梁國雄

梁國雄
出生日	1956年3月27號  （68歲）
出生地	英屬香港
國籍	中華人民共和國
信奉	無神論
母校	金文泰中學
職業	政治人
政黨	社會民主連線
[改維基數據]

長毛畀記者訪問

梁國雄（LEUNG Kwok-hung，1956年3月27號—），花名長毛、毛哥、饅頭雄，係前香港立法會議員，激進民主派代表人物，共產主義托洛茨基派信徒，網絡電台MyRadio星期一深夜節目〈足球頻道〉主持同埋星期五晚節目〈風也蕭蕭〉嘅客席主持。2006年4月，佢同黃毓民、陳偉業等人起咗政團社會民主連線。

梁國雄嘅招牌係把長頭髮同埋「捷古華拉」T裇。佢成日同四五行動響香港大細示威同警察肢體衝撞，亦多次被判違反公安條例；香港政府嘜咗佢做麻煩友。佢嘅鮮明形像係香港一個標誌，第度嘅香港旅遊指南都有記；有啲遊客會特登去蘭桂坊搵佢傾偈。

2017年2月8號宣佈參選2017年香港行政長官選舉，2017年2月25號由於未能夠得到足夠公民提名，宣佈放棄參選。

屋企

梁國雄祖籍廣東增城，香港出世。1988年，梁國雄識咗一名德國女人，兩人一度去咗德國一個小鎮過田園生活，最後分手收場（部份傳媒指梁國雄曾經結婚，但陶君行響2006年6月5號風波裏的龍門陣網上電台節目中指出梁國雄當時並冇結婚，只係同個女人共同生活啫）。

2021年，佢同社民連副秘書長陳寶瑩拉埋天窗。

履歷

佢響金文泰中學畢業，細個就跟阿媽入左派工會，中學時代參加毛派學生運動。畢業後佢做過酒保、地盤工等。

早年

1970年代，佢加入當時嘅托派政治組織「革命馬克思主義者同盟」（革馬盟）。1979年4月，梁國雄曾經因紀念四五天安門事件三周年同支持內地民主運動，被控以「非法集會」罪，入獄一個月。

1989年革馬盟解散，佢就同一群志同道合嘅朋友，包括梁耀忠等人，創辦四五行動，並且係紀念四五天安間事件同八九民運早期（1989年4月，民運仍限於學運狀態）已組織多場示威，聲援北京學生。

1989年到1999年間，梁國雄同四五行動最廣為人知嘅喺，佢哋一次又一次喺中共領導人訪港期間抬假棺材到佢哋活動地點示威。

梁國雄喺六四18週年紀念活動。

政途

梁國雄喺2000年嘅立法會選舉曾經因為不滿劉慧卿嘅政策太保守，而喺新界東選區挑戰佢，以18,235票對63,541票輸咗，係全區最高票嘅落選人。

2003年，佢又喺區議會選舉中越區前往北角錦屏區挑戰蔡素玉，以「踢走保皇黨」做競選口號，意圖動搖福建幫響嗰區嘅鐵票，但以些微票數飲恨。

2004年香港立法會選舉中，佢再次出選新界東，最後佢以六萬多票順利當選。

2007年8月香港紮鐵工人嘅示威集會，梁國雄參與聲援。

2004年10月6號，梁國雄宣誓就任香港立法會議員，響正式誓詞前後，佢加插咗「效忠人民」及「平反六四」等字句。宣誓後佢並冇按慣例簽誓詞。香港立法會秘書長及後話，立法會冇明文規定宣誓後要署名，誓詞仍然有效。梁國雄就任香港立法會議員後，部分港人認為佢只顧將街頭勇士形象帶入立法會，未能以一個立法者身份去提倡並宣傳自己嘅政綱同埋理想，以致佢嘅支持度大不如前。但事實上，佢係上年度喺議會發言次數最多、而且從未缺席立法會會議嘅議員。

梁國雄亦係立法會保安事務委員會嘅委員。

2005年4月29號，梁國雄等人搭車去到東區海底隧道九龍入口，並落車拉起橫額抗議東隧加價，響2006年3月21號被判阻街罪成，判監12日，但獲准以1000蚊保釋，等候上訴。2007年1月5號，梁國雄等人獲高等法院判上訴得直，無罪釋放。

2007年6月3號，梁國雄聯同四五行動成員到前房屋及規劃地政局局長孫明揚寓所外示威，期間有人衝擊大門。梁國雄因涉嫌參與非法集會喺6月5號被捕。

2010年1月，梁國雄同埋其他四個議員，包括陳淑莊、梁家傑、黃毓民、陳偉業，唔撈立法會議員。不過，佢哋之後參加補選，話借補選畀市民搞「變相公投」，為日後香港政制改革表態。結果，長毛喺補選攞到十萬幾票，成功重返立法會。

2017年7月14號，佢同劉小麗、姚松炎、羅冠聰畀高等法院宣佈宣誓無效，意味住佢嘅13年立法會議員生涯告一段落。

喺2019年嘅第6屆香港區議會選舉裏面，梁國雄參選九龍城區嘅土瓜灣北選區，結果都係落選，輸畀民建聯嘅李慧琼。

長髮

梁國雄嘅一頭長髮，其實同六四事件有關。佢曾經講過中國政府若果唔平反六四，佢就唔會剪髮。一直以來，就只得佢坐監嗰次俾人剪髮。

同曾蔭權關係

梁國雄一向以激烈方式示威見稱，但佢同曾蔭權早喺二十年前認識，不過因為佢哋兩個嘅政治取向唔同，所以近年已極少聯絡。

響2007年3月1號，行政長官候選人答問大會響灣仔會議展覽中心舉行期間，梁國雄喺會場示威時唔覺意仆親，曾蔭權喺第二朝打電話畀梁國雄問候佢。

受公屋富戶爭議困擾

梁國雄自2004年起任擔任立法會議員，長期住開公屋，經常被親中派攻擊話佢霸佔公共資源。對此，佢就話自己唔一定次次選舉都當選，而且佢擔任議員大部分嘅收入都攞咗去捐助民主運動，並唔係自己享受。而去到2016年，由於佢已經年滿60歲，所以根據房委會規定，佢亦唔受公屋富戶政策嘅限制。

參攷

• 林保華（2003年），香港「長毛」當選的含義
• 梁國雄宣誓就職　高喊平反六四
• 黃世澤，《聯合早報》梁國雄現象
• 香港東方日報：長毛陳偉業籌組新政團
• 長毛：香港最不服從的公民
• 梁國雄始終未有回鄉證

出面網頁

• 〈香港特別行政區立法會 - 議員資料庫〉 (繁體中文)。香港特別行政區立法會。