跳去內容

雕塑

改拎
出自維基百科，自由嘅百科全書
(由雕刻家跳轉過嚟)
多件出名嘅雕塑作品：

雕塑（粵拼：diu1 sou3；英文：sculpture），又叫雕刻（粵拼：diu1 haak1），係專門創作 3D 物體嘅一門視覺藝術，相對於（例如）創作 2D 圖像嘅畫畫。最傳統上，創作雕塑嗰陣，一個雕塑家要做以下呢啲步驟[1]：

一般嚟講，雕塑作品可以分做兩大類：雕像同埋浮雕；前者係指能夠自己獨立噉企到喺度嘅雕塑作品，例子有舉世聞名嘅《大衛像》；而後者就係指喺一塊平面（例如係牆）上雕出嚟嘅作品，件作品雕好咗之後會依附喺塊表面上，成日俾人攞嚟做建築物上嘅裝飾[4]。順帶一提，粵式建築其中一樣出名之處就係多浮雕[5]。

雕塑呢種藝術歷史悠久：包括兩河流域文明、古埃及、古希臘、古華夏同古印度在內嘅遠古文明都有留低雕塑作品[註 1][6]；喺呢啲遠古社會，雕塑好多時扮演住宗教性質嘅角色－啲人會用（喺當時造價一般都好貴嘅）雕塑展示佢哋心目中神靈嘅形象，仲會對雕像做禮拜[7][8]，而打後歐洲喺基督教化咗之後，就改用雕像展示佢哋心目中耶穌等人物嘅形象[9]。到咗廿一世紀，隨住啲人變得有錢，雕塑成為咗社會大眾都玩得起嘅藝術，而「多咗人搞」呢樣嘢仲帶嚟用料同風格等方面嘅創新[10]。

定位

[編輯]
睇埋：視覺藝術同工藝

喺現代視藝界，雕塑定義上係指

  • 唔具有功能性、
  • 立體

嘅視藝作品：

立體

[編輯]

喺最廣義上，雕塑可以包嗮一切立體（3D）嘅視覺藝術作品（造型藝術），相對於純粹平面性質嘅畫畫同影相。雕塑可以分做兩大種：

  • 雕像[e 1]－指能夠獨立噉企到喺度嘅立體作品，同埋
  • 浮雕[e 2]－指成件作品都依附喺一個平面上嘅雕塑作品，浮雕呢種做法成日俾人攞嚟喺建築物嘅牆同柱或者係傢俬嘅表面上加雕塑裝飾，甚至用浮雕嚟表達故仔。

要留意嘅係，雕像同浮雕之間條界線係有些少含糊嘅－原則上，浮雕可以按「由塊表面嗰度凸出嚟嘅程度」分做低浮雕（[e 3] 凸出程度低）同埋高浮雕（[e 4] 凸出程度高），一般嚟講，如果雕嗰嚿嘢嘅質量有一半以上係由個表面嗰度凸咗出嚟，件作品就算係高浮雕，而極高嘅浮雕往往同雕像難以清楚分界[4]。

表示性

[編輯]
睇埋：現代雕塑

現代人對於「雕塑」嘅定義可以包括唔具有表示性質[e 7]嘅作品：喺廿世紀打前嘅西方藝術界，啲人認為雕塑定義上係應該要有表示性質嘅，意思即係話覺得雕塑一定要係雕得似某啲現實世界嘅事物（表示緊某啲現實世界嘅事物），包括人物、動物、植物或者係死物呀噉，例如《大衛像》就係描繪緊米高安哲羅心目中大衛王嘅形象。不過由廿世紀初開始，「雕塑」就包埋一啲高度抽象化嘅作品：例如係英國雕塑家亨利·摩亞[e 8]嘅作品《雙重橢圓形》噉，就高度抽象化，並唔明顯似乜嘢現實物件；好似摩亞噉嘅現代雕塑家[e 9]喺廿世紀中嗰陣對「表示性質」呢樣嘢作出挑戰，最後令到藝術界放棄堅持雕塑要有表示性質[11][12]。

  • 《雙重橢圓形》[e 10] 亨利·摩亞，1966 年
    《雙重橢圓形》[e 10]
    亨利·摩亞，1966 年

功能性

[編輯]

雕塑另一個定義特徵係唔具有功能性質[e 11]。現代人對雕塑嘅定義唔使一定有表示性質（睇上面），不過噉就帶出咗一條問題：建築設計同陶藝呢兩個視藝領域嘅作品都係立體得嚟又唔具有表示性質嘅，噉建築物同用陶藝整嘅刀叉等嘅嘢係咪冚唪唥都算雕塑呢？對於呢條問題，廿一世紀初藝術界嘅解答在於「功能性質」呢一點－建築設計可以用嚟整建築物，而陶藝可以攞嚟整食具同容器，建築物、食具同容器等嘅物品都係有實用價值嘅，而相比之下，雕塑作品整咗出嚟淨係可以攞嚟擺同睇－冇乜特別嘅功能，係所謂嘅「純粹藝術」[12]。

  • 一棟典型嘅古典粵式建築上會有大量嘅浮雕； 棟建築有實用功能，但啲浮雕淨係攞嚟睇。
    一棟典型嘅古典粵式建築上會有大量嘅浮雕；
    棟建築有實用功能，但啲浮雕淨係攞嚟睇。

技術

[編輯]
睇埋：材料科學同結構工程

製作方法

[編輯]
睇埋：金屬加工

廿世紀嘅雕塑製作主要有四大技術[1][13]：

  • 雕琢[e 12]，係指用削減[e 13]嘅方法創造雕塑，做法係攞一嚿大、有返咁上下硬淨嘅材料（石同木等），然後用某啲架生（常見嘅有鎚仔同鑿以及係砂紙等等）將嚿材料嘅某啲部份削走，靠雕塑者嘅巧手最後令嚿材料變成想要嘅形狀。雕琢呢種做法主要唔好處係一旦雕嗰個人失咗手，嚿嘢通常就唔要得，唔似得模型塑法或者組合塑法噉可以輕易噉重新嚟過[2]。舉世聞名嘅《大衛像》就係用雕琢法整嘅[14]。
  • 鑄造[e 14]，有陣時俾人嗌做取代[e 15]嘅做法，做法係事先整一個有特定形狀嘅模，然後將雕塑材料加熱到閒閒地成攝氏幾百度嘅高溫，令嚿材料熔化變成液體狀態，再將啲液體倒入去個模裏面，跟手就等啲液體冷卻變返做固體狀態，最後雕塑者就會攞走個模同幫件作品嘅表面加工。鑄造呢種做法成日俾人攞嚟製作用青銅等嘅金屬整嘅雕塑作品，噉係因為金屬硬淨得好交關，要用雕琢嘅方法整比較撈絞，所以雕塑者就會首先用石頭等冇咁硬嘅材料雕琢咗件初型作品出嚟先，再用呢件初型作品做鑄造整個模出嚟，再用個模嚟整一件用金屬造嘅最終成品[15]。
  • 模型塑法[e 16]帶有削減同添加[e 17]嘅成份，做法係搵一嚿啱大細嘅材料，然後用拉、撳同搓等嘅方法令嚿材料變形（即係話呢種做法通常都淨係會用於工藝黏土等軟腍腍嘅材料），途中可以添加或者搣走材料，喺嚿材料變成咗想要嘅形狀之後，雕塑者通常就會用某啲方法令嚿嘢變硬－簡單嘅例子有加熱（加熱會令好多種唔同嘅黏土變硬）。好多人認為，模型塑法好處係易整，就算失咗吓手都未至於會搞到成嚿嘢要揼。
  • 組合塑法[e 18]一定程度上可以話係雕琢嘅相對，指攞一啲已有、甚至係由工廠量產嘅細嚿物件，然後用緊固件、膠水同銲接等嘅方法令呢啲細嚿物件黐埋一齊，最後砌出想要嘅形狀。可以睇埋現代雕塑同組合藝術[16]。
  • 一個人喺度雕琢一嚿木。 （雕琢）
    一個人喺度雕琢一嚿木。
    （雕琢）
  • 工作人員將液體狀態嘅材料倒入去個模裏面。 （鑄造）
    工作人員將液體狀態嘅材料倒入去個模裏面。
    （鑄造）
  • 一個人喺度拉、撳同搓一嚿黏土。 （模型塑法）
    一個人喺度拉、撳同搓一嚿黏土。
    （模型塑法）
  • 呢件作品由金屬支架同發泡膠砌成。 （組合塑法）
    呢件作品由金屬支架同發泡膠砌成。
    （組合塑法）

