跳去內容

複輔音

出自維基百科，自由嘅百科全書
(由輔音群跳轉過嚟)

複輔音（粵拼：fuk1 fu6 jam1；英文：consonant cluster [註 1]），又叫輔音群、輔音叢或者輔音簇cuk1，係指有多過一個輔音接連出現，而中間冇任何嘅元音。複輔音可以喺音節嘅開頭或者結尾嗰度出現。舉例說明：

  • 用廿一世紀初嘅粵語嚟讀食呢隻漢字，個讀音用粵拼寫係 sik6 而用 IPA 寫就係 /siːk̚˨/，呢段音節並冇任何嘅複輔音—音節嘅開頭輔音係 /s/ 而結尾輔音就係 /k̚/，兩個都係單獨出現嘅輔音。
  • 相比之下，又例如廿一世紀初嘅英文字詞 twelfth —呢隻字詞讀音（用 IPA 寫）係 /twɛlfθ/，意思係第十二個噉解，開頭有兩個輔音 /tw/ 而埋尾有三個輔音 /lfθ/，係一隻有複輔音嘅字詞。

唔同語言喺複輔音相關特性上可以相差幾遠，每隻語言都會有一啲組合法則（語音組合），淨係准許某啲輔音組合，而唔同語言嘅組合法則可以好唔同。詳情亦可以參考吓音系類型方面嘅概念。

少複輔音

[編輯]

有唔少語言都被指係冇複輔音，或者近乎冇複輔音咁滯。

太平洋一帶嘅語言，好多都缺少複輔音。例如日文噉：日文啲音節多數都係開放嘅，即係話佢哋音節通常以元音做結尾，輔音結尾嘅音節花款少；日文嘅音節開頭複輔音係得 Cj（輔音後面掕個 /j/）呢隻款，例子有百（hyaku · ひゃく · /hjaku/）呢隻漢字，或者係表示慘叫嘅 gyaa（ぎゃあ · /gjaa/）呀噉[1]。除此之外，馬來-波利尼西亞語族[e 1] —出名嘅成員有夏威夷話—多數都係傾向冇複輔音嘅，頂攏係啲外來詞會有[2]。

粵語

[編輯]
睇埋：粵語音系

廿一世紀初嘅漢語（屬漢藏語系）都係被指缺少複輔音：粵語基本嗰種音節結構[e 2]係 CVC，即係話一段典型嘅粵語音節，係最多一個輔音喺前、最多一個輔音喺後，中間就會挾住一個元音[3]。講音節開頭嘅話，唯一有啲似複輔音嘅係 /kʷ/ 同 /kʰʷ/ [註 2] —呢種噉嘅音節結構缺少複輔音，多數情況下都唔容許講嘢嘅人將多過一個輔音拼埋一齊。

觀點：口快定係複輔音？

有關「粵語係咪真係冇複輔音」呢條問題，學界係有啲爭議嘅。

例如冚唪唥一般係讀做 ham6 baang6 laang6 嘅，但係喺日常口語當中，啲人成日會將隻字詞讀咗做 haam6 blaang6（/haːm˨˨ plaːŋ˨˨/）噉嘅音。有啲人話呢種情況「只係口快」，但係有啲語言學家就提出咗個主張，話粵語查實容許 /pl/ 嘅複輔音，只不過係「有複輔音嘅字詞數量好少」噉解。

觀點：借詞相關嘅問題

而家觀察一啲以粵語（或者第啲傳統上冇乜複輔音嘅語言）做母語嘅人，教佢哋講英文或者其他多複輔音嘅語言，會引致一條學術問題。

想像有個以粵語做母語嘅人，叫佢做阿明。阿明讀出 /kʰlik̚˥/（想像粵拼：klik1）噉嘅語音—原則上，呢段語音並唔合符傳統嘅粵語音系，因為傳統上粵語音系並唔容許 /kʰl/ 噉嘅開頭複輔音，但係除咗呢點之外，佢讀出嘅嗰段語音完全合符傳統粵語音系。而對於 /kʰlik̚˥/ 呢段語音算唔算係粵語，就會有兩派睇法—

