芭蕾舞技巧

出自維基百科,自由嘅百科全書
(由芭蕾舞技法跳轉過嚟)
一位芭蕾舞蹈員喺度做英國派心目中嘅第五手位。

芭蕾舞技巧粵拼baa1 leoi4 mou5 gei6 haau2英文ballet technique)係指芭蕾舞當中舞蹈員身體郁動同形態嘅基本原則,要求舞蹈員精確噉執行每一段郁動,係芭蕾舞表演-尤其係古典芭蕾舞-不可或缺嘅一部份。而且因為古典芭蕾舞對現代其他舞種嘅影響深遠,好多芭蕾舞技巧喺第啲舞蹈裏面都會用到,例如爵士舞就有採用芭蕾舞上嘅技巧[1][2]

一個芭蕾舞技巧包含主要兩個部份[2]

  • 身體各部份要相互對準(alignment)-膊頭髖關節要垂直對準,而且雙要做好外開(turnout);呢種對準法幫助舞蹈員做出乾淨俐落嘅腳郁動、優雅手臂運行(port de bras)同埋正確嘅身體位置線條,亦會減少做大動作嗰陣整親嘅機會率。
  • 要有正確嘅姿勢(posture)-離地嗰陣腳趾要尖噉指住地板,多數時間膊頭要放低、而且全身要拉高(pull up;將胸腔胸骨提高);一般認為呢啲姿勢會令舞蹈員望落更加有高貴氣質。

芭蕾舞技巧可以按門派有異。芭蕾舞有一柞核心技巧,係所有門派都會用嘅,但有時同一個技巧喺唔同門派又會有些少唔同款:例如係芭蕾舞手位(positions of the arms)噉,「個舞蹈員要將雙手高舉,兩隻手掌要指向對方但唔掂到」嘅技巧(附圖)喺包括英國派在內嘅多個門派當中都會用到;但英國興嗌呢個手位做「第五手位」,而俄羅斯就嗌個手位做「第三手位」,而另一方面,法國派同英國派一樣嗌個手位做第五,但喺做呢個手位嗰時好興要對手臂成嘅形狀圓啲[3][4]

五大腳位[編輯]

呢位舞蹈員對腳喺度做緊第五腳位。

無論係跟邊個門派,芭蕾舞學生首先要學識嘅實係五大腳位(five positions of the feet)。芭蕾舞腳位係指一柞用嚟起始同終結每個舞步腳板擺位-芭蕾舞舞步近乎冚唪唥都係會以呢啲腳位當中其中一個起始同作結嘅;因為腳位嘅重要性,無論係邊個門派,芭蕾舞學生首先要學識嘅實係五大腳位。五大腳位係喺 1725 年由皮雅·布淳(Pierre Beauchamp)制定嘅。五大腳位內容大致上如下[2]

五大腳位嘅圖解;最左手邊係第一腳位,佢右邊嘅係第二腳位,如此類推。
  • 第一腳位(first position):兩腳腳踭掂住位住身體正下方,而腳尖就指住相反方向,雙要直一直。
  • 第二腳位(second position):似第一腳位,但係兩腳腳踭要分開,彼此之間維持大約髖關節咁闊嘅距離。
  • 第三腳位(third position):同第一腳位類似,但係雙腳嘅腳踭要互相平行,大致上去到另一隻腳板嘅中間位置;呢個係比較少用嘅一個腳位,因為成日俾人以為係一個做得衰嘅第一或者第五腳位。
  • 第四腳位(fourth position):兩隻腳板平行但腳尖指住相反方向,腳尖要去到另一隻腳踭咁遠,兩隻腳板相距大約一隻腳板嘅距離。呢個腳位都係比較少用。
  • 第五腳位(fifth position):係五大腳位當中最難做嗰個;同第四腳位類似,唯一嘅分別係兩隻腳板要掂住。

除咗呢五大腳位,仲有由烏克蘭裔芭蕾舞蹈員 Serge Lifar 發明嘅第六同第七腳位等等[5]

五大手位[編輯]

芭蕾舞手位(positions of the arms)係指跳芭蕾舞嗰陣,跳舞嗰個人對手臂通常會擺嗰幾個特定嘅位。喺最基本嘅芭蕾舞手位當中,雙手會維持若干(相同嘅)高度,而且兩隻手掌嘅手指尖要差啲掂住,雙手手掌嘅高度可以係喺髖關節咁高、又或者係喺肚臍咁高、又或者高到喺個舞蹈員頭頂上都得;而喺第啲手位當中,雙手手臂可能會延伸並且彼此遠離,令到兩隻手掌分別去到身體嘅左右兩邊嘅遠處。而且有陣時,一個芭蕾舞蹈員又可以兩隻手分別做唔同嘅手位[2][6]