三維打印

[編輯]
用三維打印整一個機械人公仔嘅片
内文：三維打印

除咗以上呢四種技術之外，廿一世紀初嘅雕塑界仲開始有咗「用三維打印整雕塑」嘅諗頭。三維打印[e 19]係一種喺廿世紀尾興起嘅技術，指由一個電腦嘅立體模型[e 20]嗰度建構出一嚿實質嘅立體物件；喺廿一世紀初，三維打印嘅技術經已夠成熟，可以攞嚟整好多嘢。用三維打印整一件物件（當中嘅「物件」可以係一件雕塑作品）嘅過程大致如下[17][18]：

  1. 首先，製作者要用電腦圖像（CG）技術整出描述想要嘅物件嘅立體模型；
  2. 然後部電腦會將描述個立體模型嘅數據傳去一部三維打印機[e 21]嗰度，部打印機會睇個立體模型，得知「件物件每一層有邊啲位置有嘢、邊啲位置要留空」；
  3. 部打印機跟住就會將嚿嘢「印」出嚟，將第一層整出嚟，再整第二層... 一路整到完全成嚿嘢為止；喺廿一世紀初，最勁嘅三維打印機每一層得 16 微米咁薄，用肉眼睇唔出嚿嘢分咗做一層層[19]；

喺搞掂咗之後，製作者仲可以對嚿嘢作出多種嘅加工[20]。

力學平衡

[編輯]
内文：力學平衡

力學平衡[e 22]係牛頓力學上嘅一個概念。如果話一嚿物體處於力學平衡，意思即係話作用喺呢嚿物體身上嘅淨力[e 23]係 0，而根據牛頓第二定律，淨力係 0 即係表示嚿嘢如果係靜止嘅就會繼續處於靜止狀態[21]。正路嚟講，一個雕塑家會想自己件作品能夠處於力學平衡，噉件嘢先會唔使特登搵嘢撐住（支撐好多時都俾人認為係唔好睇）都能夠長時間企到喺度唔跌低，而對雕塑作品嘅力學平衡嘅思考可以相當複雜[22]。

例如係位於西班牙馬德里、描繪西班牙王菲臘四世[e 24]騎住馬嘅樣嘅青銅像（下圖）噉：呢個雕像係喺 1640 年整好嘅，佢個設計俾人覺得佢好大膽，成個雕像淨係得隻馬嘅兩條後髀掂地；正常嚟講，呢個雕像唔會做到力學平衡，嚿嘢會向前跌；不過整呢個雕像嘅人員[註 2]就用咗個當時史無前例嘅做法－隻青銅馬喺密度上唔平均，隻馬嘅後髀同尾用近乎完全實心嘅青銅嚟整，而隻馬嘅頭同埋前半身就用薄、空心嘅青銅嚟整，當中隻馬頭部嘅殼據講淨係得嗰差唔多 2 毫米咁薄，所以隻馬掂地嘅下半身就明顯重過上半身，最後呢個做法成功噉令呢個雕像達致力學平衡，企到喺度，亦係雕塑史上嘅一個突破[22]。

保存

[編輯]
一個俾酸雨侵蝕過嘅雕像
睇埋：風化作用同鍍膜

「點樣保存雕塑作品」喺雕塑界係一個受關注嘅課題。雖然話用某啲材料－例如金屬同石頭－整嘅雕塑襟擺過用第啲材料－例如木同冰－整嘅，但講到埋尾，無論製作材料係乜，雕塑作品都梗會隨住年月流逝而或多或少噉走樣變形[23]；而且同畫或者陶藝作品比起嚟，雕塑作品好多時都會俾人擺喺室外空間，令到呢啲作品零舍容易受各種嘅自然力量侵害：

  • 例如酸雨就係出咗名搞到雕塑家好頭痕嘅一樣嘢，指因為二氧化硫（SO2）等嘅空氣污染物造成嘅酸性雨，呢啲雨會帶有腐蝕性，雖然一般唔足以對人體造成直接危害，但長遠嚟講會腐蝕建築物同室外嘅雕塑作品[24]。
  • 喺凍啲地區嘅雕塑作品又要面對所謂嘅霜凍作用[e 25]－想像因為落雨等嘅原因，有水積聚咗喺一個雕像表面嘅一啲窿罅位嗰度，跟住入冬，氣溫跌落攝氏 0 度以下，於是啲水開始結成冰，而冰嘅密度係低過水嘅，即係話啲水結咗冰之後嘅容量會大咗，所以喺結冰嘅過程當中，嚿冰會向四周圍嘅空間施力，而如果結成嚿冰嘅水係喺一個雕像嘅窿罅位裏面，就有可能會搞到個窿罅位變形[25]。

除咗呢啲之外，喺室外嘅雕塑作品亦都成日會受到太陽光當中嘅紫外線（UV）、潮濕、極端氣溫同埋植物嘅生長等嘅自然力量侵害。為咗應對呢啲問題，雕塑界諗咗好多方法出嚟，幫手保存雕塑作品[26][27]。

要保存雕塑作品，最簡單直接嘅方法係幫件作品加浸鍍膜[e 26][27]。鍍膜泛指喺一件物體嘅表面加一浸特製嘅物質用嚟達到某啲目的，喺最理想嘅情況下，一浸鍍膜會係唔會點產生化學反應、而且對溫度同濕度變化唔會有乜大反應嘅隋性物質－唔會同環境入面嘅化合物或者雕塑作品本身起化學反應、唔會因為氣溫變化而變形、唔會因為溶入水裏面而俾雨沖走... 等等。例如啲人好興喺用青銅整嘅雕像表面噴一浸蠟，蠟唔溶喺水，而且喺常溫之下會一路呈固體狀態，最啱攞嚟將個青銅像同空氣隔絕[28]。不過要留意嘅係，唔同嘅雕塑材料所用到嘅鍍膜材料都唔同[29]。

按用料分類

[編輯]

