黃金投資
黃金投資(粵拼:wong4 gam1 tau4 zi1)顧名思義係指用買賣黃金嚟做一種投資:黃金自古就一路畀人類攞嚟整珠寶同雕像等嘅物品,因而有價值;人類對黃金嘅需求會時常有上落,所以黃金嘅價格(金價)亦會不斷噉升升跌跌;噉即係話,投資者可以趁金價低嗰陣入貨,等到金價一升返就賣走手上嘅金,達致賺取利潤。
投資用嘅黃金可以以好多種唔同嘅方式存在。最簡單直接嘅係買賣實體黃金—包括咗金條、金幣、金飾同埋足金金猴等等。除此之外,投資黃金仲可以係透過交易所買賣基金(ETF)、期貨或者期權嚟做。投資者要識得按自己嘅需要嚟決定用邊一種方法做投資。
到咗廿一世紀初,黃金係最受普羅大眾歡迎嘅投資方式之一。好多人面臨通脹嗰陣都會買黃金,諗住噉做可以保值。而唔少人仲會用平均成本法(DCA)—定時定候買少量嘅金,用嚟為將來未雨綢繆。
金價
[編輯]自古以嚟,黃金就一路都有一定嘅市場價值:古埃及、古印度同古華夏等遠古文明嘅人,已經好興用黃金整銀仔、珠寶同埋雕像等嘅物品;由廿世紀起,電子工程上又因為黃金導電能力強,成日都會用黃金嚟製作電子元件[1];黃金呢種元素有各種嘅獨特物理同化學性質,出晒名擺幾耐都唔會受到侵蝕,因而一路都畀人類視為財富甚至長生不死嘅象徵[註 1],而黃金咁有用就表示人會肯出錢買金。事實亦表明,黃金嘅價(金價)會不時有所升跌,一位投資者最簡單可以靠「趁金價低就入貨,金價升就賣出」噉嘅做法嚟圖利[2]。
黃金同第啲物品一樣,個價由市場嘅供應同需求帶動,不過一般認為黃金算係一種穩定嘅資產:想像而家阿明使咗筆錢,買 A 公司呢間新創企業嘅股票,後嚟 A 公司盤生意唔掂,破產收場,阿明手上揸嘅股票就會變到一文不值—佢盤投資乜都冇得淨;相比之下,黃金可以用嚟造好多嘢—銀仔、珠寶同電子元件等嘅嘢係人類社會一路都需要嘅[註 2][3];而噉就表示,人類對黃金永遠梗會有股需求,永遠有需求就表示個價低極有限;另一方面,黃金嘅供應頗為穩定,唔似得例如銀紙噉政府有得話印就印[註 3]。需求同供應都穩定,就表示市場價值都會有返咁上下穩定—因此,揸黃金難有大損失,黃金廣泛噉被視為一種比較穩陣嘅投資,名目價值會隨住經濟增長而穩定噉上升[4]:2,好多投資者面臨經濟形勢不穩或者通脹嗰陣都會選擇揸黃金,保障自己嘅財富。
影響因素
[編輯]以下呢啲因素都被指會影響金價:
- 通貨膨脹:當一個經濟體有通脹嗰時,啲人好多時會爭住買金,諗住買黃金可以保值,佢哋噉做就會推高金價,而經濟形勢一穩定返,好多人就會想攞啲錢去投資,爭住賣咗啲金佢,就會搞到金價短期噉下滑[註 4][5]。
- 央行放金:如果一間央行手上揸住大量外匯儲備而經濟順利發展,央行好多時會想放咗手上嘅黃金佢—噉係因為黃金係一種「死」嘅資產,一味淨係可以儲,唔似得例如債券噉可以產生回報;而央行放金就表示金嘅供應升,價值就會跌。
- 利率:利率升就表示,好似債券等嘅資產所產生嘅回報會高咗,而噉就表示投資者會寧願揸呢啲資產,唔揸好似黃金呢啲唔會產生咩回報嘅「死」資產,好多人都放手上嘅黃金,金價就會下跌;而如果利率跌,相反嘅事就會發生[6]。
- 科技進展:有經濟學家指出,科技對金價嘅影響好難預料;原則上,地球上嘅金係有限嘅,所以隨住時間過去,人類就會越嚟越接近「掘晒地球上嘅金」嘅狀態,到時黃金供應緊張,理應金價會勁升;另一方面,科技進步可能令到人類發現新嘅方法生產黃金,供應升個價就應該會跌[7]。
等等。順帶一提,亦有唔少經濟學同金融學工作者喺度做研究,嘗試用人工神經網絡等嘅 AI 技術嚟預測金價嘅變動[8]。
|
Info:用黃金嚟做多角投資
