跳去內容

大逃港

出自維基百科，自由嘅百科全書
(由逃港跳轉過嚟)
  呢篇文章講嘅係中國改革開放前廣東等民眾偷渡至香港。想搵香港人在回歸前後離开香港，請睇「香港移民潮」。想搵受六四事件影響的八九民運人士偷渡至香港，請睇「黃雀行動」。

大逃港係指由中國大陸逃去英屬香港嘅人，喺内地稱之爲“大逃港”，喺香港叫做“偷渡潮”。呢個跡象主要係喺50年代中華人民共和國成立之後開始大量咁出現[1]。自從1951年中英開始封鎖邊界之後，總共有4次大規模嘅偷渡：

大量人口逃港嘅原因，主要都係爲咗擺脫貧窮同飢餓。逃港潮同時亦都強化咗喺香港嘅反共意識形態。

簡介

[編輯]
寶安只有三件寶，
蒼蠅、蚊子、沙井蠔。
十屋九空逃香港，
家裏只剩老和小。[2]
—— 當時的民謠

人口來源

[編輯]
穿越邊境嘅逃港者，喺1962年影低

逃港者以最臨近香港嘅廣東人為主要大多數。其次係嚟自福建和四川（包括今日嘅重慶），唔過佢哋比較多係用合法途徑。自從抗日戰爭同國共內戰嘅前後，移民係以江浙（包括上海人）、山東、河南同天津為主。

由廣東省偷渡嚟香港嘅人數超過200萬，唔少經香港移居東南亞或者再偷渡到歐美國家。從地區嚟睇，最多係惠陽地區 (包括今惠州市、深圳市、東莞市、河源市等)，跟住之後係潮汕佛山、江門五邑、同埋廣州。其次亦有幾十萬嘅北方人同華中人，主要經上海偷渡去香港，亦有少部份直接偷渡到香港。比較出名嘅逃港者包括：倪匡由內蒙古經上海偷渡去香港，李摩西同埋李鵬飛亦都係由上海偷渡去香港，其餘南方每個省亦都有零散嘅幾萬人經廣州嚟偷渡去香港[3]，總和亦都有幾十萬。南方人大多數經廣州同中山去偷渡香港，而北方人大多數經上海同杭州去偷渡香港。所以今時今日，香港人其實都包括唔同省籍嘅人。成功逃港嘅以男性比較多，但係當然亦都有唔少係女人[註 1]。逃港者多數係農民，但亦都包括部分城市嘅居民、學生、“知識青年”、工人，甚至有軍人。[4]

原因

[編輯]

逃港分爲多個階段，其中有因爲中國大陸政府為咗清除國內反動勢力，所以唔少需要逃離保命，但係更加多係因為忍受唔住飢荒同階級鬥爭等等嘅壓迫。

逃港者主要係年輕人，大部分都係因為：香港同中國大陸有接近100倍嘅收入差距、認為香港遍地黃金（好似電影《打蛇》嘅鑽石山嘅謠言同《我嘅大嚿父母》嘅角色定位「拋妻別子偷渡去香港尋金覓財嘅康伯」）、嚮往香港生活等等，都係逃港嘅原因。

除咗年輕人之外， 逃港者亦都有係其他年齡層嘅人，主要都係因為被批鬥、飢荒、希望賺錢嚟改善自己家庭生活等等嘅原因。

過程凶險

[編輯]

有好多嘅人喺偷渡嘅過程中俾鯊魚咬死、游水嘅時候唔夠氣而淹死、跳落火車嘅時候摔死[5]、同解放軍同埋英國嘅啹喀兵或者華人兵糾纏中嘅死傷、俾稱之爲「打蛇人」嘅香港黑社會擄掠後強姦同斬殺等等（根據電影《打蛇》嘅資料搜集）[6]。最後有大約200萬[7]至250萬[8]成功越過邊防線嚟偷渡去香港市區，净係1962年嘅逃港，已經有平均每日五千人嘅「大軍南下」[9]，短短一個月已經有15萬人。[10]。

華山救親

[編輯]
一名唔願遣返中國内地而從卡車上跳下嘅逃港者，攝於1962年。

1962年5月14日，由於逃去香港嘅人數太多，香港政府決定放棄「安置難民」，開始向難民實行新嘅「即捕即遣」政策[11]。呢個時候，有大約三萬個逃港者，喺香港上水嘅華山度集結，又攰又肚餓咁喺山上喘息，等由市區嘅親人收到風之後，趕嚟接佢哋下山。[12]

