惡龍

2021 年盧布爾雅那嘅一座雕像；座雕像描繪咗隻典型嘅惡龍。

惡龍（粵拼：ok3 lung4），又有叫西方龍或者歐洲龍，英文叫 dragon，係歐洲啲神話同民間傳說入面嘅一種動物，由北歐至意大利至東歐... 等多地，都有傳說提起惡龍。

一隻典型嘅惡龍形象如下：

• 凶邪：新約聖經《啟示錄》據講有提到撒旦變身做隻 drákon（有人將呢隻字理解做龍噉解）；基督教對歐美影響咁深遠，歐美人自然興將龍描繪成邪惡嘅，例如喺歐美地區傳統嘅故仔當中，成日都會有「惡龍捉走咗公主，英勇嘅騎士殺龍同救返公主」（公主同龍）噉嘅橋段。
• 身形：惡龍通常身形強壯，有四肢同一條粗壯嘅尾，而且有翼識飛，啲翼好多時望落似蝙蝠嘅翼－突顯佢哋邪惡；
• 力量：惡龍通常擁有強大嘅魔法力量，多數識噴火；現代奇幻作品仲會講惡龍噴第啲危險嘢－例如冰雪或者閃電呀噉；

早喺古希臘同古羅馬嗰陣，歐洲已經有關於惡龍嘅傳說，類似嘅傳說喺打後嘅中世紀都仲有周圍流傳。去到廿世紀中後期，惡龍成為咗西方奇幻故仔嘅常用橋段，有唔少出名嘅西方媒體作品都有提到惡龍－例子可以睇吓《冰與火之歌》同《哈利波特》等嘅奇幻文學，或者 2010 年嘅夢工場動畫片《馴龍記》呀噉；同時唔少東方作品都有用惡龍嘅形象－例子有《寵物小精靈》同埋《艾爾登法環》... 呀噉。

篇文跟住落嚟嘅部份，除非另外講明，否則龍呢隻字預設咗係指緊西方龍。

上古傳說

呢幅畫描繪畫家心目中上帝誅殺海中魔獸 leviathan 嘅情景。

睇埋：希臘神話、啟示錄、聖經海怪同九頭蛇

好似龍噉嘅橋段可以追溯到公元前咁耐：例如

• 舊約聖經嘅《詩篇》就有提到一隻叫 leviathan（粵拼：let6 waai1 aa4 fan4；可以譯做海怪）嘅怪獸；《詩篇》估計源自起碼 5 世紀 BC 甚至更耐之前，根據呢份文獻嘅描述，聖經海怪形態上係一隻身形長、有翼嘅大海蛇，體形非常巨大，起碼有成幾架大型船咁長（有傳說仲話佢嘅身體長到能夠圍繞成個世界），而且佢仲好似現代嘅龍形象噉曉噴火；
• 及後新約聖經最後一部嘅《啟示錄》（公元 1 世紀尾）入面，就有提到撒旦－基督教信仰裏面邪惡嘅代表－以 δράκων（羅馬字係 drákon）噉嘅形態出現。

好似上述呢啲文獻都表示，早喺公元 1 世紀嗰陣，歐洲同近東嗰頭經已有傳說描述體形巨大、有翼、識噴火、邪惡嘅爬蟲類傳說生物－呢啲特徵都同現代嘅龍形象非常相似。

喺意大利南部搵到嘅一件鑲嵌藝術； 呢件作品估計可以追溯到 200 年 BC 咁久遠。 喺意大利南部搵到嘅一件鑲嵌藝術； 呢件作品估計可以追溯到 200 年 BC 咁久遠。

