起城市遊戲
(由虛擬城市跳轉過嚟)
起城市遊戲（粵拼：hei2 sing4 si5 jau4 hei3）—又叫城市建造遊戲，坊間亦有稱之為模擬城市類或者 SimCity 類[1] —係一種電子遊戲類型，屬於模擬遊戲，顧名思義隻遊戲係模擬緊起城市，畀玩家彷彿好似搖身一變做咗城市規劃師噉。
一隻起城市遊戲大致係噉嘅：隻遊戲會提供一笪笪嘅地圖，玩家可以由
起城市遊戲起源自 1980 年代尾，由模擬城市[英 1]帶起，到咗廿一世紀初都一路出到有睇頭嘅作品，例子可以睇吓城市：天際線[英 2]呀噉。
基本格局
[編輯]睇埋：圖 (抽象資料類型)同搵路
唔同嘅起城市遊戲，喺機制上可以好唔同。不過喺廿一世紀初，起城市遊戲實會有：
- 平面：隻遊戲會有個平面嘅世界，畀玩家喺個世界入面放置各種嘅建築物同基建，編程上可以係以一幅圖數據[英 3]嘅形式存在嘅，每一個節點都有變數表示佢有乜特性[2]；一般認為，個世界嘅最大可能嘥
士 係愈大愈好，不過呢樣嘢就受制於電腦性能同埋軟件最佳化等嘅因素；喺 2015 年嘅起城市遊戲《城市：天際線》[英 2]當中，一座玩家起嘅城市嘅面積最高可以去到 33.18 km2 咁大[3][4]。 - 控制：隻遊戲要有個 UI 管控玩家畀嘅 input，要畀玩家控制鏡頭嘅郁動—常見嘅有「撳住右掣嗰陣鏡頭會旋轉」同埋「轆踎士中間個轆會放大縮細」呀噉；除此之外，隻遊戲亦要畀玩家由選單度揀「想起乜」同埋將揀咗想起嘅嘢擺落平面地圖度，同埋有啲掣畀玩家剷走想剷嘅嘢；隻遊戲要有齊晒呢啲嘢嘅 3D 模型或者精靈圖（遊戲資產）。
有咗平面同埋控制方法，起城市遊戲個基本格局經已齊晒[5]。
城市模擬
[編輯]開發起城市遊戲嘅一個難點，在於點樣模擬座城市啲變數之間嘅關係。
喺《模擬城市》[英 1]同《城市：天際線》裏面，玩家嘅城市可以愈轆愈大：玩家要起嘢就要使虛擬錢；同時隻遊戲梗會有一啲機制，畀玩家賺虛擬錢（否則隻遊戲好快就玩完）；喺呢啲遊戲入面，玩家起嘅嘢能夠製造收入，就好似現實世界嘅城市噉—玩家起咗住宅就會有人搬嚟住，市民會搞經濟活動創造 GDP 而且仲會交稅；如是者，假設玩家管理得妥當，座虛擬城市就會進入一個循環—
- 擴充城市，
- 賺到收入，
- 攞啲收入擴充，
- 重複。[註 1]
噉就表示，個遊戲程式內部實係猛咁計數，用手上座虛擬城市嘅狀態—好似係人口、商業用建築物嘅數量、工業用建築物嘅數量... 呀噉—做 input 計出玩家跟住落嚟會得到幾多收入[6]。事實係，開發一隻起城市遊戲，往往會要個遊戲程式模擬現實城市規劃上已知嘅城市同經濟現象，想達致迫真嘅城市模擬。當中有啲起城市遊戲達致相當高嘅真實度，高到有啲城市規劃相關領域嘅工作者想攞呢啲遊戲嚟做教學工具，畀學生透過玩呢啲遊戲嚟學城市規劃概念[7][8]。
有好多城市規劃或者經濟學嘅電腦模擬模型，都可以用嚟幫手開發起城市遊戲。例如係房地產市場電腦模擬噉：房地產市場可以當做一個由好多決策者同住戶組成嘅系統，一個住戶會有若干位決策者，每位決策者都有各種嘅特徵，包括性別、年齡同埋喺娛樂上嘅偏好呀噉，同時每個住戶都有啲特徵，例如係「手上有幾多錢」噉[註 2]；然後個程式會同每位決策者計個數，得知佢住邊會得到最大嘅效益—例如一個鍾意睇戲嘅人正路會想住喺戲院附近。進階啲嘅模型，仲會考慮埋參數會點樣隨時間而變化，或者考慮每位決策者會唔會遇到情況令佢啲特徵突變[9]。同每位決策者計好晒呢啲嘢，遊戲程式就會知座虛擬城市嘅每位虛擬市民會住邊。
除此之外，亦可以睇睇啲人點樣用電腦模擬交通[10]、人口變化[11]、就業[12]、污染[13]、能源[14]、健康[15]、教育[16]同埋金融[17]等嘅社會現象[註 3][18]。
|
出名作品
[編輯]睇埋：建造經營模擬遊戲
喺起城市遊戲嘅歷史上，有過以下呢啲名作[20]：
現代設定
[編輯]以下係啲背景設定喺現代城市嘅起城市遊戲：