木雕

[編輯]
内文：木雕

木雕指用木整雕塑作品。木雕係一種極古老嘅工藝：有考古學家試過舊石器時代嘅遺跡當中搵到受人雕琢過嘅木造物件，而呢啲物件歷史有成超過 400,000 年咁耐[30]；亦有考古學家喺公元前 4,000 年前嘅古埃及遺跡裏面發現（差唔多爛嗮嘅）木雕[31]，而東亞同非洲等地都有歷史悠久嘅木雕傳統。不過雖然話木雕咁古老，木雕作品多數都留存唔到去後世－因為同石雕或者金屬雕比起嚟，傳統嘅木雕係非常之唔襟擺嘅，會腐爛、會受昆蟲破壞、又容易著火。因為噉，木雕就俾一啲雕塑學者稱之為「藝術史上嘅隱藏元素」－木雕技藝廣為流傳，而且相當受歡迎，不過啲作品成日都留唔低，搞到現世嘅藝術史學者難以研究同了解古代嘅木雕藝術[32][33]。

不過另一方面，木雕又有好多好處：首先，同石頭或者金屬比起嚟，木冇咁硬淨，所以要做起雕琢上嚟就容易；而且木呢種材料又比較輕身，所以好方便攞嚟雕面具等會俾人戴上身嘅雕塑作品。到咗廿一世紀初，隨住現代科技進步，保存木製物體變得愈嚟愈容易[34][35]，於是好多藝術家都唔使再驚自己嘅木雕作品會爛而開始更加有意慾進行木雕創作[36]。

石雕

[編輯]
内文：石雕

石雕係指用石頭整雕塑作品。石雕技術都相當古老，而且因為石雕夠襟擺，所以由古希臘、古印度以至古華夏等多個遠古文明都有留低石雕作品，例如公元前 3,000 年嘅古埃及嘅神殿同陵墓就充滿咗出名嘅巨型石雕[38]；石刻[e 27]係最早期嘅石雕，指用架生雕琢同磨擦石頭，喺石頭表面嗰度留低圖案同文字，而呢啲石雕技術後嚟仲延伸到去俾人攞嚟做寶石嘅雕塑，好似係玉、瑪瑙同雪花石膏等嘅材料都有俾人攞嚟雕[39]。可以睇埋石窟。

石頭自古以嚟就係一種受歡迎嘅雕塑材料，原因係因為石頭有好多好處：

  • 同金屬礦石比起嚟，多數種類嘅石頭都相當易搵，而且唔使點樣加工就可以攞嚟雕嘢；
  • 另一方面，用石頭唔使驚蟲蛀或者著火，所以石頭整嘅物體襟擺過用（例如）木整嘅物體好多，能夠輕易創造出擺得到成幾個世紀咁耐嘅作品；而且
  • 石頭仲好多變－唔同類嘅石頭喺硬度同色水等各方面有相當高嘅多樣性。

因為呢啲原因，就算到咗廿一世紀初，石頭依然係一種廣受歡迎嘅雕塑材料[40]。

金屬雕

[編輯]
睇埋：青銅雕

金屬雕係指用金屬整雕塑。金屬雕可以用金、銀、鐵同鋁等嘅金屬做材料，當中金同銀因為俾人視為高貴嘅象徵而成日俾人攞嚟整奢侈嘅雕像；不過就算到咗廿一世紀初，金屬雕當中最常見嘅都仲係青銅雕，噉係因為青銅呢種材料用嚟做雕塑有好多優點－首先，青銅喺由液體成形嗰陣會係噉咦膨脹，而且喺臨冷卻嗮之前又會係噉咦收縮，即係話如果將液體狀態嘅青銅倒入去一個模入面（睇返鑄造），啲青銅喺成形嗰時會因為膨脹而撑落個模內部嘅表面（令到青銅雕容易展現出細節），跟住嚿青銅又會係噉咦縮返細（令到「跟住落嚟攞走個模」呢樣嘢易做）；除此之外，青銅唔脆，唔似得石頭或者陶瓷噉跌多兩嘢就爛[43]。因為青銅咁多好處，自古以嚟就好多人用青銅做雕塑作品－青銅雕歷史相當久遠，可以追溯到去公元前 3,200 年嘅兩河流域文明[44]，而公元前 1,600 年至 1,046 年嘅商朝都有好多青銅雕作品[45]。

金屬雕嘅製作好多時會涉及高熱：

  • 金屬雕通常會用鑄造嘅方法嚟整－噉係因為金屬好硬淨，做起雕琢上嚟好難搞，所以用金屬嘅雕塑家通常會首先用石頭等冇咁硬嘅材料整咗件作品嘅形態（初型）出嚟先，然後就用個初型作為「模」，做鑄造嘅過程，整出一個模，跟手再攞呢個模嚟鑄造形態上同個初型一樣嘅金屬作品[43]；
  • 金屬雕又可以涉及鍛造[e 32]－金屬加熱到咁上下就會變軟，所以做金屬加工嘅人可以利用呢一點，將嚿金屬加熱到會變軟嘅溫度[註 3]，然後將嚿金屬攞喺一個鐵砧上面，並且用鎚仔等嘅架生扑嚿金屬，令嚿嘢變形，靠噉造出想要嘅形狀[46]；
  • 除咗噉之外，用金屬嘅雕塑家好興用銲接嘅方法將若干嚿金屬物體結合埋一齊，做一嚿更大更複雜嘅雕塑作品[47]。

冰雕

[編輯]
内文：冰雕

冰雕係指用冰整雕塑。冰雕常見於北半球緯度比較高（氣候比較凍）嘅地區，例如係東北三省、日本嘅北海道、俄羅斯、北歐以及加拿大等地－呢啲地區冬天嗰陣往往有長時間嘅零下氣溫，會有大量嘅冰同雪積聚，所以嗰頭嘅人就成日都貪得意攞冰雪嚟雕嘢[48][49]。

同第啲形式嘅雕塑比起嚟，冰雕最大嘅特徵就係極之唔襟擺：一旦冬天結束（或者只係到咗冬天冇咁凍嘅時段），氣溫升返上去攝氏 0 度以上，冰雕就會開始溶；即係話冰雕通常都係要嘥多好多時間心機整，而且整好咗都只係曇花一現，所以啲人多數都淨係喺盛事（例如係冰雪節或者搞婚禮）嗰陣，先會有心機特登整冰雕，而喺氣候比較熱嘅地區，冰雕好多時會成為一種奢侈品，係有錢嘅象徵[50]；另一方面，「冰雕極唔襟擺」呢一點又會俾人利用嚟做表演－有陣時啲人會貪得意，喺溫度攝氏 0 度以上嘅環境下整冰雕；喺呢種情況下，通常個雕塑家會將嚿要雕嘅冰擺喺觀眾或者鏡頭面前，再用電鋸等嘅架生喺幾分鐘內（嚿冰溶嗮之前）雕好件作品，再將雕嘅過程作為一種表演吸引觀眾睇[51]。