5月15日號，金庸旗下嘅《明報》發表咗第一篇社評：「最寶貴嘅係人嘅生命！最大嘅仁政，係救人嘅生命！」明報報館呢段時間成為咗救援物資中心。第二日，胡仙旗下嘅《星島日報》亦都刊登咗《百名難民寄語香港親友》呢篇文，呼籲香港人去幫手救呢一班親友。香港唔同嘅宗教團體、鄉親組織、新聞媒體都一齊發起咗「援助有困難嘅人民」呢個行動[13]，前後總共有十幾萬人送衫、嘢食、同水去到華山。市民亦都用各種唔同嘅方法去保護華山上面嘅親友，包括接佢哋走、匿埋喺自己屋企或者市區等等。[14]

喺「唔行動者作抗命論」之下，警察將一批批越境者強行咁拖上卡車，跟住送到去石湖墟嘅收容營地。當時港府決定，偷渡者喺送咗入收容營後，會免費俾兩餐豐盛嘅自助餐佢哋，等到第二日嚟派車由羅湖橋送返大陸。嗰晚有市民守喺營外面，據報到有話：「滯留（喺營外）嘅市民唔下三四千眾。」同埋「佢哋當晚就喺露天臥睡。」。嗰晚喺香港市内亦都有唔少歌舞廳等嘅娛樂場所熄燈閂門，嚟表示佢哋對越境者嘅同情。

第二日，成千上萬嘅市民手攞住餅乾、麵包、糧袋，當卡車嘅長龍駛出營門，公路兩邊嘅糧袋齊飛、淚雨傾盆。突然，成百人衝出馬路瞓喺地下，以身體嚟阻截住條車隊，俾車裏面好多嘅越境者嚟跳車逃跑。

跟據事後估計，前後總共有大約過半嘅華山越境者，喺市民嘅幫助同埋警察「抓捕唔力」之下，最後可以融入市區。[15]

歷史

[編輯]

邊界封鎖之前

[編輯]
乘坐漁船逃至香港嘅逃港者一家，攝於1960年。

喺50年代初，中國共產黨喺國共內戰之後，得到中國大陸嘅控制權，並且最終建立中華人民共和國。 中華民國政府相關嘅軍政人員，同埋資本家、地主、富農等為咗逃避新嘅政權，唔少都南下逃去英屬香港。根據大陸官方檔案嘅顯示，只係喺1957年、1962年、1972年同埋1979年之内，由深圳出發嘅四次大規模逃港潮之中，逃港者嘅人數就已經達到56萬人。[16]。由於人數眾多，香港政府喺1950年5月開始限制大陸人嚟香港，並且喺調景嶺暫時安置中華民國國軍嘅家人[17]；而大陸政府亦都因為抗美援朝，同埋為咗清除國民黨剩返嘅人，冇封鎖到個邊境，任由人離開大陸，唔到1953年韓戰完咗之後都冇真正咁收緊個邊境。而同時，大陸政府發動咗三反五反、鎮壓反革命、土地改革等等嘅政治運動，令到大量仍然留喺大陸嘅資本家、地主、富農、同埋國民黨抗日有關嘅人，都有被清算同批鬥嘅迫害，導致一啲人喺邊境封鎖之後通過各種方式逃離大陸，揭開咗逃港嘅序幕。

邊界封鎖之後

[編輯]

50年代初期，由於中華人民共和國建立之後政局未穩、經濟活動又好弱、民生又一塌糊塗；再加上政治運動嘅四起、大躍進運動導致嚴重嘅三年大饑荒、田地嘅收成得個吉，四五月份又青黃唔接，大陸嘅居民苦唔堪言，個個都日思夜想，盼望逃出呢個又肚餓又高壓力嘅生活。[1]

1957年，反右運動開始，大量嘅知識份子、異見者成爲咗「右派」而受到迫害，引發第一次大規模以知識份子為主嘅逃亡潮。1957年6月底至9月底期間，大陸公民第一次大規模咁通過寶安縣（今深圳市）嚟越境逃亡去香港，歷時3個月嘅逃亡因爲遭受到鎮壓所以先至平息[1]。