Info：希臘神話入面嘅九頭蛇

19 世紀一幅油畫，描繪畫家想像中「海格力斯同九頭蛇戰鬥」嘅情境。

希臘神話入面都有提到類似龍噉嘅怪獸，例如《海格力斯嘅勞動》就有講到希臘神話著名英雄海格力斯誅殺九頭蛇。

個故仔係噉嘅：

海格力斯係一個半神，佢阿媽係個人類，而佢阿爸就係身為眾神之王嘅宙斯。海格力斯血統上一半係天神所以有超人力量，佢足智多謀又力大無窮，做出咗好多英勇事跡，係廣受全希臘敬重嘅英雄。不過始終佢係宙斯嘅私生子，所以天界女王希拉（宙斯個正室老婆，同時亦係掌管結婚同生育嘅天神）不嬲都好憎佢，好想搵方法整死佢。有一日，希拉對海格力斯落咒，搞到海格力斯發癲攻擊身邊嘅人，仲喺發癲途中殺死自己老婆同仔女。悲痛嘅海格力斯向太陽神阿波羅祈禱，想搵方法贖罪。阿波羅聽到佢嘅祈禱，就叫佢去做邁錫尼國王嘅僕人做 10 年。

海格力斯喺邁錫尼國王手下做嘢期間，曾經畀國王派去做 12 單好危險嘅工作，而呢連串事跡就係希臘神話當中好出名嘅《海格力斯嘅勞動》。响第二單勞動當中，海格力斯畀國王派去誅殺九頭蛇－條蛇查實係希拉暗中養出嚟嘅，希拉噉做係想用條蛇嚟殺死海格力斯。

九頭蛇蛇如其名有九個頭。佢住喺一個大沼澤裏面，沼澤入面彌漫住毒霧，海格力斯搵塊布揞住自己口鼻行入沼澤，同九頭蛇戰鬥。

海格力斯話咁快就發現，一般嘅攻擊對九頭蛇完全冇效：每當佢將九頭蛇嘅其中一個頭斬落嚟嗰陣，條蛇會由個傷口度即刻生個新嘅頭出嚟，噉無論海格力斯點樣斬條蛇嘅頭，條蛇都唔會死；海格力斯大聲叫佢個侄仔伊奧勞斯嚟幫手，伊奧勞斯諗到條計仔，提議每次斬條蛇嘅頭嗰時都用火燒條蛇嘅傷口；然後兩個人就一齊合作行動，海格力斯一路斬條蛇嘅頭，而伊奧勞斯就一路攞住火把，用火辣海格力斯斬蛇頭造成嘅傷口；結果伊奧勞斯條橋真係掂，條九頭蛇變到愈嚟愈虛弱，最後海格力斯攞住雅典娜（掌管打仗同智慧嘅女神）賜畀佢嘅神劍，將九頭蛇最後嗰個頭一嘢斬落嚟，成功誅殺九頭蛇。

仲有版本話，希拉事後好嬲，將九頭蛇條屍收埋咗喺天界一間暗室度，而條屍最後變咗做長蛇座。

好似九頭蛇噉嘅故仔，响打後嘅西方文化入面成日都見到。例如屠龍者就係西方奇幻故仔同民間傳說好興用嘅橋段，故仔往往係講一位英雄殺死龍（好似海格力斯殺九頭蛇噉），而且英雄好多時仲會喺殺龍嗰陣拯救畀惡龍脅持嘅公主。

中古傳說

13 世紀一本書入面有幅插圖，幅圖描繪畫畫人心目中嘅惡龍

睇埋：公主同龍、梅林 (魔法師)、歪焚同紋章

中世紀（大約 5 至 15 世紀期間）嘅歐洲慢慢噉基督教化。呢個時期嘅歐洲人開始唔再接觸古希臘同古羅馬嘅文獻。有學者指出，龍嘅形象就係喺呢個時期開始變到比較似現代描述嘅噉，仲出咗唔少出名嘅故仔。包括：

