司馬懿

司馬懿
後世嘅司馬懿畫像
曹魏 太傅、錄尚書事
生	179年
死	251年
老豆	司馬防
仔女	司馬師、司馬昭等
遞啲名
字	仲達
諡號	宣皇帝（晉朝追諡）
廟號	高祖（晉朝追崇）

司馬懿（懿讀意，粵拼：si1 maa5 ji3；179年—251年），字仲達（zung6 daat6），司州河內郡温縣孝敬里舞陽村（今河南省溫縣招賢鎮）人，出身士族家庭，三國時期魏國大臣，政治人同軍事家。佢曾經喺曹魏西部抵禦諸葛亮嘅北伐軍，之後又平定咗遼東公孫淵嘅叛亂，魏帝曹叡因此好信任佢，臨死前託孤佢同埋大將軍曹爽。後尾佢發動高平陵之變做低曹爽，控制咗曹魏嘅政權。之後曹魏嘅君主都成為司馬家嘅傀儡，為日後司馬炎篡奪曹魏政權埋下伏筆。

司馬懿個仔司馬昭稱王後，追尊佢為晉宣王；司馬懿個孫司馬炎做咗皇帝之後，追尊為高祖宣皇帝，所以又叫晉高祖（zeon3 gou1 zou2）、晉宣帝（zeon3 syun1 dai3）。

生平

司馬懿係東漢京兆尹司馬防嘅第二個仔，司馬懿阿爺司馬儁係潁川太守。

曹操當政嗰陣，搵司馬懿做官，由文學掾做起，之後轉做黃門侍郎，又轉做議郎、丞相東曹屬，之後又轉做主簿。

曹丕篡漢之後，司馬懿做尚書，之後轉做督軍、御史中丞，受封安國鄉侯。

魏黃初二年（221年），司馬懿轉做侍中、尚書右僕射。黃初五年改封做向鄉侯，轉做撫軍、假節，領兵五千，加給事中、錄尚書事。

魏明帝即位之後，改封司馬懿做舞陽侯，之後轉做驃騎將軍，之後明帝加司馬懿督荊、豫二州諸軍事。

魏太和四年（230年），司馬懿升做大將軍，加大都督、假黃鉞。第二年，魏明帝任命司馬懿都督雍、涼二州諸軍事。

青龍三年，司馬懿升做太尉。魏明帝過身嗰陣，有遺詔叫司馬懿同大將軍曹爽輔佐下任皇帝曹芳。