聽覺
聽覺（粵拼：ting3 gok3）係對聲嘅感知過程：耳嘅耳蝸會對聲起反應，會按自己接收到嘅聲嘅特徵向個腦處理聽覺嘅區域射訊號，話俾個腦知自己聽到乜。
聽覺基礎
[編輯]人類嘅聽覺感官位於個頭嘅兩側。外耳[e 1]顧名思義係耳仔最外邊嗰忽，包括下圖 gg 同以外嘅結構。外耳個形狀有少少似一個漏斗噉，會將接收到嘅聲「引導」入去耳仔嘅內部，令到人類更加能夠聽得出啲聲波「係由邊度嚟嘅」，亦起到放大接收到嘅語音嘅作用。除此之外，外耳亦都有助保護耳仔內部啲嘅結構，例如外耳嘅毛就能夠阻擋環境入邊嘅塵[1]。
中耳[e 2]嘅主要結構包括耳膜[e 3]（下圖 tf 個位）、聽小骨[e 4]（人體最細嗰三嚿骨；下圖嘅 h a 同 s）同埋耳咽管[e 5]（下圖 ot 個位）等等。聲涉及咗介質粒子（介質粒子通常會係空氣）嘅振動，耳膜一接觸到聲波就會振動，帶動埋聽小骨一齊振，同時耳咽管會一路保持耳內同耳外嘅壓力大致相同[1]。
內耳[e 6]顧名思義係耳仔最入嗰忽，包括咗耳蝸[e 7]（最裡邊螺旋噉形嗰嚿）。耳蝸唔大，得嗰大約 35 mm 咁長。耳蝸入面有一個特別嘅器官—柯蒂氏器[e 8]，柯蒂氏器內有特別嘅感官神經細胞，呢啲細胞表面有細細條嘅毛，啲毛能夠對耳膜嘅振動起反應，將感受到嘅嘢（例如係振動頻率有幾高）傳上去個腦嗰度[1]。
音高感知
[編輯]如果一吓聲嘅頻率高－例如 880 Hz，聽嘅人會覺得吓聲「高音」，而相反如果一吓聲嘅頻率低－例如 55 Hz，聽嘅人會覺得吓聲「低音」，呢一點可以由反覆多次做嘅實驗證實。
嚴格嚟講，音高係指振動頻率經過人腦嘅處理所形成嘅感受：頻率係一樣由聲波具有嘅客觀特性，研究者可以齋靠客觀[註 1]嘅方法嚟量度一吓聲嘅頻率；相比之下，音高就一般係指緊一個人對於「聽到嗰吓聲嘅頻率係幾多左右」嘅主觀感覺，而呢股感覺經過咗感知嘅過程（音高感知）；舉個具體啲嘅例子，假設有班受試者，佢哋都識音樂而且响音樂知識上程度相約，實驗表明，如果研究者攞住一吓聲，俾班受試者遂個遂個去聽，唔同受試者對「吓聲有幾高」嘅判斷可以唔同，而呢啲判斷可能會（例如）受年齡影響，隨住一個人衰老而變得冇咁準－呢啲噉嘅研究就表示，就算頻率唔變，「對吓聲有幾高嘅感覺」都可以唔同，所以音高呢家嘢係有些少主觀性嘅。即係話[2]：
| 「 | 」 |
|
.jpg)
腦部相關
[編輯]神經科學研究表明，顳葉上側、後側、同外側等多個部份都參與高層嘅聽覺訊息嘅處理[3]。耳仔會將收到外界訊息傳送到去顳葉嘅主要聽覺皮層嗰度，主要聽覺皮層會係噉咦處理吓啲訊息，並且初步噉將啲訊息詮釋同歸類（例如聽到某啲聲之後初步噉斷定啲聲係語言定係第啲類型嘅聲）[4]，然後塊主要聽覺皮層就會將唔同類嘅聽覺訊息傳去唔同嘅次要聽覺皮層嗰度－呢啲次要聽覺皮層係一啲專化咗、淨係處理某啲特定聽覺訊息嘅腦區，例如布諾卡區[e 9]就係位於顳葉上少少嘅一個腦區，專門處理語言相關嘅訊息（研究顯示，布諾卡區病變會搞到個病人明明聽覺同聲帶冇問題，都講唔到嘢）[5]。
睇埋
[編輯]註釋
[編輯]參考
[編輯]- ↑ 1.0 1.1 1.2 Møller, A. R. (2013). Hearing; anatomy, physiology, and disorders of the auditory system (3rd edition). Plural Publishing Inc.
- ↑ Plack, Christopher J.; Andrew J. Oxenham; Richard R. Fay, eds. (2005). Pitch: Neural Coding and Perception. Springer.
- ↑ Zwislocki, J. (1960). Theory of temporal auditory summation. The Journal of the Acoustical Society of America, 32(8), 1046-1060.
- ↑ Recanzone, G. A., Schreiner, C. E., & Merzenich, M. M. (1993). Plasticity in the frequency representation of primary auditory cortex following discrimination training in adult owl monkeys. Journal of Neuroscience, 13(1), 87-103.
- ↑ Alexander, M. P., Naeser, M. A., & Palumbo, C. (1990). Broca's area aphasias: aphasia after lesions including the frontal operculum. Neurology, 40(2), 353-353.
