唔饒恕人嘅惡僕嘅比喻

出自維基百科,自由嘅百科全書
跳去: 定向搵嘢

唔饒恕人嘅惡僕嘅比喻係耶穌講嘅一個比喻,記載喺《新約聖經》《馬太福音》第18章第21至35節。呢個比喻通過惡僕嘅反面事例,話畀人知我哋需要好似上帝寬恕罪人一樣噉樣寬恕周圍嘅人。

聖經譯文[編輯]

嗰時,彼得來問耶穌:「主呀,我嘅弟兄得罪我,我應該饒恕佢幾次呢?七次夠未?」耶穌話:「唔係七次,係七十個七次。因為天國好比以下嘅故事:有一個王要同佢嘅臣僕結帳。佢開始算帳時,有人將一個欠佢一千萬嘅臣僕帶到佢面前。因為呢個人冇錢還債,王就下令將佢賣做奴隸,連同佢嘅老婆仔女,同一切所有嘅都要賣嚟還債。個僕人喺王面前跪低,衰求話:『請寬容我啦!我一定會將一切債務都還清。』王可憐佢,免佢嘅債,而且將佢釋放。「嗰個僕人出去之後,遇見一個同伴,呢個同伴欠佢十兩銀子,佢就捉住佢,揸住佢嘅喉嚨,話:『將欠我嘅錢還畀我!』佢嘅同伴跪低,哀求佢話:『請寬容我,我一定會還清嘅。』佢唔肯,反而押佢落監,等佢還清欠款。其他同伴見呢件事嘅經過都好唔開心;佢哋去見王,將成件事向佢報告。於是王叫嗰個僕人來,對佢話:『你呢個惡奴,你向我要求,我就免你所有嘅債.你唔應該寬容你嘅同伴,好似我寬容你一樣咩?』王就好嬲,將佢關入監獄受刑,等佢還清全部嘅債。」耶穌話:「若果你哋唔肯真心饒恕你嘅弟兄,我天父亦都要噉樣對待你哋。」

——《馬太福音》18章21-35節

解釋[編輯]

喺耶穌所講嘅呢個比喻裏面,王係代表上帝,僕人係代表我哋。上帝按照自己嘅形像創造咗人,而人卻因為犯罪墮落「虧缺咗神嘅榮耀」(羅馬書3章23節)。我哋都好似比喻裏面嗰個僕人一樣,欠咗上帝嘅債,並且靠住我哋自己永遠都冇辦法還清,按照上帝公義嘅法則我哋每個人都係只有死路一條。但係,上帝憐憫我哋,藉住佢嘅仔耶穌基督嘅寶血洗淨咗我哋嘅罪,饒恕咗我哋一切嘅過犯。

上帝已經饒恕咗我哋嘅過犯,上帝都盼望我哋能夠饒恕嗰啲傷害我哋嘅人,並且噉樣嘅饒恕唔單止係口頭上或者行為上嘅,而應該係發自內心嘅。從心裏饒恕傷害我哋嘅人,就係唔再記住對方嘅仇恨,唔再諗起對方嘅過錯。

僕人得到主人白白嘅恩典,免除咗佢嘅一筆巨債,不過佢就唔識得以恩典對待同伴,唔識得寬容同伴欠佢嘅錢。耶穌借住呢個比喻,教導我哋:要樂於饒恕人,好似我哋白白得到上帝嘅饒恕一樣;上帝以寬容、仁慈對待我哋,我哋都應該要噉樣做。