1958年至1960年嘅大躍進，引發咗三年大饑荒，好多廣東嘅農民為咗生存都通通逃亡，雖然當初廣東嘅地方政府對呢件事冇咩所謂，直至到伊塔事件發生咗之後先至收緊政策。自此之後嘅逃港活動基本都係非法嘅經濟移民同埋家庭團聚。

1962年4月26號，從惠陽、東莞、廣州、南海、台山、海豐、潮安等等嘅62個縣市同埋全國12個省市自治區嚟嘅公民，佢哋排哂長龍，扶老攜幼又牽兒帶女咁大量湧向香港。一日内成功逃亡嘅人數達到4,000人，而參與逃亡嘅人數總共有8,000人。[1]1962年4月29日，寶安縣公安局嘅14人假扮做外流群眾，混入逃亡嘅人群嚟進行研究同考察，佢哋發現發起呢個逃亡運動嘅主要都係19到40歲之間嘅青壯年，尤其係大學生。[1]1962年5月6號，因爲港英政府看到嚟勢洶洶嘅人流，又恐怖又震驚，於係將捉到嘅逃亡者全部遣送返寶安。[1]

周恩嚟知道咗呢件事之後作出咗指示：「為咗迅速制止群眾大批外流，中共廣東省委負責同志親自嚟到寶安現場指揮，組織遣送逃港群眾返鄉。」[1]1962年5月22號，廣東省内有萬幾人嘅官兵，開始集中清理逃亡者，總共有51,395人俾官方送返家鄉。[1]1962年6月19號，東莞縣委發出指示，「對參與外流嘅國家機關幹部、教師一律開除公職，係黨員嘅一律開除黨籍；對參與外流嘅農村基層幹部，視情節輕重，給予批評教育或停止職務嘅處分。」[1]

1979年，喺深圳市建立冇耐，香港喺第二年即刻實施即捕即解政策。喺呢短短一年内期間，發生咗最後一次大規模去香港越境逃亡嘅人潮，有參與嘅人數總共有10萬幾人，其中成功嘅有4萬幾人。[1]根據大陸嘅官方資料，净係計廣州，喺1979年因爲逃港失敗而坐監嘅人數已經達到5萬，而全個廣東省（特別係珠三角為主）嘅人數達到30萬[18]。

逃港路徑

[編輯]
趁深圳河枯水期間涉水前往香港嘅逃港者，攝於1962年。

逃港分為陸路同水路兩種途徑。

陸路按路線分為東線、中線、同西線。

  • 西線主要係深圳以西嘅逃港者嘅好選擇，即係由蛇口、紅樹林一帶游過深圳灣，順利嘅話，個幾鐘之内就能夠游到香港西北部嘅元朗。呢個方法比較吃力，唔過成功率亦都比較高。
  • 中線嘅逃港者大多數都持有縣級證明（包括假證明），佢哋乘搭火車或者汽車進入深圳，跟住入夜之後乘機喺羅湖一帶跨越深圳河，爬翻過鐵絲網嚟進入香港。但係邊界有大量嘅武警和警犬把守，防守最嚴。[19]
  • 東線大多數都係嚟自深圳以北同以東嘅縣市（即係惠陽、梅縣、同汕頭等等嘅地區）嘅逃港者。佢哋由惠州出發，徒步穿過惠東，攀越梧桐山嚟進入中英邊界。或者佢哋可以由鹽田區、大鵬和南澳一帶游過大鵬灣。由於灣內有很多鯊魚，逃港者好容易俾鯊魚咬死。

水路嘅話，就係由廣東嘅沿海地區坐漁船入香港嘅水域登陸。曾經為中央音樂學院院長嘅香港音樂家馬思聰就係1967年坐船由水路去逃往香港。珠三角西部嘅難民大多先以澳門做中轉站，跟住再利用快艇或者漁船嚟進入香港。

當時寶安縣全部都屬於邊境禁區，所以如果冇特別嘅證明文件，就會俾人拉，跟住送去喺樟木頭嘅看守所遣送返鄉下。即使有合法文件，所有人都先要被搜身，一旦搜出任何浮具，例如游泳圈、塑膠吹氣枕頭、單車輪胎嘅內膽等等，又或者有乾糧，就會即刻遣送去收容所。

