中環站

中環
Central

中環站3號月台
站名
中文名	中環站
英文名	Central Station
站代碼	CEN
基本資訊
車站色	紅色／深啡色 白色（畢打街大堂）
途經路線	港島綫
站服務時間	0556-0114 尾班車時間
接駁交通	巴士、小巴、電車、渡輪、山頂纜車
車站結構
站類	地底
月台類	港島綫-側式月台 荃灣綫-島式月台
月台數	4
出口數	13
其它設施	其它無障礙設施
地圖

英文
英：	Central
字面解釋：	中央

中環站（粵拼：zung1 waan4 zaam6；英文：Central Station）喺香港中環遮打道、畢打街及德輔道中一帶，係港鐵站之一，車站有4個月台。

呢個站係荃灣綫香港島嘅總站及港島綫中途站，喺環球大廈、干諾道中及交易廣場地底以行人通道同東涌綫及機場快綫嘅香港站相連。呢個站採用磚紅色為主色，而荃灣綫月台就用深咖啡色作為主要顏色。

車站結構

車站樓層

中環站有5層，地面係車站出口，車站大堂同商店主要響中環站嘅L1、L2層。L2同L4層分別係港島綫3號月台（往柴灣）同4號月台（往堅尼地城），而L3層就係荃灣綫嘅1號同2號月台（往荃灣）。

另外，響L1層嘅遮打道大堂同車站出口之間重有一層閣樓，用嚟通去車站出口，地鐵公司響車站嗰層開放咗「藝術管道」，為藝術家提供一個展覽場地。而響L2層嘅畢打街大堂設有行人隧道連接香港站東涌綫大堂。

G 地面	-	出口
閣樓	J出口	藝術管道
L1 大堂	畢打街大堂	客務中心、車站商店
		恒生銀行、自動照相機、自動櫃員機
		「e分鐘著數」機
	遮打道大堂	客務中心、車站商店
		自動櫃員機
L2 大堂/月台	遮打道大堂	客務中心、車站商店
		恒生銀行、自動售賣機、自動櫃員機
	畢打街大堂	客務中心、車站商店
		行人隧道連接香港站東涌綫大堂
		「e分鐘著數」機、「iCentre」免費上網服務
	側式月台，左邊嘅車門將會打開
		往柴灣
		路軌
L3 月台		路軌
		往荃灣
	島式月台
		往荃灣
		路軌
L4 月台	側式月台，右邊嘅車門將會打開
		往堅尼地城
		路軌

車站大堂

中環站設有兩個大堂：畢打街大堂與遮打道大堂。畢打街大堂響畢打街地底，因為港島綫需要而後期加建，而畢打街大堂同時係連接住遮打道大堂嘅上層。其後又因機場快綫連接通道而作翻新同擴建，有行人通道連接香港站嘅東涌綫同機場快綫相連。由於翻新後嘅大堂同香港站嘅設計相若，令乘客唔小心蕩失路，以為去到香港站嘅範圍，其實佢哋只係身處畢打街大堂。

遮打道大堂，由地鐵修正早期系統至今早已經起好，響遮打道地底，中環站係全港首個設有雙層大堂嘅車站。中環站開放初期，上層大堂同下層大堂未設有非收費區連接，乘客要經過收費區先可以往返上下兩層大堂。

直到2001年嘅翻新，先至有樓梯連接嘅大堂上下層，加入咗咖啡店、快餐店同書店，成為車站購物街，增加地鐵公司嘅非車務收入同方便乘客購物。

車站商店同埋自助服務

現時，中環站內提供唔同類型嘅商店畀乘客買嘢同食嘢，例如有7-Eleven便利店、餅店、咖啡店、書店、花店、恒生銀行同埋DHL等零售業同其他服務。港鐵收費區入面唔准飲食，因此大部份食肆都唔喺收費區內。

中環站係MTR系統中，唯一設有兩間恒生銀行嘅地鐵站。香港人習慣約人喺地鐵站內嘅恒生銀行見面，因為每座大堂裏面，唯一一間恒生銀行最顯眼。喺未有手機嘅年代，不明就裏相約嘅人，不時因為冇指明中環站邊間恒生銀行而出事。