喺 2014 年影到嘅一嚿嚿黃金 有唔少專家指出,黃金非常適合用嚟做多角投資。
例如總部設喺美國嘅道富環球(SSGA)就喺 2023 年出咗份白皮書,探討黃金呢種投資。道富環球係廿一世紀初世上最大嘅資產管理公司之一;喺佢哋嗰份白皮書入邊,道富環球嘅專家團隊睇勻咗打前嗰 30 年世界各大經濟體(包括美國同日本等)嘅金價數據,發現金價同股票債券等資產嘅價格冇乜明顯嘅統計相關,甚至乎係同呢啲嘢嘅價有輕微嘅負相關,當中相關值大約係 -.05 至 .30 左右。上述呢段嘢用日常用語講,即係話喺股票債券個價勁跌嗰陣,金價都傾向唔會點郁甚至傾向上升[4]。
多角投資係投資上嘅一種技巧,講到一位投資者要同時揸多種唔同嘅資產,即係例如同一時間又揸債券又揸黃金呀噉。多角投資相關嘅思考亦提到,自己手上嘅唔同資產之間喺價格上唔應該有太強嘅正相關,即係呢啲資產嘅價唔可以傾向一齊升或者一齊跌,否則投資者就好易陷入「手上啲資產嘅價冚唪唥一齊跌」嘅困境[9]。道富環球嘅分析發現黃金嘅價同股票債券嘅冇乜相關,就表示黃金啱晒用嚟將自己嘅投資多角化。
買金方法
[編輯]![](http://upload.wikimedia.org/wikipedia/commons/thumb/9/9f/HK_MK_%E6%97%BA%E8%A7%92_Mong_Kok_%E5%BD%8C%E6%95%A6%E9%81%93_Nathan_Road_shop_Lukfook_Jewellery_%E5%9B%9B%E9%9D%A2%E4%BD%9B_%E9%87%91%E9%A3%BE_night_December_2022_Px3_03.jpg/240px-HK_MK_%E6%97%BA%E8%A7%92_Mong_Kok_%E5%BD%8C%E6%95%A6%E9%81%93_Nathan_Road_shop_Lukfook_Jewellery_%E5%9B%9B%E9%9D%A2%E4%BD%9B_%E9%87%91%E9%A3%BE_night_December_2022_Px3_03.jpg)
![](http://upload.wikimedia.org/wikipedia/commons/thumb/b/bd/One_Tenth_Ounce_American_Gold_Eagle_reverse.jpg/240px-One_Tenth_Ounce_American_Gold_Eagle_reverse.jpg)
In God We Trust(粵譯:我哋信任上帝)
買賣黃金嘅方式有以下呢三大種[2][10][4]:Ch 5:
唔同做法各有利弊。
亦可以睇睇啲人點樣買賣採金公司嘅股票—採金公司嘅生意好唔好,同金價好有啦掕。
實體黃金
[編輯]![](http://upload.wikimedia.org/wikipedia/commons/thumb/0/04/HK_MK_%E6%97%BA%E8%A7%92_Mongkok_%E5%BD%8C%E6%95%A6%E9%81%93_Nathan_Road_shop_%E8%AC%9D%E7%91%9E%E9%BA%9F%E7%8F%A0%E5%AF%B6_TSL_Jewellery_November_2021_SS2_02.jpg/240px-HK_MK_%E6%97%BA%E8%A7%92_Mongkok_%E5%BD%8C%E6%95%A6%E9%81%93_Nathan_Road_shop_%E8%AC%9D%E7%91%9E%E9%BA%9F%E7%8F%A0%E5%AF%B6_TSL_Jewellery_November_2021_SS2_02.jpg)