逃港者如果離開惠州或者東莞進入寶安縣，就要晝伏夜出，避開民兵嘅村民檢查，徒步潛入深圳。由惠州行到深圳需要十晚時間，行途非常艱苦，而大部分人未到深圳已經俾民兵拉咗。到咗深圳之後，需要行近邊防軍駐守嘅邊境區更加唔容易。

唔少資料都顯示，逃港者都冒著極大嘅生命安全風險，例如水路（大鵬灣一帶）經常有鯊魚出冇，而嘗試跨過邊界嘅時候會俾邊防士兵開槍射死。

所有逃亡失敗或者被遣返返内地嘅居民，喺回鄉之後都會被視爲「階級敵人」，喺批鬥會被進行批判和毆打[1]，並且會被「勞改」（監禁和勞動刑罰）。[20]

影響

[編輯]

香港偷渡潮喺世界歷史之中，係屬於冷戰嘅一部份，而國際社會亦都曾叫深圳河為「中國嘅柏林圍牆[21][22][23]」，係共產主義地區嘅人民逃往資本主義地區嚟「投奔自由」嘅世界史中嘅一部份。[24]

對香港

[編輯]
一位俾港警逮獲嘅逃港者，攝於1962年。

偷渡潮對港府嘅政策執行有非常大嘅影響。根據香港大學教授周永新所講，香港政府一直有幫助木屋區嘅人口上樓（即入住公屋）嘅政策，但係香港喺1981年仍然有70萬人喺木屋區度住，當中絕大多數都係1976年之後嘅逃港者。因為逃港者太多，而香港嘅土地亦都漸趨短缺，所以需要通過市區填海同埋喺港九以外起新嘅香港新市鎮（今日嘅荃灣、屯門、元朗，同埋1997年前起嘅天水圍同將軍澳）。政府通過十年嘅建屋計劃所起嘅屋仍然冇辦法應付需求[25]。

因為珠三角喺中華人民共和國成立之前已經成為咗其中一個主要移民地方，所以由珠三角偷渡去香港嘅人口包括咗唔同省籍嘅人口，包括當年佔領廣州嘅山東兵。逃港同時大大加重咗廣東籍人口喺香港人嘅比例，現今香港人口入面嘅新移民，有57%嚟自廣東（包括先喺珠三角聚居嘅各省籍人），呢啲人口同時亦都大多數嚟自親屬移民，佔咗總親屬移民嘅84%[26]。香港嘅貧窮新移民人口幾乎全部係逃港者嘅大陸親屬，其他省籍嘅移民主要都係以投資移民和技術移民為主。

因為逃港者喺大陸經歷過批鬥同饑荒嘅日子，所以佢哋比喺香港長達而冇經歷過中共統治嘅香港人，更討厭中國共產黨同埋中國大陸人。佢哋唔少都有恐共、反共、厭共甚至仇共嘅心態[27]，對中共同埋香港親共意識充滿戒心同厭惡。呢個亦都使到好多香港人唔接受中共接管香港、主張香港同中國大陸保持距離、反對自由行同中港融合。唔少中產階級嘅逃民，喺1989年六四事件至到1997年香港主權移交期間都大量移民外國。當時因為香港樓價高企，由香港移居去外國嘅人主要都係投資移民，所以佢哋唔少只要喺1997年前賣咗層樓，就有足夠資金嚟移民去外國[28]。

香港人口由1950年嘅220萬人開始，以每10年增長100萬人嘅速度急升，而香港偷渡潮對香港經濟亦都有利有弊。到香港喺70年代嘅經濟騰飛嘅時候，逃港者為香港提供咗好多廉價勞動力，而佢哋冒險追求財富嘅精神，對於香港經濟起飛同成為「亞洲四小龍」都帶嚟咗唔少嘅貢獻，有部份更加成為咗知名人士。香港人口喺1980年上升到大約500萬。[1]但係唔少逃港者仍然爲社會帶嚟很多問題，例如黑社會、犯罪、大量公屋同社區建設、綜援嘅支出等等。亦都有好多逃港者，最終成為咗危害香港社會嘅罪犯，例如張子強等。1980年之後，成功逃港嘅公民亦都攞到香港身份證，而佢哋喺攞到之後都將家人申請嚟香港，而香港人口喺呢個時候開始每10年增加55萬人，逃港潮嘅人口同埋佢哋嘅後代，成為咗香港現今人口嘅重要嚟源，係香港人嘅思想同文化嘅重要組成部份，包括例如「獅子山下」精神等。[29]。