此外，中環站亦有唔少自助服務設施畀乘客享用，包括恒生銀行同中銀香港嘅自動櫃員機、自動售賣機、自動照相機等。近F出口嘅車站大堂更設有香港郵政郵箱，方便乘客喺車站內寄信。

喺互聯網服務上，現時中環站大堂及月台都有免費由電訊盈科提供嘅Wi-Fi熱點，乘客可以喺等車啲時候透過手提電腦或個人數碼助理（PDA）上網。同時，喺3號月台行人通道設有「iCentre」免費上網服務設施，畀乘客瀏覽網上資訊。

另外，畢打街大堂L1層非收費區及L2層往返香港站嘅收費區行人通道內，各設有1部「e分鐘著數」機，畀乘客買網上服務同埋享用港鐵友禮會嘅會員優惠。

車站月台

本站設有4個月台，全部月台都裝咗月台幕門。1號同2號月台共用一個島式月台，處理荃灣綫往荃灣方向嘅列車，起響遮打道嘅地底，由德輔道中伸到去會所街。同時，荃灣綫有停車側綫，路軌由月台伸到去德輔道中地底。

3號月台（港島綫往柴灣方向）同4號月台（往堅尼地城方向）整響德輔道中同畢打街嘅交界地底，由環球大廈整到去歷山大廈。呢兩個月台從上下把荃灣綫月台夾咗響中間。呢兩個港島綫月台都係響路嘅北面設立嘅側式月台，而3號月台就喺4號月台之上（用嚟處理往來堅尼地城站嘅人流）。

港島綫往柴灣方向嘅3號月台全景圖

車站出口

中環站出口眾多

中環站B出口

中環站D1出口

中環站K出口

中環站有15個車站出口，出口主要連接中環建築物同埋購物中心嘅地庫同大堂，乘客可直接響車站通道穿梭中區主要建築物嘅購物中心同車站大堂。

此外，部份出口鄰近主要街道、中區行人天橋系統同埋公共運輸工具車站，方便乘客轉車。

畢打街大堂（L1）

• A - 干諾道中
  • 干諾道中、巴士總站、中環碼頭、歐陸貿易中心、交易廣場、香港四季酒店、郵政總局、國際金融中心、怡和大廈、盈置大廈
    • 設有升降機同失明人士引導徑往返地面
• B - 環球大廈
  • 環球大廈、華人銀行大廈、香港總商會簽證部、恒生銀行總行、協成行中心、永安集團大廈、工業總會簽證處
• C - 利源東/西街
  • 中環街市、創興銀行中心、德輔道中、利源東街、利源西街、德成大廈、萬宜大廈、紅十字會捐血站
• D - 畢打街
  • D1 - 藝穗會、華人行、畢打行、畢打街、中環中心、會德豐大廈
  • D2 - 100QRC、卡佛大廈、德己立街、娛樂行、蘭桂坊酒店、蘭桂坊、皇后大道中、中央廣場、戲院里、環貿中心

遮打道大堂（L1）

• E - 遮打大廈
  • 遮打大廈、遮打道
• F - 聖佐治大廈
  • 雪廠街、聖佐治大廈、文華東方酒店
• G - 置地廣場
  • 置地文華東方酒店、置地廣場、東亞銀行大廈、中建大廈、告羅士打大廈、上海商業銀行大廈、香港外國記者會、律政中心西座
• H - 歷山大廈（地庫）
  • 歷山大廈

遮打道大堂（L2）

• J - 遮打花園
  • J1 - 終審法院（舊立法會大樓）
  • J2 - 中銀大廈、長江集團中心、遮打道、美利道、山頂纜車總站
  • J3 - 美國銀行中心、和記大廈、昃臣道、香港會所大廈
• K - 皇后像廣場
  • 大會堂、愛丁堡廣場、皇后像廣場、展城館、滙豐總行大廈、太子大廈、渣打銀行大廈、律政中心中及東座
• L - 中國建設銀行大廈
  • 中國建設銀行大廈、東昌大廈、投資推廣署