![](http://upload.wikimedia.org/wikipedia/commons/thumb/9/97/HK_%E4%B8%8A%E6%B0%B4_Sheung_Shui_%E4%B8%8A%E6%B0%B4%E5%BB%A3%E5%A0%B4_Landmark_North_mall_shop_Jewellery_November_2021_SS2_03.jpg/240px-HK_%E4%B8%8A%E6%B0%B4_Sheung_Shui_%E4%B8%8A%E6%B0%B4%E5%BB%A3%E5%A0%B4_Landmark_North_mall_shop_Jewellery_November_2021_SS2_03.jpg)
實體黃金主要以以下呢三種形式存在—
- 金條:金條通常冇乜點加工,買賣價會最接近實質黃金嘅價值;
- 金幣:各大文明喺歷史上都有用金幣嚟做通貨;金幣可以有好高嘅升值潛力,尤其係一啲發行預咗畀人攞去收藏嘅金幣,成日畀人攞去炒賣,例如美國金鷹幣就係噉;
- 金飾:珠寶好多時都會含有黃金;不過要留意嘅係,金飾通常都會為咗好睇而經過咗大量嘅加工同雕刻,所以佢哋個賣價實會明顯高過「將件嘢熔咗做純金」所值嗰個價;
金條同金幣唔一定好貴。如果睇 2020 年代初香港恆生銀行嘅金產品嘅話,有恆生個撈稿喺上邊嘅 1 金衡制安士(1 金衡制安士等如 31.10 g 左右)金條成萬幾文港紙一條,但係比較平嗰啲產品(例如係得 1 到 5 g 咁重嘅金條)只係花費 500 至 3,000 文港紙就買得到[11]—平均嚟講,同期香港打工仔嘅月入大約係三萬零港紙左右[12],一般都應該負擔得起 1 至 5 g 嘅輕量金產品。
喺 2020 年代初,金條同金幣係最受歡迎嘅投資黃金方法[4]:p 18。投資者可以去銀行或者金舖等嘅地方買金條同金幣。呢種做法有好多好處:唔少人都覺得實實在在揸住啲金令佢哋有一股心安感;除此,金幣亦被指係市場流通度夠晒高,即係隨時可以攞去換做現錢,揸金幣嘅人等錢使嗰陣可以輕易搵到現金週轉;不過持有實體黃金都有佢嘅弊處,最主要嘅問題在於要擔心保安,因而要同啲金買保險,呢啲嘢可以幾撈絞。
黃金基金
[編輯]買黃金嘅另一種方法,可以係有若干位投資者一齊夾錢嚟買:想像而家有 10 位投資者將佢哋啲錢夾埋一齊,有成 100 萬文港紙,形成一個投資基金,然後佢哋再請一個識做投資管理嘅專業人士幫佢哋手管理呢嚿錢,決定幾時買金、買幾多同埋幾時放,最後個基金賺到錢變咗 200 萬,班投資者就齊齊將啲利潤分咗佢。證券投資基金可以再細分做幾種,包括互惠基金同埋交易所買賣基金(ETF)呀噉[13]。
想投資黃金嘅投資者,可以摷吓一啲價值對應金價嘅 ETF,喺呢啲基金當中揀返個表現好(即係過往回報高)嘅,再買嗰個基金嘅「股」做個基金嘅「股東」[註 6]。黃金 ETF 可以再細分做好幾種,例如係[14][15]
- 一般嘅黃金 ETF:個 ETF 有若干量嘅資產,當中最少一部份嘅係黃金;如果金價升,呢個 ETF 嘅投資組合嘅價值就會跟住升;
- 黃金嘅相反 ETF:指個 ETF 係專登設計到同金價成反比嘅,如果金價跌佢就會賺;要理解呢樣嘢嘅原理,可以舉個簡化例子—想像個 ETF 嘅管理者預金價嚟緊會跌[註 7];佢然後用期貨嘅方式,講好會喺一個月後將手持嘅金賣畀阿明,講定咗之後,佢跟手就將手持嘅金賣畀阿偉,得到 X 咁多錢;而等到臨要交貨畀阿明之前,位管理者就再使 Y 咁多錢買一啲金返嚟,用呢啲金交貨;如果金價喺呢段時期之間跌咗,Y 嘅數值會細過 X —位投資管理者就成功幫個基金賺咗錢。
