跳去內容

外匯市場

出自維基百科，自由嘅百科全書
(由外幣跳轉過嚟)
2008年幾個牌顯示唔同通貨之間嘅匯率。

外匯市場（粵拼：ngoi6 wui6 si5 coeng4），又有叫通貨市場（currency market），係指世界各地嘅人唔喺交易所管控下交易唔同嘅通用貨幣（港紙、美金同日圓呀噉）而形成嘅市場。外匯市場當中嘅買家同賣家有得彼此之間買賣呢啲唔同嘅貨幣，甚至出現投機嘅行為，而佢哋嘅呢啲行為會影響市場上每隻貨幣嘅需求同供應，從而左右唔同貨幣之間嘅匯率[1][2]。

買賣外匯（forex / FX）可以係一種好好搵嘅投資。舉個簡單例子：想像家陣有個住喺日本嘅人手上揸住啲日圓，佢睇到而家呢刻日圓同美金之間嘅匯率係 $1/114－意思係指每 1 文美金值 114 円日圓；而佢（可能因為美國經濟好景等嘅原因）預美金嚟緊會升值，於是

  • 佢使 5,000,000 円嚟買美金，買到 43859.65 文咁多美金；
  • 喺跟住落嚟嗰幾個月，美金真係一如佢所料噉升值，最後日圓同美金之間個匯率變咗做 $1/120（美金貴咗）；然後
  • 佢就將手上啲美金轉返做日圓，買到 43859.65 × 120 = 5,263,158 円咁多日圓，最後賺咗 5,263,158 - 5,000,000 = 263,158 円咁多日圓[3]。

到咗廿一世紀初，外匯市場因為流通度高呢類嘅原因而成為咗一種極受歡迎嘅長遠投資，好多人都會將自己啲儲蓄定時定候噉攞嚟轉做第啲貨幣，諗住靠長時間噉做呢啲嘢嚟慢慢將自己嚿儲蓄轆到愈嚟愈大[2][4]，而外匯亦都成為咗最受歡迎嘅金融工具之一[5]。

基本諗頭

[編輯]
2010 年有幾隻唔同嘅通貨嘅銀紙；佢哋之間會有若干匯率。
内文：錢同通貨
睇埋：投資同金融工具

外匯市場係買賣通貨而形成嘅市場[6][7][8]：

  • 喺廿一世紀初，是但攞個經濟體嚟睇，個經濟體都會有佢哋用嘅通貨，指可以喺嗰個經濟體入面攞嚟做買賣嘅媒介，例如喺 2020 年嘅香港，法定貨幣係港紙，一個人揸住港紙可以喺香港買嘢，但一個手上淨係揸住（例如）美金或者日圓嘅人就冇得喺香港直接買嘢，一定要將自己手上啲美金或者日圓轉做港紙先至得；
  • 匯率[英 1]就係指兩隻唔同通貨之間兌換嘅比例－舉個例說明，喺一個時間點，美金（USD）同港紙（HKD）之間嘅匯率係 0.13 兌 1，或者可以講做「大約 7.69 HKD 兌 1 USD」，意思係每 0.13 個單位嘅美金值 1 個單位咁多港紙，所以正常嚟講，攞住 100 文港紙去換美金嘅話會換到大約 13 文美金返嚟；
  • 世界各地嘅人喺去旅行或者做國際買賣嗰陣，都梗要將自己手上啲錢轉換做外幣，例如家陣有個人要去日本旅行，就要買啲日圓返嚟，用日圓喺日本國內消費；噉即係話响是但一個時間點，一隻通貨都會有一定嘅需求（可以睇返供應同需求），而且呢股需求有可能會隨時間上落－每隻通貨「值幾多外幣」呢樣嘢有可能隨時間上落；
  • 而噉亦都表示，買賣唔同通貨係有可能圖利嘅－想像家陣有個人揸住 5,000,000 円日圓，佢將手上啲日圓冚唪唥轉嗮做美金，買到 43859.65 文美金，一個月之後美金（相對日圓）價值升嘅話，個人攞返嗰筆美金嚟買日圓就實會買到超過 5,000,000 円日圓，所以就有賺。

响現實世界，好多人都鍾意留意住世界各大通貨啲匯率嘅走勢，定時定候將自己手上嘅儲蓄轉做（佢哋預跟住會升值嘅）通貨，靠重複噉樣做呢啲嘢嚟將自己嚿儲蓄慢慢轆到愈嚟愈大[2][9]。事實係國際結算銀行（BIS）喺 2019 年 4 月發佈嘅數據顯示，外匯市場每日嘅交易量總共值成 6.6 萬億美金咁多－超過嗮第啲金融工具[5]。

