MDA 框架

藍色嗰個係遊戲設計師，綠色嗰個係玩家；設計師最先睇到嘅係機制，而玩家最先睇到嘅係美學。

MDA 框架（粵拼：em1 di1 ei1 kwaang1 gaa2；英文：MDA framework）係遊戲設計上成日用嘅一套理論框架。根據 MDA 框架，一隻遊戲－無論係圖版遊戲、紙牌遊戲定電子遊戲都好－有三大組成部份：

1. 機制（Mechanics）、
2. 動態（Dynamics）、同
3. 美學（Aesthetics）。

呢三個部份會不斷互動：機制加埋玩家行為引致動態，而動態決定美學（玩家嘅情緒體驗）。

MDA 定義

睇埋：遊戲

MDA 框架對呢三個組成部份都有精確嘅定義：

1. 機制指隻遊戲嘅基本部份，包括規則、玩家可以揀選嘅行動、隻遊戲用咗嘅演算法、以及遊戲程式嘅數據結構，等等；機制係最硬性、最完全受設計師控制嘅嘢，而且好多時淨係隻遊戲嘅設計師先會見到，例如係喺一隻電子遊戲當中，玩家通常唔會睇到隻遊戲用咗乜嘢演算法，除非嗰個玩家好通曉遊戲編程方面嘅知識。
2. 動態指啲機制玩起上嚟會令玩家出現嘅行為，係第一層嘅不確定性：知道咗隻遊戲嘅規則，玩家就會按照佢哋嘅目的（例如想贏）作出決策，而佢哋嘅決策同規則嘅互動所形成嘅狀態就係隻遊戲嘅動態。例：想像家陣有隻新嘅射擊遊戲，有齊一般射擊遊戲有嘅規則－「每個玩家有個生命值」、「俾敵人射中會扣生命值」、「生命值變 0 就會輸」等等，但仲外加咗一條特殊規則：每個玩家要定時定候離開自己身處嘅地點，而如果一個玩家留喺同一個地點耐過 30 秒，佢嘅生命值會開始下降；有咗呢條規則，玩家就會有誘因定時定候移動，於是就會少咗死守喺同一個地點伏擊敵人－而最後所形成嘅「啲玩家好少可會喺同一個地點伏敵人」呢一個狀態，就係隻遊戲嘅動態嘅一部份（有關動態嘅相關問題，可以睇吓博弈論嘅思考）。
3. 美學指玩家出現嘅情緒反應：包括咗隻遊戲嘅配樂、圖像、故仔、以及係設計師嘗試向玩家呈現嘅一個虛擬世界等等。原則上，呢啲部份唔係必要嘅，但事實證明咗，美學能夠有效提升玩家嘅投入程度，例如某啲電子遊戲當中嘅角色好多時都好有人氣，令到隻遊戲靠佢哋先噉賣座。而且適當嘅美學仲可以幫玩家手記住隻遊戲嘅規則：例如係中國象棋噉，如果中國象棋當中每一隻棋都係用甲乙丙丁戊嚟命名嘅，玩家就要死記住「甲呢隻棋俾對手食咗就即刻輸」嘅規則；相比之下，如果中國象棋用佢現有嘅命名方法，玩家要記嘅就變成「而家打緊仗，將軍俾對手食咗就即刻輸」－後者喺直覺上合理，所以對於玩家嚟講通常會比較容易記憶。

睇埋

• 遊戲設計
• 博弈論
• 決策者

文獻

• Hunicke, R., LeBlanc, M., & Zubek, R. (2004, July). MDA: A formal approach to game design and game research. In Proceedings of the AAAI Workshop on Challenges in Game AI (Vol. 4, No. 1, p. 1722).