買黃金 ETF 要留意好多嘢:首先,有好多黃金 ETF 都會投資埋黃金以外嘅資產,例如係同時投資黃金同埋債券噉;除此之外,有好多所謂嘅 ETF 查實係交易所買賣票據(ETN)—即係投資者並唔真正擁有個基金包含嗰啲資產。投資者落手買黃金 ETF 之前,一定要 cek1 清楚呢啲細節嘢先。
期貨期權
[編輯]期貨同期權係兩種幾相似嘅金融衍生工具[16][17]。兩者都涉及買家同賣家之間做好協議,講定喺某個時間點交易某一樣資產。「資產」可以係好多唔同嘅嘢,包括黃金產品。
- 期貨涉及買賣雙方事先講定一個價,跟住同意喺將來嘅某一點時間買或者賣一樣資產。例如家陣阿明同阿偉兩位投資者同意,一個月之後阿明會用 6,000 文港紙嘅價買阿偉手上嘅兩碌金條,如果金價喺呢一個月之內升咗嘅話,阿明就著數咗—等如可以用低啲嘅價買金條,而阿偉會肯噉樣賣,可能係因為佢等錢週轉唔想搏,或者係佢預期金價嚟緊會跌。
- 期權(有權買)同期貨好相似,都係事先講好個履約價同埋日期,其中一方有權喺嗰個日期前用履約價買或者賣一件事先講好咗嘅嘢,唔似得期貨噉係「講好咗就一定要交易」。期權成日畀人攞嚟同期貨比較,被指係風險冇期貨咁高。
想買賣黃金嘅人,可以喺商品市場嗰度用期貨同期權交易黃金。用呢啲方法買賣黃金嘅,通常都係機構投資者想用呢種方法同佢哋嘅投資組合做槓桿(槓桿涉及運用借返嚟嘅資金提高一件投資嘅回報)。喺廿一世紀初,一般普羅大眾做投資好少可會用期貨或者期權嚟買賣黃金[4]:Ch 5。
採金股
[編輯]![](http://upload.wikimedia.org/wikipedia/commons/thumb/7/73/Roasted_gold_ore_%28Cripple_Creek_Diatreme%2C_Early_Oligocene%2C_32_Ma%3B_Cripple_Creek%2C_Colorado%2C_USA%29_7.jpg/240px-Roasted_gold_ore_%28Cripple_Creek_Diatreme%2C_Early_Oligocene%2C_32_Ma%3B_Cripple_Creek%2C_Colorado%2C_USA%29_7.jpg)
「如果嗰樣嘢唔係種到出嚟嘅,噉就一定係要去開礦掘佢出嚟。」
開採金礦係一盤大生意:從事金礦業嘅企業會運用地質學等領域嘅知識,搜尋有金礦藏嘅地方,搵到之後仲會估計吓笪地方有幾多金礦藏(可行度研究)。做咗採礦作業郁手掘咗啲金出嚟之後,佢哋就要用各種嘅化學技術將啲金由(唔純淨,夾咗好多雜質喺入面嘅)礦石嗰度抽取出嚟,最後先至得出可以攞去用嘅金[20]。
有興趣投資礦企業股票嘅投資者,成日都會留意住可行度研究[21]:一間礦企業搵到有礦藏嘅地方之後,就要做好多分析,評估笪地方嘅礦藏夠唔夠多—如果笪地方有金礦藏但金量少得滯嘅話,喺笪地方大肆開礦(要請人做嘢,又要運送物資去嗰度)係會得不償失嘅;噉即係話有陣時會出現一種情況,就係有一間礦企業宣佈搵到礦藏,引起唔少投資者期待,然後佢哋做完可行度研究先發覺「笪地方礦藏唔夠多,喺嗰度開礦應該冇錢賺」—跟住就搞到好多投資者大失所望,間企業嘅股價就下滑[註 8]。
投資策略
[編輯]「喺市場入邊打滾咗幾耐,緊要過喺市場入邊捉唔捉得啱時機。時間重要過時機。」
