警醒僕人嘅比喻

出自維基百科,自由嘅百科全書
Jump to navigation Jump to search
Teachings of Jesus 32 of 40. the faithful and wise steward. Jan Luyken etching. Bowyer Bible.gif

警醒僕人嘅比喻係耶穌講嘅一個比喻,記載喺《新約聖經》《馬太福音》第24章第42至51節、《馬可福音》第13章第34至37節、同埋《路加福音》第12章第35至48節。

聖經譯文[編輯]

所以,你哋要警醒,因為你哋唔知道主喺邊一日來到。你哋要知道,一家嘅主人若果知道夜晚乜嘢時候有賊來,就必定會警醒,唔畀賊破門而入。所以,你哋都要預備好,因為喺你哋估唔到嘅時候,人子就來到。噉樣,邊個係嗰個忠心又精明嘅僕人,主人派佢管理其他僕人、按時候分配糧食畀佢哋呢?主人返到來,睇見僕人噉樣做,嗰個僕人就有福喇。我實在話你哋知,主人要派佢管理所有嘅財產。如果嗰啲惡僕心裏面話:「我嘅主人實冇咁早返來」,就郁手打佢嘅同伴,又同醉酒嘅人一齊飲飲食食,喺估唔到嘅日子,唔知道嘅時候,嗰個僕人嘅主人要來,重重噉懲罰佢,定佢同假冒為善嘅人同罪,喺嗰度要喊,咬牙切齒。

——《馬太福音》24章第42-51節

呢件事正如一個人出外遠行,授權畀班僕人,分派每一個人嘅工作,又吩咐看門嘅人要小心門戶。所以,你哋要警醒,因為你哋唔知道主人會喺幾時返來,可能係挨晚,可能係半夜,可能係雞叫嘅時候,可能係朝早,唔好俾佢突然返到來,睇見你哋瞓着咗。我對你哋所講嘅嘢,係對眾人講嘅:要警醒!

——《馬可福音》13章第34-37節

你哋要綁緊腰帶,燈都要點着,好似僕人等候自己嘅主人喺婚宴返來。佢敲門,就即刻開門畀佢。主人返到來,睇見僕人警醒,嗰啲僕人就有福喇。我實在話你哋知,主人會叫佢哋坐低食飯,自己綁上腰帶,親自服侍佢哋。佢或者係半夜來,或者天光之前來,睇見僕人噉樣,嗰啲僕人就有福喇。你哋要知道,一家嘅主人若果知道幾時有賊來,佢一定唔會畀佢破門而入。你哋亦要準備好,因為喺你哋估唔到的時候,人子就來到。彼得問:「主呀,呢個比喻係對我哋講嘅?定係對全部人講架?」耶穌話:「噉樣,邊個係嗰個忠心又精明嘅管家,主人要派佢管理自己嘅家僕,按時候分配糧食畀佢哋呢?主人返到來,睇見僕人噉樣做,嗰個僕人就有福喇。我實在話你哋知,主人要派佢管理所有嘅財產。如果嗰個僕人心裏面話:『我嘅主人實冇咁早返來』,就郁手打其他僕人同使女,並且飲食醉酒,喺估唔到嘅日子,唔知道嘅時候,嗰個僕人嘅主人要來,重重噉懲罰佢,定佢同唔忠心嘅人同罪。僕人知道主人嘅意思,但係唔預備,亦唔照佢嘅意思去做,嗰個僕人就要受鞭打;至於嗰啲唔知道主人嘅意思,而做咗應該受鞭打嘅事嘅僕人,會受比較輕嘅鞭打。多畀邊個,就向邊個多收;多交託邊個,就向邊個多要。」

——《路加福音》12章第35-48節

解釋[編輯]

呢個比喻從僕人等候主人返來嘅態度,就知道佢嘅真性情。一個係好嘅、忠心嘅僕人,另一個係壞嘅、懶惰嘅僕人。懶人嘅特點係佢唔係唔會預備,而係心裏面諗:「重有聽日」,等到主人就快返來嘅時候先至預備。佢用心計較盤算主人嘅時間,自以為聰明反而成為愚拙。好僕人嘅特色就係依照主人嘅吩咐按時候分配糧食,佢隨時預備好主人返來,係忠於職守可以信靠嘅僕人,主人將賦予佢新嘅權柄去管理一切所有嘅。而壞僕人將要自食惡果,受到極重嘅懲罰,因為佢虐待佢嘅同伴[1]

參考[編輯]