非線性遊戲度

非線性遊戲度（英文：nonlinear gameplay）係遊戲設計上嘅一個概念，指要完成一隻遊戲需要通過嘅挑戰可以用多個唔同次序完成。舉個例子說明，而家有一隻平台遊戲，喺玩家過咗一個關卡之後，遊戲世界會有多道傳送門出現，俾玩家揀去邊一個關卡，而且玩家仲有可能直接跳過某啲關卡，就去到大佬嗰度；相比之下，一隻「過咗一關就去下一關」嘅平台遊戲設計上就好線性。

喺現代遊戲設計上，線性遊戲設計冇話一定唔好，不過唔同玩家群可能對遊戲嘅線性設計有特別嘅喜惡。

沙盒模式

好多遊戲都會有所謂嘅沙盒模式：舉個例說明，喺好似《模擬樂園系列》等俾玩家建設遊樂園嘅商業模擬遊戲入面，正常嚟講玩家要受資金嘅限制，而且要達到某啲任務目的（例如「要令個遊樂園嘅入場人次超過某個數」）；而《模擬樂園系列》嘅多部作品都有沙盒模式－响沙盒模式當中，玩家有無限咁多資金，而且冇話要達到乜嘢任務目的，等玩家有得完全自由噉建設自己心目中嘅夢幻遊樂園。

睇埋

• 關卡
• 開放世界
• 打機用語