平均成本法係一種投資策略。用平均成本法買金嘅做法如下[25]:投資者每個月攞自己個人入息裡邊其中一橛仔(例如 1,000 文)出嚟買金,如果咁啱撞正金價跌佢就會買到多啲金,不過佢就算撞見金價升都照買;呢種做法相對於(例如)一次過攞 20,000 銀出嚟買一隻巨型足金金猴;如是者位投資者儲吓儲吓,過咗若干年之後佢就會儲到好多黃金,可以搵日趁住金價高,賣晒啲金佢—利潤可以有成 25 至 50% 咁多,然後佢手上突然多咗一筆錢,就可以用筆錢去幫手買車或者買樓畀首期。
平均成本法有好有唔好:一方面,平均成本法喺好多情況下都冇「一吓過攞大筆錢做投資」咁好賺[25],尤其係如果市場處於強烈嘅牛勢,啲資產嘅價勁喺度升,一吓過買大堆資產會比較著數[26];但係喺另一方面,平均成本法亦被指有好多好處,例如係入場門檻低,可以訓練投資者嘅紀律,又可以避免「唔好彩,落手嗰陣撞啱市場處於不利狀態」嘅風險... 等等。因此,平均成本法呢種策略,被指係好適合唔能夠一吓抌大筆錢做投資嘅一般大眾—包括啱啱出嚟社會做嘢嘅年輕人,或者想儲錢第時供仔女讀書嘅父母呀噉[27]。
|
貯藏方法
[編輯]如果投資者選擇咗用實體黃金(金條同金幣等)嚟做黃金投資,跟住就實要諗貯藏嘅問題—啲金要擺去邊?要採取咩保安措施,以防啲金畀人偷走?而且仲要幫啲金買保險,買邊一隻好?由此可見,貯藏黃金都有唔少學問。
首先,有關「金要擺去邊」嘅問題,投資者主要有以下呢啲選項[28]:
- 屋企夾萬:要儲實體黃金,最簡單嘅做法係喺屋企搵個夾萬鎖住佢,但係呢種做法喺某啲情況下可能唔適用;例如可能投資者住喺租返嚟嘅地方,包租方唔准佢鑲個夾萬喺牆或者地板上面;而且喺某啲地區,擺個夾萬喺屋企會有天災相關嘅憂慮。
- 銀行保險箱:好多銀行都會提供服務,畀人租保險箱嚟儲起啲資產;銀行嘅保險箱會收藏喺銀行金庫裡邊,廿四小時都受到嚴密嘅保護;用呢種做法儲金,銀行就會負責晒啲保安方面嘅嘢,不過投資者通常仲係要自己買保險嘅。
- 專業人士:有啲企業會提供專業嘅保險箱服務。不過唔同企業提供嘅服務細節可以幾唔同,例如有啲企業會幫啲客安排埋保險,有啲就唔會。投資者要 cek1 清楚啲細節先至做決定。
買保險亦有一定嘅學問:火災保險往往會有上限,即係例如「最多淨係賠 2,000 文美金咁多嘅錢」呀噉,而上限就表示保險賠嘅錢可能根本遠遠彌補唔到啲金實際值嘅錢;除此之外,投資者亦要留意睇緊嘅保險保障啲乜,例如有啲保險可能比較嚴,如果啲金條係畀賊偷走嘅就會賠,但如果啲金條係個人自己唔小心整唔見嘅佢就唔賠,又有啲保險比較寬鬆,就算係後者嗰種情況都肯賠錢[29]。
|
應對假嘢
[編輯]![](http://upload.wikimedia.org/wikipedia/commons/thumb/a/a0/Goldbarren-Fake-up.jpg/240px-Goldbarren-Fake-up.jpg)
金係一樣好有價值嘅物品,有價值就實會有人嘗試造假。假金呢家嘢,據講早喺約莫公元前 600 年已經存在,人類喺歷史上一路都有研究點樣對抗假金,例如據講喺廿世紀前嘅歐美,啲人收到金嗰陣好多時都會
廿一世紀嘅黃金投資界不溜都有關注開假金問題[31][32]。要防範假金,最直接嘅做法係淨係幫襯規模同名氣都有返咁上下嘅交易商:呢啲交易商有雄厚嘅資本同人材,有嚴格嘅基準,檢驗自己買賣嘅金,而且一般嚟講,佢哋都會想保護自己嘅名聲,亦唔想假金搞到啲人對黃金喪失信心,所以佢哋有能力亦有強烈誘因想確保自己啲金係堅嘅。
除此之外,投資者仲可以採取以下呢啲措施[30]:
- 買親金都 kip1 住啲收據,一旦有問題就可以追究。
- 留意吓條金條或者個金幣有冇甩色,有嘅話就可能係假嘢。