唔同嘅芭蕾舞門派對手位嘅定義有啲唔同,可能會用同一個名指唔同嘅手位,又或者有第啲門派冇嘅手位,例如俄羅斯派嘅芭蕾舞會用三個手位,而其他主要門派興用五個。大中華地區啲芭蕾舞老師多數都係用英國皇家舞蹈學院(RAD)所指定嗰套手位嘅。五大手位內容如下[6]

  • 準備位(bras bas,又叫「bras au repos」)係指個舞蹈員將雙手手臂垂低,雙手手掌要差啲掂住,手掌要喺髖關節左右咁高。顧名思義,呢個係啲芭蕾舞蹈員喺對手臂要開始做大動作之前會做一吓嘅一個手位。
  • 第一手位(first position)同準備位差唔多,都係雙手手掌要差啲掂住(好似攬住某啲嘢噉),主要分別係手掌嘅高度要高過準備位嘅-第一手位嘅手掌要喺肚臍同胸骨之間嘅高度。喺意大利嘅切劇蒂派當中,第一手位會稍為低少少,去到芭蕾舞裙嗰個高度。
  • 第二手位(second position)指雙手要向左右兩邊伸出去,手掌要彼此遠離,但唔完全伸直(好似攬住啲好大嘅嘢噉),手踭嘅位置要高過手腕;手瓜嘅內部要同地板平衡而前臂同手掌唔好完全面向觀眾,要稍微向下。唔同芭蕾舞門派嘅第二手位大致上都係噉,不過佢哋喺做第二手位嗰陣膊頭嘅圓度同手臂嘅高度有所不同。好多門派會要求男舞蹈員嘅手掌去到同膊頭差唔多嘅高度,而女舞蹈員手掌位置就要低少少。
  • 第三手位(third position)喺唔同門派當中好唔同:
    • 法國派同英國皇家舞蹈學院嗰套嘅第三手位(又有叫「bras croisé」;法文讀音:[bʁa kʁwaze])涉及個舞蹈員左右手當中是但一隻做第一手位,另外嗰隻就做做第二手位。喺 RAD 派嘅芭蕾舞入面,啲人會將第三手位分 regular 同 in opposition-如果話第三手位 in opposition,意思係話擺身側面做第二手位嗰隻手係同伸出髀同邊嗰隻(例:右髀伸咗出去嘅話,「第三手位 in opposition」就係右手向側移成第二位置嘅第三手位)。
    • 喺切劇蒂派當中,第三手位指個舞蹈員是但一隻手做佢哋嗰套第一手位,而另一隻就做半第二手位(睇下面)。
    • 喺俄羅斯派當中,第三手位等同其他主要門派當中嘅第五手位(睇下面)。
準備位 第一手位 第二手位 第三手位(RAD 式) 第四手位打開 第五手位
  • 第四手位(fourth position)分兩種:
    • 第四手位打開(fourth position ouvert)指其中一隻手高舉,而另外嗰隻就做第二手位-兩隻手處於好開放嘅位置。
    • 第四手位相交(fourth position croisé),喺切劇蒂派當中有叫西班牙式第四手位(Spanish fourth),指其中一隻手高舉,而另外嗰隻做第一手位。
    • 喺 RAD 派當中,第四手位又係有得分 regular 同 in opposition,原理同第三手位一樣。
    • 俄羅斯派當中並冇指定第四手位。
  • 第五手位(fifth position)喺法國派同英國皇家舞蹈學院嗰套當中如下:個舞蹈員要將雙手高舉,兩隻手掌要指向對方但唔一定要掂到;兩隻手掌位置要稍為向前令到個芭蕾舞蹈員能夠眼尾望到自己手掌,而且手掌要稍為向內,用其他手指遮住手指公;個舞蹈員對手臂關節拗彎嘅角度要大啲,令到雙手手臂好似形成一個圓形或者橢圓形噉。俄羅斯派嗌呢個手位做第三手位,而且冇指定乜嘢係第五手位。
  • 除咗噉,
    • 半手(demi-bras)指一隻手處於第一同第二手位之間,向外延伸。
    • 半第二手位(demi-seconde)似第二手位,不過雙臂要低啲,手掌通常向下。
  • 喺做芭蕾舞手位嗰陣,手板同手腕應該要放鬆,手指之間要有空間,頭要望向適當嘅方向(例如做 RAD 第五手位嘅話,頭可以望住觀眾方向或者稍微向右上或者左上望),一般嚟講,男舞蹈員做手位嗰陣雙手手板之間嘅距離會同面嘅闊度相約,而女舞蹈員做手位嗰陣雙手手板嘅距離會比較近,大約兩個手指尖嘅距離。