郁手買賣

[編輯]
内文：現貨外匯同外匯期貨
睇埋：波動性

投資者可以用多種方法買賣外匯。

  • 現貨[英 2]可以話係最直接嗰種 forex 買賣方法：喺呢種 forex 交易當中，買賣雙方要決定好個價，而個價通常會係睇佢哋交易嗰陣嘅市場價值嚟定嘅；講掂數之後佢哋就會郁手買賣，雙方都會喺一至兩日（講緊工作日）之內收到自己要收嗰筆錢（買家收到佢買嗰筆外匯，賣家收到買家畀嘅錢）－至於「買賣現貨 forex 會喺一日定兩日之內交收」，就視乎通貨而定。現貨係咁多種 forex 買賣方法之中最快搞掂嘅[10]。
  • 買賣 forex 亦都可以用間接啲嘅做法：例如外匯期貨都唔少人用。外匯期貨顧名思義係指用期貨嘅方式買賣 forex，雙方講定買賣價，然後喺若干時間（例如 3 個月）之後交收。

喺廿一世紀初，市面上仲有埋流動應用程式專畀人用嚟買賣 forex [11]。

通貨對

[編輯]
内文：通貨對
睇埋：ISO 4217

啲人買賣 forex 嗰陣，好興將啲 forex 表示做通貨對[英 3]：一對通貨對會有兩隻通貨，通貨嘅名會用 ISO 4217 嚟表示－例如喺 ISO 4217 裏面歐羅叫 EUR 而美金就叫 USD，啲人想表達「一文歐羅值幾多文美金」嗰時，就會寫成好似以下噉嘅樣：

EUR/USD 1.2500

上述呢行符號，意思係話「每一個單位歐羅（基通貨[英 4]）值 1.2500 個單位咁多嘅美金（相對通貨[英 5]）」。將 EUR 同 USD 換做第啲通貨，上述嘅表示方法都一樣行得通：

USD/EUR 0.9659－「每一個單位美金值 0.9659 個單位咁多嘅歐羅。」
USD/JPY 134.8020－「每一個單位美金值 134.8020 個單位咁多嘅日圓（ISO 4217：JPY）。」
GBP/USD 1.2433－「每一個單位英鎊（ISO 4217：GBP）值 1.2433 個單位咁多嘅美金。」

... 如此類推。

匯率概念

[編輯]
2018 年日本一地一間買賣外幣嘅舖頭
内文：匯率
睇埋：宏觀經濟學同實際同名目價值

兩隻通貨（例如日圓同港紙）之間嘅匯率反映咗嗰兩隻通貨喺嗰一刻時間嘅相對價值，受到供應同需求左右。因為供應同需求會隨時間而變化，所以匯率梗會週期性係噉上上落落。一般嚟講，經濟學同金融學領域嘅工作者最常分析同研究嘅「影響匯率嘅因素」有以下呢啲[註 1]：