雖然逃港嘅人口嚟自廣東唔同嘅民系，唔過香港政府推動廣州話作為香港嘅通用語，令到香港原居民同嚟自中國各地嘅人，利用語言嚟將文化同種族單一化。成功逃港嘅人喺香港嘅生活，大多因爲佢哋嚟自廣東唔同嘅方言區同文化背景，間中都會受到唔同程度嘅歧視同衝突[30]，好似土客械鬥咁。但係到咗1997年嘅時候，大多數都因爲語言單一化而逐漸消失，到呢個時候基本上全部都已經融入咗去香港嘅社會之中。除此之外，世界各地喺香港住嘅非華裔，大多都以英文做第一語言。

對廣東省

[編輯]

廣東省因為同香港相距比較近，而好多嘗試逃港嘅居民都逃亡成功，令到廣東省嘅人口下跌，唔少工廠要停運，因爲城鎮嘅居民少咗。[1]1977年11月11號，鄧小平喺廣州市視察嘅時候話：「呢係我哋嘅政策有問題。此事唔係部隊能夠管得咗嘅。」[1]當時係中共廣東省委第一書記嘅習仲勳亦形容呢件事係「人民用腳投票」，將偷渡潮定性為經濟原因，而唔係政治原因。内地政府為咗唔希望俾偷渡潮持續嚟損害佢嘅體面，決定喺廣東投資改善經濟，令廣東省有錢起嚟，抑制偷渡嘅人流。最终，中國大陸喺70年代尾推行咗改革開放政策，喺1980年建立咗深圳經濟特區，優先開放深圳、廣州同埋珠三角[31]。廣州同深圳從此成為咗大陸嘅富有地區，人民嘅生活質素亦大大提升，加上香港喺1980年開始實施即捕即解政策，唔再值得冒九死一生之風險偷渡嚟港，有效咁㩒停咗偷渡潮。喺偷渡人潮大量減少嘅同時，亦都使到其他省份嘅人口大量咁移居去廣東[32]。深圳係全大陸第一個實施最低工資嘅地方（2013年时達每月1600元），引嚟各省居民爭相去到深圳做工[33]。

主權移交後

[編輯]

1997年香港主權移交之後，香港特區政府推動「中港融合」政策，大量香港新移民隨即移居香港。廣東省公安廳每日有150位親屬移民嘅配額，俾新移民嚟移居去香港生活。唔少人繼續用簡體字，亦都講自己嘅母語或者普通話；與此同時，把持香港政府同部分商界勢力嘅建制派，亦都擴大普通話和簡體字嘅使用範圍，引致陸港矛盾加劇。

内地政府反外逃嘅舉措

[編輯]
維基文庫有原文：

政策

[編輯]

廣東大量民眾偷渡外逃，引起當時中共廣東省委同政府，甚至中共中央同國務院嘅極大關注。中共廣東省委喺1979年4月中，就召開咗全省嘅緊急會議，為制止偷渡外逃而部署應對措施。國務院、中央軍委之後喺同年6月14號發出《關於堅決制止廣東省大量群眾偷渡外逃嘅指示》，而廣東省革命委員會喺6月21號發出《關於堅決制止偷渡外逃嘅布告》。呢份聲明表明出境人士都必須經當局批准、憑證喺指定口岸離境同進入邊境地區，而偷渡外逃者就要接受收容、教育同遣送等等。為咗迅速咁遏制民眾外逃，廣東亦都喺深圳同珠海嘅邊境沿線，組織民兵同邊防部隊，開展堵截。喺臨近港澳，偷渡特別嚴重嘅地方：惠陽、惠東、東莞、海豐、中山、斗門、順德、番禺、台山等嘅縣，政府增設咗臨時民兵嘅哨所，加強巡邏嘅堵截。喺珠江出海口靠近港澳嘅海面，集中船艇嚟加強海上嘅巡邏，嚴格檢查所有嚟往嘅船隻[34]。

宣傳

[編輯]