- 廿世紀嘅投資界流傳住一個「貼士」話金係軟軟哋嘅,所以真金用牙咬會留低牙印。專家研究表示咗,呢個講法係流嘅。事實上係啱啱相反:古時嘅人造假金好興加啲鉛落去,而噉做會令到嚿嘢變軟,所以如果嚿嘢咬落去會留低牙印,反而顯示嚿「金」似係有輘輷。
- 純金冇磁性,所以對攝石理應係會冇反應嘅[33];不過要留意嘅係,有大把物質都係冇磁性嘅,所以嚿嘢冇磁性只係嚿嘢係純金嘅必要條件而非充分條件—如果嚿嘢冇磁性只係「過咗第一關」,唔表示佢一定係純金。
等等。再唔係,投資者可以索性去搵黃金方面嘅專家幫手檢驗自己手上嚿金,不過要搵專家幫手,正路就實要畀錢請,而且佢哋嘅收費可以幾昂貴。
同其他資產比
[編輯]同其他資產比,黃金被指係有優點亦有缺點:
- 對比股票:買股票即係買一間公司嘅擁有權;股票靠嘅係間公司賺錢自己有份分,而黃金靠嘅係等金價升;一般認定,黃金同股票都係屬於市場流通度高嘅資產,可以話賣就賣,分別在於股票被指比較高風險高回報—黃金冇咁容易受市場波動影響[34],但係有研究者指出,如果冇咩特別嘅經濟不穩,股票嘅回報(講緊由 30 年嘅時間尺度睇)可以係黃金嘅 2.7 倍咁多[35]。
- 對比債券:買債券即係借錢畀人,可以靠收利息嚟賺錢;一般認為,黃金同債券最大嘅分別係黃金係「死」嘅資產,淨係有得靠「搵日金價高賣咗佢」嚟賺取利潤,相比之下債券就算唔攞去賣,都能夠慢慢隨時間產生回報[36]。
- 對比房地產:好多投資者認為房地產係「最正嘅資產之一」,被指係波動性仲低過黃金,唔似得黃金噉可以畀人偷走,而且喺好多人心目中,置業係人生嘅重要一步;房地產同黃金比,最大嘅唔好處係流通度極低—想賣金可以隨時去搵黃金交易商,但想賣房地產往往要搞一大輪(例如淨係搵人睇樓已經大把嘢搞)先至成得到交[37][38]。
- 對比其他貴金屬同寶石:好多貴金屬同寶石都可以買嚟做投資—好似
鉑 、銀同埋多種嘅寶石都好似黃金噉,有返咁上下稀缺之餘又有工業用途,所以會「永遠有需求,永遠或多或少有啲價值」。唔同金屬同寶石嘅特性可以好唔同,例如銀就被指係個價同股票債券有比較強嘅正相關,所以銀嘅多角化效果冇金咁強[39]。
|
睇埋
[編輯]文獻
[編輯]以下係文中用咗嘅重要概念嘅英文名:
- 投資:investment
- 供應同需求:supply and demand
- 多角投資:diversification
- 波動性:volatility
- 金條:gold bar / gold bullion
- 美國金鷹幣:American Gold Eagle
- 金衡制安士:troy ounce
- 流通度:liquidity
- 互惠基金:mutual funds
- 交易所買賣基金:exchange-traded fund,ETF
- 交易所買賣票據:exchange-traded notes,ETN
- 相反 ETF:inverse ETF
- 期貨:futures
- 期權:options
- 可行度研究:feasibility study
- 平均成本法:dollar cost averaging,DCA
- 保險箱:safe deposit box
- 銀行金庫:bank vault
- 假金:counterfeit gold / fake gold
- 通貨膨脹:inflation
以下係一啲有用嘅文獻,提供到黃金投資嘅相關資訊:
- Bampinas, G., & Panagiotidis, T. (2015). Are gold and silver a hedge against inflation? A two century perspective. International Review of Financial Analysis, 41, 267-276.
