茶餐廳

茶餐廳，俗稱茶記，係一種香港起源嘅快餐食肆，提供揉合咗香港特色嘅西式餐飲同埋部分粵式食品，係香港平民化嘅飲食場所。隨住香港人口嘅移動同埋香港文化嘅傳播，香港以外嘅地方都唔難搵到茶餐廳嘅蹤影，中國大陸、海外嘅唐人街有茶餐廳算係好平常。

歷史

喺第二次世界大戰之前，香港一啲住宅區嘅附近有唔少大牌檔，呢啲大牌檔主要提供油炸鬼、叉燒包等粵式早餐。戰後，香港受到西式生活嘅影響，由於當時淨係得高級餐廳會提供西式食物，而呢啲餐廳收費昂貴、而且唔係咁歡迎華人。為咗令更多人以低廉嘅價錢享受西式食物，冰室於是興起。

冰室本來係以提供咖啡、奶茶、紅豆冰等飲品為主，同時提供三文治、奶油多士等小食。部份冰室更加設有麪包工場，製造新鮮菠蘿包、蛋撻等揉合咗本地同埋西洋特色嘅餅食。後來冰室提供嘅食品種類逐漸增加，演變成為今日嘅茶餐廳。

特色

喺香港，茶餐廳遍佈各區，營業時間唔定，通常由朝早6點至凌晨1點，旺角等呢啲繁忙地區嘅茶餐廳重可能通宵營業。

茶餐廳係一種地道香港嘅食肆，主要顧客係啲可以負擔一般消費嘅普羅大眾。佢嘅主要特色包括：

食品多樣化：茶餐廳供應粵式同埋西式嘅食品，重有唔少香港獨有嘅飲食（睇茶餐廳食品）。一間細細嘅茶餐廳入面，菜單最少都會有幾十種食物。
講求效率：茶餐廳一般都唔收貼士，茶客幫襯後自己去收銀處畀錢。而且都唔使點等，由叫嘢食至到埋單都講求速度。一到食晏時段，地盤工人、學生、貨車司機、辦公室白領都會同時幫襯茶餐廳。唔同階層、行業嘅顧客喺同一間茶餐廳裏邊食飯、高談闊論、刨馬經波經等，成為茶餐廳嘅一大特色。
食品價錢相宜：傳統食肆所賣嘅食品價錢通常比較貴。茶餐廳入面嘅一餐飯可能只係使三四十蚊港幣就搞掂；有啲特惠嘅套餐好似常餐、快餐……等呢啲重送埋飲品，而且多數會喺坐低時就奉上清水或者熱茶（不過好多茶餐廳為咗保障收入，唔畀啲人唔食嘢淨係飲杯免費茶水之餘重要霸住個位，都會實施「淨飲最低消費」）。

茶餐廳跟快餐店唔同，因為有企堂。

茶餐廳食品

茶餐廳一般會有以下各類食品：

飲品

咖啡
飛砂走奶：齋啡，唔加砂糖同埋花奶
奶茶（絲襪奶茶）：茶餐廳必備嘅港式飲品。以香、滑、濃為標準
鴛鴦：咖啡加奶茶，香港獨創
茶走、啡走：絲襪奶茶或咖啡，唔加砂糖而改為加煉奶
好立克：麥類營養飲品嘅一種，又叫做「呵瀝」
阿華田：可可豆類營養飲品嘅一種，又叫做「華田」
檸茶（檸檬加紅茶）：港式檸茶必定有幾塊切片檸檬喺杯入面。有啲人會叫「少甜」，即係叫水吧落少啲糖漿去杯嘢度
檸水（檸檬加糖漿水）
檸樂（檸檬加可樂）
檸七（檸檬加七喜）
鹹檸七（鹹柑桔、檸檬加七喜）
熱檸樂（檸樂煲薑），不過要額外加多兩到五蚊不等
檸啡（檸檬加咖啡）：香港獨創
檸賓（檸檬加利賓納）：香港獨創
汽水（可樂）
牛奶：有鮮牛奶（鮮奶）和朱古力奶（朱奶）
奶水（牛奶加熱水）
滾水蛋
唂咕（唂咕粉加水）
杏仁霜
柚子蜜
花旗參蜜
檸蜜（檸檬加西洋菜蜜）
西洋菜蜜
蓮子鴛鴦冰
紅豆冰
菠蘿冰
薄荷賓治
什果賓治
黑牛 (可樂加朱古力雪糕)
白牛 (七雪或雪碧加雲呢拿雪糕)