鄰接車站

中環站係荃灣綫響香港島嘅總站同港島綫中途站，畀乘客響荃灣綫同港島綫轉車，往返西環、九龍同新界。另外，乘客可以經行人通道去香港站轉東涌綫或機場快綫列車。

	港島綫
堅尼地城 - 香港大學 - 西營盤 - 上環 - 中環 - 金鐘 - 灣仔 - 銅鑼灣 - 天后 - 炮台山 - 北角 - 鰂魚涌 - 太古 - 西灣河 - 筲箕灣 - 杏花邨 - 柴灣

	荃灣綫
中環 - 金鐘 - 尖沙咀 - 佐敦 - 油麻地 - 旺角 - 太子 - 深水埗 - 長沙灣 - 茘枝角 - 美孚 - 茘景 - 葵芳 - 葵興 - 大窩口 - 荃灣

	東涌綫
香港 - 九龍 - 奧運 - 南昌 - 荔景 - 青衣 - 欣澳 - 東涌

	機場快綫
香港 - 九龍 - 青衣 - 機場 - 博覽館

接駁交通

由於中環站處於已發展嘅商業中心區，個站冇位設立地面公共運輸交匯處，但中環站落成初期亦有部份地鐵接駁巴士線（路線冧巴後面有英文字母「M」嘅路線）以中環站做總站或以循環線形式運作，但站位只設喺街道旁邊巴士站。直到交易廣場設有大型巴士總站，唔少巴士路線搬去嗰度做總站，而接駁巴士路線只係途徑中環街道中途站方便乘客轉車。隨住港島綫落成，有唔少來往中環至港島東嘅接駁巴士線失去原有功效，有巴士線因而縮短或取消。

現時，仍然有唔少乘客喺中環站行去交易廣場公共運輸交匯處或者喺德輔道中轉巴士、小巴或電車前往香港中西區、南區；同時亦有唔少乘客前往海旁搭山頂纜車接駁巴士往返纜車站，或者行路去中環碼頭轉渡輪前往離島區、九龍半島等地。

此外，由於地鐵起機場鐵路時，早已經喺環球大廈地底起行人隧道連接香港站，現時有港島綫同荃灣綫。乘客用行人隧道轉機場快綫或東涌綫前往香港國際機場、青衣島、大嶼山等地，為中環站帶來龐大轉車人流。

• 港鐵
  • 機場快綫同東涌綫香港站
• 電車
• 山頂纜車花園道總站
• 城巴：
  • 1、2、4、4X、5B、5X、6、6A、6X、7、10、11、12、12A、12M、13、15、15C、18、18P、18X、23、25、26、30X、37A、37B、37X、40M、66、70、70P、75、88X、90、90B、91、97、260、629、720、720P、722、780、788、A11、A17、E11、E11A、E11B、E11S、N8X、N11、N90、NA11、NA12
• 過海隧道巴士：
  • 101、101X、104、109、111、111P、113、115、115P、182、182X、307、307A、373、601P、603、603A、603P、603S、619、619P、619X、621、673、673P、679、680X、681、681P、690、690S、900、905、905A、905P、907B、907C、914、914P、914X、930、930A、930B、930X、934、934A、935、936、936A、948、948A、948B、948P、948X、950、952、952C、952P、960、960A、960C、960P、960S、961、961P、961S、962、962A、962C、962P、967、967X、968、968A、968X、969、969A、969B、969C、969P、976、976A、978、978A、978B、979、980A、980X、981P、982X、985、985A、985B、P960、P968、X962、969N、N121、N182、N307、N368、N373、N680、N691、N930、N952、N962、N969
• 港島專線小巴：
  • 55 - 瑪麗醫院 ↺ 中環
  • 其他路線：1、1A、2、3、3A、8、9、22、54
• 渡輪
  • 珀麗灣客運：
    • 中環 ↔ 馬灣珀麗灣
  • 愉景灣航運：
    • 中環 ↔ 大嶼山愉景灣
  • 港九小輪：
    • 中環 ↔ 南丫島榕樹灣
    • 中環 ↔ 南丫島索罟灣
  • 新渡輪：
    • 中環 ↔ 長洲
    • 中環 ↔ 大嶼山梅窩
    • 中環 ↔ 坪洲
  • 天星小輪：
    • 中環 ↔ 九龍尖沙咀
    • 中環 ↔ 九龍紅磡

