土木工程

香港昂船洲大橋景色，背景係香港島同九龍半島

土木工程tou2 muk6 gung1 cing4係工程學嘅一個分支，負責設計、起、同埋維修人類生活嘅地方。土木工程整嘅嘢包括土地、樓宇、港口、路、橋等等基礎建設，亦負責供水、排污、排洪同埋環境管理以確保城市同村莊適合人類居住，而且能夠提供生活必需品。

正因為土木工程涉及成個建成環境，所以土木工程嘅學科同行業範圍好闊，包函好多唔同工種，下轄唔少專科。主要專科包括土力工程、結構工程、水利工程、環境工程同建築工程。土木工程同建築學、規劃、測量有密切聯繫，但一般睇成唔同行業，不過亦有行內人覺得呢啲行業應該合併成一個建成環境專業。

從事土木工程嘅專業人士叫土木工程師。

歷史

萬里長城慕田峪

土木工程呢樣嘢，自從人類由遊牧民族變成定居嘅群體開始就有。人類起樓、修橋起路嘅痕跡可以追溯到舊石器時代。古埃及、古印度、美索不達米亞全部都喺人類開始定居嘅時候就發展咗建築技術。漢字文化圈方面就有大禹治水同萬里長城等等嘅大型建設。直至歐洲中世紀，工程師、建築師同工匠之間並無清楚嘅分界。

現代土木工程學追溯自十七世紀歐洲。現代工程學相比起古代工匠做嘅嘢，最大分別就係現代工程學會用計量嘅方法嚟設計。意大利嘅伽利略用數學公式表達樑嘅設計理論；英國嘅牛頓繼而發展力學。法國嘅納維再改良佢哋嘅理論，成為今日結構工程學嘅基礎。英文同法文叫「土木工程」做「民事工程」（英文：civil engineering、法文：génie civil），因為土木工程起嘅路、橋、水塘等等多數係民用建築，傳統上同軍事工程對立。

十九世紀以來，鋼筋石屎興起，煉鋼技術又越嚟越精湛，令到鋼同埋石屎成為土木工程最常用嘅結構材料。電腦近年普及，帶挈電腦輔助設計嘅發展，使到畫圖同埋修改設計嘅工序越來越簡單。電腦嘅計算能力越來越勁，令土木工程師可以用有限元素法去分析同設計形狀複雜嘅建築，唔再俾基本幾何形狀局限。

分支

土木工程可以按學術範疇大致分成四個專業：結構工程、岩土工程、環境工程、同埋建設工程。另外又按應用範疇分成唔同嘅專業，例如海事工程、地震工程、交通工程、水利工程等。

結構工程

結構工程利用結構設計同結構分析嘅方法去設計各種嘅設構，例如橋、屋、鑽油台等等。佢哋用嘅方法建基於力學，基本上就係由一個建築物需要承載嘅力諗起，然後搵啱嘅物料同大細去將啲力傳去一個穩陣嘅地基。

岩土工程

岩土工程專責處理泥同石，諗點樣用佢嘅力學嚟承載建築物。故此岩土工程有時又叫做土力學或者土力工程。岩土工程負責處理地基、隧道、路基、地牢，同埋其他人造建築物需要接觸天然泥石嘅地方。

環境工程

環境工程負責處理人造結構同埋大自然之間嘅互動，尤其是風同水。環境工程師要處理樓宇點通風、點供水，一條村點排洪，一個新市鎮點做生態保育等等嘅技術問題。

建設工程

好多土木工程分支都聚焦喺「起乜」同埋「夠唔夠力」嘅問題度，而唔係處理「點起」。建設工程就專諗一幢建築物究竟起緊嘅時候點算，要用咩次序起，地盤出入應該點安排，需要點樣嘅物流支援，同埋要用乜嘢臨時工事。建設工程可以話係土木工程嘅分支，但佢哋用嘅技術其實更接近製造工程同運籌學。

專業資格

土木工程係一個專業，喺世界大部分地方都受政府同埋專業工會監管。土木工程師嘅專業訓練一般由大學學位開始，學生會喺大學度學工程理論，並需要去地盤或者設計寫字樓實習。大學畢業之後，新晉工程師要喺工程機構返工，吸取經驗，再考專業資格。入行條件同埋監管程度視乎地區而異。