大部分飲品都可以加冰成凍飲，但要加收附加費一到兩蚊，有啲坐落喺貴價地段或者好生意嘅茶餐廳重會將凍飲附加費提高到三至四蚊不等。不過有啲跟餐嘅飲品就可能唔使加嗰兩蚊。

小食

各式多士：例如奶油多（煉奶+牛油多士）、奶醬多（煉奶+花生醬多士）、油占多（鮮油+果醬多士），西多士（將夾咗花生醬嘅方包染上雞蛋汁再炸香，用金黃糖漿伴食）等。
各式三文治：例如蛋治（雞蛋三文治）、腿蛋治（火腿雞蛋三文治）、牛治（碎牛肉三文治，通常讀成「嘔（廣東話第二聲）治」）、蛋牛治（雞蛋碎牛肉三文治）、公司治（Club Sandwich）等。香港茶餐廳嘅三文治同外國其他地方嘅三文治最大唔同，係只會用方包整，而且可以畀顧客選擇要唔要「飛邊」（去咗啲方包皮）、或者「烘底」（將白方包烘成多士）。
蛋撻
各式麪包：例如餐包、菠蘿包（菠蘿即鳳梨，菠蘿包酥皮表層經烤烘之後好似菠蘿，所以改個咁嘅名）、菠蘿油（喺菠蘿包入面加一片鮮牛油）、雞尾包
通心粉、麥片等

真係種類繁多，講都講唔晒。

早餐、午餐、快餐、常餐、晚餐

除咗早午晚餐呢啲特定時段套餐之外，其實每間茶餐廳對嗰啲快餐、常餐、特餐等嘅茶餐所供應嘅時段定義都唔同，呢度列出嘅茶餐係多數茶餐廳會採用嘅。

喺特定嘅時間內供應嘅固定餐單，通常會有A、B、C等幾個選擇甚至更多可以畀顧客揀。

最普通嘅早餐一般會有煎雙蛋、通粉、餐包，亦會有公仔麪或者三文治，附送咖啡或茶。
最經典嘅早餐A餐單係：牛油餐包、西煎雙蛋、火腿通粉、咖啡或茶。
午餐同早餐差唔多。典型嘅餐單係：牛油餐包、火腿奄列、叉燒湯意粉、咖啡或茶。話明係午餐，所以淨係會喺午市（大概上晝11點至下晝2點半）供應。
快餐一般淨係會喺午市先有供應。當有客人落單就可以用最快嘅時間送到客人面前，呢個就係所謂快餐。
- 一般快餐嘅餐單上面，會有最少一個嘅選擇，但多數會係碟頭飯（用一個碟裝晒所有飯餸），「餸」多數預先煮好，一般會係香港常見嘅例如柱侯牛腩飯、咖喱雞飯等，又或者會係附有汁料嘅肉扒飯、例如黑椒/洋蔥（汁）嘅牛/豬/雞扒飯等。一般亦會奉送熱飲品一杯。快餐餐牌通常係每日更換，亦都有一啲茶餐廳預先設定好一個禮拜嘅固定快餐餐牌。
- 有啲茶餐廳嘅快餐會送埋餐湯。通常會有羅宋湯（稱為紅湯）或者忌廉湯（稱為白湯）畀客人揀。有啲茶餐廳重會有粵式湯水（稱為例湯或者中湯），而中湯款式基本上每日轉換，最常見嘅係青紅蘿蔔煲牛腩／唐排（即係豬肉排），或者西洋菜煲生魚／豬骨。
常餐一般冇供應時間限制，即係全日供應。餐單一般嚟講全年都會一樣。
下午茶餐一般以煎炸食品為主。好以炸雞髀（一般會寫錯做「雞脾」）、炸雞翼、西多士（亦有寫成全寫「法蘭西多士」）、炸薯條等。豐富啲嘅會係一碗火腿煎蛋／沙爹牛肉公仔麪。附送咖啡或茶。
重有一啲茶餐廳供應埋「營養餐」。基本上餐單以營養為賣點，同早餐亦大同小異，唯一唔同嘅係飲品一定是玻璃樽鮮奶或者朱古力奶，價錢會比早餐貴。多數會係全日供應。

粉、麪、飯

茶餐廳多數亦都會有各樣式各樣嘅炒飯、炒粉同炒麪。好似揚州炒飯、星洲炒米、肉絲炒麪、乾炒牛河等。香港嘅茶餐廳冇「港式炒飯」或「香港炒飯」，不過會有公司炒飯麪，即係由嗰間茶餐廳自創嘅招牌飯麵。

