電子遊戲製作

用遊戲引擎製作遊戲

電子遊戲製作（參見英文：game dev）係製作電子遊戲嘅過程。廿一世紀嘅電子遊戲設計以及製作係一個相當專業化嘅領域，而大公司製作新遊戲預算閒閒哋過百萬美金。要製作電子遊戲，製作者需要做好多嘢：佢哋要諗遊戲嘅核心，做好程式編寫、電腦圖像製作同埋寫故仔等，整咗初型出嚟，跟住仲要試行試玩呢個初型，發覺到有問題就要返轉頭執；隻遊戲出得街，仲可能要度埋點樣為隻遊戲做宣傳；隻遊戲出咗街後，製作組仲要喺社交媒體等嘅地方留意玩家嘅意見，睇吓隻遊戲有冇地方需要執。

遊戲程式

1982 年嘅食鬼遊戲

内文：電子遊戲同遊戲程式

電子遊戲係一種電腦程式。喺概念上，遊戲程式結構大致如下：遊戲嘅程式啟動嗰陣，個程式要初始化設定好嗮隻遊戲嘅參數嘅數值、講好嗮要用乜資源等等。初始化咗之後，個程式就要進入遊戲迴圈－喺程式編寫上，迴圈係一類控制流程機制，能夠令一段程式碼只要某啲條件唔達到，就會一路係噉重複行，而相對喺冇迴圈嗰陣，段碼會逐句逐句行，行一次就算。好似係以下呢段食鬼嘅虛擬碼噉，就用咗個 while 迴圈：

 move_speed = ...
 number_of_ghost = ...
 ... 用若干行 declaration 設定遊戲柞參數嘅數值
 
 while player.lives > 0 當玩家有多過 0 條命嗰陣一路做...（「玩家命變咗 0」就係 GAME OVER 條件）
    // Process Inputs；睇讀取輸入
    JoystickData j = grab raw data from joystick 由手掣嗰度探測玩家撳咗乜掣
    
    // Update Game World；睇遊戲邏輯同人工智能
    update player.position based on j 基於玩家撳嘅掣，更新玩家角色嘅位置
    foreach Ghost g in world for 每一隻鬼
       if player collides with g 如果玩家撞到嗰隻鬼
          kill either player or g 玩家就死
       else
          update AI for g based on player.position 基於隻鬼嘅人工智能，更新佢嘅位置
       end
    loop
    // 喺現實應用上，以上嘅各個動作通常會每個做一個子程式。
    
    ...
    
    // Generate outputs；睇遊戲外觀
    draw graphics 喺熒光幕上面畫相應嘅影像
    update audio ... 同埋整聲效
 loop

製作團隊

宮本茂嘅相，2015 年影嘅；宮本茂係日本公司任天堂旗下最有料到嘅遊戲設計師之一。

睇埋：遊戲設計

遊戲嘅製作團隊主要包括咗以下嘅成員：

• 遊戲設計師主要負責構思遊戲嘅玩法、規則同機制。佢哋會同其他部門緊密合作，確保遊戲體驗符合設計理念。有啲設計師專注於關卡設計，打造具挑戰性同趣味性嘅遊戲關卡；亦有啲人會負責角色能力、武器系統、劇情分支等核心元素。
• 美術團隊負責創造遊戲世界嘅視覺元素，包括以下幾個子範疇：
  • 關卡美術：負責裝飾同設計遊戲場景，確保每個環境都富有特色同投入感。
  • 立體模型：建模師會製作角色、道具同場景物件嘅三維模型，配合貼圖師上色。
  • 視覺效果（VFX）：負責特效製作，例如爆炸、魔法、天氣變化等，增強遊戲畫面嘅動感。
• 軟件工程師：負責撰寫遊戲嘅程式碼，包括遊戲邏輯、物理引擎、AI 系統等。佢哋會同設計師同美術緊密合作，將概念實現成可互動嘅遊戲內容。

等等。

遊戲分析

内文：遊戲分析

廿一世紀初嘅遊戲設計同製作亦都開始重視遊戲分析嘅思考。遊戲分析指用某啲方法攞取有關遊戲運作情況嘅數據，跟住再對啲數據進行分析，評估隻遊戲使唔使改。遊戲分析常見於電子遊戲嘅製作－製作組可以將個遊戲程式編寫成曉自動噉將數據傳返去製作組手上，令到分析起上嚟更容易。

睇埋

• 遊戲編程
• 打機用語
• 軟件工程

拎

• （香港繁體）遊戲開發者喺香港係咪只係傳說中嘅職業？，香港 01
• （英文）GameDev.net，有遊戲製作資源。