天外救星

天外救星（拉丁文：deus ex machina），又叫解圍之神或者神之解圍，係一種情節裝置，指故仔當中一個望落冇可能解決到嘅狀況突然噉由一個完全出乎意料同可能性低嘅事件解決。

天外救星嘅一個極端例子如下：主角俾魔王韞喺一個地牢入面，地牢嘅天花板有尖刺，而且慢慢噉向下移，主角冇計可施，只係有得等死（一個望落冇可能解決到嘅狀況）... 然後下一刻佢俾人傳送咗去一個椰林樹影、水清沙幼嘅沙灘嗰度，知有個（個故仔之前完全冇提過嘅）神仙貪得意用魔法變佢去沙灘^[1]。

有好多作家都認為，天外救星係一種極低水平嘅寫作技法^[2]。