大部分嘅茶餐廳會有埋車仔麪、同各種即食麪等麪食供應。即食麪通常都係採用價錢較為平價嘅「頂好大光麪」，亦有越來越多茶餐廳選用日本出嘅日清出前一丁（可能要畀附加費，詳見下文）。除咗出前一丁之外（行內術語稱之為「食丁」或者「丁麪」），即食麪喺茶餐廳都俾人統稱叫做「公仔麪」（簡稱「公麪」，呢個係香港南順食品公司嘅即食麪產品之一，以一個大字形公仔做標記；因為廣告嘅效應關係，公仔麪呢個名已經深入咗香港人腦海，所以時至今日，大多數嘅香港人都會將「食即食麪」講成「食公仔麪」）。

潮式粉麪

部分嘅茶餐廳又會有潮式粉麪供應，好似魚蛋麪、雲吞麪、牛腩河等呢啲，重會供應埋特價灼油菜；呢類茶餐廳嘅名通常會叫做「粉麪茶餐廳」。

粥、油條

部分茶餐廳會有提供各樣嘅粥同埋油器，好似油炸鬼哩啲。

燒臘

部分燒味檔式嘅茶餐廳，會有叉燒、燒肉（燒乳豬）、燒鵝、白切雞、豉油雞等燒臘供應。一般會伴埋湯粉麪或者白飯嚟食用。伴白飯嘅會叫佢做燒味飯，亦都係碟頭飯嘅一種。而呢種茶餐廳會叫做「燒臘茶餐廳」。

以前嚟講好多茶餐廳甚至一啲酒樓，將燒鴨當成燒鵝咁供應畀客人食用，因為燒鵝嘅價錢比較貴，而燒鴨切好之後個賣相其實同燒鵝都差唔多，所以就索性取而代之，而一般嘅香港人都好難食得出。而家就因為法例關係，如果唔表明係咩材料，係屬於欺詐行為，於是大部份嘅茶餐廳食肆嘅餐牌都會標明係賣燒鴨定燒鵝，或者兩樣都有（除咗少數仍然得過且過之外）；不過一般香港市民去到酒樓或者茶餐廳時，唔理係鴨定鵝都慣咗嗌燒鵝，好多夥記亦都費事糾正。

廚房

茶餐廳廚房係整嘢食嘅食品工場，嚮樓面隔離，之間有個窗口，分水吧、西點、中餐燒味幾個部門。例如奶茶係水吧出品，當收到落單即製，將半製成品茶淡奶材料加埋就係製成品上枱。

座位同搭枱

一般茶餐廳嘅檯都會係四人方檯或者係六人至八人圓檯。亦有啲會係二人檯。舊式重有樓上閣樓雅座，而新式有包廂。
一啲茶餐廳會喺檯面上放上透明玻璃，餐牌楔喺中間。
座位一般都有椅背。主流嘅茶餐廳座位一般都係冇椅背嘅圓櫈。
而家好大部分嘅茶餐廳會有「卡位」，呢樣嘢其實係源自西餐廳。講起嚟都有段故事：喺好舊時嘅香港，西餐廳要食一餐都幾貴，畀得起錢嘅多數係啲外國商人或者有錢人，而卡位呢樣嘢主要係畀佢哋有一個舒適嘅環境坐低，一邊食飯嘆茶一邊傾生意；有時啲小情侶想拍拖浪漫一啲，但係去西餐廳嘆杯茶又覺得好貴，去大牌檔又熱又冇情調，於是乎就有人為咗照顧呢班小情侶可以拍拖兼嘆西茶嘆冰飲，就開設咗冰室呢門生意，重特登為咗方便呢班小情侶談心而引入卡位呢種面對面嘅座位設計。其實坐卡位亦都會畀到私人空間嘅感覺，所以一路以嚟都好受顧客歡迎。但部份茶餐廳嘅卡位係非常狹窄，四人座位有時最多只可以坐到兩個人，有啲甚至因為要遷就樑柱而將卡位改細，變成一邊坐一人一邊坐兩人嘅三人卡位。
喺繁忙時段，想去茶餐廳食嘢就多數要「搭檯」，尤其係喺午市最繁忙嘅時候。「搭檯」即係話，因為間茶餐廳爆棚嘅關係，幾個互相唔認識嘅人為咗要有位食飯，就要安排坐埋同一檯。搭檯通常由夥記話事；如果唔聽話就可能會俾夥記鬧。