- Ghosh, D., Levin, E. J., Macmillan, P., & Wright, R. E. (2004). Gold as an inflation hedge?. Studies in Economics and Finance, 22(1), 1-25.
- Hafezi, R., & Akhavan, A. (2018). Forecasting gold price changes: Application of an equipped artificial neural network (PDF). AUT Journal of Modeling and Simulation, 50(1), 71-82,呢篇文講到用人工神經網絡預測金價。
- Invest in Gold A Portfolio Diversifier With Staying Power (PDF) - SSGA,道富環球嘅 2023 年黃金投資白皮書。
- (英文) 黃金同氣候變化,世界黃金協會出咗篇文,講黃金同氣候變化有咩啦掕,當中提到黃金可以用嚟做一種催化劑,幫手將二氧化碳變做第啲嘢。
- ↑ Goodman, P. (2002). Current and future uses of gold in electronics. Gold bulletin, 35, 21-26.
- ↑ 2.0 2.1 How To Invest In Gold. Forbes.
- ↑ Gold Demand Trends Q2 2022. World Gold Council.
- ↑ 4.0 4.1 4.2 4.3 4.4 4.5 Invest in Gold A Portfolio Diversifier With Staying Power (PDF) - SSGA.
- ↑ 5.0 5.1 Erb, C. B., & Harvey, C. R. (2013). The golden dilemma. Financial Analysts Journal, 69(4), 10-42.
- ↑ How do Interest Rates Affect the Price of Gold and Silver?. Physical Gold,佢講咗呢段:"Traditionally, gold prices often decline when rates rise. This is due to higher yields on fixed-income assets like bonds, diminishing the appeal of non-yielding metals."
- ↑ Gold Price History: Highs and Lows. Investopedia,佢講咗:"As gold deposits become harder to reach and more scarce, the cost will tend to rise. At the same time, new mining and extraction technologies can work in the opposite direction, making it more efficient and cost-effective."