第啲材料

[編輯]
  • 象牙雕指用象牙整嘅雕塑；喺中世紀歐洲等嘅多個古代社會，象牙雕曾經俾人視為奢侈同富裕嘅象徵，但到咗廿世紀，象牙呢種材料就因為俾人指搞到大笨象面臨絕種危機所以俾好多國家地區禁咗，而象牙雕亦都因而式微[52]。
  • 玻璃雕指用玻璃整嘅雕塑。一般嚟講，玻璃好脆近乎冇可能雕琢，所以玻璃雕絕大多數係用鑄造方法整嘅；古羅馬嘅《來古格士杯》[e 35]表面嘅浮雕係一件極之罕有、「雕出嚟」嘅玻璃雕作品[53]。
  • 陶瓷雕指用陶瓷整嘅雕塑。
  • 沙雕指用沙整嘅雕塑。

... 等等。

  • 19 世紀中嘅一個日本象牙雕像； 個雕像描繪一隻帶住兩隻仔嘅老虎乸。
    19 世紀中嘅一個日本象牙雕像；
    個雕像描繪一隻帶住兩隻仔嘅老虎乸。
  • 《來古格士杯》 4 世紀；材料：玻璃
    《來古格士杯》
    4 世紀；材料：玻璃
  • 德化白瓷觀音像
    德化白瓷觀音像
  • 一件沙雕作品；2007 年
    一件沙雕作品；2007 年

簡史

[編輯]
一個舊石器時代嘅維納斯小像
睇埋：考古學同藝術史

早期歷史

[編輯]

史前

[編輯]

人類歷史上第一個無可否定（學者一致認同佢係雕塑）嘅雕塑例子出自舊石器時代[e 36]嘅歐洲同西亞，嗰度嘅人喺舊石器時代創出咗好多雕過嘅工具同埋首飾，包括一啲立體嘅小型雕像，例子有喺德國掘到出嚟嘅《哈奧費嘅維納斯》[e 37]噉，就係一個大約 6 厘米高嘅雕像，似係描繪緊一個女人（類似附圖），而呢個雕像可以追溯至 40,000 至 35,000 年前[54][55]；呢啲噉嘅「有明顯同誇張化嘅女性特質」嘅雕像喺舊石器時代好常見，人類學家估計當時嘅女人會用呢啲雕像向神靈祈求生仔順利[56]。

兩河流域

[編輯]

兩河流域文明[e 38]係喺公元前 3,100 至 332 年之間活躍於西亞嘅一個遠古文明，包括咗阿卡德帝國同波斯第一帝國等嘅多個皇朝，地理上嘅特點係身處於兩條大河－底格里斯河[e 39]同幼發拉底河[e 40]－之間。兩河流域文明係史上第一個有文字嘅文明，而且有豐富嘅雕塑傳統。考古學家喺兩河流域文明遺跡發現咗好多雕像，呢啲雕像有描繪動物、神職人員、拜神嘅人（當中啲男人通常有又長又濃密嘅鬍鬚）以及係佢哋想像中嘅神靈嘅形象呀噉，多數都係有顏料喺上面（不過經已甩咗色）嘅石雕，用料上以石灰岩零舍常見[57][58]。詳情可以睇吓兩河流域文明藝術。

古埃及

[編輯]
睇埋：古埃及藝術

古埃及係另一個喺整雕塑上好出名嘅古文明，活躍於公元前 3,100 至 332 年之間嘅尼羅河[e 41]流域。古埃及人有高超嘅石雕技術，能夠創造出好似獅身人面像等舉世聞名嘅作品，當中獅身人面像極之巨大，係一個由前髀到尾有成 73 米長、由底到頭頂 20 米高、由正面睇有 19 米闊嘅石灰岩雕像[59]，而古埃及嘅神殿裏面都有大量嘅雕像描繪阿努比斯同芭絲特等古埃及人相信嘅天神。除咗呢啲大雕像之外，古埃及亦都出好多細啲（大約大人咁高）嘅雕像或者係喺神殿等建築物嘅牆上面嘅浮雕。呢啲作品對於考古學家研究古埃及文藝有重大嘅幫助[60]。

  • 兩河流域文明浮雕
    兩河流域文明浮雕
  • 一個兩河流域文明雕像
    一個兩河流域文明雕像
  • 一個描繪阿努比斯嘅雕像
    一個描繪阿努比斯嘅雕像
  • 一間古埃及神殿嘅雕像
    一間古埃及神殿嘅雕像

歐洲雕塑史

[編輯]

古希臘

[編輯]
内文：古希臘雕塑

西人嘅雕塑傳統係喺古希臘嗰陣發展出嚟。古希臘雕塑係喺大約公元前 3,000 年出現嘅，當時嘅人有好多雕像，成日都有用大理石整、擺出各式各樣嘅姿勢嘅女人雕像，而希臘嘅雕塑藝術喺鄰近嘅兩河流域文明同古埃及嘅影響下發展，到咗公元前 650 年左右，古希臘雕塑正式成形，自成一套風格，有各種中至大型（起碼好似大人咁高）嘅雕像，喺神殿俾人擺嚟描繪個樣生得靚嘅少男少女同古希臘人心目中嘅天神[註 4]，又有雕像係喺墓穴嗰度擺嚟描繪過咗身嘅人，呢啲雕像通常都係油咗顏色嘅（不過喺俾現代人發現嗰陣經已甩嗮色），而古希臘式嘅雕塑藝術仲有傳播到去希臘以外嘅歐洲地區[61]。

古羅馬

[編輯]
内文：古羅馬雕塑

古羅馬喺文化上深受古希臘影響，而古羅馬雕塑亦都唔例外。當時嘅羅馬共和國征服咗希臘嘅土地，控制咗成半個歐洲；到咗公元前 2 世紀嘅時候，喺羅馬做嘢嘅雕塑家經已多數都係希臘人，呢啲雕塑家好多都係俾古羅馬捉咗嚟做奴隸嘅，而且古羅馬嘅人又好興由希臘嗰度搶或者買雕像，將呢啲雕像帶返去羅馬帝國權力中心羅馬嗰頭，甚至攞古希臘嘅雕像嚟裝飾羅馬人嘅神殿[註 5]，於是古羅馬雕塑就喺呢種深受古希臘影響嘅環境下發展。古羅馬雕塑喺好多特性上都同古希臘雕塑相似，不過零舍出名整人像，尤其係富裕嘅中產階層羅馬人會請雕塑家整佢哋嘅人像[62]。

  • 一個古羅馬墓穴嘅浮雕 公元前 2 世紀
    一個古羅馬墓穴嘅浮雕
    公元前 2 世紀
  • 羅馬帝國皇帝克勞狄嘅胸像 公元前 50 年
    羅馬帝國皇帝克勞狄嘅胸像
    公元前 50 年
  • 羅馬帝國開國皇帝奧古斯都嘅雕像 公元前 1 世紀
    羅馬帝國開國皇帝奧古斯都嘅雕像
    公元前 1 世紀
  • 一個古羅馬浮雕 公元前 13 年
    一個古羅馬浮雕
    公元前 13 年

