可否證度

兩隻黑天鵝

可否證度（粵拼：ho2 fau2 zing3 dou6 / 英文：falsifiability），又或者叫可證偽度，係科學哲學上嘅一個概念，係大部分科學理論必需要有嘅一個特質。如果話一個理論可否證（falsifiable），意思即係指會個理論會作出一啲可以用實證嚟驗證（睇吓佢係咪真確）嘅預測。

攞句陳述，求知者可唔可以想像得到有最少一個可能嘅情況，個情況係一旦發生咗就會證實嗰句陳述係一個錯誤嘅預測？

廣義上，可否證度包括「個理論係咪會作出驗證到嘅預測」同埋「驗證預測要做嘅工序係咪可行」。

可否證

以下呢啲諗法都係可否證嘅：

黑白天鵝

睇埋：黑天鵝效應

「

世界上嘅天鵝冚唪唥都係白色嘅。

」

呢句嘢具有可否證度－如果有日啲研究者搵到黑天鵝，呢句嘢就會俾人證實係假嘅。

古典力學

萬有引力定律話是但兩嚿有質量嘅物體會喺通過連心線方向上互相產生一鼓引力吸引住對方。

睇埋：古典力學

例如牛頓嘅萬有引力定律係一個可否證嘅理論。萬有引力定律基本上係話，是但搵兩嚿有質量嘅物體，兩嚿嘢會喺通過連心線方向上互相產生一鼓引力吸引對方；呢股力嘅大細同佢哋嘅質量相乘成正比，同佢哋距離嘅平方成反比，同兩嚿嘢嘅化學本質唔啦更。牛頓佢仲提出咗一條方程式嚟計兩嚿嘢之間嘅引力：

$F=G{\frac {m_{1}m_{2}}{r^{2}}}$

萬有引力定律條方程式可否證：如果科學家搵到兩嚿物體，佢哋之間嘅引力

1. 唔係同佢哋嘅質量相乘成正比；
2. 唔係同佢哋距離嘅平方成反比；或者
3. 同兩樣嘢嘅化學本質有關係嘅話，

佢哋就可以否決條定律，或者最少話條定律「唔係萬有」（即係宇宙入面有一啲嘢係唔跟條定律嘅）。

唔可否證

以下呢啲諗法一般都認為係唔可否證嘅：

風水

内文：風水

例－

阿松：大師，今年阿明嘅運程點呀？

大師：阿明佢今年恐怕有生命危險。

一年後...

阿松：大師，阿明佢全年都好安全喎。

大師：冇呀，我話佢今年恐怕有生命危險之嘛。（無論結果阿明有冇生命危險，大師都有籍口兜到－無論結果係點，佢講嘅嘢都唔會受到否證。）

精神分析

内文：精神分析

古典嘅佛洛伊德精神分析就係一個典型嘅唔可否證嘅理論。

根據古典嘅精神分析理論，人嘅潛意識度有好多受壓抑住嘅慾望，而且仲好興講話呢柞慾望可以引致精神病，但套理論對於要點樣量度呢柞慾望就冇乜嘢標準。例如係抑鬱症噉：精神分析話抑鬱症可以係因為人壓抑自己嘅慾望壓抑得太勁而搞出嚟嘅，但係就算個病人冇抑鬱症嘅症狀，個分析師都有得話「係因為個慾望太過壓抑，壓抑到出唔到症狀」－根本冇可能知個分析師係唔係真係做咗一個準確嘅預測。到咗廿一世紀初，心理學界基本上唔會再點理精神分析呢套理論，而會當佢係假科學－望落好似科學，但係查實唔合科學原則嘅學說。

睇埋

• 可測試度
• 科學方法
• 科學理論
• 歸納
• 懷疑論

文獻

• Popper, Karl (2002) [1959]. The Logic of Scientific Discovery. Abingdon-on-Thames: Routledge.