當時，中國内地政府對香港進行醜化宣傳，曾經發過一份文件，叫做《人間地獄——香港》，當中係咁樣描述香港：

  1. 香港係世界上最荒淫嘅城市；
  2. 香港黑社會橫行；
  3. 香港係最大嘅製毒販毒基地；
  4. 香港自殺者係世界上有數嘅。

由於香港喺1997年前唔受中華人民共和國管治，所以所有大陸政府嘅政策，例如大躍進、上山下鄉同埋文化大革命，都影響唔到香港。與此同時，香港實際上處於經濟騰飛嘅時期，所以香港人嘅生活水平，事實上比中國大陸嘅高好多。[35]

紀念

[編輯]

當年嘅逃港者到依家已經成為長者，而唔少都支持建造一座逃港遇難者嘅紀念碑[36][37]，同時建議開發當年逃港者上岸嘅流浮山為一個景點[38]，俾後世人能夠記住當年嘅歷史。

當年逃港潮之中，唔少廣東人偷渡到香港，其實目嘅係以香港為中轉站，希望成功偷渡到美國，出名嘅例子係美國舊金山嘅電視台主持人汪倫同埋關惠群。汪倫組織咗依家喺舊金山、夏威夷等地方住嘅華人，計劃緊去籌辦一個逃港者網站，同時為《大逃港》嘅作者提供一啲美國華人逃港者嘅資料，嚟寫大逃港嘅劇本[39]。一啲住喺新澤西州嘅逃港知識青年，喺拉法葉鎮恆福墓陵園樹立咗“逃港罹難知青紀念碑”，嚟紀念176位喺文化大革命期間，因爲逃港途中而罹難嘅知識青年[40][41][42]。

逃港名人

[編輯]

罪犯

教育界

宗教人物

新聞界

政界

法律界

音樂家

功夫

企業家

慈善家

厨師

作家

演藝界

其他/不知道

相關嘅影視同文學作品

[編輯]

相關條目

[編輯]

類似事件

[編輯]

當時嘅饑荒導致雲南邊境居民偷渡到緬甸加入軍閥部隊謀生，而喺延邊嘅朝鮮族邊民亦有啲偷渡去北韓。 1962年發生伊塔事件，大量新疆人偷渡去蘇聯。 1989年六四天安門事件之後，以司徒華為首嘅香港人士發起黃雀行動，秘密咁將民運人士營救去香港。 朝鮮人亦都透過各種方法嚟偷渡同移民去南韓（或其他地方），佢哋亦都叫做“脫北者”。