  • 佢講嘢粵英夾雜：有人會話阿明只係用粵語噉嘅方式讀 click 呢隻英文字，算係講嘢粵英夾雜。
  • 借詞加語言演變：另一方面，亦有人會主張阿明係由英文借咗隻字詞入去粵語嗰度（外來詞），而廿一世紀初嘅粵語音系已經起咗變化（語言演變），變到容許 /kʰl/ 噉嘅開頭複輔音。

詳情可以睇睇外來詞[e 3]同語碼轉換[e 4]嘅概念爭議。

順帶一提，雖然粵語（根據標準嗰種睇法）冇咩複輔音，但某啲粵語以外嘅漢語就有複輔音或者類似複輔音嘅情況。

  • 例如上古漢語噉：上古漢語係現存所有漢語嘅語言祖先；廿一世紀嘅歷史語言學研究者有著力嘗試重新建構上古漢語，發現上古漢語似乎有一定量嘅複輔音；根據鄭張尚芳、白一平同埋沙加爾等學者嘅研究，喺上古漢語入便江呢隻漢字係讀做類似 /*kroːŋ/ 噉嘅音嘅—開頭輔音係 /kr/，而且亦有部份學者話上古漢語有 /sn/ 或者 /st/ 等嘅音節頭輔音串[4]。
  • 講現存嘅漢語嘅話，複輔音通常以分音詞形式存在，比較出名嘅有閩東話、晉語同埋部份官話方言（好似係中原官話）等，比如晉語嘅「圪頭詞」「嵌l詞」[5]、福州話嘅「切腳詞」[6]等等[註 3]。

兩三個輔音

[編輯]
睇埋：日耳曼語族同羅曼語族

好似英文、法文、德文同葡文等嘅印歐語言[e 5]，好多時都坐底容許兩至三個輔音連埋一齊形成複輔音，例子：

  • 英文字詞 sixth（/sɪksθ/，第六個噉解）—有三個輔音埋尾；
  • 法文字詞 pluie（[plɥi]，雨噉解[7]）—有三個輔音開頭；
  • 德文字詞 Straße（/ˈʃtraːsə/，街道噉解[8]）—有三個輔音開頭；
  • 葡文字詞 frequente（/fre'kwɛnte/，形容詞頻密噉解[9]）—呢隻字詞三段音節，頭嗰兩個音節都係各自有兩個輔音開頭；
  • 挪威話字詞 svin（/sʋiːn/，豬噉解[10]）—有兩個輔音開頭；

等等。不過，複輔音組合唔係任意點都得嘅。呢啲語言往往會對「邊啲輔音組合係可以接受嘅」作出一啲限制，例如英文噉，英文嘅音節結構係 CCCVCCCC [11][12] —佢哋嘅一段音節最多可以有成三個輔音砌埋一齊做複輔音，但係佢哋啲三輔音輔音群一定要跟從以下嘅規律：

/s/ + 塞音 + 近音，

下表列出咗一啲例子，呢度啲音以英式英文作準[13]，

 組合 例字詞（羅馬字） 例字詞（IPA） 例字詞（意思）
 /s/ + /t/ + /r/ strength /streŋθ/ 力量、強項
 /s/ + /p/ + /j ɹ l/ sprawl /sprɔːl/ 擴張
 /s/ + /k/ + /j ɹ l w/ scream /skriːm/ 尖叫

複輔音嘅存在，對人類學語言會造成具體影響。一個母語冇乜複輔音嘅人學呢啲語言嗰陣，成日會喺複輔音嘅發音上有困難[14]，例如粵語人（母語缺少複輔音）學英文，被指經常都會唔覺意將一串複輔音「縮短，攞走其中一啲輔音」—即係例如將 play（/pleɪ/，玩噉解）讀咗做 pay（/peɪ/，畀錢噉解，當中個 /l/ 音唔見咗）噉，搞到佢哋用英文溝通有困難[15]。