中世紀

[編輯]
睇埋：羅曼式同哥德式

公元 5 世紀打後，隨住西羅馬帝國倒塌，歐洲正式步入中世紀。喺中世紀嘅歐洲，唔同行業嘅工匠同商人興建立公會[e 44]，每個公會各自負責監控屬佢嗰行嘅歐洲人做嘢同埋組織嗰行嘅貿易[63]；另一方面，中世紀嘅歐洲全面開始基督教化：遠古時期嘅歐洲人興拜嗰啲希臘羅馬噉嘅多神信仰走向衰落，並且俾一神論嘅基督教取代，早期嘅基督教好反對拜偶像，對於打前時期（俾人攞嚟拜）嘅天神雕像相當反感，出現咗破壞偶像主義嘅現象，而且神職人員同商人帶住雕塑方面嘅知識同埋改革歐洲藝術嘅意欲行勻成個歐洲大陸，令到歐洲嘅雕塑藝術起咗重大變化，而喺黑暗時代過後，10 世紀嘅歐洲喺文化同經濟上開始繁榮返，出現咗羅曼式[e 45]同哥德式[e 46]等嘅新藝術風格，例如喺當時嘅歐洲，象牙雕頗為盛行，係有錢階層嘅代表[64]。

中世紀後

[編輯]

15 世紀係歐洲（尤其係意大利半島嗰頭）進入文藝復興嘅時代，係歐洲史上一個出咗大量出名雕塑作品嘅時代：喺呢個時代，歐洲人發明咗一樣革命性嘅技術－印刷術，印刷術令歐洲人有得大規模印書同分享知識，搞到教會冇得再獨佔住啲知識，令到歐洲人重拾對古希臘同古羅馬嘅興趣，並且郁手整一啲仿古典嘅雕塑作品，於是呢啲歐洲人帶動咗一股新嘅藝術風潮，雕塑就自然走唔甩[65]。當時嘅有錢人好興出錢請雕塑家整雕塑作品，又會用雕塑嚟做公眾地方嘅裝飾，整咗大量描繪成年男女以至細路嘅雕塑作品。米高安哲羅（Michelangelo）係喺 1500 年 1520 年間活躍嘅一位著名雕塑家，喺古典雕塑嘅影響下整咗《大衛像》、《哀悼基督》[e 47]同埋《摩西像》[e 48]等多件舉世聞名嘅作品，當中例如《大衛像》就俾話佢喺姿勢上似古典嘅雕像[66]。

有關文藝復興後嘅歐洲藝術風格嘅例子，可以睇巴洛克。

中國雕塑史

[編輯]
睇埋：中國藝術

古代中國嘅雕塑藝術歷史相當悠久：中國雕塑最少可以追溯至商朝（公元前超過 1,500 年），當時商朝嘅人喺整青銅嘅金工技術上經已相當成熟，出咗大量用嚟做祭祀等用途嘅青銅器，而呢啲青銅器上面往往有複雜嘅浮雕，會描繪動物但又有純抽象嘅幾何圖案[註 6]；打後少少嘅秦朝又有好出名嘅秦始皇兵馬俑（公元前 3 世紀），呢啲雕像描繪咗超過 8,000 個士兵，俾秦始皇攞嚟做陪葬品[67]。而喺呢啲時期佔領嶺南地區嘅百越人都有整雕塑，而且不乏平民化嘅作品[68]。一般嚟講，公元前嘅時期嘅中國雕塑喺風格上嘅一大特徵係冇乜宗教性質嘅雕像－儒教等喺呢個時代佔據咗中國嘅宗教多數都唔興整神靈嘅雕像嚟拜，要去到打後嘅唐朝等嘅朝代先至開始有大型嘅宗教性質雕像[69]。

  • 一個商朝嘅青銅鼎； 鼎表面有浮雕。
    一個商朝嘅青銅鼎；
    鼎表面有浮雕。
  • 兵馬俑
    兵馬俑
  • 越國雕像 公元前 200 年
    越國雕像
    公元前 200 年
  • 兵馬俑由上面望嘅樣
    兵馬俑由上面望嘅樣

唐朝（618 - 907 年）同宋朝（960 - 1279 年）係漢傳佛教開始進入全盛嘅時代。當時佛教嘅相關文化（例如係印度嘅文化）經絲綢之路傳入中國，佛教徒好多時都興整佛祖或者觀音等宗教人物嘅雕像，於是唐朝同宋朝嘅雕塑喺風格上嘅一大特徵就係有大量嘅宗教性雕塑（尤其係大型嘅），用料上由木以至石頭同玉都有[70]，出名嘅例子有喺四川嘅樂山大佛，又或者係佛祖同觀音等人物嘅木雕（廿世紀前嘅木雕保留到超過 500 年一般俾人覺得算係好勁）；另一方面，呢個時代嘅中國冇乜描繪皇室成員嘅雕塑作品－呢點同（例如）打前少少、好興整皇帝雕像嘅羅馬帝國好唔同，噉據講係因為喺唐朝同宋朝，皇帝嘅形象俾人認為係私人嘅，唔俾得外人知，不過皇帝嘅陵墓同廟等嘅地方依然好多時都有豪華、描繪動物形象嘅雕像同浮雕[69]。

中國雕塑嘅另一個特徵係雕塑家嘅地立頗低：喺古希臘同古羅馬，雕塑家好多時都係奴隸，但起碼有啲雕塑家能夠喺作品上留名[71]；而中世紀同打後嘅歐洲雕塑家仲會俾人請佢哋整雕塑，令雕塑家嘅地位提升[66]；相比之下，古代中國嘅雕塑家屬士農工商當中嘅「工」，地位唔高，就算整咗受人鍾意嘅作品，都唔會喺作品上面留名；因為噉，廿世紀前嘅中國雕塑史上難以出到好似米高安哲羅噉嘅名家[72]。

  • 樂山大佛由下向上望
    樂山大佛由下向上望
  • 唐朝佛祖像 650 年
    唐朝佛祖像
    650 年
  • 宋朝玉杯 12 世紀
    宋朝玉杯
    12 世紀
  • 坐喺度嘅木觀音像 11 世紀北宋
    坐喺度嘅木觀音像
    11 世紀北宋

粵式建築

[編輯]
睇埋：粵式建築

嶺南建築，又叫粵式建築，係喺 14 世紀嘅嶺南興起嘅一種建築風格。嶺南建築好有特色：同中原嗰頭比起嚟，嶺南氣候又熱又濕立立，如果將中原嗰套建築風格直接搬落嚟嘅話，會好容易有發霉呢類濕滯嘢。所以粵人整咗一套同中原人唔同嘅建築風格。古典嶺南建築通常比較輕，而且會用通透同冇咁易發霉嘅材料起，色水會偏好灰白或者係綠呢啲柔和嘅色調，而且嶺南民居建築仲有好多露台呢類嘅開放式結構，等人有得唞涼。傳統上，嶺南建築一大特徵係雕像同浮雕多：同其他唐人起嘅祠堂比起上嚟，粵人嘅祠堂鍾意擺好多用木同石頭整嘅人物靈獸雕塑嚟做裝飾，達到「光宗耀祖」嘅效果。嶺南建築雕塑喺主題上好多樣，有歷史故事、神話傳說、吉祥圖案、飛禽走獸、奇花異草呀噉，亦都有啲係用本地特色嘅景物，好似係洋桃、番石榴、木棉同榕樹呢啲嶺南地區成日都見到嘅生果同植物[5]。