以下正號（+）表示嗰個因素同一隻通貨嘅價值成正關係，而負號（-）表示嗰個因素同一隻通貨嘅價值成負關係。睇埋統計相關嘅概念。

  • 經濟增長（+）：一般認為，如果一個經濟體經濟好景－GDP 持續噉升、失業率低、啲人正常噉使錢，噉嗰個經濟體嘅通貨價值就會升；噉係因為一個經濟體健康，外地人就會肯去嗰度投資，就自然多咗人想要嗰個經濟體隻通貨，需求升價值就會跟住升。
  • 通脹（-）：一般嚟講，如果一個地區通脹率低，噉嗰個地區嘅通貨價值就會升（用嗰隻通貨會換到更加多嘅外幣），而相對嚟講，如果一個地區通脹率高，噉嗰個地區嘅通貨價值就會跌；噉係因為通脹會影響一隻通貨幾有實際價值－想像一個地區嘅通貨 A；如果 A 地區通脹勁，就表示一個人攞住通貨 A 買到嘅貨品服務嘅量會少咗，而假設第啲通貨嘅通脹情況不變，就表示 A 嘅實際價值（買到幾多貨品服務）相對嚟講低咗[12]。
  • 利率（+）：利率會影響啲人投資嘅意慾－如果一個經濟體利率升，噉即係話啲人喺呢度借錢俾人可以賺到嘅利息就會多咗，（最少喺短期內）好多時會因而吸引外地嘅投資者將自己啲錢攞嚟個經濟體度借錢俾人，多咗人想買個經濟體隻通貨就表示對隻通貨嘅需求升咗，隻通貨嘅價值就會升。值得一提嘅係，利率係一樣中央銀行能夠直接控制嘅嘢，所以成日俾人攞嚟做調控匯率嘅一種手法[13]。
  • 經常收支[英 6]：經常收支係指一個經濟體同佢啲貿易夥伴之間嘅貿易平衡，反映一個經濟體同貿易夥伴之間喺貨同服務上嘅交流；如果有個經濟體嘅經常收支出現咗赤字，就表示佢喺對外貿易當中使嘅多過賺返嚟嘅，而且要由外地借資本嚟應付呢啲赤字；噉亦都表示，呢個經濟體需要大量外幣（買進口嘢），而且需要嘅量大過佢靠出口賺到嘅，同時佢又實係有向外地供應自己嘅貨幣（買進口嘢），而且呢股供應大過貿易夥伴由佢度買嘢引起嘅需求－個經濟體嘅貨幣供過於求，而佢啲貿易夥伴嘅貨幣供不應求，會令個經濟體嘅貨幣價值下降[14]。
  • 打仗（-）：正常嚟講，打仗等政治上嘅不穩會搞到一隻通貨嘅價值跌；如果一笪地方出現打仗等嘅大型衝突，實會搞到啲人冇咁想去嗰度做生意或者旅行－少咗人去笪地方做生意或者旅行，就表示少咗人會想用笪地方嘅通貨，而需求跌價值就會跟住跌[15]。

... 呀噉。

常用外匯

[編輯]

喺廿一世紀初，多人買賣嘅通貨有以下呢啲：

... 呀噉。

睇埋

[編輯]

註釋

[編輯]
  1. ↑ 是但攞一個因素嚟睇，都有經濟學家主張嗰個因素喺某啲情況下會同通貨價值成唔合乎預期嘅關係。

詞表

[編輯]

文中用咗嘅詞彙嘅英文版：

  1. ↑ exchange rate
  2. ↑ spot
  3. ↑ pair
  4. ↑ base
  5. ↑ counter / quote
  6. ↑ current account

引咗

[編輯]
  1. ↑ Frankel, J. A., & Froot, K. A. (1990). Chartists, fundamentalists, and trading in the foreign exchange market. The American Economic Review, 80(2), 181-185.
  2. ↑ 2.0 2.1 2.2 Baillie, R. T., & McMahon, P. C. (1990). The foreign exchange market: Theory and econometric evidence. Cambridge University Press.
  3. ↑ How Do You Make Money Trading Currencies?.
  4. ↑ Mancini, L., Ranaldo, A., & Wrampelmeyer, J. (2013). Liquidity in the foreign exchange market: Measurement, commonality, and risk premiums. The Journal of Finance, 68(5), 1805-1841.
  5. ↑ 5.0 5.1 Foreign exchange turnover in April 2019. BIS.
  6. ↑ Dornbusch, R. (1976). Expectations and exchange rate dynamics. Journal of political Economy, 84(6), 1161-1176.
  7. ↑ Eichengreen, B. (2007). The real exchange rate and economic growth. Social and Economic Studies, 7-20.
  8. ↑ Sweeney, R. J. (1986). Beating the foreign exchange market. The Journal of Finance, 41(1), 163-182.
  9. ↑ Jorion, P. (1995). Predicting volatility in the foreign exchange market (PDF). The Journal of Finance, 50(2), 507-528.
  10. ↑ Triennial Central Bank Survey of Foreign Exchange and Derivatives Market Activity in 2010 (PDF). Bank for International Settlements.
  11. ↑ Best Forex Trading Apps for 2023. Forexbrokers.com.
  12. ↑ Exchange Rates and the Australian Economy.
  13. ↑ Domestic Interest Rates Have Inverse Relationship With Currency Demand In Long Run. Business Standard.
  14. ↑ Ghosh, Atish; Ramakrishnan, Uma (28 March 2012). "Current Account Deficits: Is There a Problem?". International Monetary Fund. Retrieved 24 December 2015.
  15. ↑ Clare, G., & Gang, I. N. (2010). Exchange rate and political risks, again. Emerging Markets Finance and Trade, 46(3), 46-58.

拎

[編輯]
維基同享有多媒體嘅嘢：
Forex 市場
由「https://zh-yue.wikipedia.org/w/index.php?title=外匯市場&oldid=2171495」收