注意點：二合字母

睇埋：二合字母

要留意嘅係，複輔音同二合字母[e 6]係兩個唔同嘅概念。二合字母係指用兩個符號嚟書寫某一款音素，但係用咗兩隻字母嚟寫唔表示某段輔音真係複輔音。例子可以睇吓英文書寫入便嘅

  • Sh-：好似 sheep（/ʃiːp/ · 羊）等嘅字詞，開頭輔音實際上係清顎齦擦音[e 7] /ʃ/，呢個輔音係一個單一嘅輔音，並唔係真係 /s/ 同 /h/ 嘅結合，只不過係羅馬字母數量有限，而且 /ʃ/ 咁啱聽落又有少少似 /s/ 同 /h/ 嘅結合，所以慣例上會寫做 sh- 噉嘅款。
  • Kn-：好似 knight（/naɪt/ · 騎士）等嘅字詞，實際口語嘅開頭輔音係 /n/ 呢個單一嘅輔音，不過現代英文書寫上保留咗遠古英文嘅某啲特徵，縱使隻字詞個讀音實際上唔係以 /kn/ 開頭，慣例上依然係會寫做 kn- 噉嘅款開頭[16]。可以睇睇靜 K 同 G 嘅概念。

好似呢啲噉嘅情況，並唔係真正嘅複輔音—要判定一隻字詞係咪帶有複輔音，睇嘅係講嘢唔係寫嘢，即係要睇啲人講嘢嗰陣會點樣讀一隻字詞。

四個輔音起

[編輯]
睇埋：南高加索語系同斯拉夫語族

世上有啲語言會有更長嘅複輔音，當中南高加索語系[e 8]（主要分佈喺高加索地區嗰頭）喺呢方面就幾出名。

格魯吉亞話係高加索國家格魯吉亞嘅官方語言。喺呢隻語言入便，超過四個輔音咁長嘅複輔音幾常見，格魯吉亞話甚至仲有部份複輔音係將六至八個輔音連埋一齊嘅，當中仲不乏一啲日常生活都會用到嘅字詞[17]，例子有[18]

 字詞（IPA） 幾多個輔音 意思
 /brtʼqʼeli/ 4 平坦
 /mt͡sʼvrtnɛli/ 6 訓練者
 /prt͡skvna/ 6 同... 剝皮

亦要留意返，上述呢啲例子，係專登揀咗複輔音最長嗰啲字詞嚟睇。日常格魯吉亞話入便亦都有大把比較「正常」（複輔音由最多兩至三個輔音組成）嘅字詞。

除咗南高加索語系之外，斯拉夫語族[e 9]亦被指係可以有頗長（閒閒哋四至五個輔音咁長）嘅複輔音。斯拉夫語族屬於印歐語言嘅一個分派，主要分佈喺東歐，包括波蘭話、捷克話、烏克蘭話同俄羅斯話等都係斯拉夫語言。斯拉夫語言複輔音嘅一個出名例子，有捷克話急口令

Strč prst skrz krk（讀音：[str̩tʃ pr̩st skr̩s kr̩k] ( 聽)）

句嘢嘅意思係「將手指頭插過喉嚨」噉解，成串嘢一個元音都冇[19]。

睇埋

[編輯]
  • 外來詞：一隻少複輔音嘅語言（例如粵語或者日文）要由多複輔音嘅語言（例如英文）借詞嗰陣，一種常見嘅做法係同啲字詞嘅複輔音「加插啲元音落去」，一段複輔音變成多段音節，例如 sta- 變做 suta- 噉。
  • 嘉絨話：分佈喺四川嗰頭嘅一種藏緬語言（漢藏語系嘅一個分派，算係粵語嘅遠親），保留咗好多古漢藏語嘅文法同發音，被譽爲漢藏語系嘅「活化石」；嘉絨話有唔少特色複輔音，閒閒哋兩三個輔音咁長[20]。
  • 響度連串：呢條原則被指可以用嚟解釋複輔音嘅組合規律。
  • 雙元音
  • 音節結構
  • Abugida