利用狀況

中環係香港首要嘅核心商業區同各重要機關所在，周邊主要係地標性建築物、辦公大樓、政府機構同埋總部等，再加上本身係荃灣綫、港島綫同埋香港站嘅東涌綫、機場快綫嘅重要轉車站，亦係西區使用鐵路來往其他區嘅必經之站，附近設有巴士小巴、電車、碼頭等交通接駁，所以車站相當繁忙，每日大概有25萬人次嚮呢個站往返香港各區，係整個系統第三繁忙嘅車站。

乘客若果往返呢個站、葵芳站同埋荃灣站，去香港站搭東涌綫再經荔景站轉搭荃灣綫嘅時間會較直接喺本站搭荃灣綫快。不過，東涌綫班次相對疏落，仲要轉車，直接搭荃灣綫可能比較便利。

車站歷史

翻新後嘅遮打道大堂

中環站嘅「iCentre」互聯網中心

早期計劃

根據1967年發表嘅《香港集體運輸研究》，中環站初期同上環街市站（家下上環站）計劃做港島綫同觀塘綫中間嘅轉綫站，而荃灣綫嘅尾站係金鐘站。當時中環站嘅計劃位置嚮租庇利街同畢打街中間嘅一段德輔道中地底，較而家中環站嘅位置偏西。

修正早期系統

内文：修正早期系統同荃灣綫

中環站喺1980年2月12號因應地鐵修正早期系統由尖沙咀延伸而啟用，成為修正早期系統嘅終點站，乘客可以直接搭列車前往觀塘，大概要27.5分鐘。啟用初期只開放1號同埋2號月台、位於遮打道車站大堂同埋畢打街走廊層，而車站底層設有停車側綫，由遮打道月台延伸至德輔道中，車站當時共深25米，長380米。車站當時更預留部份結構以便起港島綫。

由於修正早期系統當時包括荃灣綫嘅中環到旺角嘅路段，所以荃灣綫喺1982年5月10號通車嗰陣時，中環站就成為荃灣綫南端嘅尾站。

港島綫

内文：港島綫

1980年，香港政府決定起港島綫，因此地鐵擴建中環站車站大堂並喺德輔道中地底起2個側式月台，並利用修正早期系統嘅預留結構同荃灣綫大堂連接，擴建期間並冇影響荃灣綫服務。喺起港島綫嘅同時，中環站更加設4個新出入口，令當時中環站出入口加至13個。

另外，由於1983年3月動工嘅上環站至中環站嘅隧道工程要搬走受影響嘅消防處大樓及上環街市，因此中環站嘅港島綫月台同埋上環站遲過其他港島綫路段1年至開放，有關路段喺1986年5月23號啟用。

車站命名

中環站通車前後曾經有多個名，分別有3個英文名：Chater（遮打）、Pedder（必打）同埋Central（中環），以及4個中文名：遮打、必打、中環、中環西。而家中環站一律叫「中環（Central）」。

1967年9月，費爾文霍士顧問工程公司發表一份有關香港喺地底集體運輸城市軌道交通系統嘅研究《香港集體運輸研究》，報告中提及喺中環起一個車站，名為Central。

1970年，顧問公司發表另一份《集體運輸計劃總報告書》，喺報告書度，位於中環遮打道地底嘅車站叫做遮打（Chater），而位於中環必打街（家下畢打街）地底嘅車站叫做必打（Pedder）。

