才幹嘅比喻

出自維基百科,自由嘅百科全書
Jump to navigation Jump to search

才幹嘅比喻係耶穌講嘅一個比喻,記載喺《新約聖經》《馬太福音》第25章第14-30節、《路加福音》第19章第11至27節,係關於末日耶穌再來嘅一個比喻。

聖經譯文[編輯]

天國又好比以下嘅故事:一個人要出去外國,佢叫僕人來,將產業交畀佢哋,佢按照佢哋各人嘅才幹,分錢畀佢哋,一個畀五千,一個畀二千,一個畀一千,然後就出國喇。嗰個領五千嘅,立刻出去做生意,另外賺咗五千;嗰個領二千嘅,亦都另外賺咗二千;不過嗰個領一千嘅,喺地下挖一個窿,將主人嘅錢埋起。過好耐,僕人嘅主人返來,同佢吔算賬。嗰個領五千嘅,帶住另外嗰五千,話:「主人,你畀我五千,你睇,我又賺咗五千。」主人話:「好,你個又善良又忠心嘅僕人,你喺小事都忠心,我要委託更大嘅事派你管理,入來同你嘅主人一齊分享快樂。」嗰個領二千嘅入來,話:「主人,你畀我二千,你睇,我又賺咗二千。」主人話:「好,你個又善良又忠心嘅僕人,你喺小事都忠心,我要委託更大嘅事派你管理,入來同你嘅主人一齊分享快樂。」嗰個領一千嘅亦都入來,話:「主人,我知道你係個嚴厲嘅人,你喺冇栽種嘅地方亦要收割,冇撒種嘅地方亦要收聚。我驚起嚟,所以將你嘅錢埋喺地下。你睇,你嘅錢係呢度。」佢嘅主人話:「你個又惡又懶嘅僕人,既然你知道喺冇栽種嘅地方亦要收割,冇撒種嘅地方亦要收聚,就應該將我嘅錢存入銀行,等我返來嘅時候,可以連本帶利一齊收返。你哋將佢嘅錢拎過來,畀嗰個有一萬嘅。因為嗰啲已經有嘅,要畀更多佢,等佢豐富有餘;而嗰啲冇嘅,連佢所有嘅都要奪去。至於呢個無用嘅僕人,將佢趕出去外面黑暗嘅地方,喺嗰度要喊,咬牙切齒。」

——《馬太福音》25章第14-30節

耶穌話:「有一個貴族要去遠行,為咗要得到王位,然後返來。佢叫咗自己嘅十個僕人來,交畀佢哋十個金幣,話:『你哋去做生意,直到我返來。』佢本國嘅百姓都好憎佢,打發使者跟住佢去,話:『我哋唔想呢個人做我哋嘅王。』佢得到王位返來之後,就吩咐嗰啲領過金幣嘅僕人來,要知道佢哋做生意賺咗幾多。』頭一個上來,話:『主人,我用你嘅金幣賺咗十個金幣。』主人對佢話:『好,你係個善良嘅僕人,你既然喺最小嘅事上忠心,你有權柄管理十座城。』第二個來,話:『主人,我用你嘅金幣賺咗五個金幣。』主人對佢話:『你亦都可以管理五座城。』又有一個來話:『主人!睇吓,你嘅金幣喺呢度,我將佢包喺手巾度保存住。我一路都驚你,因為你係嚴厲嘅人:唔屬於你嘅,你要拎走;未有種嘅,都要去收割。』主人對佢話:『你呢個惡僕,我要用你講嘅嘢定你嘅罪。你既然知道我係嚴厲嘅人,拎走唔屬於我嘅嘢,收割我未有種嘅,點解唔將我嘅金幣存入銀行,等我返來嘅時候,可以連本帶利都收返呢?』於是佢對嗰啲企喺旁邊嘅人話:『將佢嘅金幣拎過來,畀嗰個有十個嘅。』佢哋對佢話:『主人,佢已經有十個金幣喇。』主人話:『我話你哋知,凡有嘅,要畀更多佢;冇嘅,連佢所有嘅都要奪去。至於我嗰啲仇敵,唔想我做佢哋嘅王嘅,將佢哋帶來,喺我面前殺咗佢哋!』」

——《路加福音》19章第11-27節

解釋[編輯]

呢個比喻係講到「天國」嘅特性。耶穌提到有一個主人,喺出國之前,將僕人叫到佢面前,希望將佢嘅「財產」交畀僕人,由佢哋負責管理。佢想試用僕人嘅才幹,於是將錢分畀佢哋。錢分幾多就因人而異,乃係按照各人嘅才幹而分配。其中一個人分到五千,另一個分到兩千,而第三個僕人就分到一千。佢哋對呢個責任作出嘅回應,喺呢個比喻裏面佔咗重要嘅分量。第一個僕人好認真噉負起佢嘅責任,利用呢筆錢財去做生意,為咗佢哋主人嘅財富同利益而勤力做嘢。第二個僕人都照樣噉去做。呢兩個僕人都分別賺到主人分畀佢哋一倍嘅錢。第三個僕人因為懶惰嘅性格,而將主人畀佢嘅錢埋喺地下而唔去搵忠誠服事主人嘅機會。

過咗一段好長嘅時間之後,主人就返來。佢就同僕人算賬,要清算僕人經營佢錢財嘅結果。頭兩個僕人都過去同佢講好消息,而獲得主人嘅稱讚同獎賞。主人嘅評語係:「又善良又忠心嘅僕人。」「善良」係指佢哋已經做咗僕人應該要做嘅嘢;而「忠心」係指佢哋所做嘅係為主人嘅利益着想。至於嗰個將錢埋喺地下嘅唔忠心僕人,主人好嬲叫佢做:「又惡又懶嘅僕人」,將佢所有嘅錢都收返,並將佢趕出去外面黑暗嘅地方,呢個係佢應得嘅結果[1]

參考[編輯]