註釋

[編輯]
  1. ↑ 亦有 consonant compound 同 consonant blend 等嘅名。
  2. ↑ 可以睇吓唇音化嘅概念。
  3. ↑ 但未必所有連綿詞、「嵌l詞」都係跟複輔音來。

引述

[編輯]

篇文用咗嘅行話詞彙，英文版本如下：

  1. ↑ Malayo-Polynesian languages
  2. ↑ syllable structure
  3. ↑ loanword
  4. ↑ code-switching
  5. ↑ Indo-European languages
  6. ↑ digraph
  7. ↑ voiceless postalveolar fricative
  8. ↑ Kartvelian languages
  9. ↑ Slavic languages

篇文引用咗以下呢啲文獻同網頁：

  1. ↑ Shinohara, Shigeko (2004), "Emergence of universal grammar in foreign word adaptations", in Kager, René; Pater, Joe; Zonneveld, Wim (eds.), Constraints in Phonological Acquisition, Cambridge University Press, pp. 292-320.
  2. ↑ Lyovin, Anatole V. (1997), An Introduction to the Languages of the World, New York: Oxford University Press. p. 260.
  3. ↑ Pronunciation of Hong Kong English. EdUHK，引文："However, in Cantonese there are no consonant clusters. Some people may take the initial sounds of 國; 果 [gw] and 葵; 誇 [kw] as initial consonant clusters. But most people will regard them as consonant digraphs rather than consonant clusters."
  4. ↑ （香港繁體） 上古漢語複輔音聲母的諸據 (PDF)，香港中文大學
  5. ↑ 张树铮 (2002)。〈山东方言中的 "嵌 l 词〉。《语海新探》。5。
  6. ↑ 梁玉璋 (1982)。〈福州方言的 "切脚词"〉。《方言》。1: 37–46。
  7. ↑ pluie.
  8. ↑ Straße. Cambridge Dictionary.
  9. ↑ frequente. Cambridge Dictionary.
  10. ↑ svin. Cambridge Dictionary.
  11. ↑ Madureira, S. (2020). English and Portuguese consonant clusters: contrasts and challenges. DELTA: Documentação de Estudos em Lingüística Teórica e Aplicada, 36, 2020360207.
  12. ↑ Hultzén, L. S. (1965). Consonant clusters in English. American Speech, 40(1), 5-19，佢哋第 7 頁同第 8 頁有列出當代英文入便嗰啲複輔音組合。
  13. ↑ 以下呢啲 IPA 係由劍橋字典查返嚟嘅。
  14. ↑ （英文） Dupoux, E., Hirose, Y., Kakehi, K., Pallier, C., & Mehler, J. (1999). Epenthetic vowels in Japanese: A perceptual illusion? Journal of Experimental Psychology: Human Perception and Performance, 25(6), 1568-1578，呢篇論文講到，以日文做母語嘅人（日文缺少複輔音）聽外語嘅複輔音嗰陣，成日都不自覺噉喺一段複輔音啲個別輔音之間加插元音，即係例如將英文 start 個開頭（/st/）變咗做 suta 噉嘅音。亦可以睇吓日本人點用片假名寫啲外來詞。
  15. ↑ Pronunciation of Hong Kong English. EdUHK.
  16. ↑ Middle English Basic Pronunciation and Grammar. Harvard University.
  17. ↑ Shosted, R. K., & Chikovani, V. (2006). Standard Georgian. Journal of the International Phonetic Association, 36(2), 255-264.
  18. ↑ Butskhrikidze, M. (2002). The consonant phonotactics of Georgian (Vol. 63). Utrecht: LOT.
  19. ↑ Le virelangue – jazykolam : strč prst skrz krk. Radio Prague (法文).{{cite AV media}}: CS1 maint: url-status (link)
  20. ↑ Shuya, Z., Jacques, G., & Yunfan, L. (2019). A study of cognates between Gyalrong languages and Old Chinese. Journal of Language Relationship, 17(1-2), 73-92.

外拎

[編輯]
由「https://zh-yue.wikipedia.org/w/index.php?title=複輔音&oldid=2155716」收