1979年，地鐵修正早期系統通車嗰陣，有關首日通車紀念特刊提及到位於遮打道地底嘅修正早期系統車站（1號同埋2號月台）叫中環（Chater），而位於畢打街地底嘅港島綫車站叫中環西（Pedder）。因此，當修正早期系統喺1980年2月12號由尖沙咀伸延至中環時，有關車站嘅中文名命名為中環，而唔係遮打。

而根據1983年香港政府出版嘅街道圖，畢打街地底嘅港島綫車站命名為中環（Pedder），因此可以證明車站嘅中文名統一為中環。

1985年5月31號，港島綫延伸至金鐘站，地鐵亦同時為包括中環站嘅多個車站（另外重包括油麻地站、旺角站同埋美孚站）更名，中環站嘅英文名Chater統一做Central。當港島綫喺1986年5月23號延長至中環站時，全站英文名已經統一做Central。

機場鐵路連接通道

内文：機場鐵路同香港站

為配合1990年代香港機場核心計劃，地鐵公司喺環球大廈同埋交易廣場地底起一條橫跨干諾道中嘅地下行人通道，連接中環站同埋香港站，畀乘客從港島綫或荃灣綫轉機場快綫或東涌綫。同時，地鐵公司亦翻新及擴建舊有畢打街大堂，加設新閘機同埋鋪頭，令乘客可享受更舒適嘅車站環境，工程喺1998年完成。

車站翻新工程

2001年，地鐵公司為改善中環站車站環境，再度翻新舊有遮打道大堂，以配合畢打街大堂同埋香港站嘅一貫設計。呢次翻新除咗加設一般商店外，重將咖啡店、快餐店同埋書店引入至地鐵範圍，增加地鐵公司嘅非車務收入，吸引人流以及方便乘客喺車站買嘢。

此外，呢次翻新工程亦將中環站畢打街同埋遮打道上下層嘅非收費區大堂連接，乘客唔使再穿越地面繁忙街道或途經收費區往來兩個大堂，成個工程喺2002年4月完工。同時又喺中環站月台引入8部公眾電腦作為「iCentre」免費上網服務設施同埋將喺J3出口嘅車站商店改做「藝術管道」方便乘客喺車站內上網同埋為藝術家提供一個展覽場地。

2008年1月，港鐵公司為現代化中環站嘅環境，將中環站大堂同埋港島綫3號月台沿用多年嘅地台更換為灰色地台，並喺部份位置更換假天花。

事件

2019年3月18號凌晨，荃灣綫試緊新訊號系統嗰陣，兩架列車（A131/A218同A187/A112）喺中環站同金鐘站之間相撞，令到荃灣綫喺3月18同埋19號兩日要縮短去金鐘站，中環站嘅荃灣綫月台封閉。

2021年2月20號傍晚6點幾，大堂去A－C出口靠左嘅扶手電梯，突然有一幅1米乘半米嘅石屎從天花剝落跌落嚟，之後發出刺鼻嘅氣味同好大煙，乘客四圍走同尖叫，事件中冇人受傷。事後港鐵職員到場疏導乘客喺其他出口走，並用帆布遮住事發位置，而警員都到場調查，暫時未知冧天花嘅原因。

上一站‧下一站

上一站		港鐵		下一站
上環 往堅尼地城		港島綫		金鐘 往柴灣
總站		荃灣綫		金鐘 往荃灣
總站		東涌綫 喺香港站度轉		九龍 往東涌
		機場快綫 喺香港站度轉		九龍 往博覽館

列車班次

月台	方向	列車班次（分鐘）						頭班車	尾班車
		平日上晝 繁忙時段	平日下晝 繁忙時段	星期六上晝 繁忙時段	星期六下晝 繁忙時段	星期六 非繁忙時段	平日非繁忙時段/ 星期日及公眾假期
	往荃灣	2.0		2.5		4-5.5	3.1-5.5	0606	0054
	往柴灣	1.9	2.1	3	2.8	4-5	3.6-6	0607	0058
	往堅尼地城							0607	0058

出面網頁

• 港鐵公司－中環站街道圖
• 港鐵公司－中環站位置圖
• 港鐵公司－中環站列車服務時間