粵文

用粵文嚟寫：英文：Wikipedia is some good stuff

粵文（Jyut⁶man^4-2）（英文：Written Cantonese，粵語白話文 ，舊稱廣白（Gwong²baak⁶））係指跟從粵語嘅書面語，即係用粵語嘅文法、詞彙同粵字寫出嚟嘅文字，有別於（例如）用標準官話文法同詞彙寫嘅中文書面語。

粵語寫嘢早喺明末清初嗰陣已經有，1920年代到1930年代初亦風行一時，由二戰時期嘅限於傳統左派嘅方言文化運動，同埋普及得多嘅三及第行文方式，去到1980年代到而家響香港流行嘅「口語中文」，粵文有至少幾百年歷史。

粵文用字

内文：粵字同Wikipedia:粵語本字

粵語雖然有好長嘅歷史，但係自古以嚟，讀書啲人寫嘢嘅時候多數會用文言文。用喺粵語中嘅詞語，好少會寫低，又或者變咗音調。久而久之，啲人已經唔記得廣東話之中嘅詞語原字係點樣寫，有人以為廣東話根本就係有音無字嘅。

因此，為咗呢「有音無字」嘅字（或者，應該係唔知點樣寫嘅字），就會寫成同音字（應該係同音同調嘅字），好似「聽日」嘅 ting¹ 字，原本呢個字唔知係點樣寫，就用「聽」字嚟代替。另一個方法係用口字部首加同音嘅聲旁，例如「咁（gam³）」、「嘅（ge³）」、「嚿（gau⁶）」、「嚟（lai⁴）」等等。有陣時仲會造字，例子有「𨋢（lip¹）」字，呢個音譯自英文「lift」，解中文升降機。用「車」字部首，加個「立」字造出「𨋢」字。

喺1980年代，香港嘅電視節目《每日一字》有幾集都提到粵語有好多講法都好古雅。節目主持林佐瀚重去咗圖書館翻查呢啲字嘅正音、正寫，喺節目度介紹畀大家。有唔少嗰陣時俾人遺忘咗嘅古字，例如「攰」呢一個字就係咁樣翻生（喺《廣州話字典》入面，呢個字寫做「癐」）。由嗰陣時開始，香港嘅語文工作者就開始咗新一輪嘅「粵語正音運動」，重喺好多份報紙入面要求傳媒要「讀正音」。

比起其他嘅語言，由一開始到而家，粵語都係用漢字嚟寫嘅。

香港粵語

因為歷史嘅關係，香港一段時間俾英國統治，華人之間仍然用中文，大部份人用廣東話，廣東話一路影響寫嘅中文。到咗1970年代。

史

起源

冇人知幾時同邊個最先用粵語嚟寫嘢。Victor Mair 認為佛教係最早用通俗口語（vernacular）嚟寫嘢，因為佛教冇睇低通俗口語，覺得一樣可以攞嚟表達真理同佛陀嘅教化，佛教亦有口述嘅傳統，呢啲講學都直接寫低，可以保留神緒，大眾亦都容易明白。

明清時期

最早有粵語出版嘅書係木魚歌啲書（木魚書），木魚書可以追溯到明末清初，當時木魚書係用木板印出嚟，亦係粵語第一次有規模噉印。不過，木魚書裏便嘅「粵文」同今日寫嘅好唔同，喺啲文言之中間唔中夾埋幾個粵語用詞，其他好大部份嘅字都係文縐縐。木魚書嘅內容主要係同佛教有關嘅故仔，以導人向善為主。喺呢啲作品裏便比較出名嘅有《花箋記》：

……步轉西邊紅杏苑，只見嬌嬌紅杏鬥春芳。芳草萋萋迷去路，薔薇隱隱出高牆。好花總亦無心賞，輕輕移步轉蕓窗。點想東風送得棋聲到，細想誰人嗊在行。夜深尚有棋中興，悄聲移步入東方。遠望牡丹亭一座，花邊斜影見燈光。似有幾人花下立，笑語頻頻到耳旁。聲嬌必定風流女，隨風蘭麝過來香。行前仔細偷觀看，花間原有女娘行。湊著浮雲遮朗月，丫環錯認系姚郎。無去亭前報小姐，因此梁生得到石欄桿。睇見嬌姿人兩個，圍棋笑著對銀缸。南邊一個方披髮，入眼誰知斷客腸。料知不是凡塵女，好似天仙留意等劉郎。色膽就從今晚大，整衣前去見嬌娘。無想驚動玉人丟一下俏眼，做乜花林蕩出個少年郎？丟落圍棋齊舉步，梁生著意細觀看。只見杏眼時時關住我，芙蓉面色柳眉長。一點紅唇真俏麗，生成模樣斷人腸。春風陣陣羅裳卷，的息金蓮二寸長。佢總回頭開一下笑臉，我估呢條殘命死花旁！一對丫環跟主去，梁生如醉倚欄桿。姊妹二人攜玉手，沉吟無語轉香房。 ——明《花箋記（卷一）·四·棋邊相會》揀

