寡婦同法官嘅比喻

寡婦同法官嘅比喻係耶穌講嘅一個比喻，記載喺《新約聖經》《路加福音》第18章第1至8節。

聖經譯文

「	耶穌對門徒講咗一個比喻，為咗要佢哋時常禱告，唔可以灰心。佢話：「某城有個法官，唔敬畏上帝，又唔尊重人。城裏面有個寡婦，成日去佢嗰度，話：『我有一個冤家，麻煩你同我主持公度。』法官一直拖延，後來心裏面諗：『我雖然唔敬畏上帝，又唔尊重人，但係呢個寡婦係噉煩我，我就幫佢伸冤啦，廢事佢成日走來煩我。』」主話：「你哋聽呢個法官所講嘅嘢。上帝嘅子民日求夜求噉呼求佢，佢會拖延唔幫佢哋伸冤咩？我話你哋知，佢好快就會同佢哋伸冤。但係，人子來嘅時候，能夠喺世上搵到噉樣嘅信心咩？」	」
——《路加福音》18章1至8節

解釋

耶穌用寡婦同法官嘅比喻，教導人祈禱。有一個傲慢嘅法官，遇到一個寡婦去到佢嗰度求佢伸冤。法官對佢嘅申訴毫無興趣亦都無動於衷，但係因為呢個寡婦好堅持又唔放棄嘅態度，勸服咗呢位法官。法官照住佢嘅要求去做，並唔係出於崇高嘅動機，佢只係想擺脫呢個女人對佢嘅糾纏，受唔住佢嘅煩擾。可以睇得出呢個法官係好勉強噉幫佢，並唔係出於真正嘅憐憫同情，因為呢個法官係一個唔敬虔嘅人。上帝唔會好似嗰個法官噉，因為唔想受到煩擾而採取行動。上帝係毫無條件噉幫助世人，佢會聽人嘅祈禱。上帝對嗰啲不斷祈禱尋求佢嘅人，會對佢哋有公義嘅回答，因此我哋祈禱唔可以灰心，上帝鍾意人對佢持續嘅祈禱。