- 《模擬城市》[英 1]（1989 年）：一般認為，起城市遊戲呢種遊戲類型，係由 1989 年嘅《模擬城市》確立嘅；隻遊戲有相當大嘅自由度，玩家可以自由噉建造自己想要嘅城市，唔似得打前嗰啲戰略遊戲噉吓吓都有特定嘅任務目標要玩家達成；隻遊戲初出就大受歡迎，直至 1992 年一共賣咗 100 萬件咁多。呢隻遊戲打後成為咗一個系列，出咗多部續作[21]，對起城市遊戲造成咗深遠嘅影響。
- 《LinCity》（1999 年）：出名在自由開源，有意研究電子遊戲開發嘅人可以自由噉攞佢啲源碼去用[22]。
- 《OpenCity》（2008 年）：又一隻自由開源嘅起城市遊戲。
- 《超級大城市》[英 4]（2009 年）
- 《城市：天際線》[英 2]（2015 年）：喺 2010 年代，起城市遊戲被指係低迷咗一排，出唔到咩有睇頭嘅作品，尤其係 2013 年嘅《模擬城市 2013》劣評如潮，畀好多人覺得係敗筆[20]；而《城市：天際線》就被指係喺 2010 年代中取得成功，帶動返起起城市遊戲[20]。
- 《城市：天際線 II》[英 5]（2023 年 10 月）
架空設定
[編輯]有啲起城市遊戲，背景唔係設喺現代嘅。有啲設喺古代，又或者設喺未來世界嘅都有。
- 《凱撒大帝》[英 6]（1992 年）：背景設喺古羅馬。
- 《法老王》[英 7]（1999 年）：背景設喺古埃及。
- 《宙斯：奧林匹斯之主》[英 8]（2000 年）：背景設喺古希臘，有奇幻成份，故仔提到宙斯等嘅希臘天神。
- 《皇帝：龍之崛起》[英 9]（2002 年）：背景設喺古華夏。
- 《不朽之都：尼羅河嘅仔女》[英 10]（2004 年）：背景設喺古埃及。
- 《美麗新世界 2070》[英 11]（2011 年）：個故仔設喺 2070 年嘅未來世界，講全球暖化搞到北極嘅冰溶晒，令到海平面大幅上升，好多城市都畀水淹沒咗；玩家要負責喺新嘅島嶼（曾經係高地）建立新嘅城市[23]。
- 《空中王國》[英 12]（2020 年）：用 Unity 遊戲引擎整嘅[24]；個故仔設喺一個奇幻世界，用咗蒸汽鬅客噉嘅美學設計，畀玩家建造一座喺空中嘅城市；玩家仲可以「揸住」呢座城市周圍飛嚟飛去，搵新資源同埋新同盟[25]。
睇吓
[編輯]文獻
[編輯]- Bereitschaft, B. (2016). Gods of the city? Reflecting on city building games as an early introduction to urban systems. Journal of Geography, 115(2), 51-60.
- Bereitschaft, B. (2023). Commercial city building games as pedagogical tools: what have we learned?. Journal of Geography in Higher Education, 47(2), 161-187.
- Cuccurullo, S., Francese, R., Passero, I., & Tortora, G. (2013). A 3D serious city building game on waste disposal. International Journal of Distance Education Technologies (IJDET), 11(4), 112-135.
- Pinos, J., Vozenilek, V., & Pavlis, O. (2020). Automatic geodata processing methods for real-world city visualizations in cities: Skylines. ISPRS International Journal of Geo-Information, 9(1), 17.
註釋
[編輯]英詞
[編輯]引咗
[編輯]- ↑ MicropolisJS: original Sim City clone in the browser. boingboing.net.