- ↑ Hafezi, R., & Akhavan, A. (2018). Forecasting gold price changes: Application of an equipped artificial neural network. AUT Journal of Modeling and Simulation, 50(1), 71-82.
- ↑ Medo, M., Yeung, C. H., & Zhang, Y. C. (2009). How to quantify the influence of correlations on investment diversification. International Review of Financial Analysis, 18(1-2), 34-39.
- ↑ GLD Has Changed The Gold Market.
- ↑ 金價,香港恆生銀行
- ↑ 2024 Hong Kong SAR Salary Guide. Morgan McKinley.
- ↑ Goetzmann, William N.; Rouwenhorst, K. Geert (2005). The Origins of Value: The Financial Innovations that Created Modern Capital Markets. Oxford University Press.
- ↑ 4 Best Gold ETFs for February 2024. Nerd Wallet.
- ↑ (香港繁體) 黃金ETF101:黃金ETF種類、港股和美股黃金ETF推薦,Money Smart
- ↑ Fischer Black and Myron S. Scholes. "The Pricing of Options and Corporate Liabilities," Journal of Political Economy, 81 (3), 637-654 (1973).
- ↑ Crack, Timothy Falcon (2004), Basic Black-Scholes: Option Pricing and Trading (1st ed.), pp. 91-102.
- ↑ If it can't be grown it must be mined.
- ↑ 18.1 If You Can't Grow It, You Have to Mine It
- ↑ (英文) 畀初學者睇嘅礦公司股票入門,投資百科
- ↑ Ferguson, A., Feigin, A., & Kean, S. (2013). Gold mine feasibility study disclosure in Australia: Determinants and implications. Resources Policy, 38(1), 8-17.
- ↑ Dollar Cost Averaging: What You Need to Know. ABC Bullion, "Time in the market is more important than timing the market."
- ↑ Market Timing vs Time in the Market. Zoe Financial. "Time in the market beats market timing every time."
- ↑ DCA with Precious Metals, Goldline.
- ↑ 25.0 25.1 How To Invest With Dollar Cost Averaging. Forbes. "Dollar cost averaging works because over the long term, asset prices tend to rise. But asset prices do not rise consistently over the near term. Instead, they run to short-term highs and lows that may not follow any predictable pattern."
- ↑ Dollar Cost Averaging. GoldPriceForecast.com. "The stronger the bull market in a particular sector is, the more costly the dollar cost averaging becomes. It may be more difficult from the psychological point of view for one to purchase all of their bullion at once, but in the end it should prove profitable in most cases."
- ↑ Why Dollar Cost Averaging May Be the Smart Way to Buy Gold and Silver 互聯網檔案館嘅歸檔,歸檔日期2024年1月20號,.. Rush Gold.
- ↑ Storing and securing your physical gold investment 互聯網檔案館嘅歸檔,歸檔日期2024年2月16號,.. Gold Investopedia.
- ↑ Precious Metals Insurance: Protecting Your Gold And Silver. Forbes.
- ↑ 30.0 30.1 Counterfeit Gold: How to Spot Fake Gold?. Gold Broker.
- ↑ As gold prices gather momentum, scammers are looking to capitalize. CNBC.
- ↑ (香港繁體) 優質足金標誌,香港珠石玉器金銀首飾業商會
- ↑ Does Gold Magnetize?. Stanford Magnets.
- ↑ Gold vs Stock Market: A Comparative Guide. Musaffa.
- ↑ Has Gold Been a Good Investment Over the Long Term?. Investopedia.
- ↑ The Better Inflation Hedge: Gold or Treasuries?. Investopedia.
- ↑ Real Estate Vs Gold: What is the right investment option for you?
- ↑ Historical Returns of Gold and Real Estate. Mindfully investing.
- ↑ Gold vs Silver: 4 Key Differences You Should Know,摩根士丹利。