註

[編輯]
  1. ↑ TVB《大逃港》的逃港者妻子和鳳凰衛視逃港者張宇德的老婆係其中之一。

攷

[編輯]
  1. ↑ 1.00 1.01 1.02 1.03 1.04 1.05 1.06 1.07 1.08 1.09 1.10 1.11 1.12 1.13 〈揭秘上世纪深圳不为人知的逃港风波〉 (中國中文)。凤凰网。原著喺2010-09-18歸檔。喺2008-12-24搵到。
  2. ↑ 李跃 (2020-8)。《深圳，深圳》 (簡體中文)。海天出版社。頁 7。ISBN 9787550729193。 {{cite book}}: |access-date= requires |url= (help); Check date values in: |date= (help)
  3. ↑ 《習仲勳與廣東反「偷渡外逃」》
  4. ↑ TVB《大逃港》
  5. ↑ 〈香港猛鬼熱點 - 東方日報〉。orientaldaily.on.cc。原先內容歸檔喺2020-12-24。喺2013-03-14搵到。
  6. ↑ 打蛇資料搜集以及其他逃港者video
  7. ↑ 〈深圳曾設「柏林牆」防偷渡 潘石屹鑽鐵絲洞撈金_卫视频道_凤凰网〉。phtv.ifeng.com。原著喺2013-08-19歸檔。喺2013-03-26搵到。
  8. ↑ 〈揭毛时代黑暗：250萬大陸居民逃亡香港 - 大紀元〉。2011-08-08。原先內容歸檔喺2013-12-05。喺2013-01-28搵到。
  9. ↑ "YouTube". www.youtube.com. 原先內容歸檔喺2021-02-09. 喺2013-05-07搵到.
  10. ↑ 「大逃港」的震撼與反思 互聯網檔案館嘅歸檔，歸檔日期2021年3月20號，.. 新紀元. 2011年.
  11. ↑ 〈存档副本〉。原先內容歸檔喺2021-03-20。喺2018-08-22搵到。
  12. ↑ 陳秉安 (2011)。《大逃港》。原先內容歸檔喺2021-03-20。喺2018-08-22搵到。
  13. ↑ 〈存档副本〉。原先內容歸檔喺2021-03-20。喺2018-08-22搵到。
  14. ↑ 〈存档副本〉。原先內容歸檔喺2021-03-20。喺2018-08-22搵到。
  15. ↑ 〈存档副本〉。原先內容歸檔喺2021-03-20。喺2018-08-22搵到。
  16. ↑ 〈學者記錄深圳30年前大逃港 百萬內地人曾越境香港〉。原先內容歸檔喺2020-12-24。喺2010-12-08搵到。
  17. ↑ 林芝諺 (2011)。《自由的代價：中華民國與香港調景嶺難民營(1950-1961)》。國史館。頁 25。ISBN 9789860288117。
  18. ↑ 解密百年香港 - 偷渡潮
  19. ↑ 〈「大逃港」的震撼與反思揭毛時代黑暗：250萬大陸居民逃亡香港-香港大紀元〉。原先內容歸檔喺2014-12-26。喺2014-12-26搵到。
  20. ↑ 《梁氏歷史》1997
  21. ↑ "YouTube". www.youtube.com. 原著喺2022-06-02歸檔. 喺2013-01-30搵到.
  22. ↑ 〈任仲夷力挽"中国柏林墙"不倒/余以为〉。www.boxun.com。原先內容歸檔喺2020-08-11。喺2013-01-30搵到。
  23. ↑ lesyan21 (2012-05-19)。〈大逃港五十周年 ( 議事論事 17-5-2012 )〉。原先內容歸檔喺2014-01-31。喺2013-01-30搵到 –透過YouTube。
  24. ↑ 世代懺悔錄：香港前途考古札記 (2018-03-27)。〈考古現場 072：大躍進變大飢荒，廣東省委默許災民逃港〉。Medium。原先內容歸檔喺2021-03-20。喺2018-08-23搵到。
  25. ↑ http://www.youtube.com/watch?v=J1tDaQ6rFvY 互聯網檔案館嘅歸檔，歸檔日期2021年2月9號，. 解密百年香港 - 隻身闖香江 from 7:00 onwards
  26. ↑ 〈数据显示赴港定居内地人士84%为广东人〉。news.sina.com.cn。原先內容歸檔喺2021-03-20。喺2013-03-22搵到。
  27. ↑ 〈中門大開：厭共情緒〉。《Apple Daily 蘋果日報》。原先內容歸檔喺2017-08-06。喺2013-04-23搵到。
  28. ↑ 〈隨著公公婆婆消失的核心價值〉。am730。原先內容歸檔喺2021-03-20。喺2019-04-03搵到。 {{cite web}}: Unknown parameter |archieve-url= ignored (help)
  29. ↑ 〈存档副本〉。原先內容歸檔喺2016-06-01。喺2013-01-28搵到。
  30. ↑ 以前廣府人認為客家人不屬漢族
  31. ↑ 〈历史的交响 ——深圳见证改革开放30年记录〉。原著喺2012-05-10歸檔。喺2013-10-15搵到。
  32. ↑ 〈存档副本〉。原著喺2013-01-26歸檔。喺2013-01-28搵到。