而家去茶餐廳食嘢嘅流程

搵位坐：入到茶餐廳，自己搵個冇人坐嘅座位坐低，或者等個夥記幫手安排。
叫嘢食：注意，部分餐單有特定供應嘅時間。有啲重要同時叫埋飲品。點完餐之後，夥記會寫一張結算單，內容主要係食咩餐或者價錢，等埋單時去到櫃檯個收銀員可以好快咁計到張單嘅總額；寫咗張結算單之後，佢會將張單就咁放喺顧客面前嘅檯面，或者將張單夾喺檯面同玻璃中間嘅條罅（當然會留返少少角等顧客走嗰時可以拉返張單出嚟）。
等食。（如果一早叫埋飲品，咁呢段期間可能飲品會到檯先）
食嘢。
叫餐飲：有啲茶餐廳會喺客人差唔多食完嘢時先至問個客人飲咩。咁做好處係可以避免凍飲嘅冰太早溶影響咗杯飲品嘅味道，亦可以避免熱嘅飲品會攤凍／熱咗。（同埋呢個亦承接咗英國人餐後嘆茶嘅習慣）
埋單：離開嘅時候，拎住張結算單去到櫃檯畀錢（櫃檯位置多數會喺大門口附近）。

茶餐廳嘅特色現象

大部分茶餐廳喺顧客坐好之後會先奉茶，即係畀客人每人一杯熱茶或者熱水。呢杯茶一般都係淡而無味嘅紅茶或者平價茶葉沖嘅茶；而香港人通常都會將啲刀叉匙筷等插晒入呢杯奉茶度，用嚟洗餐具。
餐具嘅提供一般有兩個方式：
- 喺叫野食之後夥記會提供適用嘅餐具。例如食碟頭嘅扒類飯或者西式飯意粉，就會畀刀叉同埋鐵匙羹，食湯粉或者炒粉麪公仔麪或者粵式碟頭飯等，就會畀筷子湯匙。
- 另外一種方式係，所有餐具都會預先用筒裝好放喺檯上，或者枱下面嘅櫃桶。筷子同埋刀叉鐵羹會分開嚟裝。
部分茶餐廳嘅衛生情況唔係幾令人滿意。尤其係餐具上面（筷子同刀叉鐵羹等）有時會殘留污漬或者唔知係咩嘅水漬，就係因為咁嘅原因，所以香港人會喺用餐前先用奉茶嚟洗餐具。
如果要將即食麪換做「出前一丁」或者日式烏冬嘅話，通常都要加一兩蚊附加費。21世紀初，呢個收費亦逐漸提升到去三至五蚊。
而家因為政府開始搞食肆禁煙，所以有一啲茶餐廳都響應而將餐廳分咗做吸煙區同非吸煙區嚟畀唔同要求嘅客人選座；不過其實絕大多數茶餐廳都唔會特登去禁止客人吸煙。甚至有啲茶餐廳夥記會喺值勤時當住客人面前吸煙，呢個亦算係茶餐廳嘅一大特色。但係唔鍾意吸煙嘅食客就會對呢種行為相當反感。
夥記幫客人落單嗰陣，為求快手，通常會用一啲速記符號嚟寫單畀廚房或者水吧，例如佢哋會用「反」字嚟代替「飯」，好似叉燒飯會寫成「叉反」；又或者用「0T」嚟代替「檸檬茶」（"0" 即係「零」，同「檸」同音，"T" 就係 "Tea"（茶））。其實茶餐廳嘅步伐一般都真係幾急同埋幾講效率，夥記實在冇太多嘅時間去每個字寫到靚靚咁將份單交到廚房，亦都唔會講究有冇寫到錯別字，總之大家明白共識就得。當中一個好明顯嘅例子，係佢哋通常會用「丐」字嚟代表「麪」字嘅簡寫，可能佢哋冇為意到「麪」字嘅右半部係「丏」（「麪」）而唔係「丐」（「麫」），所以誤寫咗錯別字。