• 《黃金傳說》：《黃金傳說》呢本書源自 13 世紀，記錄咗一拃有關基督教聖人嘅事蹟；呢本書有講到童貞瑪加利大呢個聖人－據講童貞瑪加利大生於 4 世紀初，佢因為唔肯放棄佢嘅基督教信仰而畀屋企人遂出家門，仲畀（當時成日迫害基督徒嘅）羅馬人酷刑對待同處死，佢對基督信仰嘅忠誠令基督教會後嚟封佢做聖人；根據《黃金傳說》裏面嘅傳說，迫害瑪加利大嘅人將佢韞咗喺監牢入面，佢喺監房裏面遇到隻邪惡嘅龍，正當隻龍要攻擊瑪加利大之際，瑪加利大郁手做十字聖號，佢嘅信仰嘅力量令到隻龍即刻消失咗。
• 《卑奧胡夫》：《卑奧胡夫》係一首好出名嘅古英文史詩，估計源於 10 世紀左右；《卑奧胡夫》故仔最後一章講到主角卑奧胡夫成為咗國王，佢嘅統治帶嚟咗 50 年咁耐嘅和平，不過有日，佢族人當中有個奴隸由隻惡龍嘅竇度偷走咗一隻用金造嘅杯，隻惡龍好嬲，仲由佢個竇度行出嚟周圍噴火，將佢經過嘅地方嘅一切冚唪唥燒成灰；身為國王嘅卑奧胡夫帶住佢手下嘅戰士到場，經過一輪戰鬥，卑奧胡夫同佢嘅手下成功打低隻惡龍，但卑奧胡夫喺戰鬥途中畀惡龍咬中中毒身亡；故仔最後就講卑奧胡夫啲族人厚葬卑奧胡夫，仲喺海邊起咗座墳塚嚟紀念佢。

...呀噉。由呢啲故仔睇得出，中世紀嗰陣歐洲人心目中嘅龍，已經同現代嘅好相似－龍嘅形象可以隨地區同個別傳說而有異，不過大致上都係會噴火同邪惡嘅生物，形象上似一隻隻有翼嘅大蜥蜴或者大蛇。

聖佐治同龍

内文：聖佐治同龍

《聖佐治同龍》係中世紀一個好出名嘅有關龍嘅故仔，估計最早喺 6 世紀已經存在。個故仔以聖佐治做主角－相傳聖佐治係 3 世紀嗰陣羅馬帝國嘅一個士兵，佢因為唔肯放棄自己嘅基督教信仰而畀羅馬人處死，而佢嘅殉道令佢畀打後嘅基督徒封做聖人，而且佢仲係英格蘭嘅主保聖人。

根據《聖佐治同龍》呢個傳說，當時喺利比亞有座城市受惡龍侵擾；隻惡龍日日都由城市度捉羊嚟食，而等到成座城啲羊都畀佢食嗮嗰陣，隻惡龍就開始食人，座城市嘅市民每日都焗住要犧牲一個生勾勾嘅人畀隻龍做祭品；佢哋有埋套制度，每日都會有方法揀個人做祭品；有一日，城主個女被揀中咗做祭品，聖佐治睇唔過眼，就用佢嘅騎矛殺死惡龍；城主好感激，跟住就攞嗮一大拃金銀珠寶出嚟，想用呢啲金銀珠寶做禮物報答聖佐治；不過聖佐治拒絕，而且仲郁手將啲金銀珠寶送嗮畀城上面嘅窮人。

傳說仲話，啲人見到聖佐治咁勁品德又咁好，就冚唪唥都受洗同改信基督教。

15 世紀中嘅一幅油畫；幅畫描繪想像中騎住白馬嘅聖佐治（右邊）用騎矛殺死惡龍（左邊嗰隻怪獸）。

廿世紀嘅描述

1905 年一幅畫，描繪英勇嘅騎士同一隻受女巫控制嘅惡龍戰鬥。

内文：奇幻

睇埋：檯上 RPG同電子 RPG

龍嘅形象，到咗廿一世紀初都仲廣泛流傳。2022 年嘅不列顛百科全書係噉樣描述 dragon 呢隻字嘅：

「

粵文翻譯：龍，喺好多唔同文化嘅神話、傳說同埋民間故仔入面，一種大隻、好似蜥蜴或者大海蛇噉嘅生物，... 喺中世紀歐洲，龍通常畀人描繪成有翼、條尾有尖刺同埋識得噴火。

」

响廿一世紀，龍係奇幻成日用嘅橋kiu2，由文學至電影至視像遊戲，都有用到龍呢條橋，而喺視像遊戲當中，龍往往係強大嘅敵人，一出場就係大佬級嘅角色。現代奇幻當中嘅龍傾向有以下呢啲特徵：

