存所需要解決嘅問題，隻動物要集中處理同佢生存最有啦掕嗰啲資訊，同時忽略嗰啲同佢生存冇乜啦掕嘅。認知心理學同神經科學等嘅領域都有對注意做仔細嘅研究，呢啲領域嘅科學家一般都興將注意力想像成一種有限嘅資源，由個腦決定要點樣分配落去唔同嘅資訊嗰度。