任務 (電子遊戲)

喺打機用語上，任務（英文：quest / mission）係指玩家要做嘅某啲任務：喺任務開始嗰陣，個遊戲程式會給予清晰嘅指示，俾玩家知道任務目標（mission objective），然後玩家一係要走去遊戲地圖某個地方，做嗰樣作業；又或者個遊戲程式喺任務開始嗰陣，會直接將玩家傳送去任務地圖嗰度。一個任務大致上等同一關。

分類

按主次：

• 主線任務（main quest）：要爆機一定要完成嘅任務。
• 支線任務（side quest）：唔完成都可以爆機嘅任務，但完成呢啲任務會得到某啲獎勵，例如係多啲經驗值或者會得到成就等等。

• 循環任務：喺 MMORPG 入面較常見，可以重複做，但係每日有限定次數，做晒就要第二日先有得再做。

按性質：

• 討伐任務（kill quest）：目標係殺死某啲或者某個敵人嘅任務。
• 蒐集任務（gather quest）：目標係喺地圖當中搵到若干物件嘅任務。通常啲物件會難搵，又或者地圖危險四伏。
• 遞送任務（delivery quest）：目標係將某件物件由地圖嘅一個位帶去另一個位嘅任務。通常地圖當中會有敵人攻擊玩家角色，嘗試搶走或者偷走件物件。
• 護送任務（escort quest）：目標係要令某個 NPC 安全噉由一個地點到達另一地點嘅任務。通常護送中途會有敵人攻擊嗰個 NPC。
• 塔防任務（tower defense quest）：目標係要防守某個位置嘅任務，玩家要擊退若干數量（嘗試攻擊嗰個地點）嘅敵人，又或者守住嗰個地點一定時間。可以睇埋塔防遊戲。
• 突擊任務（raid）：指 MMORPG 當中要求玩家打低若干個敵對玩家、若干個由電腦控制嘅敵人、或者一個好勁嘅大佬嘅任務。

睇埋

• 強迫循環
• 打機用語
• 成就