現代雕塑

[編輯]
内文：現代雕塑

現代雕塑[e 49]係喺廿世紀初嘅歐美興起嘅雕塑藝術風格。一般認為，現代雕塑係由法國雕塑家羅丹[e 50]喺 1900 年嗰陣响巴黎搞展覽而帶起嘅，當時羅丹展示咗《思索者》等嘅作品[73]。打後西班牙藝術家畢加索[e 51]帶起咗立體主義[e 52]呢門藝術流派：呢個流派嘗試將一件藝術品所描繪嘅事物抽象化成一塊塊平面同埋立方體等嘅基本幾何形狀，展現事物嘅基本構造，唔再好似打前嘅歐洲藝術噉，成日都堅持「要畫或者雕到同實物一樣」先算係靚；除此之外，畢加索又採取咗喺當時好嶄新嘅做法，用多嚿唔同嘅物體砌出佢想要嘅雕像（組合塑法），而唔係靠雕琢或者鑄造[74]。另一方面，超現實主義[e 53]嘅風潮興起，呢種藝術講求特登唔跟現實，而呢點同「要畫或者雕到同實物一樣」啱啱相反[75]。上述嘅呢啲藝術革命創出咗現代雕塑－高度抽象化、唔追求「似實物」同埋唔追求學院化嘅新雕塑藝術。現代雕塑到咗廿一世紀初都仲有繼續發展緊[76]。

宗教爭議

[編輯]
荷蘭尼美根一間教堂嘅浮雕喺 16 世紀宗教改革嗰陣俾人破壞過－啲面冚唪唥唔見嗮。

亞巴郎諸教

[編輯]
睇埋：拜偶像

雕塑嘅地位喺亞巴郎諸教（[e 56] 包括猶太教、基督教同伊斯蘭教呢三個認同亞巴郎嘅地立嘅宗教）當中係一條好有爭議性嘅問題。簡單噉講，亞巴郎諸教傳統上係堅信一神論，認為宇宙當中除咗上帝之外冇嘢係應該受人崇拜嘅，所以對於拜偶像（指當雕像等嘅物體係神噉拜）極之反感，當中伊斯蘭教仲嚴到禁止信徒製作雕像，而伊斯蘭教盛行嘅中東亦都因為噉而喺 8 世紀（大規模改信伊斯蘭教）之後近乎冇嗮雕像藝術[77][78]。猶太教同基督教相比之下寬鬆啲，當中羅馬天主教對雕像比較包容，一般都俾信徒面向住聖母同聖人嘅雕像祈禱[79]，而猶太教以及新教通常都唔會俾信徒整宗教性質嘅雕像，但一般都容許非宗教性質嘅雕像[80]。

破壞偶像主義

[編輯]
内文：破壞偶像主義

因為亞巴郎諸教對雕像嘅忌諱，亞巴郎諸教各教喺歷史上都有出現破壞偶像主義[e 57]，即係指啲信徒出於宗教目的而走去大規模噉破壞雕像，尤其係異教徒嘅宗教偶像。例如係歐洲喺 16 世紀嗰時搞宗教改革，呢場改革涉及對（當時經已存在咗差唔多成 1,000 年嘅）羅馬天主教會嘅不滿，亦引致新教嘅出現，而期間有好多激進嘅信徒都走去破壞羅馬天主教會好興整嘅宗教雕像同浮雕。呢點俾人指搞到歐洲喪失咗好多有歷史價值嘅雕塑作品[81]；類似嘅事就算到咗廿一世紀都仲有發生，例如係自從廿世紀尾開始，基督新教開始喺韓國廣傳，有唔少韓國新教徒都唔老嚟韓國嗰啲古老嘅佛教雕像，認為噉係拜偶像，仲出咗多單「新教徒走去放火破壞佛寺同佛教雕像」嘅案[82]。

順帶一提，iconoclasm 呢隻英文字詞源自古希臘文嘅 εἰκών-（羅馬字轉寫：eikṓn-，聖像噉解）同埋 κλάω（羅馬字轉寫：kláō-，打爛噉解）結合埋一齊[83]，所以直接意譯可以叫做破壞偶像主義。

註腳解釋

[編輯]
  1. ↑ 呢啲作品多數以石雕為主，因為石雕襟擺過（例如）木雕好多；而且呢啲遠古作品好多都嚴重甩色。
  2. ↑ 據講伽利略有份設計呢個雕像。
  3. ↑ 唔同金屬嘅「變軟溫度」都唔同。
  4. ↑ 呢啲雕像好多時都係唔著衫嘅。可以睇吓維納斯像。
  5. ↑ 喺宗教上，古羅馬都係拜返古希臘嗰啲天神。
  6. ↑ 不過有考古學家留意到，商朝嘅浮雕唔知點解好少可描繪人。

相關藝術

[編輯]

睇埋

[編輯]

文獻

[編輯]
  • Boucher, Bruce, Italian Baroque Sculpture, 1998, Thames & Hudson (World of Art), ISBN 0-500-20307-5
  • Calkins, Robert G.; Monuments of Medieval Art, Dutton, 1979, ISBN 0-525-47561-3
  • Cherry, John. The Holy Thorn Reliquary, 2010, British Museum Press (British Museum objects in focus), ISBN 0-7141-2820-1
  • Cook, R.M., Greek Art, Penguin, 1986 (reprint of 1972), ISBN 0-14-021866-1
  • Dodwell, C.R., Anglo-Saxon Art, A New Perspective, 1982, Manchester University Press, ISBN 0-7190-0926-X
  • Harle, J. C., The Art and Architecture of the Indian Subcontinent, 2nd edn. 1994, Yale University Press Pelican History of Art, ISBN 0-300-06217-6
  • Paine, Robert Treat, in: Paine, R. T., & A. Soper, The Art and Architecture of Japan, 3rd edn 1981, Yale University Press Pelican History of Art, ISBN 0-14-056108-0
  • Kitzinger, Ernst, Byzantine art in the making: main lines of stylistic development in Mediterranean art, 3rd–7th century, 1977, Faber & Faber, ISBN 0-571-11154-8 (US: Cambridge UP, 1977)
  • Olson, Roberta J. M., Italian Renaissance Sculpture, 1992, Thames & Hudson (World of Art), ISBN 978-0-500-20253-1
  • Sickman, Laurence, in: Sickman L., & A. Soper, "The Art and Architecture of China", Pelican History of Art, 3rd edn 1971, Penguin (now Yale History of Art), LOC 70-125675
  • Smith, W. Stevenson, and Simpson, William Kelly. The Art and Architecture of Ancient Egypt, 3rd edn. 1998, Yale University Press (Penguin/Yale History of Art), ISBN 0-300-07747-5
  • Snyder, James. Northern Renaissance Art, 1985, Harry N. Abrams, ISBN 0-13-623596-4
  • Williams, Dyfri. Masterpieces of Classical Art, 2009, British Museum Press, ISBN 978-0-7141-2254-0

引述

[編輯]