  33. ↑ TVB 晚間新聞 2013年3月14日
  34. ↑ 七十年代末的广东反偷渡斗争 互聯網檔案館嘅歸檔，歸檔日期2020年10月28號，. 杨建
  35. ↑ 陈秉安。〈60年代内地文件称香港世界最荒淫城市也拦不住逃港潮〉。北京青年报。原先內容歸檔喺2020-06-07。喺2016-05-12搵到。
  36. ↑ 〈余以為：深圳尚欠一座逃港遇難者紀念碑〉。原先內容歸檔喺2021-03-20。喺2013-05-18搵到。
  37. ↑ TVB大逃港當事人的對話
  38. ↑ 〈香港議員建議開發前「偷渡聖地」流浮山為景點〉。[失咗效嘅鏈]
  39. ↑ 〈新闻_星岛环球网〉。history.stnn.cc。{{cite web}}: CS1 maint: url-status (link)
  40. ↑ 方冰 (2022-06-15)。〈"让他们的灵魂在自由土地安息" 文革逃港罹难知青纪念碑半世纪后在美国竖立〉。《美国之音》。原著喺2022-06-27歸檔。喺2022-06-16搵到。
  41. ↑ 陳玟綺 (2022-06-16)。〈魂兮歸來「逃港罹難知青紀念碑」揭幕〉。《大紀元》。原著喺2022-07-12歸檔。喺2022-06-16搵到。
  42. ↑ 〈逃港罹難知青紀念碑〉。《逃港知青網 (美東)》。喺2022-06-15搵到。
  43. ↑ 〈揭香港黑幫教父鬍鬚勇：與張柏芝母親很熟絡〉。鳳凰網娛樂。2012-08-29。原先內容歸檔喺2020-06-07。喺2012-08-29搵到。
  44. ↑ 陳新滋小檔案 互聯網檔案館嘅歸檔，歸檔日期2019年2月9號，.. 亞洲週刊.
  45. ↑ 〈1979文艺宣传员偷渡至香港 文革时期曾"又红又专" _卫视频道_凤凰网〉。phtv.ifeng.com。原先內容歸檔喺2021-02-03。喺2013-03-21搵到。
  46. ↑ 〈存档副本〉 (PDF)。原先內容歸檔 (PDF)喺2017-09-28。喺2013-03-15搵到。
  47. ↑ 〈廣東政協：無共產黨　你水都無得食〉。《Apple Daily 蘋果日報》。原先內容歸檔喺2016-03-04。喺2013-01-25搵到。
  48. ↑ 東周刊-啤啤熊密會楊匡 醞釀作反？
  49. ↑ 〈专访叶问长子叶准：银幕外的真实叶问(图) 文娱滚动 南方网〉。ent.southcn.com。原著喺2015-03-25歸檔。喺2013-01-18搵到。
  50. ↑ 〈股壇大廚黃坤財技了得 - 太陽報〉。原先內容歸檔喺2021-03-20。喺2013-01-25搵到。
  51. ↑ 內地首家港資醫院今天開業選址福田車公廟盛唐大廈_深圳新聞網
  52. ↑ 〈算到盡 雷鼎鳴 - 名人薈 - 名人專訪〉。《東周網【東周刊官方網站】Eastweek.com.hk》。原先內容歸檔喺2016-03-05。喺2013-03-23搵到。
  53. ↑ 〈存档副本〉。原先內容歸檔喺2020-06-07。喺2013-02-18搵到。
  54. ↑ 〈中國窗-香港商報電子報〉。www.hkcd.com.hk。原著喺2016-03-05歸檔。喺2013-03-21搵到。
  55. ↑ 〈存档副本〉。原先內容歸檔喺2020-05-10。喺2013-02-18搵到。
  56. ↑ 〈主旋律作品《深圳湾》大胆描写逃港潮 (组图)-搜狐娱乐〉。yule.sohu.com。原先內容歸檔喺2021-03-20。喺2013-01-18搵到。
  57. ↑ 〈逃港潮電視劇 送審一刀未剪 - 香港文匯報〉。paper.wenweipo.com。原先內容歸檔喺2020-05-10。喺2013-01-18搵到。
  58. ↑ 〈存档副本〉。原著喺2021-03-20歸檔。喺2013-02-10搵到。
  59. ↑ 〈頭條日報 頭條網 - 圖說往昔 大逃港〉。news.hkheadline.com。
  60. ↑ 〈新闻_星岛环球网〉。feature.stnn.cc。原著喺2012-11-01歸檔。喺2013-01-18搵到。
  61. ↑ 〈62年10萬人逃港潮揭秘 - 香港文匯報〉。paper.wenweipo.com。原先內容歸檔喺2021-03-20。喺2013-01-18搵到。
  62. ↑ 〈学者记录深圳30年大逃港 百万内地人曾越境香港〉。原先內容歸檔喺2013-02-04。喺2014-09-13搵到。
  63. ↑ Television, 新唐人電視台 New Tang Dynasty。〈見證逃亡潮 港傳記作家新書反迫害,視頻節目新聞視頻環球直擊環球直擊新聞 -新唐人電視台 ntdtv.com〉。原著喺2015-03-25歸檔。喺2013-05-08搵到。
  64. ↑ 〈梁志祥倡活化流浮山警署 - 香港文匯報〉。paper.wenweipo.com。原先內容歸檔喺2021-03-20。喺2013-03-26搵到。

睇多啲

[編輯]
由「https://zh-yue.wikipedia.org/w/index.php?title=大逃港&oldid=2145534」收