睇波。由於英超聯同其他歐洲杯賽都係係收費電視先有得睇，有部分茶餐廳加足球轉播。同埋可能收最低消費，如50蚊。

茶餐廳術語

茶餐廳度有好多術語。好似喺客人嘅要求方面通常會用到以下幾種：

飲品
- 如果話想要杯凍飲但係唔要冰，一般顧客都會講「走冰」或者「走雪」
- 咖啡紅茶如果唔要糖同奶，就會叫「飛沙走奶」，其實亦可以叫「齋啡」
- 叫凍飲時如果唔想水吧落咁多白糖漿，就要喺落單時加句「少甜」；完全唔要白糖漿就係「走甜」
- 「走」：意思係熱飲用「煉奶」代替「花奶」（淡奶），例如「茶走」、「啡走」、「鴦走」、「華田走」
- 紅湯：紅色嘅西式湯，通常指羅宋湯；白湯：白色嘅西式湯，通常指忌廉湯
食物
- 主食叫「底」。例如碟頭飯嘅「底」係指飯，三文治嘅「底」係指麪包
  - 如果覺得平時食開嘅麪／飯份量少，覺得唔夠飽，一般顧客會喺點餐時加句「加底」。「加底」通常都需要畀多少少錢（一般三至五蚊港元）
  - 如果覺得平時食開嘅麪／飯份量多，覺得嘥嘢，一般顧客會喺點餐時加句「扣底」。「扣底」喺極少數茶餐廳限定嘅時間可以畀少少少錢（一般一蚊港元）
  - 若果覺得點嘅飯款飯底只係白飯，唔夠惹味，客人可以要求個飯底改做炒飯，術語就叫做「炒底」。「炒底」一般亦都係要畀多少少錢（一般三至五蚊）
  - 麪包改為多士叫做「烘底」。「烘底」一般亦都係要畀多少少錢（一般一至兩蚊）
- 有啲客人鐘意碟頭飯上面加隻煎蛋，喺碟飯上面加塊煎蛋嘅術語就係叫做「戴帽」；當然呢個服務亦都要加多少少錢（一般一至兩蚊）
- 有啲客人鐘意碟頭飯上面加啲豉油，喺碟飯上面加豉油嘅術語就係叫做「加色」；呢個服務通常唔使錢
- 喺粥同湯粉麪方面，一般都會有蔥花芫茜呢啲調味菜灑喺面頭。唔鐘意食呢啲調味菜嘅客人可以喺落單時要求「走青」
- 靚仔：白飯。係靚女類推延伸。^[1]
- 靚女：白粥。潮州閩南話「糜」字讀【muê】，等同粵語「妹」字讀音。^[1]
其他
- 行街：外賣
- 睇數：有餐廳唔用單嚟記數，係到客人埋單嗰陣時先至由伙記按客人食嘅嘢計總數（通常係按碗碟嘅大細或者顏色）。但係呢種埋單方法已經幾乎滅絕
- 候數（後數）：重有人未走，未走嘅人畀錢
- 走數：有客人食完嘢冇畀錢走咗，即係食霸王餐

茶餐廳同香港文化

2004年9月，香港電台喺網上舉行嘅「最能代表香港的設計」投票裏面，茶餐廳以1930票獲得冠軍。

香港嘅電視節目、電影、音樂錄影帶等，往往都有喺茶餐廳裡面拍攝或者以茶餐廳作為背景嘅情節，可見茶餐廳嘅普及程度係幾咁深入大眾。例子有香港制作嘅動畫－麥兜系列、梅艷芳同鄭秀文喺2002年合唱嘅一首叫做《單身女人》嘅音樂錄像（MTV）。

1997年香港主權移交咗之後，唔少政府高官都曾經公開咁表示對茶餐廳食品嘅愛好，呢個亦係作為支持香港本土文化、貼近普羅大眾生活嘅一種表示，好似前財政司司長梁錦松咁就係一個例子。部分藝人同埋某啲名人亦都好鍾意去茶餐廳一路飲嘢食嘢一路傾計，中環威靈頓街嘅翠華餐廳就係因為有好多明星幫襯過而出名，因為咁，呢間茶餐廳嘅門外就成日會見到狗仔隊嘅蹤影，跑馬地奕蔭街嘅祥興咖啡室亦好多時會見到星蹤。

衍生產品

因為茶餐廳嘅獨有特色，部份飲品同埋食品都會用「茶餐廳風味」作為宣傳綽頭。比較特出嘅好似係附圖呢隻紙包裝嘅茶餐廳檸檬茶，同系列重有茶餐廳奶茶。

出名茶餐廳

香港

百份百餐廳 - 全香港都有分店

香港島

九龍

新界

澳門

中國大陸

深圳

廣州

上海

日本

流行文化

謝安琪我愛茶餐廳

睇埋

參考

↑ ^1.0 ^1.1 白飯點解叫「靚仔」？

連出去

香港人鍾情茶餐廳：“大眾食堂”見証香港變遷

[靚仔-1] 1.0 ^1.1 白飯點解叫「靚仔」？

[1]