浪子嘅比喻

出自維基百科,自由嘅百科全書
Jump to navigation Jump to search

浪子嘅比喻係耶穌講嘅一個比喻,記載喺《新約聖經》《路加福音》第15章第11-32節。呢個故事係《路加福音》第15章裏面耶穌嘅比喻「三部曲」嘅最後一個,前面兩個比喻係迷羊嘅比喻唔見錢嘅比喻

聖經譯文[編輯]

耶穌繼續話:「一個人有兩個仔。細仔對佢阿爸話:『阿爸,請你將我應得嘅產業分畀我。』佢阿爸就將產業分畀佢哋。過幾日,細仔就帶住錢,去好遠嘅地方。喺嗰度揮霍無度,過放蕩嘅生活。當佢花盡一切所有嘅,嗰個地方發生嚴重饑荒,佢就一窮如洗。只好去投靠當地嘅一個居民;嗰個人打發佢到自己嘅農場去看豬。佢恨不得拎餵豬嘅豆莢充飢,但係,連呢啲都冇人畀佢。最後,佢醒悟過嚟,就話:『我阿爸處有好多雇工,佢哋糧食充足,我反而喺呢處餓死咩?我要起身,返去阿爸度,對佢話:阿爸!我得罪天,又得罪你;我再唔配做你嘅仔,請將我當做你嘅雇工啦!』 於是,佢起身返去阿爸度。佢離開屋企仍然好遠,佢阿爸見到佢,心裏面充滿憐憫,迎向前去,緊緊攬住個仔同錫佢。仔話:『阿爸!我得罪天,又得罪你,我再唔配做你嘅仔。』但係阿爸吩咐僕人話:『快啲拎最好嘅衫畀佢着,拎戒指畀佢帶,拎鞋畀佢着; 然後拉隻肥牛嚟劏,等我哋設宴慶祝!因為我呢個仔係死而復活,失而復得嘅。』佢哋就開心起嚟。嗰時,大仔喺農場返來,離屋企冇幾遠,聽見音樂同跳舞嘅聲, 佢叫一個僕人過來,問佢發生咩事。僕人答話:『你細佬返來,你阿爸因為見佢冇災冇病返來,將肥牛劏咗。』大仔就好嬲,唔肯入去;佢阿爸就出來勸佢。佢對阿爸話:『我服事你咁多年,從來冇違背過你嘅命令,連一隻山羊仔等我同朋友熱閙一番都未有過。但係你呢個仔,佢將你嘅財產都花喺娼妓身上,佢一返來,你反而為佢劏咗隻肥牛。』阿爸對佢話:『仔呀!你成日同我一齊,我一切所有嘅都係你嘅;但係你細佬係死而復活、失而復得嘅,我哋為佢宴慶祝係應該嘅。』」

——《路加福音》15章第11-32節

解釋[編輯]

呢個比喻講到一個人有兩個仔,細仔向佢阿爸要求將應得嘅家業分畀佢,然後佢就去好遠嘅地方,揮霍無度,過放蕩嘅生活。後來啲錢用晒,嗰度又發生大饑荒,喺噉樣嘅打擊之下,佢可以話係走投無路,投靠無門。無可奈何,為咗生活,佢去咗個農場做看豬,證明佢已經陷入絕望嘅困境之中。

細仔喺艱難嘅時刻裏面,醒悟過嚟,諗起自己屋企嘅溫暖。當一個人能夠醒悟就會有轉機,於是佢下定決心要返屋企。佢唔敢以仔嘅身份要求被接納,而係以最低級嘅雇工身份請求收容。阿爸卻畀佢一種驚人嘅看待,熱切為細仔籌備歡迎會,以迎接貴賓場合嚟準備一切。正係遠遠超過細仔嘅所求所諗,形成咗兩種鮮明嘅對比。

大仔喺田度做完嘢返來,聽到屋企度音樂跳舞嘅歡笑聲,極之驚訝。因為自從細佬離開屋企之後,已經冇歡樂嘅聲音。當僕人話佢知,阿爸因為細仔平安無事噉返來,感到無比嘅喜樂而設宴慶祝,大仔嘅反應係好嬲同好唔滿意。認為阿爸唔公平噉對佢,冇畀佢應得嘅待遇。大仔代表驕傲而自義嘅法利賽人,認為自己先至配得係模範嘅仔。阿爸唔會因為大仔冷漠嘅態度,而放棄迎接細仔嘅主意。呢個比喻解釋上帝對罪人回轉嘅歡迎同接納[1]

參考[編輯]