商學

2013 年兩位生意人做成單生意，喺度笑住噉握手。

商學（粵拼：soeng1 hok6；英文：business studies）係指一啲教學生點樣打理生意同埋做相關事務嘅學科。喺好多國家同地區，商學都係高中會教嘅知識，而且大學一般亦都會開設商學方面嘅課程。

領域

睇埋：工商管理

一般嚟講，商學正路會包括以下呢啲領域：

• 經濟學：專研究貨品同服務嘅生產、消費同埋分配；經濟學嘅研究範疇包括個體人類嘅行為同互動，以至成個經濟體嘅運作，好興用數學模型嚟模擬經濟個體（個人以至企業呀噉）點樣做決策，用嚟對經濟現象作出預測。
• 管理學：專研究組織要點管，當中「組織」可以係一間企業、一個非牟利機構或者一個慈善團體都得；管理學旨在考慮點安排一個組織嘅各種資源（包括財力、物力同人力等），務求令個組織達到目的，途中要諗到應變管理（幫個組織改變自身嚟適應外界形勢）、風險管理（測量同評估風險）同埋績效管理（監督個組織嘅人員同工作團隊）等嘅多個課題。
• 市場學：專研究點樣吸引人買自己產品；途中會考慮到定價策略（要估消費者肯出幾多錢買）、分銷（要諗件產品要點送到去啲客嘅手上）同埋宣傳（指要確保消費者知件產品存在，同知道件產品掂）等嘅課題。
• 會計學：專研究點樣量度、處理同傳達有關經濟物體（例如一間企業）嘅財務資訊；簡單嘅例子有紀錄住間企業嘅經濟活動（生產咗幾多嘢、使咗幾多錢做研發同埋賺咗幾多利潤... 等等），並且將呢啲資訊講俾股東等嘅人員知。
• 金融學：專研究點樣分配同用錢以及投資；喺個人層面，金融學可以包含個人理財，幫個體投資者思考「啲錢要點打理，先可以令自己嚿儲蓄愈碌愈大」噉嘅問題，而喺企業層面，金融學會思考（例如）點樣用股票同間企業籌募資金。
• 資訊系統（IS）：專研究用資訊科技喺一個組織入面收集、處理、儲起同散佈資訊；簡單嘅例子，有研究點樣用數據庫儲住商業上有用嘅數據，仲有係思考點樣設計軟件幫管理者運用呢啲數據。

...呀噉。

睇埋

• 社會科學
• 科學
• 科學方法
• 工業

拎

• （英文） Investopedia，專講商學嘢嘅投資百科。