工作記憶

工作記憶（粵音：gung1 zok3 gei3 jik1；英文：WM）係記憶功能嘅一種，負責暫時儲起個心靈用緊嘅資訊，並且對呢啲資訊作出運算，可以話係短期記憶一種。

概論

睇埋：記憶力

喺 1974 年，英國心理學家亞倫·伯特里（Alan Baddeley）同加拉咸·希卓（Graham Hitch）提出咗工作記憶呢個概念，指短期內儲住啲資訊，兼且對呢啲資訊作出運算嘅記憶功能。喺伯特里工作記憶模型嗰個基礎版本入面，短期記憶主要係由三大系統組成：

• 中央處理（central executive）、
• 語音循環（phonological loop）、同
• 視覺空間畫板（visuospatial sketchpad），

呢三個子系統分別負責處理唔同類型嘅短期記憶資訊：

• 中央處理負責控制資訊喺其他工作記憶系統當中嘅流動，
• 聲迴負責暫時噉儲起聽覺資訊（例如啲人喺個腦入面複誦一段電話號碼），
• 視空畫板負責暫時噉儲起一啲視覺資訊（例如啲人喺個腦入面諗住一個影像）－

呢個分類法解釋得到某啲實驗結果，好似係對於人類嚟講，同時做兩樣同類型（都係視覺或者都係聽覺）嘅短期記憶作業難過做兩樣唔同類型（一個視覺一個聽覺）嘅作業。打後嘅研究仲有進一步噉擴張呢個模型。工作記憶模型嘅抽象圖解如下，當中箭咀係記憶資訊嘅流動：

神經對應

睇埋：記憶痕跡

有唔少心理學家都嘗試拆解工作記憶嘅神經對應。研究指，工作記憶嘅中央處理功能至少部份係由前額葉（prefrontal cortex）同頂葉（parietal lobe）呢兩個腦區向個腦嘅感官區域傳訊號而成嘅，呢啲腦區會向處理感官資訊嘅腦區傳訊號，話俾佢哋聽四圍環境嘅資訊入面邊啲值得留意，從而控制感官收到嘅資訊邊啲會成功經過入碼嘅過程進入工作記憶。一旦啲資訊成功噉入咗去工作記憶嗰度，個前額葉同頂葉會係噉互射訊號嚟維持住啲資訊。

睇埋

• 短期記憶
• 隨機存取記憶體