謙卑同待客之道嘅比喻

出自維基百科,自由嘅百科全書
Jump to navigation Jump to search

謙卑同待客之道嘅比喻係耶穌講嘅一個比喻,記載喺《新約聖經》《路加福音》第14章第7至14節。

聖經譯文[編輯]

耶穌見到所請嘅客人要坐頭位,就用比喻對佢哋話:「人哋請你去婚宴嘅時候,唔好坐喺頭位度,主人有機會請咗個比你尊貴嘅客人,請咗你同佢嘅嗰個人過來,對你話:『請讓座畀呢一位啦!』你就好尷尬噉退到最尾嘅位。人哋請你嘅時候,去坐喺最尾嘅位度,等主人來對你話:『朋友,請上來座。』噉樣,你喺同席嘅人面前就有光彩。因為凡自高嘅,必降為卑;自甘卑微嘅,必升為高。」耶穌又對請佢嘅人話:「你準備午餐同晚餐,唔好請你嘅朋友、弟兄、親屬同有錢嘅鄰舍,以免佢哋請返你,你就得到報答。你擺設宴席,要請嗰啲貧窮嘅、殘廢嘅、跛嘅、盲嘅,你就有福喇!因為佢哋無能力報答你。喺義人復活嘅時候,你要得到報答。」

——《路加福音》14章7至14節

解釋[編輯]

耶穌用一個比喻,指出爭奪高位嘅危險,斥責社交上嘅驕傲。通常筵席上所擺設嘅座位係有唔同嘅層次,主人右邊嘅位係最重要嘅,主人左邊嘅第一個位係第二重要嘅,跟住嘅次序有唔同嘅重要性,主人會將尊貴嘅位留畀佢所睇重嘅人。當我哋做客人嘅時候,最好唔好爭搶頭位,先坐喺尾位度,等主人邀請你上來坐嘅時候,你會覺得因為你嘅謙虛而帶來更大嘅光彩。耶穌講呢個比喻,乃係教導眾人,要學習真正嘅謙卑。喺上帝嘅眼中,一個自私自利、自以為是嘅人,係唔配得尊榮。自高意味住最終必降為卑微,真正升高嘅道路係謙卑自己。

耶穌教導被請嘅人點樣做客人,跟住就指示家主點樣做主人。當擺設筵席請客嘅時候,要知道邀請嘅對象同動機。當時擺設筵席嘅目的,係請嗰啲有財勢、有地位,或者同佢哋有關係嘅人,因此可以有回報。耶穌並冇禁止正常嘅社交生活,佢只係強調,唔好期望要有回報。耶穌建議要佢哋喺請客嘅事上,亦都遵行天國嘅道理。應該邀請嗰啲貧窮嘅、殘廢嘅、跛嘅、盲嘅人參加,因為呢四種人係冇機會被邀請參加,亦都冇能力回報請佢嘅主人。請有錢人食飯可得到人嘅回報,但係請窮人食飯可得上帝嘅回報,噉樣先係真正嘅有福[1]

參考[編輯]