- ↑ 可以睇睇 Layers 嘅概念。
- ↑ FEATURE HIGHLIGHT #7 Maps & Themes. Cities: Skyline II.
- ↑ Cities: Skylines 2's maps will be about 5 times as large as those of the original. ShackNews.
- ↑ 由乜都冇整一隻 Unity 起城市遊戲 — 教學 （英文），教人用 Unity 遊戲引擎嚟整起城市遊戲。
- ↑ Jolly, R., & Budke, A. (2023). Assessing the Extent to Which Players Can Build Sustainable Cities in the Digital City-Builder Game "Cities: Skylines". Sustainability, 15(14), 10780.
- ↑ Bereitschaft, B. (2016). Gods of the city? Reflecting on city building games as an early introduction to urban systems. Journal of Geography, 115(2), 51-60.
- ↑ Bereitschaft, B. (2023). Commercial city building games as pedagogical tools: what have we learned?. Journal of Geography in Higher Education, 47(2), 161-187.
- ↑ Devisch, O. T., Timmermans, H. J., Arentze, T. A., & Borger, A. W. (2009). An agent-based model of residential choice dynamics in nonstationary housing markets. Environment and Planning A, 41(8), 1997-2013.
- ↑ Fritzsche, H. T., & Ag, D. B. (1994). A model for traffic simulation. Traffic Engineering+ Control, 35(5), 317-21.
- ↑ Weber, L. (2010). Demographic change and economic growth: Simulations on growth models. Springer Science & Business Media.
- ↑ Kirchgässner, G., Müller, U. A., & Savioz, M. (1998). Ecological tax reform and involuntary unemployment: simulation results for Switzerland. University of St. Gallen, Dept. of Economics, Discussion Paper, (9806).
- ↑ Guo, G., & Cheng, G. (2019). Mathematical modelling and application for simulation of water pollution accidents. Process Safety and Environmental Protection, 127, 189-196.
- ↑ Seow, Y., Rahimifard, S., & Woolley, E. (2013). Simulation of energy consumption in the manufacture of a product. International Journal of Computer Integrated Manufacturing, 26(7), 663-680.
- ↑ Fone, D., Hollinghurst, S., Temple, M., Round, A., Lester, N., Weightman, A., ... & Palmer, S. (2003). Systematic review of the use and value of computer simulation modelling in population health and health care delivery. Journal of Public Health, 25(4), 325-335.
- ↑ Cities: Skylines: A guide to schools, universities, and education.
- ↑ FEATURE HIGHLIGHT #9 Economy & Production. Cities: Skylines II.
- ↑ Pinos, J., Vozenilek, V., & Pavlis, O. (2020). Automatic geodata processing methods for real-world city visualizations in cities: Skylines. ISPRS International Journal of Geo-Information, 9(1), 17.
- ↑ Cities: Skylines - How to Avoid Traffic Jams. Game Rant.
- ↑ 20.0 20.1 20.2 Richard Moss (October 11, 2015). "From SimCity to, well, SimCity: The history of city-building games". Ars Technica.
- ↑ Rivenburg, Roy (October 2, 1992). "Only a Game? : Will your town thrive or perish? The fate of millions is in your hands. Or so it seems. It's your turn in SimCity". Los Angeles Times.
- ↑ lincity-ng/lincity-ng Public （英文）
- ↑ "Preview: Anno 2070". ModernMethod. 21 August 2011.
- ↑ Unity - Behind the Game: Airborne Kingdom. Unity.
- ↑ Crowley, Nate (2021-01-07). "Airborne Kingdom's arabesque steampunk is an absolute delight". Rock Paper Shotgun. Retrieved 2023-06-03.
拎
[編輯]- （香港繁體）三款模擬SIM GAME學習城市規劃 玩完即做民間特首！， 香港 01
- （英文） 城市：天際線 — 香港 (1:1 比例)，有人喺《城市：天際線》入面整咗香港。
- （英文） 由乜都冇整一隻 Unity 起城市遊戲 — 教學，教人用 Unity 遊戲引擎嚟整起城市遊戲。
- （英文） 建造經營模擬遊戲，電視橋段網講建造經營模擬遊戲，有提到起城市遊戲。
- （英文） 睇吓起城市遊戲呢隻類型，由電子遊戲製作嘅角度睇城市建造遊戲。