	西方龍	東方龍
體形	望落似大隻強壯而且有翼識飛嘅蜥蜴，啲翼通常似蝙蝠嘅翼。	好似蛇噉長形，唔完全似爬蟲類（例如會有類似鬍鬚噉嘅毛髮），識飛但通常冇翼。
角同刺	身體尖銳－有尖銳嘅牙，條尾又粗壯又好多時有尖刺，頭頂仲會有對角。	有好似鹿噉嘅角。
力量	有強大嘅魔法力量，識噴火，或者會噴第啲危險嘢（噴冰雪或者噴閃電等都有）。	零舍好水，例子可以睇吓海龍王。
居住地	會住喺一啲危險嘅地方（例如火山），好多時仲會守住笪地方收埋嘅寶藏。	住喺海底嘅宮殿（睇埋龍宮嘅概念）。
智能	會有咁上下智能，可能醒過人類好多，或者至少有好似捕食者噉嘅狡詐。	非常聰明，有時仲會教導人類。

除此之外，同東方龍明顯有異嘅係，西方龍通常都會係奸角：佢哋會由人類度偷同搶金銀珠寶，仲會喺自己竇度囤積呢啲嘢，所以主角打低龍會得到龐大嘅犒賞；另一種常見嘅情節係西方龍捉走公主，所以英雄要打低惡龍拯救公主，常見到畀廿一世紀初嘅人覺得係陳腔濫調... 呀噉。

歐美作品

睇埋：龍與地下城

• 《哈比人歷險記》同《精靈寶鑽》等嘅中土世界相關小說作品
• 《龍與地下城》：係最出名嘅檯上 RPG，淨係個名已經有龍喺入面；下圖係《龍與地下城》裏面嘅龍嘅形象－

• 《魔法風雲會》：係集換式咭遊戲元祖，用咗奇幻美學，啲咭（尤其係紅色嗰啲咭）成日都提到龍。
• 《冰與火之歌》：係由著名美國作家佐治·R·R·馬田寫嘅一系列古典奇幻小說；龍响小說嘅情節當中扮演咗重要角色，情節亦有講到人類角色畀龍噴嘅火監生燒死。
• 《哈利波特》，尤其係可以睇吓《怪獸同佢哋嘅產地》
• 《寶貝龍 Spyro the Dragon》：係源自美國嘅平台遊戲系列，主角 Spyro 係一隻紫色嘅龍仔，有翼識噴火；順帶一提，《Spyro》係最出名嘅搜集拉松作品之一。
• 《史力加》（2001 年電影）：呢套戲被指係惡搞緊「英雄殺龍同拯救公主」呢條橋段。
• 《魔獸世界》：係最成功嘅 MMORPG 之一，有以惡龍做大佬級嘅角色。
• 《闇龍紀元》：奇幻動作 RPG；喺呢個系列嘅遊戲裏面，惡龍成日都扮演極難打嘅大佬。
• 《馴龍記》（夢工場動畫電影）：成套戲都係圍繞住龍同維京人，當中第一集嘅情節就係講主角點樣馴服龍同埋學識騎龍。

呢幅圖畫描繪著名奇幻檯上 RPG《D&D》裏面嘅多頭龍嘅形象。喺廿一世紀初嘅奇幻當中，多頭龍成日畀人當係惡龍一種：現代奇幻作品裏面嗰啲多頭龍傾向
1) 有好多個頭，但唔一定係 9 個，上圖嗰隻 hydra 有 6 個頭；
2) 有極強嘅重生能力，斬咗佢一個頭落嚟佢會好快生個新嘅頭出嚟；
3) 可以有腳，即係身體唔成蛇噉形。
－點 1 同點 3 同希臘神話入面嗰隻多頭龍有明顯差異。噉嘅現代多頭龍被指望落比較似「冇翼但有好多個頭」嘅惡龍。