方言文學運動

方言文學運動係中國共產黨1940年代利用方言做政治宣傳嘅一場運動。響唐人地方推行。

三及第

内文：三及第

應用面

最多用粵文寫嘢嘅地方就係香港嘅傳媒（例如報章）。

粵文亦會用喺電影字幕、劇本、漫畫等媒介。

喺網上討論區、社交媒體興起之後，以粵文寫作越趨普及，唔少人透過呢啲渠道發表粵文創作，例如議論文章、故事連載、漫畫、影片（如 youtube 字幕）、梗圖／迷因（meme）等等，當中有唔少人出實體書打入出版市場。

電話短訊同即時通訊軟體亦係粵文書寫嘅重要部份。

傳媒角色

粵語白話文（似乎係講緊「三及第」）嘅書面語，同粵語口語嘅文法、詞彙、句式吻合，一般認為佢嘅出現唔遲過標準官話中以官話口語為代表嘅白話文。1949年前，粵語地區，包括廣東、廣西同埋海外華人嘅社區民間，粵語白話文已經非常盛行，直至1950–60年代先至由政府規定嘅官話白話文取代。而家，香港、澳門同埋廣東、廣西各地民間仍然有唔少人用緊。港產電影嘅字幕亦多數係粵語白話文。讀起上嚟特別得意同貼近一般市民嘅生活。

已故香港作家黃霑有好多作品都係用粵語白話文寫作而成，譬如話散文集《不文集》、小說《香港仔手記》、歌詞《問我》等。許冠傑嘅歌曲中有相當部分用粵語白話文填詞。已故香港作家/填詞家林振強曾將徐志摩用官話白話文寫嘅詩歌翻譯成粵語白話文。

規範

由於欠缺政府嘅採納同支持，又缺乏專門嘅規範機構，好多人寫粵語白話文嘅時候成日出現錯別字，有時重會用同音字或者英文字母代替，令到書寫混亂。但係，約定俗成嘅「標準」都重係有嘅。喺第二次世界大戰前後，因為嗰時嘅粵劇係少數將粵語寫出嚟嘅文字紀錄，呢啲粵劇劇本或者戲院嘅電影介紹就成為咗唔官方嘅標準，得到大眾嘅認同。

喺1980年代，香港嘅電視節目《每日一字》有幾集都提到，其實粵語有好多字都好古雅。節目主持林佐瀚重去咗圖書館翻查呢啲字嘅正音、正寫，喺節目度介紹畀大家添。有唔少嗰陣時俾人遺忘咗嘅古字，例如「攰（gui⁶）」呢一個字就係噉樣翻生（喺《廣州話字典》入面，呢個字寫做「癐」，意思係疲）。由嗰陣時開始，香港嘅語文工作者就開始咗新一輪嘅「正字正音運動」，重喺好多份報章入面要求傳媒要「寫正字、講正音」。

爭拗位

雖然清末民初有四大白話，即韻白、京白、蘇白、廣白嘅稱呼，但可能係受民國初年白話文運動啲「白話文」作品嘅影響，一直有一啲意見認為，粵語就算有「廣白」都只係口語，有音無字，係唔能夠做書面語，而只有官話白話文係唯一嘅中文書面語。而好多香港人認為，筆寫粵語即係直接寫低口講嘅粵語。所以，呢篇文講嘅用粵語嘅文法、詞彙同埋粵字嚟行文嘅書面語嘅定義，對於佢哋未必成立。

喺香港社會上成日講「兩文三語」，當中兩文包括英文同統稱嘅「中文」，而三語則係英文、粵語同普通話。粵文冇得到特別噉分開列爲一種文字書寫方式，只係畀人當做係讀音唔同嘅方言。

而家廣東話嘅書寫仲係有好多嘅問題，譬如有音無字，一詞多寫，外來語素已經音系上粵化咗甚至衍生埋詞彙，但係都係寫唔到。呢類由漢字本身嘅文字系統缺陷同限制所衍生出嚟嘅問題，有人認為只可以透過採用漢字以外嘅文字系統先至可以寫出嚟。其中最為突出嘅方案包括粵文拉丁化，同粵切字方案。但亦有意見認為，粵文一旦動搖咗佢漢字專用嘅基礎，就會造成文化割裂。

現代發展

粵語文學

由香港本土主義嘅崛起，令到粵語文學嘅發展開始得到香港人重視，由以往只係追求識講，轉變到有人提出要用粵文書寫，例子有《迴響》粵語文學期刊，喺2020年開始推出，7月初出第一期。又譬如粵語第一本嘅蘇格拉底對話體哲學作品《麥花臣金將軍與白龍的對談》咁，打破咗廣東話缺乏哲學文學嘅局面。

粵語電腦技術

喺機械學習方面，2010年代以來，一直陸續有人將粵文整理成資料集，開發粵文為本嘅輸入法等等，其中2024年6月Google 翻譯正式加入粵文翻譯功能，可以算係其中一個里程碑。

睇埋

• 粵語
• 粵字
• 粵語正音運動
• 粵語文法
• 《最緊要正字》
• 白話文
• 標準官話