篇文用咗嘅行話或者專有名詞，英文版本如下：

  1. ↑ statue
  2. ↑ relief
  3. ↑ low relief / bas-relief
  4. ↑ high relief
  5. ↑ David
  6. ↑ Elgin Marbles
  7. ↑ representativeness
  8. ↑ Henry Moore
  9. ↑ modern sculptor
  10. ↑ Double Oval
  11. ↑ functionality
  12. ↑ carving
  13. ↑ subtractive
  14. ↑ casting
  15. ↑ replacement / substitution
  16. ↑ modeling
  17. ↑ additive
  18. ↑ assemblage
  19. ↑ 3D printing
  20. ↑ 3D model
  21. ↑ 3D printer
  22. ↑ mechanical equilibrium
  23. ↑ net force
  24. ↑ Felipe IV
  25. ↑ frost weathering
  26. ↑ coating
  27. ↑ petroglyph
  28. ↑ Great Sphinx of Giza
  29. ↑ Petra
  30. ↑ Ajanta Caves
  31. ↑ Self-portrait
  32. ↑ forging
  33. ↑ The Thinker
  34. ↑ Charles V
  35. ↑ The Lycurgus Cup
  36. ↑ Paleolithic
  37. ↑ Venus of Hohle Fels
  38. ↑ Mesopotamia；希臘文：Μεσοποταμία
  39. ↑ Tigris
  40. ↑ Euphrates
  41. ↑ Nile
  42. ↑ Poseidon
  43. ↑ Hermes
  44. ↑ guild
  45. ↑ Romanesque
  46. ↑ Gothic
  47. ↑ Pietà
  48. ↑ Moses
  49. ↑ modern sculpture
  50. ↑ Auguste Rodin
  51. ↑ Pablo Picasso
  52. ↑ cubism
  53. ↑ surrealism
  54. ↑ Floating Figure
  55. ↑ Family Group
  56. ↑ Abrahamic religions
  57. ↑ iconoclasm

