新舊嘅比喻

出自維基百科,自由嘅百科全書
Jump to navigation Jump to search

新舊嘅比喻係耶穌講嘅一個比喻,記載喺《新約聖經》《馬太福音》第9章第16至17節、《馬可福音》第2章第21至22節、同埋《路加福音》第5章第36至38節。

聖經譯文[編輯]

冇人將新布補喺舊衫度,因為新布補落去會扯爛嗰件舊衫,裂口就更加大。亦都冇人將新酒裝喺舊皮袋度,若果係噉,皮袋會裂開,酒就漏出嚟,連皮袋都損壞,所以,要將新酒裝喺新皮袋度,噉就兩樣都得到保全。

——《馬太福音》9章第16至17節

冇人將新布補喺舊衫度,若果係噉,補上去嘅新布會扯爛件舊衫,裂口就更加大。亦都冇人將新酒裝喺舊皮袋度,若果係噉,新酒會令到舊皮袋裂開,酒同皮袋都損壞。所以,新酒要裝喺新皮袋度。

——《馬可福音》2章第21-22節

耶穌又對佢哋講另一個比喻:「冇人撕爛件新衫,將撕落嚟嗰塊布補喺舊衫度,若果係噉,新衫撕爛咗,並且撕落嚟嘅嗰塊新布同舊嘅亦都唔相稱。亦冇人將新酒裝喺舊皮袋度,若果係噉,新酒會令到舊皮袋裂開,酒就漏出嚟,連皮袋都損壞,所以,新酒一定要裝喺新皮袋度。

——《路加福音》5章第36-38節

解釋[編輯]

當時猶太人嘅衫多數係毛布造嘅,呢啲原料好易縮水,一定要浸水縮細先可以補衫,若果用新布嚟補舊衫,係極唔相稱嘅,唔單止冇用,反而令到舊衫更加易爛,噉樣係一種愚蠢嘅方法,乃係指猶太人宗教外面嘅舊規矩同禮儀,同新嘅福音唔能夠混合嘅道理。

古時嘅猶太人,多數係用皮袋裝水同酒,呢啲皮袋多數係用山羊皮熟製而成,新酒一定要裝喺新皮袋度,只可以一次,因為舊皮袋逐漸變硬,若果再裝新酒,皮袋就會裂開,酒亦都會漏出嚟,呢個比喻係指猶太人舊宗教裏面嘅禮儀制度同內容。

耶穌所指新同舊之間唔能夠混合,乃係唔可以將福音新嘅時代規矩,加喺老舊猶太教嘅宗教禮儀法度裏面,以免招致重大嘅損害,而造成思想領受上嘅錯誤[1]

參考[編輯]