迷羊嘅比喻

迷羊嘅比喻係耶穌講嘅一個比喻，記載喺《新約聖經》《馬太福音》第18章第12至14節、《路加福音》第15章第3至7節。呢個故事係《路加福音》第15章裏面耶穌嘅比喻「三部曲」嘅第二個，另外兩個比喻係唔見錢嘅比喻同浪子嘅比喻。

聖經譯文

「	一個人若果有一百隻羊，其中一隻走失咗，你哋嘅意見係點？佢唔通留低呢九十九隻喺山上，去搵嗰隻走失咗嘅羊咩？若果係搵到，我實在話畀你哋知，佢為呢一隻羊好開心，比起嗰啲冇走失嘅九十九隻嘅喜樂重大呀！你哋嘅天父都係一樣，唔願意任何一個微小嘅人走失。	」
——《馬太福音》18章12至14節

「	你哋中間有一百隻羊，其中一隻走失咗，噉點算呢？佢要將其他九十九隻羊留喺草場，去搵走失咗嗰隻，直至搵到為止。搵到，佢就非常開心，將羊托上佢膊頭，帶返屋企，然後邀請朋友鄰舍，對佢哋話：「我好開心，我嗰隻走失咗嘅羊已經搵到喇，你哋來同我一齊慶祝啦！」同樣，我話你哋知，一個罪人悔改，喺天上嘅喜樂會比已經有九十九個無需悔改嘅義人所有嘅喜樂重大呀！	」
——《路加福音》15章3至7節

解釋

猶太地牧羊人嘅使命，艱難而且危險。因為有陡峭嘅懸崖同荒涼嘅沙漠。草原上並冇欄柵，因此羊極容易走失。耶穌講咗一個迷羊的比喻：有一個牧人擁有一百隻羊，走失咗一隻。佢唔會為咗嗰九十九隻安全嘅羊感到滿足，反而穿山越嶺，千辛萬苦將嗰隻迷路嘅羊搵返來。佢雖然已經筋疲力盡，仍然帶住喜樂嘅心將羊托上佢膊頭。呢種係失而復得嘅喜樂經歷。當一個人搵到佢唔見咗嘅嘢，一定會樂於同人分享呢份無比嘅喜樂。呢個比喻解釋一個罪人悔改，上帝嘅喜樂就好似牧羊人搵返迷路嘅羊咁喜樂。人可能會對罪人表示放棄，不過上帝卻唔會噉樣。