第啲常見技巧[編輯]

一位男舞蹈員做緊大越步喺半空,佢肌肉力量強所以跳得好高。
一位女舞蹈員喺度做緊 90 度腳尖企阿拉伯斯卡。

越步[編輯]

内文:越步

越步(jeté,即係法文入面「掟出去」噉解)係芭蕾舞其中一種最常用嘅跳躍。喺做越步嗰陣,個舞蹈員會將佢嘅其中一隻抬向前(jeté devant)、向後(jeté derrière)或者向側面(jeté à la seconde),然後用仲掂住地嗰隻髀一嘢起跳,飛過若干距離再返落地。越步可以按雙髀之間嘅角度等因素分做多種,當中大越步(grand jeté)係比較難但又常見嘅一種,過程如下:個舞蹈員其中一隻腳會向跳嘅方向掃同離地,而仲喺後面嗰隻腳要一𨅝起跳,令到成個人離地;而喺空中嗰陣,個舞蹈員對髀要擘開成一字馬,而且擘開嘅幅度喺跳躍最高點嗰時要達到最大,兩條髀通常要完全伸直,個身體重心係噉咦向移動嘅方向傾,造成個舞蹈員望落好似成個人喺空中「飄」過咗若干距離噉嘅視覺效果,俾好多評論家覺得係最有美感嘅芭蕾舞舞步之一[7]

腳尖企[編輯]

内文:腳尖企

腳尖企(en pointe;呢個字喺法文入面係「用腳尖」噉解)係另一種常見技巧,指個舞蹈員跳舞嗰陣淨係腳尖掂地-即係齋用腳趾支撐住成個身體嘅重量,目的係要令個舞蹈員望落好似無重量噉,達到一種輕盈嘅美感,喺女舞蹈員當中零舍常見。女舞蹈員跳芭蕾舞所用嗰啲鞋係有特別設計嘅,經過強化所以能夠撐住個舞蹈員成個身體嘅重量。喺教芭蕾舞嘅過程當中,老師好多時會首先要啲學生做半腳尖企(demi-pointe),即係要啲學生試吓淨係腳板前半橛掂地(一個容易版嘅腳尖企),等佢哋腳板同腳趾有返咁上下強壯,先至要佢哋做更加講求體力嘅腳尖企[2][8]

阿拉伯斯卡[編輯]

阿拉伯斯卡(arabesque;喺法文入面意思係「阿拉伯式」噉解)係一種常見嘅進階舞步,指個舞蹈員淨係一隻腳掂地(掂地嗰隻髀叫支撐髀)而另外嗰隻髀(抬起髀)就外開並且抬高去身體後面,而且要伸到直一直。條抬起髀抬高嘅角度由 20 度左右嘅低角以至大過 90 度角都有,手位置唔定,而支撐髀嘅腳板可以處於腳尖企(en pointe)或者半腳尖企(demi-pointe)都得。阿拉伯斯卡目的係要令成個身體形成一條由膊頭一路延伸落去抬起咗嗰隻髀嘅腳趾尾嗰度嘅線,達到一個嘅視覺效果[9]

阿拉伯斯卡可以按手嘅擺位同條抬起髀嘅高度再細分做幾種:其中一種最出名嘅阿拉伯斯卡係所謂嘅傾斜阿拉伯斯卡(arabesque penché),就係指抬起髀抬起嘅角度大到抬起髀腳板嘅位置高過個舞蹈員嘅頭[10];呢種阿拉伯斯卡常見於由一男一女舞蹈員所跳嘅雙人舞(pas de deux)-就算對專業嘅舞蹈員嚟講,傾斜阿拉伯斯卡都唔係一個易做嘅動作,而一種常見嘅方法係由一位強壯嘅男舞蹈員支撐一位身體柔軟嘅女舞蹈員,再由女舞蹈員一路用佢舞伴做支撐一路做出傾斜阿拉伯斯卡[2][11]

因為阿拉伯斯卡呢種舞步嘅重要性,專業嘅芭蕾舞蹈員好多都會用「自己做呢個舞步做得靚唔靚」衡量自己嘅技術,而芭蕾舞界有好多舞蹈員都會記住自己嘅最大阿拉伯斯卡(maximum arabesque)-指佢喺唔犧牲流暢度同精確度之下做阿拉伯斯卡隻抬起髀可以去到幾高[9]

