撒種嘅比喻

出自維基百科,自由嘅百科全書

撒種嘅比喻係耶穌講嘅一個比喻,記載喺《新約聖經》《馬太福音》第13章第3至9、18至23節、《馬可福音》第4章第2至8、13至20節、同埋《路加福音》第8章第4至8、11至15節。

聖經譯文[編輯]

佢用比喻向佢哋講解好多道理。佢話:「有個撒種嘅人出去撒種。撒種嘅時候,有啲落喺路邊,飛鳥就來將佢哋食咗。有啲落喺土淺嘅石地上面,因為泥土唔深,發苗好快,太陽一出,因為冇根就枯乾咗。有啲落喺荊棘裏面,荊棘生起來,就將幼苗偪住咗。又有落喺好嘅泥土度,就結出果實,有一百倍嘅,有六十倍嘅,有三十倍嘅。有耳可聽嘅,就應當聽!」

所以,你哋要明白呢個撒種比喻嘅意思,凡聽天國嘅道理但係唔明白嘅人正如撒喺路邊嘅種,惡者來到,將撒喺佢心裏面嘅道理奪去。嗰啲撒喺石地上面嘅種係指人聽咗道理,即時樂意接受,不過扎根唔深,唔能夠維持好耐,一旦為道理而遭遇困難或迫害,即時放棄。嗰啲撒喺荊棘裏面嘅係指人聽咗道理之後,生活嘅憂慮財富嘅誘惑窒息咗道理生機,唔能夠結出果實,嗰啲撒喺好嘅泥土度嘅種係指人聽咗道理就就明白,結出果實,收成有一百倍嘅、有六十倍嘅、有三十倍嘅。

——《馬太福音》第13章第3至9、18至23節

耶穌用比喻教導佢哋好多道理。喺教導之間,對佢哋話:「你哋留心聽!有一個撒種嘅出去撒種,撒種嘅時候,有啲落喺路邊,飛鳥就來將佢哋食咗。有啲落喺淺土嘅石地,因為泥土唔深,發苗好快,太陽一出,幼苗就曬乾,又因為根唔夠深,就枯乾咗。有啲落喺荊棘裏面,荊棘生起來,將幼苗逼住,唔能夠結出果實。有啲落喺好嘅泥土,就長大結實,收成有三十倍嘅,六十倍嘅,一百偣嘅。」耶穌又話:「有耳可聽嘅,就應當聽!」

耶穌又問佢哋:「你哋唔明白呢個比喻咩?噉樣,你哋點樣明白其他比喻呢?撒種嘅人撒嘅係上帝嘅信息,有啲人好似撒落喺路邊嘅,佢哋聽咗信息,撒旦即刻出來,將撒喺佢哋心中嘅信息奪去。另外有啲人好似落喺石地上嘅,佢哋聽見信息即時樂意接受,但係扎根唔深,唔能夠維持好耐,一旦為信息而遭困難或迫害,就即刻跌倒。又有啲人好似撒喺荊棘裏面嘅,佢哋聽咗信息之後,生活嘅憂慮、財富嘅誘惑,同其他各種慾望入來窒息信息嘅生機,唔能夠結出果實。但係有啲人好似撒喺好泥土嘅,佢哋聽見信息,領受咗,又結出果實,收成有收成有三十倍嘅,六十倍嘅,一百倍嘅。」

——《馬可福音》第4章第2至8、13至20節

群眾由各城各地來見耶穌。一大群人聚集嘅時候,耶穌對佢哋講比喻話:「有個撒種嘅人出去撒種,撒種嘅時候,有啲落喺路邊,俾人踩,飛鳥又來將佢哋食咗。有啲落喺石地,種子發苗之後就枯乾,因為得唔到水份嘅滋潤。有啲落喺荊棘裏面,荊棘生起來,將幼苗逼住。又有啲落喺好嘅泥土度,發苗,長大結實百倍。」耶穌又話:「有耳可聽嘅,就應當聽!」

呢個比喻嘅意思係噉樣:種子係上帝嘅道理。落喺路邊嘅種子係指人聽咗道理,魔鬼就來,將佢哋心裏面嘅道理奪去,以免佢哋信咗得救。落喺石地嘅種子係指人聽咗道理之後樂意接受,不過冇根,只係暫時相信,當遇到試煉就企唔穩。落喺荊棘裏面嘅種子係指人聽咗道理,不過生活上嘅憂慮、財富同享樂嘅誘惑,窒息咗道理生機,唔能夠結出成熟嘅果實。落喺好泥土嘅種子係指人聽過道理,用純真善良嘅心持守住,耐心等待結出果實。

——《路加福音》第8章第4至8、11至15節

解釋[編輯]

喺耶穌所講比喻嘅裏面,只有呢個比喻係耶穌解釋得最詳細嘅,甚至好多比較細微嘅要點亦都加以解釋。呢個比喻有兩種唔同深度嘅重點。上帝嘅道喺人心中所產生幾種唔同嘅結果,道嘅種子只有一種,心田卻有四種。生命嘅種子雖然係一樣,不過人嘅心卻有四種。上帝嘅道所以會喺人心中發生唔同嘅效果,唔係上帝嘅道邊方面有問題,而係人嘅心呢方面有問題。比喻裏面雖然有四種心田,卻都屬於兩大類。一類係聽咗上帝嘅道而唔結出果實;另一類係聽咗道而結出果實。唔結出果實嘅有三種唔同嘅因素,結出果實嘅亦都有三種唔同嘅效果:有一百倍嘅,六十倍嘅,三十倍嘅。種子撒喺地上如果唔能夠結實,就連佢本身嗰粒種子都冇咗。呢啲就係:「而嗰啲冇嘅,連佢所有嘅都要奪去。」嘅嗰種人[1]

參考[編輯]