本地生產總值

喺經濟學上，本地生產總值（粵拼：bun2 dei6 sang1 caan2 zung2 zik6），又叫 GDP（縮寫自英文 gross domestic product），係一定時期（通常一年爲限）一個地區最終所產出嘅所有產品、勞務夾埋嘅市場總值。當中地區可以係一片大陸（例如北美洲嘅 GDP）、一個國家（例如中國嘅 GDP）、一個省（例如廣東嘅 GDP）或者一座城市（例如香港嘅 GPD）都得。

目前，喺嚴格嘅統計文件入面，英文術語 national gross domestic product（縮：'NGDP，可譯作國內生產毛額、國內生產總值）係指一國嘅生產總值，regional gross domestic product（縮：RGDP）係指一地區嘅生產總值。本地生產總值係衡量一地經濟發展狀況嘅基本指數。

而家中文入面好多時直接用縮寫 GDP，或者國內生產總值來稱呼省、市、區等唔係國嘅地方嘅生產總值。

本地生產總值同本地居民生產總值（GNP）係兩回事，本地生產總值係唔計地方間收入轉移。即係，本地生產總值講嘅係呢度出產咁多，本地居民生產總值講嘅係呢度/嗰度出產咗，當地入到袋咁多。比如，有外資喺A地開廠，佢帶咗班B地嘅工仔做嘢，呢間廠所有嘅產出，包埋外地工仔嘅人工，會計入A地本地生產總值，但班外地工走咗，佢哋份糧就計去B地嘅本地居民生產總值，就唔關A地事。

GDP計法

支出法

喺支出法度，GDP主要係一個地方所有消費者對最終產品、勞務嘅消費總量。喺簡單經濟入邊可以僅憑當地一年產品、勞務嘅消費量計出佢嘅GDP。

GDP=C+G+I+NX

其中：

C係當地消費總量
G係政府支出

I係投資總量

I=De+In

De - 即係depreciation，折舊（又叫固定資產成本）

In - 即係net investment，淨投資（包括各類資本）

NX係淨出口

NX=X-M

X（export）係出口量

M（import）係入口量

消費總量 - consumption（C）包含私人、屋企對產品、勞務嘅各類消費。（不過商家入貨、廠家買原料唔計入私人消費，而係屬私人投資。）

投資總量 - investment（I）係私人投資。包括營業過程中各類成本，比如設備、原料、人工、折舊等等。（注意，倉庫啲貨就算佢未用完/賣出，都照計入GDP度，因為佢入貨時就已經係一筆投資。）

政府支出 - government purchases（G）包括從中央到地方各級政權喺當地嘅各類支出，包括國防、法律、道路維修、橋隧修建同維護、教育、醫療……不過政府支出入面係唔包括轉交性收入，比如畀殘疾人、窮人嘅救濟金。

淨出口 - net exports（NX）出口價值量（X）減入口價值量（M）。之所以要計係因為當地企業嘅產出唔一定顯現晒喺當地嘅消費總量同政府開支當中，出口咗嘅嘢都係當地企業嘅所得，所以要計出口價值量；而之所以去咗入口價值量，係因為呢啲產品、勞務唔係當地生產所得。

收入法

收入法，又叫分配法，喺呢個面度，GDP係來自各要素嘅收入所得嘅總和，比如有薪金、利息、利潤、租金等等，總合埋一齊，就可以知道當地產出咁多嘢之後、收益有幾多。

GDP=W+R+i+Pr+Ti+De-Subsidy

其中

W（wages）係薪金
R（rents）係租金
i（interests）係利息
Pr（profits）係利潤
Ti（indirect tax）係間接稅淨額
De（depreciation）係折舊（固定資產成本）
Subsidy係補貼

出面網頁

〈本地生產總值及生產範圍〉 (PDF)。香港，政府統計處。2001年11月23號。
〈理解本地生產總值及本地居民總收入的概念〉 (PDF)。香港，政府統計處。2012年9月11號。