腳尖旋轉[編輯]

内文:腳尖旋轉

腳尖旋轉(piroutte;呢個字喺法文入面係「旋轉」噉解)俾人認為係最有美感最好玩嘅芭蕾舞舞步之一。最簡單嗰款腳尖旋轉涉及以下嘅步驟:個舞蹈員首先要雙手臂大開,一隻腳企定定,而另一隻腳處於第二腳位噉嘅位置兼且淨係腳尖掂地;跟手處於第二腳位位置嗰隻腳要向後移,令雙腳成第四腳位,跟住再用一個快速嘅抽起一嘢將向後移咗嗰條髀抬起,用企定定嗰隻腳做旋轉嘅軸心,用快速抽起嗰股力乘勢令個身體開始旋轉至少 360 度,勁嘅舞蹈員可以再轉若干個圈。腳尖旋轉可以按照做旋轉嗰陣條髀抬高嘅角度、雙手嘅位置、或者係轉幾多個圈等嘅因素再細分做幾種,重點係個舞蹈員「喺其中一條髀抬起咗嘅情況之下旋轉」[12][13]

喺學芭蕾舞嘅過程當中,腳尖旋轉通常都係起碼去到中階嘅學生先會做嘅,噉係因為佢屬於相當之高難度嘅一種舞步,要求個學生有極之勁嘅核心肌同埋平衡力,俾人形容做「芭蕾舞蹈員冚唪唥都想做到最好嘅大師級舞步」。亦都因為噉,腳尖旋轉係比較高階啲嘅芭蕾舞考試當中差唔多實會考嘅一種舞步[14]

男女之別[編輯]

芭蕾舞技巧好多時都有男女之別[15]

  • 女舞蹈員喺跳芭蕾舞嗰陣,好多時會集中跳一啲幅度細,但講求雙腳速度快同靈敏嘅舞步(petit allegro,「又細又快」),目的係展示陰柔又纖細嘅敏感性;
  • 男舞蹈員做嘅比較多係動作大啲嘅舞步,例如係要佢哋跳起而且跳有噉高得噉高,又或者係要佢哋一路跳舞、一路捧起自己個舞伴等等(grand allegro,「又大又快」),個目的係展示個男舞蹈員嘅肌肉有幾噉勁-陽剛嘅強健性[16]

睇埋[編輯]

[編輯]

  1. Kirstein, Lincoln; Stuart, Muriel (1952). The Classic Ballet. New York: Alfred A Knopf., pp. 6-7 & 21.
  2. 2.0 2.1 2.2 2.3 2.4 2.5 Hammond, S. N. (2000). Ballet basics. McGraw-Hill Humanities, Social Sciences & World Languages.
  3. Positions of the Arms in Ballet. BalletHub.
  4. Ballet Terms for Beginners. TutuTix.
  5. Paolacci, Claire (2004). "Serge Lifar and the Paris Opera during World War II". Journal of the Oxford University History Society: 8.
  6. 6.0 6.1 Positions of the Arms in Ballet. BalletHub.
  7. Jeté 互聯網檔案館歸檔,歸檔日期2019年5月1號,.. BalletHub.
  8. Janice Barringer; Sarah Schlesinger (2012). The Pointe Book. Princeton Book Company.
  9. 9.0 9.1 Arabesque 互聯網檔案館歸檔,歸檔日期2017年9月22號,.. BalletHub.
  10. Penché 互聯網檔案館歸檔,歸檔日期2021年5月12號,.. Ballethub
  11. Grant, Gail (1982) [1950]. Technical Manual and Dictionary of Classical Ballet (3rd ed.). New York: Dover Publications. ISBN 0-486-21843-0.
  12. Lin, C. W., Chen, S. J., Su, F. C., Wu, H. W., & Lin, C. F. (2014). Differences of ballet turns (pirouette) performance between experienced and novice ballet dancers. Research quarterly for exercise and sport, 85(3), 330-340.
  13. Denardi, R. A., & Corrêa, U. C. (2013). Effects of instructional focus on learning a classical ballet movement, the pirouette. Journal of Dance Medicine & Science, 17(1), 18-23.
  14. Ballet: Tips for Pirouettes. ThoughtCo.
  15. Ballet Terms, Positions, and Poses.
  16. Why Men Who Dance Ballet Have More Balls 互聯網檔案館歸檔,歸檔日期2018年12月10號,.. International Ballet Academy.

[編輯]