匯率

幾種唔同嘅通貨；佢哋之間會有若干匯率。

匯率（粵拼：wui6 leot2；英文：exchange rate）喺經濟學同金融學上定義係指兩種通貨（currency）之間兌換嘅比例。舉個例說明，喺一個時間點，美元同港紙之間嘅匯率係 0.13 兌 1（或者可以講做「大約 7.69 港紙兌 1 美元」），意思係 0.13 個單位嘅美元價值相當於 1 個單位嘅港紙，所以正常嚟講，攞住 100 文港紙去換美元嘅話會換到 13 文美元。

喺廿一世紀，世界各地嘅通貨－包括港紙、人民幣、日圓、美元、同歐羅等等－彼此之間都有持續上落嘅匯率，對世界各地嘅經濟活動以至地區之間嘅交易有深遠影響。

因素

睇埋：外匯市場同外匯儲備

匯率可以由好多因素話事：喺外匯市場（forex）當中，世界各地嘅人會一日廿四小時係噉彼此之間買賣各種通貨－最簡單嘅例子可以係啲人預期歐洲經濟會唔掂，歐羅價值會跌，於是就快手賣咗手上啲歐羅佢；因為噉，對每種通貨嘅供應同需求會不繼有唔同幅度嘅上落，而由於匯率反映咗每種通貨嘅價值，所以匯率都會不繼噉有唔同幅度嘅上落。

此外，唔同經濟體嘅政府又會為咗確保自己經濟發展而制定一啲外匯嘅相關政策，左右匯率嘅變動，例如係香港聯繫匯率制度噉，就係一個令港紙同美元之間有固定匯率嘅制度。

• 經濟增長（+）：一般認為，如果一個經濟體經濟好景－GDP 持續噉升、失業率低、啲人正常噉使錢，噉嗰個經濟體嘅通貨價值就會升；噉係因為一個經濟體健康，外地人就會肯去嗰度投資，就自然多咗人想要嗰個經濟體隻通貨，需求升價值就會跟住升。
• 通脹（-）：一般嚟講，如果一個地區通脹率低，噉嗰個地區嘅通貨價值就會升（用嗰隻通貨會換到更加多嘅外幣），而相對嚟講，如果一個地區通脹率高，噉嗰個地區嘅通貨價值就會跌；噉係因為通脹會影響一隻通貨幾有實際價值－想像一個地區嘅通貨 A；如果 A 地區通脹勁，就表示一個人攞住通貨 A 買到嘅貨品服務嘅量會少咗，而假設第啲通貨嘅通脹情況不變，就表示 A 嘅實際價值（買到幾多貨品服務）相對嚟講低咗。
• 利率（interest rate；+）：利率會影響啲人投資嘅意慾－如果一個經濟體利率升，噉即係話啲人喺呢度借錢俾人可以賺到嘅利息就會多咗，（最少喺短期內）好多時會因而吸引外地嘅投資者將自己啲錢攞嚟個經濟體度借錢俾人，多咗人想買個經濟體隻通貨就表示對隻通貨嘅需求升咗，隻通貨嘅價值就會升。值得一提嘅係，利率係一樣中央銀行能夠直接控制嘅嘢，所以成日俾人攞嚟做調控匯率嘅一種手法。
• 經常收支（current account）：經常收支係指一個經濟體同佢啲貿易夥伴之間嘅貿易平衡，反映一個經濟體同貿易夥伴之間喺貨同服務上嘅交流；如果有個經濟體嘅經常收支出現咗赤字，就表示佢喺對外貿易當中使嘅多過賺返嚟嘅，而且要由外地借資本嚟應付呢啲赤字；噉亦都表示，呢個經濟體需要大量外幣（買進口嘢），而且需要嘅量大過佢靠出口賺到嘅，同時佢又實係有向外地供應自己嘅貨幣（買進口嘢），而且呢股供應大過貿易夥伴由佢度買嘢引起嘅需求－個經濟體嘅貨幣供過於求，而佢啲貿易夥伴嘅貨幣供不應求，會令個經濟體嘅貨幣價值下降。

睇埋

• 錢
• 通貨
• 外匯
• 套息交易
• 黑色星期三
• 錢幣兌換店

參考

• Hinkle, L. E., & Monteil, P. J. (1999). Exchange rate misalignment: Concepts and measurement for developing countries. Oxford University Press.
• MacDonald, R., & Taylor, M. P. (1992). Exchange rate economics: a survey. Staff Papers, 39(1), 1-57.

拎

• Money Magazine.