唔道德管家嘅比喻

唔道德管家嘅比喻係耶穌講嘅一個比喻，記載喺《新約聖經》《路加福音》第16章第1至13節。

聖經譯文

「	耶穌又對門徒話：「某財主有一個管家，有人向主人告管家浪費佢嘅財物。主人叫佢來，對佢話：『我聽到喇，你做嘅係咩事？將你所經管嘅交代清楚，你唔能夠再做我嘅管家喇。』管家心裏面諗：『主人要辭退我，唔畀我再做管家，我以後去做乜嘢呢？鋤地，我冇力；乞食，怕難為情。我知點做喇，等啲人喺我唔做管家之後，接我去佢哋屋企度住。』於是佢將欠佢主人債嘅，一個一個噉叫咗來，問頭一個話：『你欠我主人幾多？』佢話：『一百簍油。』管家對佢話：『拎你嘅賬簿，快啲坐低，寫五十。』佢問另一個話：『你欠幾多？』佢話：『一百石麥子。』管家對佢話：『拎你嘅賬簿，寫八十。』主人就讚呢個唔道德嘅管家咁聰明，因為今世嘅人應付自己嘅世代比光明嘅人更加精明。我又話你哋知，要藉住嗰啲唔道德錢財結交朋友，到咗錢財冇用嘅時候，佢哋可以接你哋去永遠嘅住處。人喺最小嘅事上忠心，喺大事上亦忠心；喺最小嘅事上唔誠實，在大事上亦唔誠實。若果你哋喺唔道德錢財上唔忠心，邊個會將嗰啲真實嘅錢財交託畀你哋呢？如果你哋對屬於人哋嘅嘢唔忠心，邊個會將你哋自己嘅嘢畀你哋呢？一個僕人唔能夠服侍兩個主；佢唔係憎呢個愛嗰個，就係睇重呢個輕視嗰個。你哋唔能夠又服侍上帝，又服侍瑪門。	」
——《路加福音》16章1至13節

解釋

耶穌喺呢個比喻裏面，設有三種人，財主代表上帝，管家代表主嘅僕人，兩個欠債人代表犯罪欠債嘅人，由於呢個唔道德嘅管家，佢對主人唔忠心，嘥咗主人嘅財物，唔能夠向主人交代清楚，主人就將佢辭退，佢為咗打算自己將來嘅去路，於是佢將欠佢主人債嘅人叫來，擅自將債額減低，將一個欠一百簍油嘅人，減少五十簍（每簍大概五十斤），又將一個欠一百石麥子嘅，減少二十石（每石大概九十加侖）。佢噉做嘅意思係而家主人將佢放棄，將來會有其他人能夠接待佢，可以有其他地方去。主人就讚呢個唔道德嘅管家咁聰明，主人並唔係讚賞呢個人古惑嘅行為，不過係覺得佢夠精明，早有預備，趁住而家嘅時機，造成將來嘅幸福。今世嘅人乃係指唔信上帝嘅世人，光明嘅人乃係指已經信上帝嘅人。耶穌喺教訓門徒點樣藉住用世人嘅錢財，結交朋友，賙濟貧窮，行出善事，經營將來永遠嘅好處，所以耶穌唔係叫門徒用呢個唔道德管家所做嘅行為，而係要好似佢咁聰明，並且教訓人，無論喺最小嘅事上，或喺最大事上都要忠心，意思乃係人嘅忠心唔在乎佢所受嘅交託有幾多，乃係在乎佢要盡責任嘅觀念，要盡力做好自己嘅本分。