篇文引用咗以下呢啲文獻同網頁：

  1. ↑ 1.0 1.1 4 Basic Sculpture Techniques.
  2. ↑ 2.0 2.1 Daniel Marcus Mendelowitz, Children Are Artists: An Introduction to Children's Art for Teachers and Parents (1953), p. 136.
  3. ↑ Creating Welded Sculpture By Nathan Cabot Hale, Courier Dover Publications, 1994.
  4. ↑ 4.0 4.1 Relief Sculpture.
  5. ↑ 5.0 5.1 淺談嶺南民居的嶺南建築特色
  6. ↑ Dillon, S. (2006). Ancient Greek Portrait Sculpture: Contexts, Subjects, and Styles. Cambridge University Press.
  7. ↑ Kristensen, T. M. (2013). Making and breaking the gods: christian responses to pagan sculpture in late antiquity (Vol. 12). ISD LLC.
  8. ↑ Kopár, L. (2012). Gods and Settlers: the iconography of Norse mythology in Anglo-Scandinavian sculpture. Turnhout: Brepols.
  9. ↑ Wilpert, J. (1926). Early Christian sculpture: its restoration and its modern manufacture (PDF). The Art Bulletin, 9(2), 89-141.
  10. ↑ Buchloh, B. H. (1983). Michael Asher and the Conclusion of Modernist sculpture (PDF). Art Institute of Chicago Museum Studies, 277-295.
  11. ↑ Edward Lucie-Smith, Visual arts in the 20th century, Edition illustrated, Publisher Harry N. Abrams, 1997, Original from the University of Michigan.
  12. ↑ 12.0 12.1 Sculpture. Britannica.
  13. ↑ Sculpture and Installation Art. Art Concept.
  14. ↑ Coughlan, Robert (1966). The World of Michelangelo: 1475–1564. et al. Time-Life Books.
  15. ↑ Degarmo, E. Paul; Black, J T.; Kohser, Ronald A. (2003), Materials and Processes in Manufacturing (9th ed.), Wiley.
  16. ↑ Waldman, D., & Matisse, H. (1992). Collage, assemblage, and the found object. London: Phaidon.
  17. ↑ Tran, Jasper (2016). "Press Clause and 3D Printing". Northwestern Journal of Technology and Intellectual Property. 14: 75–80.
  18. ↑ "3D printing scales up". The Economist. 5 September 2013.
  19. ↑ Objet Connex 3D Printers. Objet Printer Solutions.
  20. ↑ Hyper-Realistic Sculptures with ZBrush and 3D Printing. formlabs.
  21. ↑ John L. Synge & Byron A. Griffith (1949). Principles of Mechanics (2nd ed.). McGraw-Hill. p. 39.
  22. ↑ 22.0 22.1 Structures in sculpture. IDOM.
  23. ↑ Scherer, G. W., Flatt, R., & Wheeler, G. (2001). Materials science research for the conservation of sculpture and monuments. Mrs Bulletin, 26(1), 44-50.
  24. ↑ Reisener, A.; Stäckle, B.; Snethlage, R. (1995). "ICP on effects on materials". Water, Air, & Soil Pollution. 85 (4): 2701–2706.
  25. ↑ Khanlari, G., & Abdilor, Y. (2015). Influence of wet–dry, freeze–thaw, and heat–cool cycles on the physical and mechanical properties of Upper Red sandstones in central Iran. Bulletin of engineering geology and the environment, 74(4), 1287-1300.
  26. ↑ Couture-Rigert, D. E., Sirois, P. J., & Moffatt, E. A. (2012). An investigation into the cause of corrosion on indoor bronze sculpture. Studies in conservation, 57(3), 142-163.
  27. ↑ 27.0 27.1 Bierwagen, G., Shedlosky, T. J., & Stanek, K. (2003). Developing and testing a new generation of protective coatings for outdoor bronze sculpture. Progress in Organic Coatings, 48(2-4), 289-296.
  28. ↑ Kipper, P. V. (1996). The care of bronze sculpture: recommended maintenance programs for the collector.
  29. ↑ Pelosi, C., Calienno, L., Fodaro, D., Borrelli, E., Rubino, A. R., Sforzini, L., & Monaco, A. L. (2016). An integrated approach to the conservation of a wooden sculpture representing Saint Joseph by the workshop of Ignaz Günther (1727–1775): analysis, laser cleaning and 3D documentation. Journal of Cultural Heritage, 17, 114-122.
  30. ↑ Allington-Jones, L. (2015). The Clacton spear: The last one hundred years. Archaeological Journal, 172(2), 273-296.
  31. ↑ Crallan, Franklyn Arden (1911). "Wood-Carving". In Chisholm, Hugh (ed.). Encyclopædia Britannica. 28 (11th ed.). Cambridge University Press. pp. 791–97.
  32. ↑ See for example Martin Robertson, A shorter history of Greek art, p. 9, Cambridge University Press, 1981.
  33. ↑ Cunningham, A. B., Campbell, B. M., Belcher, B., & Belcher, B. M. (Eds.). (2005). Carving out a future: Forests, livelihoods and the international woodcarving trade. Earthscan.
  34. ↑ Morén, R., & Centerwall, B. R. (1960). Use of polyglycols in the stabilizing and preservation of wood. Meddeland en Frän Lunds Universitets Historiska Museum, 176-196.
  35. ↑ Comstock, H. (1953). Preserving wood sculpture. Connoisseur, 132, 66-66.
  36. ↑ 15 Master Artists Carrying on the Ancient Tradition of Wood Carving.
  37. ↑ 王大勇. (2011). 潮州木雕藝術地域特色探究. 裝飾, (5), 84-85.
  38. ↑ Smith, W. Stevenson; Simpson, William Kelly (1998). The Art and Architecture of Ancient Egypt. Penguin/Yale History of Art (3rd ed.). Yale University Press.
  39. ↑ Hoffman, Malvina (1939). Sculpture Inside and Out. New York: Bonanza Books. p. 235.
  40. ↑ All About the Art and Science of Stone Carving. Masonry Magazine.
  41. ↑ Hill, Bryan (22 July 2018). "The Leshan Giant Buddha: Largest Stone Buddha in the World". Ancient Origins.
  42. ↑ 〈【岭南文脉】五羊雕像：最为广州人民认可的雕塑〉。原著喺2021年4月18號歸檔。喺2021年1月19號搵到。
  43. ↑ 43.0 43.1 Savage, George, "A Concise History of Bronzes", Frederick A. Praeger, Inc. Publishers, New York, 1968.
  44. ↑ Hägele, H. (2013). Colour in sculpture: a survey from ancient Mesopotamia to the present. Cambridge Scholars Publishing.
  45. ↑ 商代青銅器的特徵
  46. ↑ Degarmo, E. Paul; Black, J. T.; Kohser, Ronald A. (2011). Materials and Processes in Manufacturing (11th ed.). Wiley.
  47. ↑ Collischan, J., & Anbinder, P. (2000). Welded sculpture of the twentieth century. Lund Humphries.
  48. ↑ Dewar, K., Meyer, D., & Li, W. M. (2001). Harbin, lanterns of ice, sculptures of snow. Tourism Management, 22(5), 523-532.
  49. ↑ Down Under Ice Designs 互聯網檔案館嘅歸檔，歸檔日期2021年1月27號，..
  50. ↑ Jokela, T. (2007). Winter art as an experience. Arts and Experiences. Articles on Experinces, 5, 114-135.
  51. ↑ Amendola, Joseph (1994). Ice Carving Made Easy. New York, NY: John Wiley & Sons, Inc.
  52. ↑ Williamson, Paul. An Introduction to Medieval Ivory Carvings, 1982, HMSO for V&A Museum.
  53. ↑ Elsner, Jaś, "The Lycurgus Cup", Chapter 12 in New Light on Old Glass: Recent Research on Byzantine Mosaics and Glass, 2013, British Museum Research Publication No. 179, British Museum Press.
  54. ↑ P. Mellars, Archeology and the Dispersal of Modern Humans in Europe: Deconstructing the Aurignacian, Evolutionary Anthropology, vol. 15 (2006), pp. 167–82.
  55. ↑ de Laet, Sigfried J. (1994). History of Humanity: Prehistory and the beginnings of civilization. UNESCO. p. 211.
  56. ↑ William Haviland, Harald Prins, Dana Walrath, Bunny McBride, Anthropology: The Human Challenge, 13th edition, 2010, Cengage Learning.
  57. ↑ Frankfort, Henri, The Art and Architecture of the Ancient Orient, Pelican History of Art, 4th Ed. (1970), Penguin (now Yale History of Art).
  58. ↑ Teissier, Beatrice, Ancient Near Eastern Cylinder Seals from the Marcopolic Collection, (1984), University of California Press.
  59. ↑ Rigano, Charles (2014). Pyramids of the Giza Plateau. p. 148.
  60. ↑ Smith, W. Stevenson, and Simpson, William Kelly. The Art and Architecture of Ancient Egypt, 3rd edn. (1998), Yale University Press (Penguin/Yale History of Art).
  61. ↑ Cook, R.M., Greek Art, Penguin, 1986 (reprint of 1972).
  62. ↑ Henig, Martin (ed.), A Handbook of Roman Art, Phaidon, 1983,
  63. ↑ Epstein, S.R.; Prak, Maarten, eds. (2008). Guilds, Innovation and the European Economy, 1400–1800. Cambridge University Press.
  64. ↑ Fletcher, Richard, The Conversion of Europe. From Paganism to Christianity 371-1386 AD. London 1997.
  65. ↑ Andrew Martindale, Man and the Renaissance, 1966, Paul Hamlyn,
  66. ↑ 66.0 66.1 Olson, Roberta J. M., Italian Renaissance Sculpture, (1992), Thames & Hudson (World of Art).
  67. ↑ Rawson, Jessica (ed.). The British Museum Book of Chinese Art, 2007 (2nd edn), British Museum Press.
  68. ↑ Barlow, Jeffrey G. (1997). "Culture, ethnic identity, and early weapons systems: the Sino-Vietnamese frontier". In Tötösy de Zepetnek, Steven; Jay, Jennifer W. (eds.). East Asian cultural and historical perspectives: histories and society—culture and literatures. Research Institute for Comparative Literature and Cross-Cultural Studies, University of Alberta. pp. 1–15.
  69. ↑ 69.0 69.1 Rawson, 135–45, 145–63.
  70. ↑ Rawson, Chapters 4 and 6.
  71. ↑ Burford, Alison, "Greece, ancient, §IV, 1: Monumental sculpture: Overview, 5 c)" in Oxford Art Online, 2012.
  72. ↑ Rawson, 134–35.
  73. ↑ Curtis, Penelope, "Sculpture: 1900-1945", Oxford University Press, Oxford, 1999, p. 1.
  74. ↑ Apollinaire, Guillaume, (1912), Art and Curiosity, the Beginning of Cubism, Le Temps.
  75. ↑ Alexandrian, Sarane. Surrealist Art. London: Thames & Hudson, 1970.
  76. ↑ Elsen, Albert E. (2003). Rodin's Art: The Rodin Collection of the Iris & Gerald B. Cantor Center for the Visual Arts. Oxford: Oxford University Press.
  77. ↑ Reuven Chaim Klein (2018). God versus Gods: Judaism in the Age of Idolatry. Mosaica Press.
  78. ↑ Faur, José; Faur, Jose (1978), "The Biblical Idea of Idolatry", The Jewish Quarterly Review, 69 (1): 1-15.
  79. ↑ Do Catholic's Worship Statues? 互聯網檔案館嘅歸檔，歸檔日期2022年9月30號，..
  80. ↑ Kurian, George Thomas; Lamport, Mark A. (10 November 2016). Encyclopedia of Christianity in the United States. Rowman & Littlefield Publishers. p. 707.
  81. ↑ Stark, Rodney (18 December 2007). The Victory of Reason: How Christianity Led to Freedom, Capitalism, and Western Success. Random House Publishing Group. p. 176. The Beeldenstorm, or Iconoclastic Fury, involved roving bands of radical Calvinists who were utterly opposed to all religious images and decorations in churches and who acted on their beliefs by storming into Catholic churches and destroying all artwork and finery."
  82. ↑ Wells, Harry L. 2000. "Korean Temple Burnings and Vandalism: The Response of the Society for Buddhist-Christian Studies." Buddhist-Christian Studies, 20:239–40.
  83. ↑ Crone, Patricia. 2005. "Islam, Judeo-Christianity and Byzantine Iconoclasm." Pp. 59–96 in From Kavād to al-Ghazālī: Religion, Law and Political Thought in the Near East, c. 600-1100, (Variorum). Ashgate Publishing.

拎

[編輯]
維基同享有多媒體嘅嘢：
雕塑
由「https://zh-yue.wikipedia.org/w/index.php?title=雕塑&oldid=2070829」收