日本作品

• 《超級瑪利奧系列》：呢個系列裏面嘅角色 Bowser（粵拼：baau1 saa4）被指雖然個樣望落似隻好大嘅陸龜，但又有啲似龍－Bowser 邪惡、識噴火而且成日捉走公主，要主角英雄救美。
• 《勇者鬥惡龍系列》
• 《最終幻想系列》：呢個系列入面嘅巴哈密龍王個樣似十足典型嘅龍。
• 《寵物小精靈》當中有好多種精靈嘅設計都係基於龍嘅，例子可以睇吓
  • No. 006 噴火龍、
  • No. 149 啟暴龍同埋
  • No. 635 三頭惡龍... 等等。
• 《遊戲王》
• 魂系遊戲：多隻魂系遊戲都有用龍做大佬級嘅敵人，例如 2022 年魂系名作《艾爾登法環》就有喺遊戲個開放世界裏面周圍放咗多隻惡龍做（可以揀唔打嘅）大佬。
• 《OVERLORD》

順帶一提，廿一世紀嘅日文當中有兩隻唔同嘅字指龍－doragon 同 ryuu ：

1. Doragon 係隻來自英文嘅借詞，會好似典型嘅英文借詞噉用片假名寫，寫做ドラゴン，日本人通常會攞呢隻字嚟指西方龍。
2. Ryuu / tatsu 係隻好古老嘅字，會用平假名或者漢字嚟寫，寫做りゅう / たつ（平假名）或者竜（漢字），日本人通常會攞呢隻字嚟指東方龍。

－用兩隻唔同嘅字，好清楚噉分到兩種唔同嘅龍。

1806 年一幅插圖；幅插圖出自德國一本講神話嘅書，描繪畫畫人想像中嘅惡龍。

睇埋

1911 年瑞典一幅插圖，描繪畫畫人想像中嘅連蟲（左邊條大蛇）。

• Wyvern（粵拼：waai1 fan4）：歐洲一種傳說生物，個樣似惡龍，不過得兩隻腳同兩隻翼，唔似得惡龍噉傳統上有 4 隻腳同兩隻翼；响現代嘅奇幻故仔當中，waai1 fan4 往往畀人描繪成係低惡龍一等嘅－冇惡龍咁大隻，力量冇咁強，而且智能亦冇咁高。
• 連蟲：北歐同中歐一種傳說生物，有陣時畀人當做惡龍一種，相傳呢種怪獸住喺森林裏面，形狀似一條好巨型嘅蛇；佢哋未必係邪惡嘅，良善嘅連蟲可能只係畀魔法變咗做怪獸嘅王子（睇埋青蛙王子嘅故事），但邪惡嗰啲連蟲會攻擊人同食人。
• 騎士：喺傳統啲嘅故仔入面，負責打低惡龍拯救公主嘅人，好多時就係「著住閃呤呤盔kwai1甲嘅騎士」。
• 蜻蜓：蜻蜓响英文入面個名叫 dragonfly，當中嘅 dragon 就係指緊惡龍。
• 東方龍
• 大海蛇
• 小妖精
• Yggdrasil
• 科莫多龍

文獻

• Barber, Elizabeth Wayland, and Paul T. Barber. "Fire-Breathing Dragons." In When They Severed Earth from Sky: How the Human Mind Shapes Myth, 231-44. Princeton; Oxford: Princeton University Press, 2004.
• Malone, Michael S. The Guardian of All Things: The Epic Story of Human Memory. New York City, New York: St. Martin's Press, 2012.
• Stein, Ruth M. "The Changing Styles in Dragons - from Fáfnir to Smaug." Elementary English, 45, no. 2 (1968): 179-89.

拎

• 「我哋啲龍唔同㗎」 （英文），TV Tropes 呢頁有講到西方龍同東方龍嘅對比，仲有講埋現代奇幻作品裏面對龍嘅分類。除此之外，TV Tropes 仲有好多個網頁專講龍相關嘅橋段：（英文）
  • 「我哋啲 wyvern 唔同㗎」
  • 「我哋啲多頭龍唔同㗎」
  • 好似貓噉嘅龍
  • 樣似龍嘅惡物
  • 死靈龍
  • 人龍體
  • 細到企到喺人膊頭上嘅龍
  • 「我哋啲龍唔同㗎」 / 日本動漫，呢頁講日本動漫入面嘅龍形象。
• Theoi Project website: Dragons of Ancient Greek Mythology （英文），講希臘神話裏面嘅龍。
• The History of Europe's Medieval Dragons and Times （英文），講中世紀歐洲龍傳說嘅歷史。